TƆMSYAADƐ WOOSƐ 1
1
TƆMSYAADƐ WOOSƐ Ɗɛɛrwol eesim yɔ Luka b i̧i̧ s Teyofil TƆMSYAADƐ WOOSƐ 1
1Teyofili, A ɗɛɛrwol mi biitir bɔ gedu, mi fɔ̀k hinyɔ Yeesu yɛɛl gi woo sɛw gi wɛɛ gi goks doodɛ, 2tuur a ɔ̧tyɔ Bɛt ha̧sig gi dɔɔnig a bɛtha gedu. Yeesu goks dood wɔ sɛ̧ɛ̧hi an tɔms-yaadɛ ɔ̧ɔ̧ hinɛ hi Bɛt Mɔkilɔ tɛŋkɔ, ɓɔr gi ɔɔ dɔɔk a bɛtha. 3Yɔ yɔ̧ nɛ ya̧a̧r gi wɔrɔ, wɛɛz nɛ za̧a̧til zunsihi muutɔ hi hinmɛksingoya kittɔnɔ. Midil dɔɔ kittɔnɔ hi teesdu, waa ɔ̧tɔ dumbili nasɔ an gi zunsihi bɛttɔnɔ a gi za̧a̧tilyɔ, wɛɛ gisihi book Bɛt wáát dɔglɔ nɔɔha. 4Yɔ Yeesu gi lekhin hi hiya, raahi
a bɔnɛ hɛml hi Urusalima, oon hinyɔ Baa be raa a gi gaazinɛ anyɔ be raasin nɛko. 5Wɛɛ raa a Yohana da hotin dood Bɛtmɛm hi mɛmɛ, yɛrɛ nɛya, gɔ gi am kaasi, nɛ́ dag Bɛtmɛm hi Bɛt Mɔkilɔ. Anbɔ.
6Hɔnɛyɔ tɔmsya wɔ hi mɔksɔ hi ɛr Yeesu
a Waar i, ɔ̧tɔ tuur ma an mɔ wɛnz Israhila hɛbtɔ waar ums a dood Israhilaya wɔ hi naan du ya?
7Yeesu wɛɛ ta̧a̧hi
a taa an nɛɛ nɛ mɛɛ hin wɔrɔ sɛw ɔ̧tya̧, zaabe, lɛlya̧ riikɔ. Baa be gii dɛ̧ɛ̧ ɔ̧tya̧ hi zulɔ. 8Yɛrɛ nɛya, nɛ dag tɛŋko, a ɔ̧tyɔ Bɛt Mɔkilɔ gɔ gi zaa nɛ zulha duge, nɛ wɛɛ segyaadɛ benɛ dihɛ a Urusalima, a Yahuduya hi Samariya hɛbt du sɛw, gi da gi tuur a waal doorum lɛlɛ.
9Yɔ Yeesu dɔg nɛ hin bɔrɔ anbɔ ɗund dɔɔ bɛtha, hi gig seeko, kuus za wɛɛ yaatig hi lɔlgbar hí gbɛ̄nig zaa ma gɛ. 10Yɔ hi gbork lɔlseek a bɛtha, yɔ Yeesu gi reko, walɛ gban buudɛya eerɛ hi midz hi er hi dɔŋdi 11hi warihi
a walɛ Galileya wɛ, nɛ er nɛ seek nɔ a bɛtha hɛ? Yeesu gii ha̧s a nɛ teesdu gi dɔɔk a bɛtha, gɔgi wɛɛzugo, gi siz a bɛtha anyɔ nɛ gbɛnig rekɔ her.
12Tɔmsya wɔ hi fu̧u̧z a Kɔ̧ɔ̧b Ga̧a̧t ha, hi wɛɛz a Urusalima. Ga̧a̧t bɔ sɛ̧btin hi Urusalima, kaasi.
13Yɔ hi wɛɛzɔ hi dɔɔ a luk hɔɔt bɔ gɔ hi waak du a buuɔ bɔ wɛɛha gedu. Doodya̧ gɛrɛ: Piyɛr , Yohana, Yakuba, Andrɛ, Filib, Tumas, Bartelemi, Mata, Halfa waawal Yakuba, Simɔŋ Hɛbtwaa Gabs bɔ, hi Yakuba waawal Yahuda. 14Wɔrɔ sɛw hi waak Bɛt zɔ̧k lɛlgbun hi kpoosya̧ gbunu, hi nɛɛd wɔ, hi Yeesu nɔɔtɔ Mariyama, hi Yeesu yɛ̧ɛ̧dɛ ɔ̧ɔ̧. 15A ɔ̧tɔge yɔ dood Yeesu ɗɔbsigya wɔ hi mɔksɔ, kitigya̧ sɛ̧ɛ̧b yɔ̧ɔ̧lɔ nɔɔn-gbunu, Piyɛr ɗuk hi teesdu raahi:
16a yɛ̧ɛ̧dɛ be wɛ, rii an hinyɔ Bɛtdɔglɔ dɔgɔ gi tuur anyɔ Bɛt Mɔkilɔ da dɔg nɛ amntɔnɔ a Dawda ya̧a̧ du a Yahuda za̧a̧nyɔ dos nɛ dood wɔ gɔ hi wa̧a̧ Yeesu gbɔnɔ gi zulha. 17Yahuda gi nɛ gbun wiinɛ a ɛmbil wi bɔ gedu. Wɛɛ dag nɛ Bɛtwoos bɔ ɔnɛ an wi wootin elo.
18Wɛɛ zeb bak za hi hinbɔbtin yɔ woo nɛ tusɔ. Mat gedu wɔrɔ, muulɔ foo teesdu ha̧dɔ wɔ sɛw hi gubr lakɛ. 19Dood Urusalimaya wɔ sɛw hi kɛm dɔglɔ hɛw. Ya̧a̧nɛ hi el bak bɔ a hi ya̧a̧boon du a Hakeldama, raakɔ a ga̧a̧mbako.
20Ya̧a̧nɛ hi bi̧i̧ nɛ a Zaabura du a an raaɔ gi wɛɛ beemɛ, bɔ doo gi waa du. Hi wɛɛ hi bi̧i̧ ɓɛ a an za̧a̧n za gi yɛr woosɔ bɔ.
21-22Piyɛr wɛɛ raa
a yɔ anbɔ, wɛ woo anyɔ Bɛt ɗɛɛrwolɔ raa. Gi an wi dag dood wɔ hi sɔkiw ɔ̧t nuŋg sɛw a Yeesu waabilɔ bɔ gedu zaaɔ. Yɔ gi za̧a̧nyɔ baariw sɔkig a ɔ̧t yɔ Yeesu dag Bɛtmɛm a Yohana naan duge, gi tuur a ɔ̧tyɔ Bɛt ha̧sig a wɛ teesdu gedu. Gi an za̧a̧nɔ gi ɔks hi wiya a Yahuda kalɛ an gi wɛɛ Yeesu rɛmtigɔ segya.
23Yɔ anbɔ hi zuun dood eerɛ: Yusufu yɔ nuŋgɔ zaa a Barsabas, zaa a Yustus, hi Matiyas du hɛw. 24Hi wɛɛ hi zɔ̧b Bɛt hi zulha:
a Waar i, mɔɔ yɔ mɔ mɛɛ dood kpoos sɛw, zuunum zaa gbun yɔ mɔ herig a dood eerɛ wɛrɛ hi teesdu, 25an gi yɛr tɔmsya wooslɛl bɔ Yahuda ɔɔ gi rek a lɛl ɔnɛ yɔ riisig ge.
26Hi her doo gbunu. Herkɔ bɔ hi woo hinɔ an subudyɔ. Subud bɔ le Matiyas giya. Matiyas ɔks gɔ ma hi tɔmsya zaadɛ koobl daa gbun wɔ.
Currently Selected:
TƆMSYAADƐ WOOSƐ 1: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
