MARK 13

Jesu tɔ̧ɔ̧ wen gbina-a ko Tua ko Sɔ̧ a nù

(Zɔk Mt 24.1-2; Lk 21.5-6)

1Hee mɔ'ɔ nɛ̀ Jesu gboo nɛ̀ kɔ̧́ Tua ko Sɔ̧ ga, ŋma ŋgaiwi kɔ̧-a̧ kpɔk tɔ̧ɔ̧ ha̧ a̧: «Wan-usi-mɔ, ɛ̀nɛ̀ zɔ́k gba de ta nɔ'ɔ! Ɛ̀nɛ̀ zɔ́k de mboo tua nɔ'ɔ!» 2Ɓɛɛ Jesu tɔ̧ ha̧ a̧: «O de mboo tua nɔ'ɔ nɛ̀ mɛ zɔk’ɛ, ŋma ta kpɔk beka ɓɔn zu ŋmaa na, o bíí tɛ gbin a nù lɛŋ.»

3Jesu nɛ̀ɛ̀ duk nù zu Kaya Te-nɔ̧́, ɓɛɛ zɔk mɔ sitɛ Tua ko Sɔ̧, ɓɛɛ Pierre, Jak, Jean in Andre nɛ́ si katɛ a̧, ɓɛɛ ak a̧: 4«Ɛ̀nɛ̀ tɔ̧́ ŋgimbi nɛ̀ mɔ‘i tɛ hɔ nɛnɛ h’ɛ́ɛ́. Mɔ nɛ̀ tɛ usi h’ɛ́ɛ́ ndé, mɔ‘i hɛɗa kaɗi nɛ́ ge?»

Ku̧u̧naŋ bɔnɛ

(Zɔk Mt 10.17-22; 24.4-14; Lk 12.11-12; 21.8-19)

5Jesu ku̧u̧ naŋ tɔ̧a̧-a̧ ha̧ wa'e: «Ɛ̀nɛ̀ zɔ́k tɛ‘nɛ́, ká ŋma bíí tɛ̀ɛ́ ɔr'nɛ́. 6Wen o bíí nɛ̀ dɔka-a tɛ́ tɛ nɛ̀ nin-am, tɔ̧ nɛnɛ‘e ndé, wi nɛ́ Krist, ɓɛɛ wa tɛ ɔr bíí nɛ̀ dɔka-a. 7Wese n’ɛnɛ tɛ zii nyɛrɛ biro in o be wen-aa nɛ̀ ti fui, k’ɛ́nɛ́ de kíì na, wen mɔ‘i tɛ hɔ kànà, ɓɛɛ sɔŋkur mɔ bo a̧‘i na. 8O tugun bíí tɛ bi ŋmaa, o wan tɛ bi ŋmaa. Nù tɛ nak dam fara nɛtɛ nɛtɛ, kaɓa tɛ tik nù mbɛt. Ɓɛɛ o mɔɔ nɔ‘i lɛŋ tɛ hɔ ŋmaa in ku̧u̧naŋ nyima-zaŋ-ko-bem.

9«Ɛ̀nɛ̀ zɔ́k tɛ‘nɛ́. O bíí tɛ e'nɛ́ er o wi-gɔn-kita, wa tɛ gusi'nɛ́ sɛn kɔ̧́ tua-mɔi̧a-a, ɛ́nɛ́ tɛ yor ti o wi-duk-zu zika-nù in o wannu wen zu'm; mɔ‘i tɛ duk nɛ́ mɔɔ-sedaako yí wa.#Mt 10.17-20; Lk 12.11-12 10O bíí tɛ tɔ̧ kànà De Mbe Wen ko Sɔ̧ ha̧ tugun bíí lɛŋ nɛti sɛka mɔ‘i hɔa. 11Ŋgimbi nɛ̀ wa tɛ ba'nɛ́ wen mgbɔɔ‘nɛ́ nɛnɛ ti kita, k’ɛ́nɛ́ de kíì wen mɔ n’ɛnɛ tɛ tɔ̧ na, ɓɛɛ ɛ̀nɛ̀ tɔ̧́ nɛ́ mɔ nɛ̀ tɛ gbo nɛ̀ kɔ̧̀ nú‘nɛ́ ŋgimbi'i; wen bó nɛ́ ɛ́nɛ́'ɛ tɛ tɔ̧ wen na, ɓɛɛ nɛ́ Sa̧a̧ Ɔmi a̧ tɛ tɔ̧ tɔ̧a̧-a̧. 12O nya-wi tɛ e ɗɔra tɛ ŋmaa, ha̧ bíí mɛ gbɛ wa yinɛ. Dáa-wan-bem tɛ e ɗɔra tɛ bem kɔ‘i mbɛt. O bem tɛ kur zu dáà kɔ‘i in nàà kɔ‘i de nɛnɛ ha̧ wa mɛ fe. 13Bíí lɛŋ tɛ sɛn'nɛ́ wen zu nin-am, ɓɛɛ wi nɛ̀ tɛ nɔ ŋgiɗi hɔ sɔŋkur-aa tɛ kpasi.#Mt 10.22

Gasa bɔnɛ

(Zɔk Mt 24.15-28; Lk 21.20-24)

14«(Wi-tɔr-wen’ɛ a̧ zíí gba̧a̧-a̧ ŋgaɓo!) Ŋgimbi n’ɛ̀nɛ̀ tɛ zɔk Ndiŋ Wi-ɗaŋ-mɔ hɔɔ sɛn fara n'aa nyɛm so mɛ hɔ na, ŋgimbi'i o wi nɛ̀ tɛ ya sɛn Judee a̧ yú mɔ si zu kaya mɛ.#Dan 9.27; 11.31; 12.11 15Wi nɛ̀ tɛ duk zu tua a̧ ká‘i zir si kɔ̧́ tua mɛ ba ŋma mɔ na;#Lk 17.31 16wi nɛ̀ tɛ duk kpɛɛfɔ a̧ ká‘i si ɗoŋ mɛ ba laa kɔ‘i na! 17O nàá-zaŋ in o nana-oi-kɔra tɛ zɔk bɔnɛ wese'i. 18Ɛ̀nɛ̀ kɔ́fí Sɔ̧ wen ká mɔ‘i tɛ́ɛ̀ hɔ mɛ ɓar; 19wen wese'i gasa bɔnɛ tɛ tik nù. Nɛ̀ Sɔ̧ dee nɛ̀ nù nɛ̀ ku̧u̧naŋ-a mɛ tɛnɛ, pɛrti bɔnɛ hegɔ tɛ hɔ nɛti na. Ɓɛɛ pɛrti bɔnɛ‘i beka hɔ woyo ɓɔna ndó-ndó-ndó.#Dan 12.1; Tom 7.14 20Kà Gasa Wan gɔn so ŋma nú zɛ-bɔnɛ‘i yinɛ na, bó nɛ́ ŋma bíí tɛ̀ɛ́ kpasi so kpɔk na. Ɓɛɛ nɛ́ wen zu o bíí n'aa hoka, á̧ a̧ gɔna nɛ̀ ŋma nú zɛ-bɔnɛ‘i yinɛ. 21Ɓɛɛ wese'i, kà ŋma bíí tɔ̧ h’ɛ́nɛ́‘e ndé: ‹Ɛ̀nɛ̀ zɔ́k, Mɛsii a̧a̧ hɛ̧ɛ̧!› kóó: ‹A̧ a̧a̧ mɛ‘i!› wó, ɓɛɛ k’ɛ́nɛ́ kpɛk na. 22Wen o wi-ɔr-wi nɛ̀ tɛ tɔ̧‘e, wi nɛ́ Mɛsii, kóó, wi nɛ́ wi-tɔ̧-wen oi nú Sɔ̧ tɛ gbo wese'i. Wa tɛ de o mɔɔ-kifi in o mɔɔ-gɔn-ɗɛɗɛ-wi, kii nɛ̀ war mɛ ɔr nɛ̀ o wi nɛ̀ Sɔ̧ hoka. 23K’ɛ́nɛ́, ɛ̀nɛ̀ zɔ́k tɛ‘nɛ́, wen mi mbaŋa tɛ‘nɛ́ wen mɔ lɛŋ kaɗi.»

Tɛa-a ko Bem ko bíí

(Zɔk Mt 24.29-31; Lk 21.25-28)

24«Ɗoŋ nɛ̀ bɔnɛ nɔ‘i tɛ kaɗi, wese tɛ ba tum, nyaŋa-zɛ beka tok ɓɔna,#Es 13.10; Ez 32.7; Jɔɛl 2.10; 3.4; 4.15; Tom 6.12 25o sɔra tɛ ai a nù nɛ̀ yiwese, ɓɛɛ o ŋgayamɔ mɛ yiwese tɛ nak.#Es 34.4; Jɔɛl 2.10; Tom 6.13 26Ɓɛɛ kóó o ndé tɛ zɔk Bem ko bíí fara tɛa-a nɛ̀ mgbara bu-zan nɛ̀ zɔm ŋgayamɔ in gasamɔ,#Dan 7.13; Tom 1.7 27ɓɛɛ a̧ tɛ tom o betom mɛ yiwese dam mgbii-zan lɛŋ, hɔ nduti nù mɛ in nduti yiwese mbɛt, mɛ mɔi̧ o bíí n'aa hoka.»

Lizaŋ ko te-mbɔra

(Zɔk Mt 24.32-35; Lk 21.29-33)

28«Ɛ̀nɛ̀ zíí lizaŋ ko te-mbɔra. Kà te-mbɔra ku̧ naŋ gbáá er ha̧ wa̧a̧-a̧ mɛ ɓɔ, ɓɛɛ ɛ́nɛ́ iŋa'e ndé, nú-kórò hɛɗa kaɗi. 29Ɛ́nɛ́ mbɛt, ŋgimbi n’ɛnɛ tɛ zɔk o mɔɔ nɔ‘i ku̧u̧ naŋ hɔa-a, ɛ̀nɛ̀ íŋ‘e Bem ko bíí hɛɗa hɔa-a kaɗi, a̧ a̧a̧ nú tua k’ɛ́nɛ́. 30Nɛ́ kpasawen a̧‘m tɔ̧ h’ɛ́nɛ́; bíí tɛ ŋgimbi’ɛ beka fe lɛŋ na, ɓɛɛ mɔɔ nɔ‘i lɛŋ hɔa. 31Yiwese in nù tɛ kaɗi, ɓɛɛ wen kɔ‘m beka kaɗi na ɓɔnsɛnɛ! 32Ɓɛɛ wese, kóó ŋgimbi nɛ̀ mɔɔ nɔ‘i tɛ hɔ nɛnɛ‘i, ŋma bíí iŋ na, o betom mɛ yiwese iŋ na, kóó Bem iŋ na mbɛt, kànà nɛ́ Dáà a̧ iŋa ɓɛɛ.»#Mt 24.36

Ɛ̀nɛ̀ pɛ́m mɔ

(Zɔk Mt 24.42; 25.13-15; Lk 12.36-38; 19.12-13)

33«Ɛ̀nɛ̀ zɔ́k tɛ‘nɛ́, ɛ̀nɛ̀ pɛ́m mɔ, wen ɛ́nɛ́ iŋ ŋgimbi nɛ̀ o mɔɔ nɔ‘i tɛ hɔ nɛnɛ na. 34Mɔ‘i tɛ hɔ ŋmaa in ŋma bíí nɛ̀ nɛ̀ɛ́ gɛnɛ. Nɛ́ mɔ'ɔ n'aa ee tua kɔ̧-a̧ er o wi-de-tom kɔ̧-a̧; a̧ kɛ̧ɛ̧ tom ha̧ wa kpɔk kpɔk, ɓɛɛ a̧ tɔ̧ ha̧ wi-pɛm-nú tua mɛ pɛm mɔ.#Lk 12.36-38 35Wen hegɔ, ɛ̀nɛ̀ pɛ́m mɔ, wen ɛ́nɛ́ iŋ ŋgimbi nɛ̀ wan-tua tɛ pii nɛ̀ ɗoŋ na; kóó a̧ tɛ pii ɗoŋ mɛ́ ga̧a̧mɔ, kóó mɛ́ ɗuka-zɛ, kóó mɛ́ hèèmɔ-kɔra, kóó mɛ́ tutuyɛ ndé, ɛ́nɛ́ iŋ na. 36Ɛ̀nɛ̀ pɛ́m mɔ wen ká̧ a̧ tɛ́ɛ̀ pii ɗoŋ yek nɛ̀ ɛ́nɛ́ fara ɔ yá. 37Ɓɛɛ mɔ n'am tɔ̧ h’ɛ́nɛ́‘i, mi tɔ̧ ha̧ bíí lɛŋ, ɛ̀nɛ̀ pɛ́m mɔ.»

Currently Selected:

MARK 13: GB11DC

Highlight

Copy