LUKAS 3

Rìkalì ɗi ɓɔlɛ ɗi Zyaŋ Bàɓtis

(Mt. 3:1-12; Mk. 1:1-8; Zŋ. 1:19-28)

1Di Tìɓɛr ànɛ à ɓaghà rìfòm ɗigwey a ti ɓèg ǹtɛ̀ɗ rì yitaǹ ɓi rìlàmì, cààmɛ̀n kiǹ kɛɛ̀ki Pɔŋs-Pilat à ɓaa gɔmìnà ànɛ a Zyude, Eroodɛ à làlamì Galile, geni ànɛ lɛ Filiɓ nyii lalàmì ɓìden ɓi zi ɓi lɛ, rì Iture rì Tirakonit, Lizanyas nyii lalàmì Abilɛn 2An rì Kayif ɓɔɔ ɓaghà ɓɛ̀pìrɛɛtìrɛ̀ ɓɛgwey; nni Zyaŋ à man à Zakarii à wokà jɛ̀ɛ̀ ì Bɛ̀ll di à rì ɓi-reɓ. 3Fɔɔnnɛ à tumɛ̀ngà rìrerènì ɗi kòdò ànɛ à rì jàŋbog rì Zyuridɛŋ, di a làalamɓɛ̀n lɛ, ɓum ɓɛɛ lɔɔ̀ghrɛn mɛ̀rem, ɓɛ ɓaɓtàg, fɔlɔɔ nnɛ Bɛ̀ll a cenɛn ɓɔ ɓìɓe ɓyaa. 4Lɔŋ yɛ̀ɛ ki ri kì kànɛn ɓi kaàtà ɓìɓan ɓi à ǹkpaŋzì-ɓìɓan Ezayii lɛ:

Jɛ̀ɛ̀ ìnɛn ì rì jɛ̀ɛ̀ ì roànɛ a làalamɓɛ̀n yì ɓi-reɓ lɛ:

Pègsɛɛna bee yi Kan bì rɛsàg yɔ lɛ saaɗ.

5Ɓɛ ɓiì roozaagh ɓigbɔ̀g ɓìcèm,

ɓɛ ɓùgsì lɛ rì dòn rì ɓìkèekèy,

ɓɛ ki rɛsag ti ɓɛ̀kɔnà ɓɛ bee,

ɓɛ tiìghgɛ̀n girig bee yi yi ri rì mɛ̀gbeŋ.

6Fɔlɔɔ nnɛ mum bimiɗ à ɓiì ghɛɛ gòri ì Bɛ̀ll.

7Ɓum ɓɛ yuyùghày yɛ̀ɛ Zyaŋ ɓìtuu lɛ ɓìtuu, lɛ a ɓàɓti ɓɔ, nyii ki kpaakpàà ɓɔ lɛ: Ɓumɓɛ ɓɛ pisɛɛ ɓìgòm ɓɛ! Ghɛn yɛ̀ɛ reɓi mìni lɛ ɓì rì lɛ ɓì ghɛŋì rìbaŋì ɗi Bɛ̀ll ɗi ɗi riì? 8Nni kìina min ɓiɓan ɓi ɓyɛɛ resi lɛ, ɓì mɛ lɔ̀ɔ̀ghrɛn mɛrem; kɛ̀ ɓi kpaakpaa ɓi mɛ̀rem min lɛ: Abiraham à rì seŋi wìs a ǹsɛ̀ɛ̀; ɓisuulɛ Bɛ̀ll à rì lɛ à kì lɛ gɔ̀g yi yɛɛ ghas̀ ɓɔn ɓɛ Abiraham, mɛ̀ yɛ̀ɛ kpaa mìni. 9Ɓi kiŋcèm, fìseŋ fi ti a ɓìte zi lɛ, kìte kicèm ki kii ɓiì rɔ̀ɓi kɛ̀ kɛɛ̀ wum ɓiɗùn ɓi syeesyee, ɓɛ ɓiì kpɛ̀ɛ kɔ, ɓɛ wòn kɔ ɓi ɗuu.

10Nni gwìy ì ɓum ìnɛ̀n ì tɔkà nyi lɛ: Cɛ kɛɛ̀ki tì ghɛ̀ɛ̀sɛɛ min ki kìi? 11Fɔɔnnɛ à ɓàkà ɓɔ lɛ: Ŋwaànɛ à rì ɓìlàà ɓiɓɛɛ̀, a fa gèni ànɛ à rì kɛ̀ɛ̀ kɔ kìfog; ŋwaànɛ à rì rì ɓyom ɓi ɗiyɛn, a yiti gèni ànɛ à rì kɛ̀ɛ̀ com. 12Ɓɛ̀terì-làmpoŋ̀ ɓɛ yughày girig lɛ ɓɛɛ ɓaɓti ɓɔ, nni ɓɛ tɔkà nyi lɛ: Ǹɗèsàg, cɛ tì ghɛ̀ɛ̀sɛɛ kì kìi? 13Fɔɔnnɛ à ɓakà ɓɔ lɛ: Kɛ̀ ɓi sagtɛn com ɓi bàlì ì mɔ̀ɔ̀ni mɛ làmpoŋ̀ ìnɛ ɓì ghɛ̀ɛ̀sɛɛ kì tɔɔ̀gh.

14Ɓɛ̀sujàà ɓɛ tɔkà girig nyi lɛ: Ɓìsi yòg, cɛ kɛɛ̀ki tì ghɛ̀ɛ̀sɛɛ kì kìi? À kpaa ɓɔ lɛ: Kɛ̀ ɓì ɓàtag mum com ɓi-tèɗ, kɛ̀ ɓi ki sɔmag mum di à kìi ɓi kiɓan ki ɓeɓtɛn; nyààrɛɛna rì mɛ̀lèɓ mɛ ɓɛ ti ɓɛ leɓkì mìni ɓi kìsay kin.

15Kìlɔ̀ŋ ki ɓoŋɓòŋgà rì dyàɓɛn, ɓum ɓɛ̀cèm ɓɛ fekì nya lɛ Zyaŋ nnyɛ̀ɛ ri Kiris. 16Fɔɔnnɛ à kpaaghà ɓɔɔ̀cèm lɛ: Mɛ̀ɛ m̀ɓàaɓaɓtì mìni rì mɛ̀nig, kìɓan kifog ŋwaànɛ à cee mɛ̀ ɓi-tèɗ à tiì, ǹkpaŋi gì ɓi ɓi ǹkoŋ wulɛ m̀fùmì ǹɗig wii wu gòò. Nnyɛɛ ri mìni ɓiì ɓàɓtii ri Kìtɛntɛ̀ɛ̀n ki Nghay, rì ɗuu. 17À rìì rì mɛ̀tɛŋkɛlɛ mii ɓi càg, lɛ a ghasi lɛ rì ɓìfɛfɛy, rì gèŋ i cag cag; à ɓiì foŋi gèŋ ɓi kìkpoŋ kii; fɔɔnnɛ à ɓiì tɔ̀ni ɓifɛfɛy ɓi ɗuu ɗi ɗyɛ̀ kɛɛ̀ ɗimi.

18Zyaŋ à kpaakpaaghà kìlɔ̀ŋ Syeesyee à Ɓɔlɛ, à ki fafa ti ɓɔ deɓ yidɛŋ lɛɛ̀gwey. 19Kìɓan kifog Zyaŋ à rèsìghà gɔmìnà ànɛ lɛ Eroodɛ zɛ̀ɗ yiì, ɓi kìɓan ki Eroɗyaadɛ à gili gèni, rì ɓìɓeɓtàg ɓi ɓiɓan ɓidɛŋ lɛɛ̀gwey ɓi à kìghà. 20Nni à kìtìghà tì kìɓan ki ɓeɓtɛn kidɛŋ, à foŋ Zyaŋ ɓi naà-zày.

Bàɓtis ì Yeesus

(Mt. 3:13-17; Mk. 1:9-11)

21Di ɓaa ɓàɓti kilɔ̀ŋ kìcèm, nni ɓɛ ɓaɓtìghà girig Yeesus. Yɛ̀ɛ à kìkìghà bɔ̀ŋzɛ̀n, nni ɗyoo ɗi nɛmɓɛ̀ngà, 22Kìtɛntɛ̀ɛ̀n ki Nghay ki sɛn yì nyi ɓi nyoo, fɛlɛ yɛ̀ɛ kuùkuù; fɔɔnnɛ jɛ̀ɛ̀ ì ɓaghày ɓi ɗyoo lɛ: Ù rì Man wɛm̀ à ǹɗem, ɓi wɔ̀ nnɛ ǹfoŋi kìnyàà kɛm̀.

Rìfuu yì ɗi Yeesus

(Mt. 1:1-17)

23Yeesus à ɓaghà nunùg bèg rìtin ɗì ǹtɛ̀ɗ cààmɛ̀n ki à tumɛɛ kìsay kii, ɓum, ɓɔɔ fefèkà lɛ, à rì man à Yoosɛɓ ànɛ à ɓaghà man à Heli 24Heli man à Matat, à man à Levi; Levi man à Mɛlki, Mɛlki man à Yanay, Yanay man à Yoosɛɓ. 25Yoosɛɓ man à Matatyas à man à Amos, Amos man à Nawum, à man a Ɛsli; Ɛsli man à Nagayi 26à man à Maat, à man à Matatyas, à man a Semeyin, à man à Yoosɛcɛ, à man à Yoda. 27Yoda man à Yoanan, à man à Resa; Resa man à Zoroɓaɓɛl, à man à Salatyɛl, man à Neri, 28à man à Mɛlki, à man à Aɗi, man à Kosam, à man à Ɛlmadam, à man à Ɛɛr; 29Ɛɛr man, à Yeesus, à man à Elyezɛɛr, à man à Yorim, à man à Matat, à man à Levi; 30Levi man a Simeyɔŋ, à man à Yuda, à man a Yoosɛɓ, à man à Yonam, à man à Elyakim; 31Elyakim man à Meleya, à man à Mena, à man à Matata, à man à Nataŋ, man à Davit, 32à man à Izayii, à man à Yoɓɛd, à man à Booz, à man à Salmɔn, à man à Naasɔn. 33Naasɔn man à Aminadaɓ, à man à Admin, à man à Arni, à man à Ɛsrɔn, man à Farɛs, à man à Zyuda; 34Zyuda man à Yakɔɓ, à man à Isag, à man à Abiraham, à man à Tera, à man à Nakɔr. 35Nakɔr man à Serug, à man à Rehu à man à Pelɛg, à man à Eɓɛɛr, à man à Cilag 36Cilag man à Kayinam, à man Arifasad, à man à Sɛm, à man à Nowe, à man à Lemɛg. 37Lemɛg man à Matusalɛm, à man à Enɔg, man à Yerɛd, à man à Maleleyɛl, à man à Kenam. 38Kenam man à Enos, à man à Sɛt, à man à Adam, à man à Bɛ̀ll.

Currently Selected:

LUKAS 3: BAFNT

Highlight

Copy

Want to have your highlights saved across all your devices? Sign up or sign in

Bafia Nouveau Testament © Bible Society of Cameroon, 2019.

Learn More About Bafia Nouveau Testament