MARIKUS 15

Ɓɛ kɛɛ rì Yeesus yɛ̀ɛ Pilat

(Mt. 27:1-2, 11-14; Lk. 23:1-5; Zŋ. 18:28-38)

1Rì sariwa lɛ ɓuɓ, ɓɛ̀pìrɛɛtìrɛ̀ ɓɛgwey ɓɛ taŋzɛ̀ngà rìghàdà rì ɓɛ̀sɛ̀ɛ̀mɛn, rì ɓɛ̀rèsàg-ɓìdɔ̀gsɛna, rì ɓum ɓɛ̀cèm ɓɛ ɓi Sànèdìrɛŋ, lɛ ɓɛɛ teɗ ǹɗɛli. Fɔɔnnɛ ɓɛ kagà Yeesus bɛn, ɓɛ kɛǹ ɗì nyi, ɓɛ fa rì Pilat. 2Nni Pilat à tɔkà nyi lɛ: Ù rì nya rìfòm ɗi Ɓɛ̀yudɛ̀n? Yeesus à ɓàg nyi lɛ: Wàa kpaa. 3Ɓɛ̀pìrɛɛtìrɛ̀ ɓɛgwey ɓɛ kpaaghà ǹkuni ɓiɓan di ɓɛɛ̀ ràraɗ ɗi nyi. 4Nni Pilat à tɔgtìghà nyi lɛ: Ù ɓàagh ɓi gɛ ɓìɓan anɛ ɓumɓɛ ɓɛ kpaa ànɛ, ɓɛ raɗ rì wɔ̀? 5Nni Yeesus à mìnɛ̀ngà, ki yeesì Pilat.

6Ɓi tìcàɓ tì Paskà tìcèm, Pilat àa ǹti à càɗkì kìmbuŋ kìfog, ki ɓum ɓɛ tɔɔgh lɛ a caɗ. 7Fɔɔnnɛ ŋwaàdɛŋ lɛ Ɓaraɓas, à ɓaghà ɓi naà-zày, nɗaŋ rì ɓum ɓɛdɛŋ lɛ ɓɛ wolà mum di ɓɛ ɓigtii wɛ̀y ri kìlàmì. 8Nni kìtuu ki ɓum ki pɛsɛ̀ngà, kì ɓɔg yɛ̀ɛ Pilat ɓɛ tɔg nyi lɛ: Kìya ɓìsi kìɓan ki ù ti ù kìlàg ɓisu wis bèg yìcèm. 9Pilat à tɔg ɓɔ lɛ: Ɓi kɔ̀nkɔn lɛ ǹcàɗ mìni rìfòm ɗi Ɓɛ̀yudɛ̀n? 10Pilat à tɔkà fɔlɔɔ lɛ à yighà lɛ ɓɛ̀pìrɛɛtìrɛ̀ ɓɛgwey ɓɛ sɔmɛ̀ngà Yeesus ɓi ǹɗemi-yàaka aɗyòò. 11Wɔ̀lɛ ɓɛ̀pìrɛɛtìrɛ̀ ɓɛgwey ɓɛ toosìghà gɛ mum ànɛ̀n lɛ ɓɛɛ tɔg Pilat lɛ, Ɓaraɓas nnɛ a caɗ. 12Nni Pilat à tòòghrɛ̀ngà tì, à tɔg ɓɔ lɛ: Ɓi kɔ̀nkɔn lɛ ǹghay la ri roànɛ ɓì ti ɓì regàg lɛ rìfòm ɗi Ɓɛ̀yudɛ̀n? 13Ɓɔɔ̀cèm ɓɛ ɓiìtì jɛ̀ɛ̀ aɗyoo lɛ: Kpana nyi ɓi kɔrɔs. 14Pilat à tɔg ɓɔ lɛ: Cɛ à kìi? Ɓɛ teŋzì tì jɛ̀ɛ̀, ɓɛ kpaa lɛ: Kpana nyi ɓi kɔrɔs. 15Yɛ̀ɛ Pilat à kɔ̀ngà lɛ à puɓsi ɓɔ ǹɗem, fɔɔnnɛ à càɗkà Ɓaraɓas. A reɓsì lɛ ɓɛɛ ɓog Yeesus ɓi kìtòn, à fa min ɓɔ nyi, lɛ ɓɛɛ kɛǹ nyi kì kpanì ɓi kɔrɔs.

Ɓɛ waasii Yeesus tàm à ɓìlɔ̀ɔ̀

(Mt. 27:27-31; Zŋ. 19:2-3)

16Ɓɛ̀sujàà ɓɛ tekà Yeesus, ɓɛ kɛǹ ɗì nyi ɓi kìkpanà ki ɓɛyɔ̀m ki ɓi naa ì gɔmìnà. Ɓɛ reŋɗɛ̀n yì ǹɗaŋ wu ɓɛsujàà wùcèm. 17Ɓɛ waasì Yeesus ɓìlàà ɓi ɓàŋ lɛ pɔɔŋ, ɓɛ saàgh nyi tàm à ɓìlɔ̀ɔ̀ ànɛ ɓɛ togà ɓi ǹto. 18Ɓɛ tumɛ̀n min nyi rìkpɔŋkpɔ̀ŋ ɗi ɓɛɛ̀ kpaakpaa lɛ: Tì tògsii wɔ̀ rìfòm ɗi Ɓɛ̀yudɛ̀n. 19Ɓɛ ɓoòɓòkì nyi kìsyòŋ ɓì ǹto, ɓɛ tuùtùùghì nyi tìtyɛɛ̀, ɓɛ ki ɓaɓag nyi mɛ̀ɗu asu yɛ̀ɛ ɓɛɛ̀ kali lɛ ɓɛɛ̀ ɓɔɔɓɔ̀gsì nyi. 20Yɛ̀ɛ ɓɛ ɓaghà di ɓɛ mɛ fengi nyi fɔlɔɔ, nni ɓɛ pisìghà nyi kìlàà ki ɓàŋ ki ɓɛ waasìghà nyi, ɓɛ pɛɛ̀zì nyi kì waasii ɓilàà ɓii, ɓɛ kɛǹ min ɗi nyi lɛ ɓɛɛ kpaǹ ɓi kɔrɔs.

Ɓɛ kpani Yeesus ɓi kɔrɔs aɗyòò

(Mt. 27:32-44; Lk. 23:26-43; Zŋ. 19:17-27)

21Ŋwaàdɛŋ ànɛ ɓi kìlɔ̀ŋ ki lɛ Sirɛn ɗii lɛ Simɔn à ghaghàghìyà wɔɔ, di à rìì a dɛm, àncèm à ɓaghà seŋi Alɛgsaŋdirɛ ɓɛɛ̀ Rufus. Ɓɛ̀sujàà ɓɛ kagà nyi lɛ a tɛg kɔrɔs à Yeesus. 22Nni ɓɛ kɛngà rì Yeesus ɓi kòdò ànɛ lɛ Gɔlgɔta, yɛɛ lɔɔ lɛ, jàŋ i kìtɛtɛg ki ǹto. 23Ɓɛ mɛɛ̀ kìghà lɛ ɓɛɛ nɔsi nyi mɛ̀rɔ̀g mɛ mɛ ɓaghà mɛ ɓiŋɛn ri com kidɛŋ lɛ miìr, wɔ̀lɛ à nɔghà ɓi. 24Fɔɔnnɛ ɓɛ kpangà min nyi ɓi kɔrɔs ɓɛ kaɓɓɛ̀n ɓìlàà ɓii di ɓɛ mɛ pìg ntɔ̀ŋ lɛ ɓɛɛ yi kìlàà ki mum ǹcèm à ghɛ̀ɛ̀sɛɛ kì terì. 25Ɓɛ kpangà nyi ɓi kɔrɔs ɓi mɛ̀kɛ̀ɛ̀ taànìn à sariwa. 26Com ki ɓɛ kangà lɛ ɓɛɛ resi ǹto wu kiɓan wu ɓɛ woli nyi miì ki ɓaghà lɛ: À rì rìfòm ɗi Ɓɛ̀yudɛ̀n. 27Ɓɛ kpangà nyi ǹɗaŋ ri ɓɛ̀zyaàzyaa ɓɛɓɛɛ̀ lɛ, roànɛ nyi ɓi weèlem, roànɛ nyi ɓi kìmɛŋ. [ 28Ki kilɛ̀ngà fɔlɔɔ lɛ kɛɛ ɓa lɔŋ yɛ̀ɛ ki ri kì kànɛn lɛ, ɓɛ fogà nyi ɓi bàlì ì ɓɛ̀zyaàzyaa.] 29Ɓɛ̀ghaàgh-bee ɓɛ sɛɛ̀sɛ̀mgìghà nyi di ɓɛɛ̀ ghegheri ri mɛ̀to, ɓɛ kpaakpàà lɛ: Di ǹghɛɛ fè! wàànɛ u kalag lɛ, ù rì lɛ ù waà naà-Bɛ̀ll, ù ki pɛ̀ɛ̀zi yɔ̀ kìtoŋì ɓi mɛ̀ru mɛraa, 30ghɛɓsi min wɛ̀ɛmiɗ, u sɛǹ yì ɓi kɔrɔs ànɛ̀n! 31Ɓɛ̀pìrɛɛtìrɛ̀ ɓɛgwey girig rì ɓɛ̀rèsàg-ɓìdɔ̀gsɛna ɓɛ wɔwɔ̀là nyi wɔɔ ɓɔ rì ɓɔ, ɓɛ kpaakpàà lɛ: Àa ǹghɛɛghɛ̀ɓsì ɓum ɓɛdɛŋ, wɔ̀lɛ kɛ̀ɛ ɓa rì bee inɛ lɛ a ghɛɓsi nyimiɗ. 32Kiris ànɛ àrì rìfòm ɗi Isirayɛl a sɛǹ yì ɓi kɔrɔs ɓigomìnɛ, ti ghɛǹ di ti gherɛn nyi. Ɓumɓɛ ɓɛ kpangà nɗaŋ ri Yeesus, ɓɛ sɛɛ̀sɛ̀mgìghà girig nyi.

Yeesus à wii

(Mt. 27:45-56; Lk. 23:44-49; Zŋ. 19:28-30)

33Birìm ì kìghà zi bimiɗ, à tumɛ̀n toroɓ, à kpaŋ mɛ̀kɛ̀ɛ̀ mɛraa. 34Yɛ̀ɛ mɛ̀kɛ̀ɛ̀ mɛraa à kpagà, nni Yeesus à nyàmgà jɛ̀ɛ̀ aɗyoo lɛ: Elɔy, Elɔy, Lama saɓagtani, yɛɛ lɔɔ lɛ, Bɛ̀ll wɛ̀m Bɛ̀ll wɛ̀m, ù rinii ɓà mɛ lɛ cɛ? 35Ɓum ɓɛdɛŋ ɓɛ ɓɛ ɓaghà wɔɔ, ɓɛ wokà com ki Yeesus à kpaghà ɓɛ kpaa lɛ: Ɓì ghɛɛ yɛ̀ɛ a rereŋi Eli? 36Nni kìbog ki ɓi ɓɔ ki kɛngà rì mɛ̀ree, kì nɔg dɛ̀ɓ ɓi ɓìkpaakpam ɓi mɛrɔ̀g, ki ɓam̀ dɛ̀ɓ ìnɛ̀n ɓi kìsyòŋ ki nam̀ Yeesus lɛ a nɔ, di kɛɛ̀ kpaakpaa lɛ: Càrina ti ghɛǹ ǹkoò Eli à ɓiì yùu lɛ a kɔsi nyi ɓi kɔrɔs. 37Yeesus à nyàmgà jɛ̀ɛ̀ aɗyoo, à maasì. 38Fɔɔnnɛ coo kilàà ki ki ɓaghà ɓi naà-Bɛ̀ll ki lanìghà ɓìlànà ɓiɓɛɛ̀, à tumɛ̀n yì aɗyoo à kpaŋ azi. 39Yɛ̀ɛ ǹkɔ̀mɛ̀n-ɓɛ̀sujàà ànɛ a ɓaghà ǹɗɛrɛliyɛn a pɛ̀ɛ̀zìì mis ɗì Yeesus à ghɛngà di Yeesus à mɛ maasi fɔlɔɔ, nni à kpaaghà lɛ: Ŋwaànɛ àa nɗì lɔŋ Man à Bɛ̀ll a tààkaà. 40Ɓɛ̀yiɓ ɓɛdɛŋ ɓɛ ɓaghà girig wɔɔ, ɓɛ seesèè yì fìràɓ. Ɓɛ ɓaghà lɛ: Rì Marii Madelɛn, rì Marii à jɛɛ Zyag à ŋwɔɓti ɓɛɛ Zyoozɛ, rì Salome. 41Ɓɛ̀yiɓ ɓɛǹ ɓɛɛ nɔɔnɔ̀ɔ̀tìghà Yeesus ɓɛ kikì nyi tìtom cààmɛ̀n ki à ɓaghà a Galile rì kìtuu ki ɓɛ̀yiɓ kim̀bog ki ki ɓɔ̀kày rì nyi a Yorisalɛm.

Ɓɛ ɓomi Yeesus

(Mt. 27:57-61; Lk. 23:50-56; Zŋ. 19:38-42)

42Yɛ̀ɛ cɛŋkò ki ɓaghà ɗi ki ti, ki ki ɓa lɛ, ŋwos anɛ̀n innɛ ɓɛ ghɛɛsɛ̀ngà kì pègsɛɛ ticàɓ, yɛɛ lɔɔ lɛ di Saɓàt à rì yɛ̀ɛ rìduri, 43Yoosɛɓ, ŋwaànɛ a Arimate à yùghày; à ɓaghà kìtèetèɗ ki mum ki ɓi Sànèdìrɛŋ; nyimiɗ a ɓoŋɓòŋgà girig kìlɔ̀ŋ ki Bɛ̀ll; à ghɛɛsìghà lɛ a kɛǹ yɛ̀ɛ Pilat, à lɔǹ nyi kìloŋ ki Yeesus. 44Pilat à kuuràkà yɛ̀ɛ à wokà lɛ Yeesus à mɛ wu, fɔɔnnɛ à reŋìghà ǹkɔ̀mɛ̀n-ɓɛ̀sujàà, à tɔg nyi ǹkòo cààmɛ̀n ki ɓaghà di ki mɛ ghaàgh lɛɛ̀gwey yɛ̀ɛ à maasìghà. 45Yɛ̀ɛ ǹkɔ̀mɛ̀n-ɓɛ̀sujàà à kpaaghà nyi lɛ Yeesus àa wii, fɔɔnnɛ à kpaaghà lɛ Yoosɛɓ a teɗ kìloŋ kii. 46Yoosɛɓ à làkày aloyà, à kɔ̀sìì kìloŋ ki Yeesus ɓi kɔrɔs, à lɔg kɔ rì aloyà ànɛ̀n, à nɔ̀ŋzì kɔ ɓi zɔ̀ŋ ìdɛŋ ìnɛ ì ɓaghà ǹsoɓɛn ɓi gɔ̀g. Fɔɔnnɛ à ɓiŋzìghà min gɔ̀g ìdɛŋ ɓi ŋwɔm wu zɔ̀ŋ. 47Marii Madelɛn, rì Marii à jɛɛ Zyag, ɓɛ seesèèghà jàŋ ìnɛ ɓɛ ɓomgà nyi.

Currently Selected:

MARIKUS 15: BAFNT

Highlight

Copy