ZYAŊ Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Kaàtà à Zyaŋ ànɛ à ghasɛɛ rì ɓɛ̀-Syeesyee ɓɛ Ɓɔlɛ ɓɛmbog lɛɛ̀gwey. Uù pisii ɓɛ̀syàpiìtɛ̀rɛ̀ 18--19 ɓɛ ɓɛɛ kpaakpaa kìɓan ki mɛtɔɓ mɛ siitòn mɛ Yeesus à wokà ɗì rìwu ɗii, Zyaŋ à ɓùŋi ɓiɓan lɛsàg ɓi ɓɛ̀ro ɓɛmbog ɓɛ kangà. Nyi resii ɓìɓan lɛɛ̀gwey ɓi ɓɛ̀ro ɓɛmbog ɓɛ kpaa ɓi; fɛlɛ yɛ̀ɛ rìwɛy ɗi a Kana (2:1-12), ɓìtòkì ɓi Yeesus rì Nikodɛm (3:1-21), kìɓan ki giɓ anɛ a Samari (4:1-42), roròɓ ànɛ a Bɛtzata (5:1-18), ŋwaànɛ à yalɛ̀ngà rì tìɗyaŋ (9:1-41), rì ɓìɓan ɓidɛŋ tì.

Nsoò yɛɛ̀ Zyaŋ à kpaa ɓi ɓiɓan lɛɛ̀gwey ɓi Yeesus à kìghà, maa gàɓ ànɛ à kpaa, àrì ɓɛ̀gɛni-ɓiɓan ɓɛ Yeesus à ɓanɛ̀ngà miì lɛ a fa mɛ̀rèsàg mɛ mɛ rimi yɛ̀ɛ mɛ̀nɔ̀ɓɔ̀.

Ɓi rìtumɛ̀n ɗi kaàtà, ɓìtòkì ɓi Zyaŋ ɓyɛɛ̀ rèsag lɛ Yeesus àrì jɛ̀ɛ̀ ì Bɛ̀ll ì fìɗyàɓ fikɔ̀ɔ̀ ìnɛ ì ghalà mum, ì yù kì ghɛɓì rì ɓum. À ɓaghà cɛɓ, rì kìtɛɛtɛn, rì saaɗ ɓi nyìinyìm wàà (1:1-18).

Ɓɛ ri lɛ ɓɛ kaɓsì Syeesyee à Ɓɔlɛ à Zyaŋ nyimiɗ di ɓaa pisi ritumɛ̀n gàɓ yiɓɛɛ̀, lɛ rì ɓìɓan ɓi à kìghà di cààmɛ̀n ki a wog rìkɛŋ ki ka kpaŋ ɓi (1:19--12:50), rì yɛ̀ɛ cààmɛ̀n kii, yɛɛ lɔɔ lɛ cààmɛ̀n ki riwù ɗii, ki ki ri girig ki rikem ɗii ki kpagà (13:1--21:25).

Ɓi gàɓ ì ǹtonto, Zyaŋ à kalii yɛ̀ɛ ɓum ɓɛdɛŋ ɓɛ fekà kì rèsìì ɓiɓan ɓi ɓɛ ghɛngà ɓi Yeesus, nsoò lɛ rìghɛn ɗi ɓɔ ghɛngà Yeesus. Ɓum fɛlɛ yɛ̀ɛ Zyaŋ Bàɓtis, Andire, Filiɓ, Natanayɛl, nsoò ŋwaànɛ à yalɛ̀ngà rì tìɗyaŋ. Ajɛ̀m ìnɛn, à kalì dàm yi ɓiɓan yidɛŋ yi Yeesus à kìghà, yɛɛ ri ɓìrèmzɛnà ɓi ɓi ghɛɛ̀sɛɛ kì kìi lɛ ɓum ɓɛɛ yi lɛ Yeesus àrì Nghɛɓsì-ɓum. Ɓìtòkì ɓi Yeesus ɓi rìlèg ɗi gàɓ ì ǹtonto ìnɛ, ɓi ri fɛlɛ yɛ̀ɛ ɓìseèkà lɛ ɓum ɓɛ ɓeni kì ghèrɛɛ, nsoò yɛ̀ɛ Yeesus à kìghà dàm. Zyaŋ à sììràg tì kì rèsii nto wu jɛ̀ɛ̀ wu Yeesus à yùghà kì ghagsiì lɔŋ yɛ̀ɛ Seŋi à romgày nyi lɛ a kakali.

Gaɓ ì kìɓɛ̀ɛ̀ ìnɛ ɓi kaàtà à Zyaŋ ànɛ yɛ̀ɛ rèresi lɛ yɛ̀ɛ cààmɛ̀n ki lɛ a wog rìkɛŋ ki kpagà, Yeesus à faghà ɓɛ̀yilàg ɓii deɓ yi siitòn nsoò ɓìɓan ɓi à ghɛ̀ɛ̀sɛ̀ngà ɓɔ kì siitaagh, lɛ a ɓii ghesɛn ɓɔ (13--16). Ɓi ɓɛ̀syàpiìtɛ̀rɛ̀ 17, Yeesus à ɓùŋɛɛ lɛ a wu, fɔɔnnɛ à reɓsɛɛ ɓumɓɛ à yùu kì càrì ɓi ziinɛ rì Seŋì. Ɓɛ̀syàpiìtɛ̀rɛ̀ 18 à kpaŋ 20 ɓɛ renagh rì ɓɛ̀-Syeesyee ɓɛ Ɓɔlɛ ɓɛmbog lɛ ɓɛɛ̀ kpaakpaa yɛ̀ɛ ɓɛ ɓangà Yeesus, ɓɛ yɔ̀m nyi, ɓɛ ren lɛ ɓɛɛ wey nyi ɓi kɔrɔs. Ŋwosi Paskà, ɓɛ̀yiɓ ɓɛ tanɛ̀n zɔ̀ŋ kìkpaŋ, kɛ̀ɛ̀ Yeesus miì. Ŋwos anɛ̀n, Yeesus à rèsɛ̀ngà Marii Madelɛn rì ɓɛ̀yilàg ɓɛmbog̀ lɔŋ yɛ̀ɛ Tomas.

Ɓɛ̀syàpiìtɛ̀rɛ̀ 21 ɓɛ kpaa yɛ̀ɛ ɓɛ̀yilàg ɓii taàɓɛ̀ɛ̀ ɓɛ tulɛɛ rì Yeesus ɓi bèn ì rìɓày à Tiɓeriyaadɛ di à mɛ ghembɛ̀n. Kìɓan kiǹ ki ri yɛ̀ɛ kìɓan ki ɓɛ saghii ǹsaghiyɛn ɓi Syeesyee à Ɓɔlɛ à Zyaŋ di Zyaŋ nyimiɗ a mɛ syɔɔ̀di kaàtà wìì rì jɛ̀ɛ̀ ìnɛ à kalii ɓi ɓɛ̀syàpiìtɛ̀rɛ̀ 20 ɓìden 30 à kpaŋ 31. A rèsag lɛ kaàtà ànɛ à kanɛ̀ngà lɛ ɓumɓɛ ɓɛ ɓali nyi ɓɛɛ yi lɛ Yeesus àrì Man à Bɛ̀ll, i ɓɛ ki gherɛɛ nyi ɓɛ ɓa rì cɛɓ lɛ ɗii ɗìì, ɓisuulɛ Yeesus àrì lɔŋ, yɛ̀ɛ nyimiɗ a kalag lɛ, nyiiri bee, rì saaɗ rì cɛɓ (14:6).

Currently Selected:

ZYAŊ Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ: BAFNT

Highlight

Copy

Want to have your highlights saved across all your devices? Sign up or sign in

Learn More About Bafia Nouveau Testament

ZYAŊ Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Popular Bible Verses from
ZYAŊ Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Bible:

Bafia

Version: Bafia Nouveau Testament - BAFNT