LUKAS 7

Yeesus à wɔ̀ɔ̀zii ǹkìì-kìsay à ǹkɔ̀mɛ̀n-ɓɛ̀sujàà à muu Ròmɛŋ

(Mt. 8:5-13)

1Yɛ̀ɛ Yeesus à lègsìghà kì kalii ɓiɓan ɓi à ɓaghà lɛ a kpaa gwìy ì ɓum ɓɛ kilɔ̀ŋ, fɔɔnnɛ à kɛ̀ngà a Kapɛrinawum. 2Muu Ròmɛŋ àdɛŋ ànɛ à ɓaghà ǹkɔ̀mɛ̀n-ɓɛ̀sujàà, à ɓaghà rì ǹkìì-kìsay anɛ à keesìghà lɛɛ̀gwey; nni ǹkìì-kìsay anɛ̀n à roròɓkà, di à ti ɓiì kɔ̀ɔkɔɔ̀sì. 3Yɛ̀ɛ ǹkɔ̀mɛ̀n-ɓɛ̀sujàà ànɛn à wokà rìkem ɗi Yeesus, nni à pɛ̀sìghà ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛdɛŋ, à rom ɓɔ a lɔŋ̀kii, lɛ ɓɛɛ kpaa nyi lɛ, à yu kì ghɛɓsii ǹkìì-kìsay wiì. 4Yɛ̀ɛ ɓumɓɛ̀n ɓɛ kpagà Yeesus a nyoo, nni ɓɛ ɓɔŋzàkà nyi, ɓɛ siìrɛ̀n rìkpaa lɛ: Tààta! Ù ghɛ̀ɛ̀sɛɛ kì kìi ǹkɔ̀mɛ̀n-ɓɛ̀sujàà ànɛ kìɓan ki à tɔɔgh wɔ̀ ki, 5ɓisuulɛ, à keesii kìlɔ̀ŋ kis, nnyɛɛ ki togà naa yìs i bɔ̀ŋzɛ̀n. 6Nni ɓɛ sugtɛ̀ngà min ɗi Yeesus, yɛ̀ɛ ɓɛ ɓaghà di ɓɛ ti jàŋbog rì mɛɛ nni ǹkɔ̀mɛ̀n-ɓɛ̀sujàà à romgày ɓɛ̀reŋkàŋ ɓii lɛ ɓɛɛ kpaa Yeesus lɛ: Tɛɛnɛ, kɔ̀ɔ teki ǹtɔɓ wìn; lɛ ǹkpaŋi ɓi rikuu ɗi mum ɗi lɛ ù ɗiŋì ɓi naa yɛ̀m. 7Fɔɔnnɛ màa ghɛɛ lɛ, ǹkpaŋi ɓi ɓi ǹɗɛli wulɛ mɛ̀ɛmiɗ n-yù wɔ̀ jàŋbog, kìɓan kifog, kali lɔŋ jɛ̀ɛ̀ ì ŋwɔm, di ǹkìì-kìsay wɛm̀ a wɔǹ. 8Lɛ mɛ̀ɛmiɗ ǹɗì rì ɓumɓɛ ɓɛ kɔmɛɛ mɛ̀; ǹki ɓa ti ri ɓɛ̀sujàà ɓɛ mɛ̀ ǹkɔ̀mɛɛ; i ǹkpaa adɛŋ lɛ kɛ̀na! à kɛ̀n; ǹki kpaati ambog lɛ a yu, à yù; ǹsoò màa kpaa ǹkìì-kìsay wɛm̀ lɛ, kìya fɛlɛ, à kì fɔlɔɔ. 9Yɛ̀ɛ Yeesus à wokà ɓìɓan ɓi ǹkɔ̀mɛ̀n-ɓɛ̀sujàà à kpaaghà ɓiǹ, à kuuràkà nyi; fɔɔnnɛ à nìmɓɛ̀ngà à fa mis rì gwìy ì ɓum à kpaa lɛ: Mìni ɓum, ǹsoò a Isirayɛl, ǹka ghɛngà ɓi mum ànɛ à rì rì coo rìgherɛ̀n yɛ̀ɛ ɗi ŋwaànɛ. 10Nni ɓumɓɛ ǹkɔ̀mɛ̀n-ɓɛ̀sujàà à romgày, ɓɛ sugtìghà a mɛɛ mii, ɓɛ tanɛ̀n lɛ, ǹkìì-kìsay anɛ à roròɓkà à mɛ wɔ̀n.

Yeesus à ghèmzii dɛlì ì ǹkpɔɓ wu giɓ wu a Nayin

11Ɓi duri tana, Yeesus à kɛ̀ngà min ɓi bàn ìdɛŋ ɗii lɛ Nayin. À ɓaghà ǹɗaŋ lɛ, rì ɓɛ̀yilàg ɓii, rì coo kituu ki ɓum. 12Yɛ̀ɛ à ɓaghà di à ti jàŋbog rì ìsuunaa wu ɓi rìɗìŋɗàg ɗi bàn ìnɛn, nni ɓɛ kɛnkɛ̀ngà kì ɓomi kìloŋ ki mum; mum àncèm à ɓaghà m̀bobog à man à ǹkpɔɓ wu giɓ wudɛŋ. Ɓumɓɛ ɓi bàn ìnɛn, lɛɛ̀gwey ɓɛ kɛɛ̀kɛ̀ɛ̀zɛ̀ngày ǹɗaŋ rì ǹkpɔɓ wiǹ. 13Yɛ̀ɛ Kan à ghɛngà giɓ anɛ̀n, à wog nyi nyìighnyìg, à kpaa nyi lɛ: Kɔ̀ɔ rènɗen. 14Fɔɔnnɛ à tyoŋdɛ̀ngà, à kòm fìkɔrɔŋ fi kilòn; ɓumɓɛ ɓɛ tɛtɛ̀kà fyɔ ɓɛ rɛlì, Yeesus à kpaa lɛ: Dɛlì ì mum, ǹkpaa wɔ̀ lɛ, pɛ̀sɛn aɗyòò! 15Nni kìloŋ ki pɛsɛ̀ngà kìkɔ̀ɔ̀kɔ̀ɔ̀, ki tumɛn ɓìtòkì, Yeesus à pɛ̀ɛ̀zì nyi rì jɛɛ. 16Ɓum ɓɛ̀cèm ɓɛ ɓɛ ɓaghà wɔɔ, ɓɛ ghɛngà kìɓan kiǹ koŋnyòò. Fɔɔnnɛ ɓɛ keèkèmzìghà Bɛ̀ll ɓɛ kpaakpàà lɛ: Coo ǹkpaŋzì-ɓìɓan a ghɛnɛɛ a lɔ̀ŋkis, rì tì lɛ Bɛ̀ll à yùu kì ghɛɓsii kilɔ̀ŋ kii. 17Fɔɔnnɛ ɓɔlɛ ànɛ̀n à sààghà lɛ rì ɓi zi ì Zyude bimiɗ, rì ɓi ɓìlɔ̀ŋ ɓidɛŋ ɓi ɓi ɓaghà wɔɔ nunùg.

Ɓumɓɛ Zyaŋ Bàɓtis à romgà yɛ̀ɛ Yeesus

(Mt. 12:2-19)

18Ɓɛ̀yilàg ɓɛ Zyaŋ ɓɛ kɛngà nyi kì kpaà gɛ ɓìɓan anɛ̀n. 19Fɔɔnnɛ Zyaŋ à reŋìghà ɓɛ̀yilàg ɓii ɓɛɓɛɛ̀, à rom ɓɔ yɛ̀ɛ Kan, lɛ ɓɛɛ tɔg nyi lɛ: Wɔ̀ yɛɛ ri nya roànɛ à ghɛ̀ɛ̀sɛɛ kì yùu gìn, ti ɓoŋ̀ɓoŋ tì roàdɛŋ? 20Yɛ̀ɛ ɓɛ kpagà yɛ̀ɛ Yeesus, ɓɛ kpaa nyi lɛ: Zyaŋ Bàɓtis yɛɛ romiì ɓìsi lɛ, tì tɔg wɔ̀ lɛ: Wɔ̀ yɛɛ ri nya roànɛ à ghɛ̀ɛ̀sɛɛ kì yùu, gìn ti ɓoŋ̀ɓoŋ tì ŋwaàdɛŋ? 21Ɓi cààmɛ̀n kɔm̀ kiǹ, Yeesus à wɔ̀ɔ̀zìghà ɓɛ̀roroɓ lɛɛ̀gwey, rì ɓɛ̀lɛnlɛm, rì ɓumɓɛ ɓɛ ɓaghà rì ɓìɓeɓtàg ɓi mɛghay, à ki kì lɛ, ɓɛ̀ɗyaŋɗyàŋ lɛɛ̀gwey ɓɛ ghɛnɛ̀n tì. 22Fɔɔnnɛ à kpaaghà ɓumɓɛ Zyaŋ à romgày ɓɛǹ a lɔ̀ŋkii lɛ: Kɛ̀ɛna kì kpaà Zyaŋ ɓìɓan ɓi ɓì ghɛɛ, rì ɓi ɓì woogh; ɓyɛɛ ri lɛ: ɓɛ̀ɗyaŋɗyàŋ ɓɛ ghɛɛghɛnɛ̀n tì, ɓɛ̀lɛnlɛm ɓɛ kɛɛ̀kɛ̀ɛ̀ lɛ syeesyee, ɓɛ̀kukwiy ɓɛ teètèètì syeesyee à nyoo, ɓɛ̀lɔlɔg ɓɛ woòwòòghrɛ̀n, ɓìloŋ ɓì gheèghèmɓɛ̀n, Syeesyee à Ɓɔlɛ à kaàkàlɛ̀n a ɓɛ̀soghàsogha. 23Nni mààgh rì ŋwaànɛ àa kɛ̀ɓtɛn ɓi fiɓàg lɛ mɛ̀.

24Yɛ̀ɛ ɓum ɓɛ fìtom ɓɛ Zyaŋ ɓɛ sugtìghà, nni Yeesus à tumɛ̀ngà ɓum rì kpaa ɗi kiɓan ki Zyaŋ, à tɔg ɓɔ lɛ: Cɛ kɛɛ̀ki ɓì kɛ̀ngà kì ghɛɛ̀ ɓi-reɓ? Kìsyòŋ ki fɛ̀ɛ̀fɛ̀ɛ̀ a nyɛ̀ɛnyɛŋzì gìn? 25Nni cɛ ɓi kɛ̀ngà kì ghɛɛ̀, ɓaà yi ɓi ŋwaànɛ à rì ǹɗɛ̀ŋɗɛn lɛ syeesyee? Kìɓan kifog ɓumɓɛ ɓɛ ri ɓɛ̀rɛ̀ŋɗɛn, lɛ syeesyee ɓɛ ki ghɛghɛɓ ɓi-kum, ɓɛ ti ɓɛ kɔràg ɓi mɛɛ mɛ mɛfòm. 26Nni cɛ ɓì kɛ̀ngà min ki ghɛɛ̀? Ǹkpaŋzì-ɓìɓan? Ɛ̀ɛ̀! Ǹkalii mìni lɛ, ŋwaànɛ ɓi ghɛngà ànɛn à cee gì ǹkpaŋzì-ɓìɓan. 27Ɓisuulɛ Zyaŋ yɛ̀ɛ rì roànɛ ɓɛ kangà ɓi kaàtà à Bɛ̀ll lɛ:

Ghɛna ǹɗomi mum wɛm̀ à fìtom wɔ asu lɛ a pegsɛn wɔ̀ bee.

28Ǹkpaa mìni lɛ, ɓi ɓum ɓɛ̀cèm ɓɛ ɓɛ yalɛ̀ngà ɓi ɗùm ɗi giɓ, ŋwaànɛ à cee Zyaŋ à yin; kìɓan kifog siitòn a mum ànɛ ɓi kìlɔ̀ŋ ki Bɛ̀ll à cee nyi. 29Ɓum ɓɛ̀cèm ɓɛ ɓɛ wowòkà ɓìtòkì ɓi Zyaŋ, ǹsoò ɓɛ̀terì-làmpoŋ̀, ɓɛ ghɛngà lɛ Bɛ̀ll à rì lɛ saaɗ; kɛɛ kìghà lɛ, ɓɛɛ kɛǹ, Zyaŋ a ɓaɓti ɓɔ. 30Kìɓan kifog, Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓi Ɓɛ̀yudɛ̀n ɓɛ ɓengà fèg ànɛ Bɛ̀ll à ɓaghà rì nyi ɓisu waa, yɛ̀ɛ ɓɛ ɓengà kì kɛ̀ɛ lɛ Zyaŋ a ɓaɓti ɓɔ. 31Nni ǹɗì lɛ ǹfèg ɓà gbàà ì ɓum ì gɛɛ̀nɛ rì cɛ? Ì pisɛɛ ɓà rìkuu ɗi ɓum aɗi? 32Ì pisɛɛ ɓɔɔɓɔɓti ɓɛ ɓɛ kɔkɔ̀rii ɓi ǹlɛm̀ɓog; ɓɛdɛŋ ɓɛ kakàlì ɓɛ̀geni ɓaa lɛ: Tì mɛ kì lɛ, tì ɓog mìni mɛ̀keŋ, kɛ̀ ɓi ɗyen, tì kɛɛ̀gh mìni kìɓààsì ki riwù, kɛ̀ ɓi ki rèn. 33Lɛ yɛ̀ɛ Zyaŋ Bàɓtis à yùghà, à ɓaghà kɛ̀ɛ ɗi bìrɛs, kɛ̀ɛ ki nɔ mɛrɔ̀g, mìni lɛ, à rì rì kìɓeɓtàg ki ǹghay. 34Man à mum à yùy, à kìkì lɛ, à ɗiɗì, à nɔnɔ̀, mìni lɛ: À rì ǹɗii com, à ki ɓa ti kinɔɔ̀ mɛ̀rɔ̀g, nyi tì rìghan ɗi ɓɛterì-làmpoŋ̀ rì ɓɛ̀kìì-kìɓe. 35Kìɓan kifog ɗyomzɛ̀n ɗi Bɛ̀ll ɗi mɛ ghɛnɛn lɛ ɗi ri lɛ saaɗ a ɓɔn ɓii.

Giɓ anɛ à ɓaghà ǹkìì-kìɓe

36Fàrìzyɛŋ adɛŋ yɛɛ reŋìghà Yeesus lɛ a kɛǹ kìɗiì a mɛɛ mii, fɔɔnnɛ Yeesus à ɗiŋìghà ɓi naa ì ŋwaànɛ̀n à kɔ̀rì ɓi ɓìɗilàg. 37Nni ǹkìì-kìɓe a giɓ ànɛ à ɓaghà ɓi bàn ìnɛn à wokày lɛ, Yeesus à rì ɓi ɓyom ɓi ɗiyɛn a mɛɛ mɛ Fàrìzyɛŋ ànɛ̀n; fɔɔnnɛ à yughày rì ɓeŋ à tìrààre ǹɗonɛn lɛ pisa, 38à rɛlì Yeesus ajɛ̀m fɛlɛ̀ a mɛ̀kòò mii, à rènɗèn lèg ànɛ lɛ misì mii mɛ ɓwaŋzìghà mɛ̀kòò mɛ Yeesus. Fɔɔnnɛ à tɔ̀sìghà mɔ rì tyòŋ tii, à lɛ̀ŋlɛ̀ŋ mɔ à ki sisiŋi mɔ tìrààre. 39Yɛ̀ɛ Fàrìzyɛŋ ànɛ à reŋìghà Yeesus à ghɛngà fɔlɔɔ, à fèg ɓi ǹɗem wii lɛ: I Yeesus àa rì ǹkpaŋzì-ɓìɓan, di à rì lɛ, a yi lɛ, giɓ anɛ a kòmkom nyi ànɛ̀n, à rì kìɓeɓtàg ki giɓ. 40Nni Yeesus à kpaaghà ŋwaànɛ̀n lɛ: Simɔn, ǹɗì rì kìɓan ki lɛ ǹkpaa wɔ̀, roànɛn à pɛ̀ɛ̀zì nyi lɛ: Nɗèsàg tòòghrɛn! 41Ŋwaàdɛŋ yɛ̀ɛ tɔtɔ̀kà ɓum ɓɛɓɛɛ̀ ɓɛ̀pon, roànɛ, ɓɛ̀hɔnɗɛ̀ɗ ɓɛtaǹ, roàmbog, dolà ǹtɛ̀ɗ. 42Nni yɛ̀ɛ ɓɛ ɓaghà ɓi ri bee i ǹlèɓɛn nyi ɓɛ̀pon ɓɛǹ, nni à cenɛ̀ngà ɓɔ mɔ̀ɔ̀ni mɛ̀n ɓɛ̀sɛ̀ɛ̀ ɓɛ̀cèm. Nni ɓi ɓumɓɛ kiɓɛ̀ɛ̀ ɓɛǹ, roàbe yɛɛ ri lɛ à keesì ɓà ŋwaànɛ̀n à cee roàmbog? 43Simɔn à ɓàg Yeesus lɛ: Mɛ̀ ǹghɛɛ lɛ, roànɛ ɓɛ cenɛ̀ngà ɓyoo mɔ̀ɔ̀ni. Yeesus à kpaa nyi lɛ: Ù kpaa saaɗ. 44Fɔɔnnɛ Yeesus à lɔɔ̀ghrɛ̀ngà yɛ̀ɛ giɓ anɛ̀n, à ki kpaa ti Simɔn lɛ: Ù ghɛɛ giɓ anɛ? Màa yùu a lɔ̀ŋkɔɔ, kɔɔ̀ fa mɛ mɛ̀nig mɛ lɛ nsoò mɛ̀kòò miì; wɔ̀lɛ nyii soo mɛ̀ mɛ̀kòò rì misì mii, à ki tɔ̀si mɔ rì tyòŋ tii. 45Yɛ̀ɛ maà kpaŋi a lɔ̀ŋkɔɔ, wàa lɔ̀ri ɓi mɛ, kìɓan kifog, giɓ anɛ à fɔli ɓi loo mɛ̀ rìlɔ̀ɛ̀ɗ ɗi mɛkòò. 46Wɔ̀ wàa siŋii ɓi mɛ mɔ̀ɔ ɓi ǹto, wɔ̀lɛ nyii siŋii mɛ̀ tìrààre ɓi mɛ̀kòò. 47Giɓ anɛ à rèsii coo geesɛ̀n lɛɛ̀gwey ɓisuulɛ, gɛ ɓìɓe wiì à tì ǹcenɛn; kìɓan kìfog ŋwaànɛ ɓɛ cenɛɛ lɛsàg, à ti a rèsàg girig geesɛ̀n lɛsàg. 48Fɔɔnnɛ Yeesus à kpaaghà min giɓ anɛ̀n lɛ: Ɓìɓe ɓyɔɔ ɓi ti ɓìcenɛn. 49Nni ɓumɓɛ ɓɛ ɗiɗìghà ǹɗaŋ ri nyi ɓɛ tumɛ̀ngà rìfèg ɓi mɛ̀rem maa lɛ: Rìkuu ɗi mum aɗi ɗyɛɛ ri lɛ, ɗi ɗyɛɛ̀ ceecenɛ̀n ɓum lɛ rì ɓìɓe miì? 50Wɔ̀lɛ Yeesus à kpaaghà giɓ anɛ̀n lɛ: Rìgherɛ̀n ɗyɔɔ ɗi ghɛɓsii wɔ̀, kɛ̀na lɛ fyòoog.

Currently Selected:

LUKAS 7: BAFNT

Highlight

Copy