MATYOO 27

Ɓɛ kɛɛ rì Yeesus yɛ̀ɛ Pilat

(Mk. 15:1; Lk. 23:1-2; Zŋ. 18:28-32)

1Yɛ̀ɛ duri i tangà, ɓɛ̀pìrɛɛtìrɛ̀ ɓɛgwey ɓɛ̀cèm rì ɓɛ̀sɛ̀ɛ̀mɛn ɓɛ kilɔ̀ŋ ɓɛ taŋzɛ̀n kìtɔ̀kɔ̀ lɛ ɓɛɛ wey Yeesus. 2Ɓɛ ɓaghà lɛ, ɓɛ mɛ kàŋ nyi bɛn, ɓɛ kɛǹ ɗì nyi yɛ̀ɛ gɔmìnà ànɛ lɛ Pilat.

Zyudas à sùrɛɛ bim inɛ ɓi kìɓan ki à kìghà

(Mkk. 1:18-19)

3Yɛ̀ɛ Zyudas ànɛ à kàɓkà Yeesus à ghɛngà lɛ, ɓɛ reni lɛ ɓɛɛ wey nyi, ǹɗem wii wu fa nyi bɛ̀lɛn, à lemgì rìkì ɗii à ki sugtiì kì pɛ̀ɛ̀zii tiraŋ̀ rìtin ɗì ǹtɛ̀ɗ ti ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ faghà nyi, 4à kpaa lɛ: Mɛ̀ɛ ǹkìi kìɓe lɛ mɛ̀ɛ ǹkàɓi bwaɓ yi ŋwaànɛ à rì kɛ̀ɛ̀ kìɓe; nni ɓɛ ɓakà nyi lɛ: Kìɓan kis ki yin miì, wɔ̀ nnɛ ki seesee. 5Zyudas à ɗyɛɛghà mɔ̀ɔ̀ni ɓi naà-Bɛ̀ll, à kpaŋ à kɛ̀n kì sùrɛɛ. 6Ɓɛ̀pìrɛɛtìrɛ̀ ɓɛgwey ɓɛ ɓadɛ̀ngà mɔ̀ɔ̀ni mɛ̀n ɓɛ ki kpaa lɛ: Ɓìdɔ̀gsɛna ɓis ɓi gherɛɛ ɓi lɛ, ti teɗ rìkuu ɗi mɔ̀ɔ̀ni ɗiǹ, ti ɓutɛn ɓi mɔ̀ɔ̀ni mɛ ɓi naà-Bɛ̀ll, lɛ mɛ rì mɔ̀ɔ̀ni mɛ bwaɓ. 7Ɓɛ nyolɛ̀ngà, ɓɛ yɔɔsì ŋwɔm wufog lɛ ɓɛɛ teɗ mɔ̀ɔ̀ni mɛ̀n, ɓɛɛ laàg kìden ki zi miì rì ǹ-yèŋì-fyòò, kɛɛ ɓa dɛm i zɔ̀ŋ ì ɓɛ̀kèn ɓɛ ɓum. 8Kɛɛ̀ki ɓɛ roòghà dɛm inɛ̀n lɛ dɛm i bwaɓ à kpaŋ gɛɛ̀nɛ. 9Fɔɔnnɛ jɛ̀ɛ̀ ìnɛ ǹkpaŋzì-ɓìɓan ànɛ lɛ Zyeremii à kpaaghà ì rongà; lɛ à kpaaghà lɛ: Ɓɛ tekà tìraŋ̀ rìtin ɗì ǹtɛ̀ɗ, bàlì ì mɔ̀ɔ̀ni ìnɛ ɓɔn ɓɛ Isirayɛl ɓɛ rengà ɓi ǹto wìì, 10ɓɛ ki fa mɔ̀ɔ̀ni mɛ̀n ɓi rìkòòsɛ̀n ɗi dɛm i ǹ-yèŋì-fyòò, lɔŋ yɛ̀ɛ Kan à siŋdɛ̀ngà mɛ̀.

Yeesus à rɛlii ɓɛ̀yɔ̀m ɓi mis mɛ gɔmìnà Pilat

(Mk. 15:2-5; Lk. 23:3-5; Zŋ. 18:33-38)

11Yeesus à rɛlìghà ɓɛ̀yɔ̀m ɓi mis mɛ gɔmìnà; gɔmìnà à tɔg nyi lɛ: Ù rì nya rìfòm ɗi Ɓɛ̀yudɛ̀n? Yeesus à ɓàg lɛ: Wɔ̀ yɛɛ kpaa. 12Wɔ̀lɛ, à ɓàkà ɓi com cààmɛ̀n ki ɓɛ̀pìrɛɛtìrɛ ɓɛgwey rì ɓɛ̀sɛ̀ɛ̀mɛn ɓɛ kpaaghà ɓìɓan ɓɛ raràɗ rì nyi. 13Nni Pilat à tɔkà min lɛ: Ù woogh ɓi ɓiɓan ɓi ɓumɓɛ ɓɛ kpaa ɓi ɓɛ ràɗ rì wɔ̀? 14Yeesus à mìnɛ̀n ɓìɓan ɓiǹ ɓìcèm, gɔmìnà à kuuràg lɛɛ̀gwey.

15Ɓi tìcàɓ ti Paskà tìcèm, gɔmìnà àa ǹti à càɗkì kìmbùŋ kìfog, ki ɓum ɓɛ kilɔ̀ŋ ɓɛ tɔɔgh lɛ, a caɗ. 16Ɓi cààmɛ̀n kiǹ, ŋwaàdɛŋ ànɛ ɓum lɛ̀ɛgwey ɓɛ yìghà, à ɓaghà kìmbùŋ ɗii lɛ: Ɓaraɓas. 17Nni Pilat à tɔkà ɓumɓɛ ɓɛ ɓaghà ɓɛ̀ taŋzɛn lɛ: Ghɛn innɛ ɓi kɔ̀nkɔn lɛ ncaɗ mìni, Ɓaraɓas gìn Yeesus ànɛ à rì ɗii lɛ Kiris? 18Pilat à tɔkà fɔlɔɔ lɛ à yighà lɔŋ saaɗ lɛ, ɓɛ sɔmɛ̀ngà Yeesus ɓi ǹɗemi-yàaka aɗyoo. 19Yɛ̀ɛ Pilat à ɓaghà di à kaka ɓi naà-ɓɛ̀yɔ̀m, nni gil a romgày mum lɛ a kpaa nyi lɛ: Kɔ̀ɔ ghàɓ gaa ìnɛ ɓi saaɗ à mum ànɛ̀n, lɛ ɓi-ru wu gɛɛ̀nɛ, ɓìdɛ̀ndɛm ɓyaa yeesii mɛ̀ lɛɛ̀gwey ɓisu wìì. 20Ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ toosìghà gɛmum ànɛ à ɓaghà wɔɔ lɛ ɓɛɛ tɔg Pilat lɛ a caɗ Ɓaraɓas, Yeesus ìnnɛ ɓɛɛ wey. 21Nni gɔmìnà à tòòghrɛ̀ngà, à tɔg ɓɔ lɛ: Ɓi kìɓɛ̀ɛ̀ ki ɓum ki, ghɛn innɛ ɓi kɔ̀nkɔn lɛ ncaɗ? Ɓɛ ɓaàg lɛ: Ɓaraɓas. 22Pilat à tɔgtì ɓɔ lɛ: Nghas̀ min la ri Yeesus ànɛ à rì ɗii lɛ Kiris? Ɓɔɔ̀cèm ɓɛ ɓaàg lɛ: Ɓɛɛ kpaǹ nyi ɓi kɔrɔs. 23Gɔmìnà à tɔgtì lɛ: Kìɓeɓtàg ki kiɓan aɗi kɛɛ̀ki à kìi? Ɓɛ syaadì tì rì ìtèɗ lɛ: Ɓɛɛ kpaǹ nyi ɓi kɔrɔs. 24Yɛ̀ɛ Pilat à ghɛngà lɛ, mɛ̀tɔɔ̀gtɔɔgh mii mɛ ghɛɓsii ɓi com, kìɓan kifog kìyoòyòò kɛɛ̀ kɛ̀nkɛn asu ǹkɛ̀nkɛnɛn, nni à tekà mɛ̀nig, à sògtɛ̀n ɓyàg ɓi mis mɛ gwìy ì ɓum ìnɛ ì ɓaghà wɔɔ, à kpaa lɛ: Ǹ-yin lɛ, ǹteɗ kìɓɛ̀kɛ ki ɓi bwaɓ yi saaɗ à mum ànɛ, kìɓan kii ki seesee lɔŋ mini. 25Nni kìlɔ̀ŋ kìcèm ki ɓakà lɛ: Bwaɓ yii yɛɛ kɛǹ ɓìsi ɓi ǹto, lɛ rì ɓìsi rì ɓɔn ɓis.

26Fɔɔnnɛ à càɗkà min ɓɔ Ɓaraɓas, à reɓsì lɛ ɓɛɛ ɓog Yeesus ɓi kìtòn, à fa min ɓɔ nyi lɛ ɓɛɛ kɛǹ nyi kì kpanì ɓi kɔrɔs.

27Ɓɛ̀sujàà ɓɛ gɔmìnà ɓɛ kɛngà rì Yeesus ɓi naa ì gɔmìnà, ǹɗaŋ waa wucèm wu kɔmzɛ̀n nyi. 28Ɓɛ sɔŋì Yeesus ɓìlàà, ɓɛ waasì nyi rìga à mɓàŋ lɛ pɔɔŋ. 29Fɔɔnnɛ ɓɛ togà tàm à ɓìlɔ̀ɔ̀, ɓɛ waasì nyi ɓi ǹto, ɓɛ teɗ kìsyòŋ, ɓɛ fa nyi ɓi càg ki weèlem, ɓɛ ɓag min nyi mɛ̀ɗu asu, ɓɛ feèfèngì nyi ɗi ɓɛɛ̀ kpaakpaa lɛ: Tì tògsii wɔ̀ rìfòm ɗi Ɓɛ̀yudɛ̀n. 30Fɔɔnnɛ ɓɛ tuutùùghà nyi tìtyɛɛ̀, ɓɛ teɗ kìsyòŋ, ɓɛ ɓoòɓòkì nyi ɓi ǹto. 31Yɛ̀ɛ ɓɛ ɓaghà di ɓɛ mɛ fengi nyi fɔlɔɔ, nni ɓɛ sɔŋìghà nyi rìga ànɛ ɓɛ waasìghà nyi, ɓɛ pɛɛ̀zì nyì kì waasii ɓilàà ɓii, ɓɛ kɛǹ min ɗi nyi lɛ ɓɛɛ kpan ɓi kɔrɔs.

Ɓɛ kpani Yeesus ɓi kɔrɔs aɗyòò

(Mk. 15:21-32; Lk. 22:26-43; Zŋ. 19:17-27)

32Yɛ̀ɛ ɓɛ kpaŋkpàŋgày ɓi naa ì gɔmìnà, nni ɓɛ tuusɛ̀ngà rì ŋwaànɛ a Sirɛn ɗii lɛ Simɔn, ɓɛ kaŋ̀ nyi lɛ a tɛg kɔrɔs à Yeesus. 33Yɛ̀ɛ ɓɛ kpagà ɓi jàŋ inɛ lɛ Gɔlgɔta, yɛɛ lɔɔ lɛ, jàŋ i kìtɛtɛg ki ǹto, 34nni ɓɛ faghà nyi mɛ̀rɔ̀g mɛ ɓɛ ɓigà rì com ki lòlolɛn lɛ a nɔ; yɛ̀ɛ à ɓoɓtìghà mɔ, à ɓèn kìnɔɔ̀.

35Yɛ̀ɛ ɓɛ kpangà nyi ɓi kɔrɔs, nnì ɓɛ ɓokà ǹtɔ̀ŋ lɛ ɓɛɛ kaɓɓɛn ɓìlàà ɓii. Ki kilɛ̀ngà fɔlɔɔ lɛ kɛɛ ɓa lɔŋ yɛ̀ɛ ǹkpaŋzì-ɓìɓan a kpaaghà lɛ: Ɓɛ kaɓɓɛ̀ngà ɓìlàà ɓyɛm̀, ɓɛ ɓog ǹtɔ̀ŋ ɓi jɔmpàs wɛ̀m. 36Fɔɔnnɛ ɓɛ kɔrìghà wɔɔ lɛ ɓɛɛ ɓeŋɓeŋ nyi. 37Ɓɛ kangà ǹtoo-kiɓan wu ɓɛ wolà nyi miì, ɓi kìɓoŋ ɓɛ foŋ nyi kɔ a ǹto; azi anɛ ɓɛ wolà nyi miì à ɓaghà lɛ: Roànɛ nnyɛɛ ri Yeesus, rìfòm ɗi Ɓɛ̀yudɛ̀n. 38Ɓɛ kpangà ɓɛ̀zyaàzyaa ɓɛdɛŋ ɓɛɓɛɛ̀ ǹɗaŋ ɗi Yeesus; roànɛ nyi ɓi weèlem, roànɛ ɓi kìmɛŋ.

39Ɓɛ̀ghaàgh-bee ɓɛ feèfèngàkà nyi, di ɓɛɛ̀ ghegheri ɗi mɛ̀to. 40Ɓɛ kpaakpàà lɛ: Wàànɛ u kalag lɛ, ù rì lɛ ù wààghì naà-Bɛ̀ll, ù ki pɛ̀ɛ̀zi yɔ̀ kitoŋì ɓi mɛ̀ru mɛraa, ghɛɓsi min wɛ̀ɛmiɗ, i ù yii lɛ ù rì Man à Bɛ̀ll, sɛnay ɓi kɔrɔs ànɛ̀n. 41Ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna, rì ɓɛ̀sɛ̀ɛ̀mɛn ɓɛ wɔwɔ̀là girig nyi di ɓɛɛ̀ kpaakpaa lɛ: 42Àa ǹghɛɛghɛ̀ɓsì ɓum ɓɛdɛŋ, wɔ̀lɛ kɛ̀ɛ ɓa ri bee inɛ, a ghɛɓsi nyimiɗ, à rì rìfòm ɗi Isirayɛl, nni a sɛn yì ɓi kɔrɔs di ti gherɛn nyi. 43À faghà ǹtyweeyi wii ri Bɛ̀ll, à kpaa lɛ nyii rì Man à Bɛ̀ll; nni ti ghɛǹ min ǹkòo Bɛ̀ll à rì lɛ, à gherɛ̀n lɛ a ghɛɓsi nyi ɓigomìnɛ. 44Fɔɔnnɛ ɓɛ̀zyaàzyaa ɓɛ ɓɛ kpangà ǹɗaŋ ɗi nyi, ɓɛ sɛɛ̀sɛ̀mgìghà girig nyi.

Yeesus à wii

(Mk. 15:33-41; Lk. 23:44-49; Zŋ. 19:28-30)

45Birìm ì sigtɛ̀ngà zi bimiɗ, à tumɛ̀n toroɓ, à kpaŋ mɛ̀kɛ̀ɛ̀ mɛraa. 46Yɛ̀ɛ mɛ̀kɛ̀ɛ̀ mɛraa à ɓaghà di à ti jàŋbog, nni Yeesus à nyàmgà jɛ̀ɛ̀ aɗyoo lɛ: <<Eli Eli, lama saɓagtani!>> Yɛɛ lɔɔ lɛ: Bɛ̀ll wɛ̀m, Bɛ̀ll wɛ̀m, wàa rinii mɛ̀ lɛ cɛ? 47Ɓum ɓɛdɛŋ ɓɛ ɓɛ ɓaghà wɔɔ ɓɛ wokà com ki Yeesus à kpaaghà, ɓɛ kpaa lɛ: A rereŋi Eli. 48Lɔŋ wɔɔ foo, kìbog ki ɓi ɓɔ ki kɛngày kì terì dɛ̀ɓ rì mɛ̀ree, ki ɓam̀ yɔ̀ ɓi kìsyòŋ, ki nɔg ɓi ɓìkpaakpam ɓi mɛrɔ̀g, ki nam̀ Yeesus lɛ à nɔ. 49Wɔ̀lɛ ɓɛ̀ro ɓɛmbog ɓɛ kpaaghà lɛ: Ka càra, ti ghɛǹ ǹkòo Eli à rì nyi ɓiì yùu kighɛɓsii.

50Yeesus à nyàmdìghà tì jɛ̀ɛ̀ aɗyòò, à maasì min.

51Fɔɔnnɛ coo kilàà kì ki ɓaghà ɓi naà-Bɛ̀ll, ki lanìghà ɓìlànà ɓiɓɛɛ̀, à tumɛ̀n yì aɗyòò, à kpaŋ azi; zi i nyɛ̀ŋɗɛ̀n, mɛ̀ɓan mɛ lanlàn. 52Zɔ̀ŋ yi ŋwarɛ̀ngà, ɓìloŋ ɓi ɓum ɓɛ Bɛ̀ll lɛɛ̀gwey, ɓɛ ɓɛ cuughà ɓi ghemɓɛ̀ngà, 53ɓi kpagìì ɓi zɔ̀ŋ, ɓi ɗiŋì ɓi bàn ìnɛ ì rì ǹtɛnɛn; ajɛ̀m ì rìghèmɓɛ̀n ɗi Yeesus ɓi ki rèsɛ̀ngà a kìgwey ki ɓum. 54Yɛ̀ɛ ǹkɔ̀mɛ̀n ɓɛ̀sujàà, rì ɓumɓɛ à ɓaghà ɓiì ɓèŋɓeŋi Yeesus rì ɓɔ ɓɛ ghɛngà di zi i nyɛ̀ŋɗɛɛ, ɓɛghɛɛdi ɓìɓan ɓimbog ɓi ɓi kilɛ̀ngà ɓiǹ, nni ɓɛ risìghà lɛɛ̀gwey, ɓɛ kpaa lɛ: Yeesus àa ǹɗì Man à Bɛ̀ll a tààkaà.

55Ɓɛ̀yiɓ ɓɛ ɓaghà wɔɔ lɛ̀ɛgwey, ɓɛ rɛlìghày fìràɓ, ɓɛ seesèè yì; ɓɛ̀yiɓ ɓɛ̀n, ɓɛ ɓaghà ɓɛ̀yiɓ ɓɛ ɓɛ kɛɛ̀kɛ̀ɛ̀ghà ǹɗaŋ ri Yeesus à tumɛ̀n a Galile, lɛ ɓɛɛ ghɛɛ̀ghɛ̀ɓsì nyi tìtom. 56Marii Madelɛn rì Marii à jɛɛ Zyag ɓɛɛ Yoosɛɓ, ri jɛɛ ɓɔn ɓɛ Zeɓede ɓɛ ɓaghà ɓi bàlì ì ɓɛ̀yiɓ ɓɛǹ.

Ɓɛ ɓomi Yeesus

(Mk. 15:42-47; Lk. 23:50-56; Zŋ. 19:38-42)

57Yɛ̀ɛ cɛŋkò ki kpagà, guŋgum a mum àdɛŋ ànɛ a Arimate ɗii lɛ Yoosɛɓ, à yùghày, lɛ nyi girig à ɓaghà ǹ-yilàg à Yeesus. 58Nni à kɛ̀ngà yɛ̀ɛ Pilat, à lɔn nyi kìloŋ ki Yeesus, Pilat à kpaa lɛ ɓɛɛ fa nyi kɔ̀. 59Fɔɔnnɛ Yoosɛɓ à tekà kìloŋ kiǹ à lɔg kɔ rì aloyà à nyɔn 60à kɛ̀n min kɔ kìnɔ̀ŋzii ɓi zɔ̀ŋ ì nyɔn ìnɛ ɓɛ soɓkà nyi ɓi rìɓan; fɔɔnnɛ à ɓiŋzìghà coo gɔ̀g ɓi ŋwɔm wu zɔ̀ŋ, à sìm yɔ̀ miì, à pɛ̀sɛ̀n à ghaàgh. 61Marii Madelɛn, rì Marii àmbog ɓɛ ɓaghà wɔɔ, ɓɛ̀kɔ̀kɔriyɛn yi ɓɛg àmbog, ɓɛ pɛ̀ɛ̀zìì mis rì zɔ̀ŋ.

Ɓɛ foŋi ɓɛ̀sujàà a zɔ̀ŋ lɛ ɓɛɛ ɓeŋ̀ɓeŋ yɔ̀

62Ɓi duri tana, yɛɛ lɔɔ lɛ ɓi ŋwos anɛ à ɓɔ̀ɓkà gòn inɛ ɓɛ m̀ɓuŋàg Saɓàt miì, ɓɛ̀pìrɛɛtìrɛ̀ ɓɛgwey, rì Ɓɛ̀fàrìzyɛŋ ɓɛ ɓakà ǹɗaŋ, ɓɛ kɛǹ yɛ̀ɛ Pilat 63ɓɛ kpaa nyi lɛ: Gɔmìnà àgwey, tì yitii lɛ pwààpwaà à mum ànɛ̀n àa ǹkpaa di à kaka cem lɛ: Ajɛ̀m ì mɛ̀ru mɛraa, ǹɗì ɓiì ghèmɓɛɛ yi a ɓìloŋ. 64Kali min, ɓɛɛ ɓeŋ̀ɓeŋ zɔ̀ŋ à kpaŋ mɛ̀ru mɛraa kɛ̀ɛ̀ fɔlɔɔ ɓɛ̀yilàg ɓii ɓɛ ri ɓiì yùu ki fyaasii kiloŋ kii lɛ ɓɛɛ tumɛn rìkpaakpàà ɓi kìlɔ̀ŋ lɛ: Àa ghèmɓɛɛ. Rìkuu ɗi pwàà ɗiǹ ɗi ɓiì ɓeɓtɛɛ ɗi cee ɗi ǹtonto. 65Pilat à kpaaghà ɓɔ lɛ: Ɓɛ̀sujàà ɓɛɛ̀ɓɛ̀n kɛ̀ɛna, ɓi woŋzi ɓɔ yɛ̀ɛ ɓɛ rì lɛ ɓɛ, ɓèŋ zɔ̀ŋ lɛ syeesyee. 66Fɔɔnnɛ ɓɛ kɛngà min, ɓɛ konàg kì rɔ̀mi gɔ̀g ìnɛ ɓi ŋwɔm wu zɔ̀ŋ, ɓɛ ki rɛsi ɓɛsujàà wɔɔ lɛ, ɓɛɛ ɓeŋ̀ɓeŋ yɔ̀.

Currently Selected:

MATYOO 27: BAFNT

Highlight

Copy