ZYAŊ 21

Yeesus à rèsɛɛ tì ɓɛ̀yilàg ɓii ɓi bèn ì rìɓày ànɛ a Tiɓeriyaadɛ

1Ajɛ̀m ìnɛn, Yeesus à rèsɛ̀ngà tì ɓɛ̀yilàg ɓii ɓi bèn ì rìɓày ànɛ a Tiɓeriyaadɛ.

2Ɓɛ̀-Simɔn Pyɛɛri ɓɛɛ̀ Tomas ànɛ à rì ɗii lɛ, Didim, rì Natanayɛl ànɛ à rì ŋwaànɛ a Kana a Galile, rì ɓɔn ɓɛ Zeɓede, rì ɓɛ̀yilàg ɓɛ Yeesus ɓɛdɛŋ ɓɛ̀sɛ̀ɛ̀ ɓɛɓɛɛ̀ ɓɛ ɓaghà ǹɗaŋ. 3Simɔn Pyɛɛri à kpaa ɓɔ lɛ: Ǹkɛ̀ɛ kì pìigh dam. Ɓɛ̀roɓɛ̀n ɓɛ kpaa nyi lɛ: Ɓìsi girig, ti kɛ̀nkɛn nɗaŋ ɗi wɔ̀. Fɔɔnnɛ ɓɛ pɛsɛ̀ngà ɓɛ ɓɔg ɓi kìkɔm, wɔ̀lɛ ìru wìn, ɓɛ wolà ɓi com. 4Yɛ̀ɛ duri i tangà, nni Yeesus à rɛrɛ̀lìghà ɓi bèn ì rìɓày, kìɓan kifog ɓɛ̀yilàg ɓɛ̀ kɛɛ̀ yi lɛ Yeesus yɛɛ ri. 5Yeesus à kpaaghà ɓɔ lɛ: Ɓɔɓti ɓɛ! ɓì yin foo ri com ki ɗiyɛn? Ɓɛ ɓaàg nyi lɛ: Àg. 6À kpaa ɓɔ lɛ: Pìighna dam ɓi ɓɛg à kìkɔm à weèlem di fɔɔnnɛ ɓi ɓan ɓìzɛn. Nni ɓɛ pikà min dam, bee inɛ ɓɛɛ tug yì yɔ̀ yɛ̀ kɛɛ̀ ɓa ti, lɛ ɓìzɛn ɓi ɓaghà miì lɛɛ̀gwey. 7Fɔɔnnɛ ǹ-yilàg ànɛ Yeesus àa nkeesàg à kpaaghà Pyɛɛri lɛ: Kan yɛɛ ri. Lɔŋ yɛ̀ɛ Simɔn Pyɛɛri à wokà fɔlɔɔ, à pùrɛ̀n kìlàà, ɓisuulɛ à ɓaghà kìtòn zɛy, à kpì ɓi rìɓày. 8Nni ɓɛ̀yilàg ɓɛm̀bog ɓɛ yughày ɓi kìkɔm, di ɓɛɛ̀ syòŋsyoŋ yi dam ìnɛ ɓìzɛn ɓi ɓaghà miì lɛ pisa, ɓisuulɛ ɓɛ ɓiisɛ̀ngà ɓi ki ràɓsɛɛ ri ǹwɔŋì wu riɓày. Ǹwɔŋì wu riɓày wu ɓaghà di wu mɛ rɔ̀ɓ yi ɓɔ nunùg ɓɛ̀mità mɛ̀tin mɛtaǹ.

9Yɛ̀ɛ ɓɛ sɛngà a cɛɗ, nni ɓɛ ghɛngà ɗuu ɗi ɓɛ̀ràŋ, rì ɓìzɛn miì aɗyoo rì bìrɛs. 10Yeesus à kpaa ɓɔ lɛ: Yùunay rì ɓìzɛn ɓi ɓì ɓaniì. 11Simɔn Pyɛɛri à ɓɔg ɓi kìkɔm à tùg yì dam ìnɛ ì ɓaghà rì ɓìzɛn lɛ pisa. Ɓìzɛn ɓincèm ɓi tɔɔghràkà, ɓi ki ɓaghà ɓìcèm ɓìzɛn mɛ̀tin taàɓɛ̀ɛ̀ rì ɓìzɛn ǹtɛ̀ɗ rì ɓiraa. Nni nsoò yɛ̀ɛ ɓi teghɛ̀ngà fɔlɔɔ dam ì ghàghàskà ɓi. 12Yeesus à kpaa ɓɔ lɛ: Yùuna kì ɗiì, kɛ̀ɛ̀ kìbog ki ɓi ɓɛ̀yilàg ki ki ghɛɛsìghà lɛ kɛɛ tɔg nyi lɛ: Ù rì ghɛn? Lɛ ɓɛ yighà lɛ Kan yɛɛ ɓaghà. 13Fɔɔnnɛ Yeesus à tyɛ̀ɛ̀tɛ̀ngà à teɗ bìrɛs, à fa ɓɔ, à fa girig ɓɔ ɓìzɛn.

14Gɛ̀n i kìraa ìnɛ lɛ Yeesus a resɛn ɓɛ̀yilàg ɓii, à tumɛ̀n yɛ̀ɛ à ghèmɓɛ̀ngà a ɓìloŋ yɛ̀ɛ ɓaghà lɔɔ.

15Ɓɛ ɓaghà lɛ, ɓɛ mɛ ɗi, Yeesus à kpaa Simɔn Pyɛɛri lɛ: Simɔn, man à Zyonas, ù keesii nya mɛ̀ ù cee lèg ànɛ ɓɛ̀roɓɛ ɓɛ keesii mɛ̀? Simɔn à ɓàg lɛ: Ɛ̀ɛ̀, Kan, ù yii lɛ ǹkeesii wɔ̀. Yeesus à kpaa nyi lɛ: Ɓèŋa jɔ̀ɔ̀ yɛm̀. 16Nni Yeesus à kpaatìghà nyi ɓi gɛ̀n i kìɓɛ̀ɛ̀ lɛ: Simɔn man à Zyonas ù keesii nya mɛ̀? Pyɛɛri à ɓàg nyi lɛ: Ɛ̀ɛ̀, Kan, ù yii lɛ ǹkeesii wɔ̀. Yeesus à kpaa nyi lɛ: Ɓèŋa jɔ̀ɔ̀ yɛm̀. 17Nni à kpaatìghà nyi ɓi gɛ̀n i kìraa lɛ: Simɔn man à Zyonas ù keesii nya mɛ̀? Pyɛɛri à ɓàg nyi lɛ: Kan, ù yii ɓìɓan ɓìcèm, ù ki yii lɛ ǹkeesii wɔ̀. Yeesus à kpaa nyi lɛ: Ɓèŋa jɔ̀ɔ̀ yɛm̀. 18Ǹkpaa wɔ̀ ɓi saaɗ à rìkalì lɛ, cààmɛ̀n ki ù ɓaghà kìɓwɛɗ ki mum, wɔ̀ɔ nti ù sìnàg kànɗa wɛ̀ɛmiɗ, ù kɛ̀n jàŋ inɛ ù kɔ̀ni. Kìɓan kifog, yɛ̀ɛ ù ɓiì rùni, ù ri nàmgi ɓyàg ɓyɔɔ, ŋwaàdɛŋ yɛɛ siǹ wɔ̀ kànɗa, à ki kɛ̀n ɗi wɔ̀ jàŋ inɛ ù kɔ̀ni ɓi. 19À kpaaghà fɔlɔɔ lɛ, a resi rìkuu ɗi riwù ɗi Pyɛɛri à ri kemzi Bɛ̀ll rì ɗyɔ. Yɛ̀ɛ à kpaaghà fɔlɔɔ, nni à kpaaghà Pyɛɛri lɛ: Nɔ̀ɔ̀ti mɛ̀!

20Yɛ̀ɛ Pyɛɛri à lɔ̀ɔ̀ghrɛ̀ngà, nni à ghɛngà ǹ-yilàg ànɛ Yeesus àa nkeesàg di a nɔ̀ɔnɔɔ̀tì ɓɔ. N-yilàg ànɛ̀n yɛɛ loŋmɛ̀ngà Yeesus ɓi-reè di ɓɛɛ̀ ɗiɗì, à tɔg nyi lɛ: Kan, ghɛn yɛɛ ri wɔ̀ ɓiì kàɓi? 21Yɛ̀ɛ Pyɛɛri à ghɛngà nyi, à tɔg Yeesus lɛ: Kan, cɛ kɛɛ̀ki roànɛ à ɓiì tulɛɛ ri kɔ̀? 22Yeesus à ɓàg nyi lɛ: I ǹkɔ̀ni lɛ a ɓaɓa ɓi cɛɓ à kpaŋ yɛ̀ɛ ǹɗi sugtiì, ki ri wɔ̀ a cɛ? Wɔ̀ɔ̀ nɔ̀ɔ̀ti mɛ̀. 23Ɓi jɛ̀ɛ̀ ìnɛn nnɛ ɓɔlɛ à sààghà ɓi nyìinyìm à ɓɛ̀geni ɓɛ ɓi rìgherɛ̀n lɛ ǹ-yilàg ànɛ̀n àa wu ɓi; kɔm̀ lɛ Yeesus à kpaaghà ɓi Pyɛɛri lɛ ǹ-yilàg ànɛ̀n àa wu ɓi. À kpaaghà lɔŋ lɛ: I ǹkɔ̀ni lɛ a ɓaɓa ɓi cɛɓ à kpaŋ yɛ̀ɛ ǹɗi sugtiì ki ri wɔ̀ a cɛ?

24Ǹ-yilàg ànɛ̀n yɛɛ̀ ki tɛɛtɛɛ̀zì ɓìɓan ɓi, nnyɛɛ ki kàngà ɓyɔ. Ɓìsii ki yii lɛ com ki a kpaa ki ri saaɗ. 25Yeesus à kìtìghà ɓìɓan ɓidɛŋ lɛɛ̀gwey. I ɓɛɛ kaǹkan ɓyɔ lɛ, kìfog kìfog, di ziinɛ bimiɗ ìrì lɛsàg, ɓi rìghɛn ɗyɛ̀m, ɓi kìɓan ki jàŋ inɛ ɓɛɛ foŋ̀ ɓɛ̀kaàtà ɓɛ ɓɛ ɓaghà lɛ ɓɛ kanɛ̀n.

Currently Selected:

ZYAŊ 21: BAFNT

Highlight

Copy