MATYOO 20

Dàɗkì ì ɓumɓɛ ɓɛ tekà ɓi kìsay ɓyàmɛ̀n dɛŋ-dɛ̀ŋ-dɛŋ

1Kìlɔ̀ŋ ki aɗyòò ki pisɛɛ rì ŋwaàdɛm adɛŋ, ànɛ à pongà kì kaà ɓumɓɛ ɓɛɛ kɛǹ kìsay ɓi dɛm yiì. 2Nni à wooghrɛ̀ngà jɛ̀ɛ̀ rì ɓumɓɛ à tekà ɓi kìsay lɛ, à rì ɓɔ ɓiì peeghii dolà bog ɓi bimiɗ à ŋwos. Fɔɔnnɛ à romgà min ɓɔ a dɛm yiì. 3Yɛ̀ɛ mɛ̀kɛ̀ɛ̀ taànìn à kpagà, nni à kɛ̀ɛ̀dìghà kì kaatii ɓɛ̀kìì-ɓìsay, à ghɛn ɓum ɓɛdɛŋ di ɓɛ rɛrɛrii ɓi kìɓàà, kɛ̀ɛ̀ com ki ɓɛɛ̀ kìkì. 4À kpaa ɓɔ lɛ: Kɛ̀ɛna kì salì ɓi dɛm yɛm̀, ǹɗi mìni ɓiì lèɓi yɛ̀ɛ ki ghɛɛ̀sɛɛ. 5Ɓɛ̀roɓɛ̀n ɓɛ pɛsɛ̀n ɓɛ kɛǹ ɓi dɛm. Nni ŋwaàdɛm anɛ̀n à kɛ̀ɛ̀dìghà kì kaà ɓɛ̀kìì-ɓìsay ɓi cààmɛ̀n à toroɓ, rì cààmɛ̀n à mɛ̀kɛ̀ɛ̀ mɛraa, à rom ɓɔ a dɛm yiì, à kàg lɔŋ ɓɔ mɛ̀lèɓ mɛ à kàkà ɓɛ̀ro ɓɛmbog. 6Di mɛ̀kɛ̀ɛ̀ mɛtaǹ à cɛŋkò à ti jàŋbog nni à kɛ̀ɛ̀dìtìghà kì kaà ɓɛ̀kìì-ɓìsay ɓɛdɛŋ, à tanɛ̀n ɓum ɓɛdɛŋ di ɓɛ rɛrɛrii girig ɓi kìɓàà, à tɔg ɓɔ lɛ: Ɓisuucɛ nnɛ ɓì ghagsii bimiɗ à ŋwos fɛ, kɛ̀ ɓi say? 7Ɓɛ̀roɓɛ̀n ɓɛ pɛɛ̀zì nyi lɛ: Mum àa reŋii ɓi ɓisi lɛ ti ki nyi kìsay. Fɔɔnnɛ à kpaaghà ɓɔ lɛ: Kɛ̀ɛna girig kìsalì ɓi dɛm yɛm̀.

8Yɛ̀ɛ cɛŋkò ki kpagà, ŋwaàdɛm a kpaa ŋwaànɛ àa m̀ɓègì ìkum wii lɛ: Regi ɓɛ̀kìì-ɓìsay ɓɛ̀cèm, u fa ɓɔ mɛ̀lèɓ maa, ù tumɛ̀n ɓi ɓɛ̀roɓɛ siitòn, ù siitɛ̀n ɓi ɓɛ̀roɓɛ ǹtonto. 9Fɔɔnnɛ ɓumɓɛ ɓɛ tumɛ̀ngà kìsay mɛkɛ̀ɛ̀ mɛtaǹ à cɛŋkò ɓɛ yughà, ɓɛ peeghi ɓɔ dolà, dolà. 10Yɛɛ ɓɛ̀kìì-ɓìsay ɓɛ ŋwaànɛ̀n à lokà kì terì ɓɛ yughà lɛ ɓɛɛ teɗ mɛ̀lèɓ maa, ɓɛ fekì lɛ, mɛ̀lèɓ maa mɛ ri ɓiì ceè mɛ ɓɛro ɓɛmbog; kìɓan kifog, ɓɛ falàkà lɔŋ ɓɔ dolà, dolà. 11Yɛ̀ɛ ɓɛ tekàkà dolà ìnɛn, ɓɛ tumɛ̀n rìŋɔ̀ŋɔ̀ŋì ɗi ŋwaàdɛm, 12ɓɛ kpaa lɛ: Ɓumɓɛ ɓaa siitɛɛ yì ɓɛ, ɓɔɔ sali lɔŋ hawò bog, wɔ̀ɔ̀ ki pee ɓɔ com kìfog rì ɓìsi ɓɛ tyàa cenɛɛ lɛ, rì kìfɔli, rì rìtɔ̀n ɓi bimiɗ à ŋwos! 13Nni ŋwaànɛ̀n à ɓàkà kìbog ki ɓi ɓɛ̀kìì-ɓìsay ɓɛǹ lɛ: Reŋkàŋ! Ǹkìi ɓì wɔ kìɓeɓtàg ki ǹɗèm. Mɛ̀ɛ ǹti, tyàa wooghrɛɛ jɛ̀ɛ̀ lɛ ǹɗì wɔ̀ ɓiì peè dolà? 14Wɔ̀ɔ̀ tera ɓà loò mɛ̀lèɓ mɔɔ, u ghaàgh wɔ̀ com kɔɔ. Mɛ̀ yɛɛ kɔni lɛ m̀peè ǹkìì-kìsay anɛ àa siitɛɛ kì yùu lɔŋ yɛ̀ɛ m̀pee wɔ̀. 15Ki ghɛɛ̀sɛɛ ɓì nya lɛ, ǹki rì ìkum wɛ̀m yɛ̀ɛ ki kɔni mɛ̀? Gìn ki ɓeɓi wɔ̀ yɛ̀ɛ ǹɗɔɔtɛɛ nɗem? 16Fɔlɔɔ nnɛ ɓum ɓɛ siitòn ɓɛ ɓiì ɓaà ɓum ɓɛ beèbɛ̀y, ɓɛ̀roɓɛ beèbɛ̀y ɓɛ ghay ɓum ɓɛ siitòn.

Yeesus à ɓùŋdii kìɓan ki riwù ɗìì, ɗì rìghèmɓɛ̀n ɗii

(Mk. 10:32-34; Lk. 18:31-34)

17Di Yeesus à ti lɛ a ɓɔg a Yorisalɛm, à tekà ɓɛ̀yilàg ɓii ǹtɛ̀ɗ rì ɓɛɓɛɛ̀ a dwìɗ, à kpaa ɓɔ di ɓɛ ti ɓi bee lɛ: 18Tì ɓɔɔgh yɛɛ lɛ a Yorisalɛm, jàŋ inɛ ɓɛ ɓiì faà Man à mum rì ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna, ɓɛ ren lɛ, ɓɛɛ wey nyi 19ɓɛ ki rì nyi ɓiì kàɓi ri ɓumɓɛ ɓɛ yin Ɓɛ̀yudɛ̀n lɛ ɓɛɛ ki lɛ ɓɛ fengì nyi, ɓɛ ɓog nyi kìtòn, ɓɛ ki kpan nyi ɓi kɔrɔs; kìɓan kifog, à ɓiì ghèmɓɛɛ ɓi ŋwos a kìraa.

Kìɓan ki jɛɛ ɓɔn ɓɛ Zeɓede à tɔkà Yeesus

(Mk. 10:35-45)

20Fɔɔnnɛ jɛɛ ɓɔn ɓɛ Zeɓede à tyòŋdɛ̀ngà Yeesus a nyoo ri ɓɔn ɓii, à ɓag mɛ̀ɗu ɓi zi lɛ a tɔg nyi kìɓan. 21Yeesus à tɔg nyi lɛ: La yɛɛ ri? Giɓ anɛ̀n à ɓàg nyi lɛ: Gherɛn lɛ kìɓɛ̀ɛ̀ kɛm̀ ki ɓɔɓti ki kɛɛ ki lɛ roànɛ à kɔ̀rì wɔ̀ ɓi weèlem, roàmbog à kɔ̀rì wɔ̀ ɓi kìmɛŋ yɛ̀ɛ ù rì ɓiì ɓaà ɓi kìlɔ̀ŋ kɔɔ. 22Yeesus à pɛ̀ɛ̀zì lɛ: Ɓi yii ɓi com ki ɓi tɔtɔg mɛ kìn. Ɓì rì lɛ ɓì cenɛ̀n lɛ ɓi nɔ ɓeŋ ànɛ mɛ̀ ǹɗì ɓiì nɔɔ̀? Ɓɛ̀roɓɛ̀n ɓɛ ɓaàg lɛ: Tì rì lɛ tì nɔ. 23Nni Yeesus à ɓàkà ɓɔ lɛ: Ki ri lɔŋ saaɗ lɛ ɓì rì ɓiì nɔɔ̀ ɓeŋ wɛ̀m, kìɓan kifog àa mɛ̀ yɛɛ ghɛɛ̀sɛɛ kì kalii ghɛn yɛɛ rì mɛ̀ ɓiì kɔ̀rii ɓi weèlem nsoò lɛ ɓi kìmɛŋ; mɛ̀kɔ̀ɔ̀ mɛǹ mɛ ri mɛ̀kɔ̀ɔ̀ mɛ ɓumɓɛ Tààta à pègsɛ̀ngà mɔ ɓisu wàà. 24Yɛ̀ɛ ɓɛ̀yilàg ɓɛmbog ǹtɛ̀ɗ ɓɛ wokà fɔlɔɔ, ɓɛ wog bim ri kìɓɛ̀ɛ̀ ki ɓɔn ɓɛ Zeɓede. 25Nni Yeesus à reŋìghà ɓɛ̀yilàg ɓɛ̀sɛ̀ɛ̀ ɓɛ̀cèm, à kpaa ɓɔ lɛ: Ɓi yii lɛ, mɛ̀fòm mɛ ɓilɔ̀ŋ mɛ ti mɛ pyèngì ɓum mis ɗì ǹcììzɛ̀n; ɓɛ̀rɛli-asu ɓaa ɓɛ lamɓàg ɓɔ, ɓɛ ceesàg gin mɔ̀ɔ. 26Ki ghɛɛ̀sɛɛ ɓi ki ɓaà fɔlɔɔ ɓi nyìinyìm wìn, kìɓan kifog, ŋwaànɛ ki kɔni lɛ a ɓa nlàmì ɓi nyìinyìm wìn, à ghɛ̀ɛ̀sɛɛ kì ɓaà ǹkìì-kìsay a ɓɛ̀ro ɓɛmbog. 27Fɔɔnnɛ ŋwaànɛ ki ɓiì kɔ̀ni lɛ a ɓa mìni ǹɗɛlì ànɛ asu, à ghɛ̀ɛ̀sɛɛ kì ɓaà ǹkpàn wiǹ. 28Fɔlɔɔ nnɛ Man à mum à yùghà ɓi ziinɛ, àa lɛ ɓum ɓɛɛ kiki nyi ɓìsay, à yùghà lɔŋ lɛ, a say ɓum, à ki fa cɛɓ kii lɛ, a kweɗ ɓum lɛɛ̀gwey.

Yeesus à wɔ̀ɔ̀zii ɓɛ̀ɗyaŋɗyàŋ ɓɛ ɓɛɛ̀rɛn a Zyeriko

(Mk. 10:46-52; Lk. 18:35-43)

29Yɛɛ ɓɛ pɛsɛngày a Zyeriko, coo kìtuu ki ɓum ki nɔɔ̀tìghà Yeesus. 30Nni ɓɛ̀ɗyaŋɗyàŋ ɓɛɓɛɛ̀rɛn ɓɛ ɓɛ kɔkɔ̀rìghà ɓi ŋwɔŋì wu bee, ɓɛ wokà lɛ Yeesus yɛɛ ri ɓi rìghaàgh, ɓɛ tumɛ̀n rìkpaa jɛ̀ɛ̀ aɗyòò lɛ: Wɔ̀ Man a Davit, wogha ɓà ɓisi nyiìghnyìg Kan. 31Gwìy ì ɓum ìnɛn ì kpɔmdɛ̀ngà ɓɔ lɛ, ɓɛɛ maàrɛn, kìɓan kifog ɓɔɔ teŋzì tì jɛ̀ɛ̀ aɗyòò ɓɛ kpaakpaa lɛ: Wɔ̀ Man à Davit wogha ɓà ɓisi nyìighnyìg Kan! 32Fɔɔnnɛ Yeesus à rɛlìghà, à regì ɓɔ, à tɔg lɛ: Ɓì kɔ̀ngi lɛ, ǹki mìni cɛ? 33Ɓɛ̀ɗyaŋɗyaŋ ɓɛ̀n ɓɛ kpaa nyi lɛ: Kan, ti kɔ̀ngi lɛ, ti ghɛnɛ̀n. 34Nni Yeesus à wokà ɓɔ nyìighnyìg, à kòm mis maa, ɓɛ ghas kì ghɛnɛɛ, ɓɛ ki nɔ̀ɔ̀ti nyi.

Currently Selected:

MATYOO 20: BAFNT

Highlight

Copy