ZYAŊ 13

Mɛkurè mɛ Yeesus mɛ siitòn rì ɓɛ̀yilàg ɓii

Yeesus à sòo ɓɛ̀yilàg ɓii mɛkòò

1Di tìcàɓ ti Paskà ti kakay, Yeesus à yighà lɛ cààmɛ̀n kii ki lɛ a pɛsɛn ɓi ziinɛ a kɛǹ yɛ̀ɛ Seŋi ki kpaŋi. À keesìghà ɓum ɓii ɓɛ ɓɛ ɓaghà fɛ ɓi ziinɛ; nni à keesìghà ɓɔ, à kpaŋ a sugtag.

2Yɛ̀ɛ Yeesus rì ɓɛ̀yilàg ɓii ɓɛ ɗiɗìghà, di Satàn à mɛ ɗiŋzi Zyudas à man à Simɔn, fèg ànɛ lɛ a tɔkɛn Yeesus ɓi nɗem, 3Yeesus à yighà lɛ Seŋi à faghà ɓìɓan ɓìcèm ɓi ɓyàg ɓii, à ki yi lɛ à pɛ̀sɛ̀ngày yɛ̀ɛ Bɛ̀ll, nni wɔɔ nnɛ à yùu kì sugtii, 4fɔɔnnɛ à pɛ̀sɛ̀ngà aɗyoo, à sɔ̀ŋɗɛ̀n ɓìlàà, à teɗ sànjà, à sìnɛ̀n ɓi kìɓon. 5Ajɛ̀m ìnɛn nnɛ à sùùrìghà mɛ̀nig ɓi taasà, à tumɛ̀n ɓɛ̀yilàg ɓii rìsòò ɗi mɛkòò di a tɔ̀tɔsi mɔ rì sànjà ànɛ à ɗyeɓɓɛ̀ngà yɛ̀ɛ kànɗa. 6Yɛ̀ɛ à kpagà yɛ̀ɛ Simɔn Pyɛɛri, Simɔn à tɔg nyi lɛ: Kan! Lɔŋ wɔ̀ yɛɛ soò mɛ̀ mɛ̀kòo? 7Yeesus à ɓàg nyi lɛ: Ɓigomìnɛ, ù yii ɓi azi anɛ ɓi kìɓan ki nkìki ki, wɔ̀lɛ ù rì nyi ɓiì siitɛɛ ki yiì ajɛ̀m. 8Pyɛɛri à kpaa nyi lɛ: Ɓɛ̀pwàà! wàa sòò ɓi mɛ mɛ̀kòò nsoò ŋwos bog. Yeesus à ɓàg nyi lɛ: I ǹsòo ɓi wɔ mɛ̀kòò, wàa ɓa ɓi ri gàɓ a lɔ̀ŋkɛm̀. 9Simɔn à kpaa min nyi lɛ: Kan, kɔ̀ɔ sòò lɔŋ mɛ mɛ̀kòò mɔ rì mɔ, u soò mɛ̀ girig lɛ, rì ɓyàg, rì ǹto. 10Yeesus à kpaa nyi lɛ: Ŋwaànɛ à mɛ wùɓɓɛ̀n, à yin lɛ ɓɛ wuɓsì tì nyi, i ki cee ɓi lɛ mɛ̀kòò mii mɛɛ̀mɛ ɓɛ soò, lɛ nyoo yìì bimiɗ ì rì ǹtɛnɛn. Nni, mìnii ri ɓɛ̀tɛnɛn, wɔ̀lɛ, àa mìniìcèm. 11Yeesus à yighà ŋwaànɛ à rì nyi ɓiì tɔ̀kɛɛ, kɛɛ̀ki à kpaaghà miì lɛ: Ɓì yin ɓɛtɛnɛn ɓɛsɛ̀ɛ̀ ɓɛ̀cèm. 12Yɛ̀ɛ à lègsìghà kìsòo mɛkòò, à pɛ̀ɛ̀zɛ̀n kì waatɛɛ ɓilàà, nni à sugtìghà kì kɔ̀rii ɓi zi, à tɔg ɓɔ lɛ: Ɓì yii azi anɛ ɓi kìɓan ki ǹkìi mìni kìn? 13Ɓì ti ɓì regì mɛ̀ lɛ ǹɗèsàg, ɓì regì tì mɛ̀ lɛ Kan, ɓì ki ti ɓì kpaaghì miì lɛ ǹɗì ǹɗèsàg, mɛ̀ tì Kan. 14Nni i màànɛ ǹɗì Kan, mɛ̀ ǹɗèsàg ǹsòo mìni mɛ̀kòò, mìni girig, ɓì ghɛ̀ɛ̀sɛɛ kì sòòraagh mɛkòò mìni rì mìni. 15Lɛ ǹfaa mìni kìfèèghrɛnà lɛ di mìni girig ɓi kilag yɛ̀ɛ mɛ̀ ǹkìi yì mìni. 16Ǹkpaa mìni kɔɔ̀kɔɔ̀ à rìkpaa lɛ: ǹkìì-kìsay adɛŋ à cee ɓi masà wìì; ǹkɛ̀nì-fìtom kɛ̀ɛ ki cee ŋwaànɛ à romi nyi. 17I ɓì yii ɓìɓan ɓiǹ, di ɓì rì ɓɛ̀mààghmaagh, nni kɛɛ̀ tɔtɔg lɛ ɓi ki ɓyɔ̀.

18Àa ɓisuu miniìcèm nnɛ ǹkpaa kìɓan kiǹ. Mɛ̀ ǹ-yii ɓɛ̀roɓɛ m̀ɓɔ̀ngà wɔ̀lɛ, ki ghɛɛ̀sɛɛ lɛ jɛ̀ɛ̀ ìnɛ ì rì ǹkànɛn lɛ: Roànɛ ti ɗiɗi bìrɛs yɛ̀m ɓɛɛ̀ nyi à ghali mɛ̀ ŋaŋ-ŋaŋ ɓi nyoo, yɛ̀ɛ roǹ. 19Ǹkpaa mìni kɔ ɓigomìnɛ di ki ka kilɛn ɓi, lɛ yɛ̀ɛ ki ri ɓiì kìlɛɛ, ɓì gherɛ̀n lɛ Mɛ̀ ǹɗì roànɛ ǹɗì. 20Ǹkpaa mìni saaɗ à rìkpaa lɛ, i mum à ghàɓi mum wɛm̀ à fìtom, di mɛ̀ nnɛ à ghàɓi, i mum à ki ghàɓi mɛ̀, di à ghàɓi roànɛ à romgày mɛ̀.

Yeesus à kpaa ɓɛ̀yilàg ɓii lɛ: Zyudas à rì nyi ɓiì tɔ̀kɛɛ

(Mt. 26:20-25; Mk. 14:17-21; Lk. 22:21-23)

21Yeesus à ɓaghà lɛ, à mɛ kpaa fɔlɔɔ nni nɗem wu ɓuùsɛ̀ngà nyi ɓi ɗùm, à kalì lɛ: Ǹkpaa mìni saaɗ à rìkpaa lɛ kìbog ki ɓi mìni ki ri mɛ̀ ɓiì kàɓi. 22Ɓɛ̀yilàg ɓɛ pɛɓsɛ̀n ɓɔmiɗ a mɛ̀su, ɓɛ̀ kɛɛ̀ yi ghɛn innɛ à kpaakpààghà. 23Kìbog ki ɓi ɓɛ̀yilàg ɓii ki àa nkeesàg ki kɔkɔ̀rìghà nyi jàŋbog. 24Simɔn Pyɛɛri à tòòghrɛ̀n ɗì ǹ-yilàg ànɛ̀n ɗì càg lɛ, a tɔg nyi ghɛn innɛ a kpaaghì. 25Nni ǹ-yilàg àncèm à loŋmɛ̀ngà Yeesus ɓi-reè, à kpaa lɛ: Kan ghɛn innɛ u kalàg? 26Yeesus à ɓàg nyi lɛ: Lɔŋ roànɛ m̀ɓiì nɔ̀ɔgh bìrɛs ǹfa rì nyi nnɛ nkalàg. Nni à nɔ̀kà kìɓɛghà ki bìrɛs à fa rì Zyudas à man à Simɔn Iskariyot. 27Lɔŋ yɛ̀ɛ Zyudas à ghàɓkà kìɓɛghà ki bìrɛs kiǹ, Satàn a ɗiŋì nyi ɓi nɗem. Yeesus à kalì nyi lɛ: Com ki u ɓeɓeg lɛ u ki, kìya kɔ lɛ fyɛ̀ɗ. 28Ŋwaàdɛŋ ànɛ ɓi ɓumɓɛ ɓɛ ɗiɗìghà ɓìɗilàg ɓiǹ, à yighà ɓi ɓisuucɛ nnɛ Yeesus à kpaaghà nyi fɔ̀lɔ̀ɔ̀. 29Ɓɛ̀ro ɓɛdɛŋ ɓɛ fefèkà lɛ, yɛ̀ɛ Zyudas àa nti à ɓègì ɓàm à mɔ̀ɔ̀ni, nnɛ Yeesus à kpaakpààghà nyi lɛ a lag ɓyom ɓi ɓi ghɛɛ̀sɛɛ rì ɓɔ ɓisuu ticàɓ, nsoò lɛ a fa ɓɛ̀soghàsogha com. 30Yɛ̀ɛ Zyudas à ghàɓkà kìɓɛghà ki bìrɛs, à ghàs kì kpaŋì. Ìru wu ɓaghà di wu mɛ fìn.

Kìdɔ̀gsɛna ki nyɔ̀n

31Yɛ̀ɛ Zyudas à ɓaghà di à mɛ kpaŋ ɓi dan, nni Yeesus à kalìghà lɛ: Ɓigomìnɛ, Man à mum à mɛ kem, Bɛ̀ll à mɛ kem girig ɓi nyi. 32I Bɛ̀ll à mɛ kem ɓi nyi, cààmɛ̀n lɛsàg Bɛ̀ll à rì girig nyi ɓiì kemzii ɓi nyimiɗ.

33Ɓɔn ɓɛm, ǹkaka tì rì mìni ɓi maa cààmɛ̀n. Ɓì rì mɛ̀ ɓiì kaà fɛlɛ yɛ̀ɛ ǹkalìghà rì Ɓɛ̀yudɛ̀n lɛ: Jàŋ inɛ ǹkɛ̀ɛ, ɓì yin lɛ ɓì yù wɔɔ. Ǹkpaa girig mìni fɔlɔɔ ɓigomìnɛ. 34Ǹfaa mìni kìdɔ̀gsɛna ki nyɔn lɛ: Kɔ̀nɛɛna. Fɛlɛ yɛ̀ɛ mɛ̀ ǹkeesìghà mìni, mìni girig, kɔ̀nɛɛnà. 35I ɓì kɔ̀nɛɛ, ɓum ɓɛ̀cèm ɓɛ ri ɓiì yiì lɛ ɓì rì ɓɛ̀yilàg ɓɛm.

Yeesus à kpaa Pyɛɛri lɛ, à rì nyi ɓiì roòzɛɛ

(Mt. 26:31-35; Mk. 14:27-31; Lk. 22:31-34)

36Nni Simɔn Pyɛɛri à tɔkà nyi lɛ: Kan fennɛ ù rì ɓiì kɛ̀ɛ? Yeesus à ɓàg nyi lɛ: Jàŋ inɛ ǹkɛ̀ɛ, ù yin lɛ ù nɔ̀ɔ̀tì mɛ̀ wɔɔ ɓigomìnɛ; kìɓan kifog ù ri nɔ̀ɔ̀tii gɛ mɛ̀ ajɛ̀m. 37Pyɛɛri à kpaa nyi lɛ: Lɛ cɛ nnɛ ǹ-yin lɛ ǹnɔ̀ɔ̀tì wɔ̀ ɓigomìnɛ? Ǹɗì m̀pègsɛn lɛ nɗimzi cɛɓ kɛ̀m ɓisu wɔ̀ɔ̀. 38Ù ɓiì ɗimzii cɛɓ kɔɔ ɓisu wɛ̀m ɛ̀ɛ? Ǹkpaa wɔ̀ saaɗ à rìkpaa lɛ, ù rì mɛ̀ ɓiì roòzɛɛ gɛ̀n yiraa di ǹlem à zag a ka rɔŋ ɓi.

Currently Selected:

ZYAŊ 13: BAFNT

Highlight

Copy