Matio 21

Ny niakaran’i Jesosy tany Jerosalema.

Mar. 11.1-11; Lio. 19.29-44; Jao. 12.12-19.

1ARY raha nanakaiky an’i Jerosalema izy ka tonga tao Betifaga any an-tendrombohitra Oliva, dia naniraka mpianatra roa lahy Jesosy ka nanao taminy hoe: 2Mankanesa amin’iroa vohitra tandrifinareo iroa, ary miaraka amin’izay dia hahita boriky mifatotra sy ny zanany eo aminy hianareo; vahao izy, dia ento etỳ amiko. 3Ary raha misy miteny anareo, dia lazao hoe: Misy raharaha analan’ny Tompo azy; ary dia havelany ho entina miaraka amin’izay izy.

4Izany dia tonga mba hahatanteraka izay nampilazaina ny mpaminany hoe:

5,,Lazao amin’i Ziona zanakavavy;

Indro, ny Mpanjakanao avy ho anao,

Malemy fanahy sady mitaingina boriky,

Dia zanaky ny boriky miasa’’#21.5 Gr. mitondra zioga. (Zak. 9.9).

6Ary dia nandeha ny mpianatra ka nanao araka izay nandidian’i Jesosy azy, 7dia nentiny ny boriky sy ny zanany ary nataony teo amboniny ny lambany, ary Jesosy dia nitaingina azy. 8Ary ny ankabiazan’ny vahoaka dia namelatra ny lambany teny an-dàlana; ary ny sasany nanapaka rantsan-kazo, dia nahahany teny an-dàlana koa izany. 9Ary ny vahoaka izay nialoha Azy sy izay nanaraka dia niantso hoe:

Hosana#21.9 Hosana = vonjeo re! ho an’ny Zanak’i Davida!

Isaorana anie Izay avy amin’ny anaran’i Jehovah!

Hosana#21.9 Hosana = vonjeo re! any amin’ny avo indrindra (Sal. 118.26).

10Ary nony efa tafiditra tany Jerosalema Izy, dia nihorakoraka ny tanàna rehetra ka nanao hoe: Iza moa izao? 11Ary ny vahoaka nilaza hoe: Izao no Jesosy mpaminany, Izay avy any Nazareta any Galilia.

Ny nandroahan’i Jesosy ny mpivarotra sy ny nanesorany ny varony hiala teo an-kianjan’ny tempoly.

Mar. 11.15-19; Lio. 19.45-48.

12ARY Jesosy niditra teo an-kianjan’ny tempolin’Andriamanitra, dia nandroaka izay rehetra nivarotra sy nividy teo an-kianjan’ny tempoly ka nanjera ny latabatry ny mpanakalo vola sy ny fipetrahan’ny mpivarotra ny voromailala; 13dia hoy Izy taminy: Efa voasoratra hoe: ,,Ny tranoko hatao hoe trano fivavahana’’ (Isa. 56.7); fa hianareo kosa manao azy ho ,,zohy fieren’ny jiolahy’’ (Jer. 7.11).

14Ary nisy jamba sy mandringa nanatona Azy teo an-kianjan’ny tempoly, dia nahasitrana azy Izy.

15Fa nony hitan’ny lohan’ny mpisorona sy ny mpanora-dàlana ny zavatra mahagaga izay nataony sy ny ankizy madinika miantso eo an-kianjan’ny tempoly ka manao hoe: Hosana ho an’ny Zanak’i Davida!–dia tezitra izy 16ka nanao taminy hoe: Renao va izay lazain’ireo? Dia hoy Jesosy taminy: Eny; tsy mbola novakinareo va ny teny manao hoe: ,,Avy amin’ny vavan’ny ankizy madinika sy ny zaza minono no nanamboaranao fiderana’’ (Sal. 8.2)?

17Dia nandao azy Izy ka niala tao an-tanàna hankany Betania; ary dia nitoetra tao mandritra ny alina Izy.

Ny nanozonan’i Jesosy ny aviavy izay tsy namoa.

Mar. 11.12-14,20-25.

18ARY nony niverina maraina hankany an-tanàna Izy, dia noana. 19Ary nahita hazo aviavy#21.19 aviavimbazaha. anankiray teo amoron-dàlana Izy, dia nankeo aminy, kanjo tsy nahita na inona na inona teo aminy, afa-tsy ravina ihany; dia hoy Izy taminy: Aza misy voa avy aminao intsony mandrakizay. Dia maina vetivety foana ilay hazo aviavy. 20Ary nony hitan’ny mpianatra izany, dia gaga izy ka nanao hoe: Nanao ahoana re no dia nahamaina vetivety io aviavy io?

21Ary Jesosy namaly ka nanao taminy hoe: Lazaiko aminareo marina tokoa: Raha manam-pinoana hianareo ka tsy miahanahana, dia tsy izao natao tamin’ny aviavy izao ihany no ho vitanareo, fa raha hiteny amin’ity tendrombihitra ity aza hianareo ka hanao hoe: Mifindrà hianao, ka mianjerà any an-dranomasina, dia ho tonga izany. 22Ary na inona na inona no angatahinareo amin’ny fivavahana atao amin’ny finoana dia ho azonareo.

Ny nanontanian’ny lohan’ny mpisorona sy ny loholona an’i Jesosy ny amin’ny fahefany, ary ny fanoharana navalin’i Jesosy azy.

Mar. 11.27–12.12; Lio. 20.1-19.

23ARY rehefa tafiditra teo an-kianjan’ny tempoly Jesosy ka nampianatra, dia nanatona Azy ny lohan’ny mpisorona sy ny loholona ka nanao hoe: Fahefana manao ahoana no anaovanao izao? Ary iza no nanome Anao izao fahefana izao?

24Ary Jesosy namaly ka nanao taminy hoe: Izaho kosa hanontany anareo zavatra iray loha, ary raha hovalianareo izany, Izaho kosa dia hilaza aminareo izay fahefana anaovako izany: 25Ny batisan’i Jaona, avy taiza moa izany? Avy tany an-danitra va, sa avy tamin’ny olona?

Ary izy ireo niara-nisaina#21.25 Na: nieritreritra. ka nanao hoe: Raha holazaintsika hoe mantsy: Avy tany an-danitra, dia hovaliany hoe isika: Ka nahoana no tsy nino azy hianareo? 26Ary raha holazaintsika hoe kosa: Avy tamin’ny olona, dia matahotra ny vahoaka isika, satria ataon’izy rehetra ho mpaminany Jaona. 27Dia namaly an’i Jesosy izy ka nanao hoe: Tsy fantatray.

Dia hoy Jesosy taminy: Izaho kosa tsy hilaza aminareo izay fahefana anaovako izany. 28Fa ahoana kosa no hevitrareo? Nisy lehilahy nanana zanaka roa lahy; dia nankeo amin’ny lahimatoa izy ka nanao hoe: Anaka, andeha miasa any amin’ny tanimboaloboko anio. 29Fa namaly izy ka nanao hoe: Tsy handeha aho; nefa nony afaka izany, dia nanenina izy ka nandeha ihany. 30Dia nankeo amin’ny faralahy izy ka niteny toy izany koa. Ary izy namaly ka nanao hoe: Handeha aho, tompoko; kanjo tsy nandeha izy. 31Ka iza moa amin’izy mirahalahy no nanao ny sitrapon’ny rainy? Hoy izy: Ny lahimatoa.

Dia hoy Jesosy taminy: Lazaiko aminareo marina tokoa fa ny mpamory hetra sy ny vehivavy janga efa mialoha anareo ho amin’ny fanjakan’Andriamanitra. 32Fa Jaona nankany aminareo tamin’ny làlan’ny fahamarinana, nefa tsy nino azy hianareo; fa ny mpamory hetra sy ny vehivavy janga no nino azy; fa hianareo kosa, na dia efa nahita izany aza, dia mbola tsy nanenina mba hinoanareo azy.

33Mihainoa fanoharana hafa koa: Nisy lehilahy tompon-trano nanao tanimboaloboka, dia namefy azy manodidina, dia nihady famiazana teo anatiny, dia nanao tilikambo, ary dia nahofany tamin’olona mpiasa tany izany, ka nandeha ho any amin’ny tany hafa izy. 34Ary rehefa mby akaiky ny taom-pahavokarana, dia naniraka ny mpanompony izy hankany amin’ny mpiasa tany handray ny vokatra. 35Fa ny mpiasa tany nisambotra ny mpanompony, ka ny anankiray nokapohiny, ary ny anankiray novonoiny, ary ny anankiray notorahany vato. 36Dia naniraka mpanompo hafa koa indray izy, maro noho ny teo; fa nataony toy izany koa ireny. 37Ary nony farany dia naniraka ny zanany hankany aminy izy ka nanao hoe: Hanaja ny zanako izy. 38Kanjo ny mpiasa tany, nony nahita ny zanaka, dia niresaka hoe: Ity no mpandova; andeha hovonointsika izy, dia ho lasantsika ny lovany. 39Ary nisambotra azy izy ka namoaka azy teo ivelan’ny tanimboaloboka, dia namono azy. 40Koa raha tonga ny tompon’ny tanimboaloboka, hataony ahoana moa izany mpiasa tany izany?

41Hoy izy taminy: Hataony loza tokoa ny handringanany izany olon-doza izany, ary ny tanimboaloboka dia hahofany amin’ny mpiasa tany sasany izay hanome azy ny vokatra amin’izay fotoany avy.

42Hoy Jesosy taminy: Tsy mbola novakinareo va ny teny ao amin’ny Soratra Masina hoe:

,,Ny vato izay nolavin’ny mpanao trano,

Dia izy no efa natao fehizoro;

Avy tamin’i Jehovah izao

Ka mahagaga eo imasontsika’’? (Sal. 118.22, 23).

43Ary noho izany dia lazaiko aminareo hoe: Hesorina aminareo ny fanjakan’Andriamanitra ka homena izay firenena mahavokatra ny voany. 44Ary izay potraka amin’ity vato ity dia ho torotoro, fa na zovy na zovy no hianjerany, dia ho mongomongo.#21.44 Gr. haely toy ny vovoka.

45Ary rehefa ren’ny lohan’ny mpisorona sy ny Fariseo ny fanoharana nataon’i Jesosy, dia fantany fa ny tenany no nolazainy amin’izany. 46Dia nitady hisambotra Azy izy, saingy natahotra ny vahoaka, satria nataon’ny vahoaka ho mpaminany Jesosy.

Currently Selected:

Matio 21: MBP

Highlight

Copy