LUKA 12

1Yɔ hin wɔrɔ hi daak sɛwi, saalzanɔ kittɔnɔ kittɔnɔ hi mɔksugo hi wɛɛ hi ɗa̧a̧tingo dɔɔ, Yeesu yɛɛl walɛsɛrɛ ɔ̧ɔ̧ wɔ raaki:

a oon zul nɛ hi Farisaya wɔ hɛ̧ɛ̧tya̧ wɔ gi kpoos mɛlya ha̧a̧lɛ. 2Hinza gɛdya taa an hi ɔɔg midigɔ, wɛɛ hinza yaatilya taa an hi ɔɔg mɛksigɔ be. 3Ya̧a̧nɛ, hinyɔ nɛ dɔg a lɛlwil du hi lag hinɔ lag a lɛlgaal du. Wɛɛ hinyɔ nɛ raatin tɔn du a luk du, hi wɛɛ hi dɔg hinɔ dɔg a luk zulha.

4Yeesu raa a be gisin raako, nɛɛ saam be wɛ:

bɔ hoob gi ha̧a̧nɛ dood wɔ hi gbɔŋk muulɛ. Wɛɛ gɔ kuudu hi ɗɛ̄ɛ̄ hinza gɔk gɛ. 5Bé zunsin za̧a̧nyɔ hoob gɔ gi ha̧a̧nge. Hoob ha̧a̧nɛg Bɛto, za̧a̧nyɔ gin tɛŋk an gi gbɔmɔ, kuudu gi wɛɛ gi yaa laazɛŋk du. Hɔɔ, be raasinɛ a hoob yɛgi ha̧a̧n za̧a̧nɔ giya. 6Wɛ taa zebtig zaw nɔɔnɛ hi tus dɛɛt eer ya? Yɛrɛ nɔɔs wɔrɔ zaaya̧ gbun hi zɛ̄nig a Bɛt muutdu gɛ. 7Susug nɛ wɔ zulha hɛw Bɛt ɓɛrihi sɛw. Bɔ hoob gi ha̧a̧n ma. Nɛ gis Bɛt hinɗɔbt daar zaw kittɔnɔ daarɔ.

8Be wɛɛ be gisin dɔko a za̧a̧nyɔ gɔ gi dɔg dɔgl be a dood muut du, Za̧a̧n Waa bɔ gii gi dɔg za̧a̧nɔ dɔglɔ a Bɛt walɛsɛrɛ ɔ̧ɔ̧ muutdu be. 9Wɛɛ za̧a̧nyɔ gɔ gi faabe a dood muutdu, Za̧a̧n Waa bɔ gii gi faa za̧a̧nɔ a Bɛt walɛsɛrɛ wɔ hi muutdu be. 10Wɛɛ za̧a̧nyɔ gɔ gi boo ya̧a̧ha̧a̧l a Za̧a̧n Waa bɔ gi zulha, Bɛt gi bitsig ya̧a̧ha̧a̧lɔ bɔ boo dɔglɔ. Yɛrɛ za̧a̧nyɔ gɔ gi boo ya̧a̧ha̧a̧l a Bɛt Mɔkil zulha, Bɛt taasig ya̧a̧ha̧a̧lɔ yɔ boo bisugo.

11Gɔ hi wà̧à̧nɛ hi ka̧nɛ a Yahuduyaadɛ mɔksilya̧ luk wɔ gedu hi a waar ɛ gbɔlɛ wɔ hi muutdu, hi a dood gbɔlɛ wɔ hi muutdu, bɔnɛ zɛks zul nɛ a hinyɔ gɔ nɛ dɔg geha. Bɔnɛ mɔkɔ a bé goo dɔglɔ a ri? Zaabe a be dɔg hinɔ a nɔ? 12Yɔ anbɔ, Bɛt Mɔkilɔ gii gi goksin hinyɔ gɔ nɛ dɔg ɓɔrbɔ.

13Za̧a̧n za raa Yeesu a saal tees bɔ gedu:

a Hingokya , raam yɛ̧ɛ̧be gi gɛ̧ɛ̧ rɔɔs bɔ hi ɔsiwi hi beya.

14Yeesu ta̧a̧ge:

a walyɔ, bɔ gbaab dɔgl-gbɛɛrikya nɛ hi rɔɔs nɛ gɛ̧ɛ̧kya nɔ?

15Wɛɛ raahi:

a oon zul nɛ bɛttɔnɔ hi rɔɔs ɗɔkum yɔ gi sɛw. Rɔɔs ɗɛ̄ɛ̄ an gi oo doo za̧a̧tig gɛ, an dag nɛ rɔɔsɔ an nɔ hɛw.

16Wɛɛ dɔksihi ya̧a̧daaniki:

a doo za rɔɔsya giro, gi dak lees a bakɔ wɔ bal gedu gbɔɔltɔnɔ. 17Wɛɛ mɔk gi kpoos du, raa: a be woo nɔ yɔ? Wɛɛ be taan lɛlɛ an be mɔks lees be wɔ du be! 18Raa: a hinyɔ gɔ be gɔ gɛrɛ: ɔbe ɛ̧br bil be wɔ, be wɛɛ be wɔm bil gbɔlɛ kittɔnɔ, be mɔks tot be sɛw hi lees be wɔ sɛw a gedu. 19Kuudu be wɛɛ be raa ma kol be: a kol be, mɔ gin rɔɔs gbɔɔltɔnɔ an mɔ za̧a̧n wɛl kittɔnɔ. Holumɔ, lemɔ, yɔ̧mɔ, dagum hato.

20Hɔnɛ Bɛt wɛɛ raage: a yoo yɛrɛ, a yɛms yɛrɛ gedu be look kol mɔ, mɔ wɔrkwɔrɔ. Hinyɔ mɔ gɛmsɔ, gi kɔm bɔ ɔnɛ? 21Gi anbɔ hi za̧a̧nyɔ gi mɔktsig zulɔ rɔɔsɛ, wɛɛ taa rɔɔsya a Bɛt ge.

22Yeesu wɛɛ raa walɛsɛrɛ ɔ̧ɔ̧ wɔ:

a ya̧a̧nɛ, be gisin raako: a bɔ kol gi tuunɛ a lees yɔ ha̧a̧n lek an nɛ za̧a̧n gi dɔŋgo, hi gbandil yɔ gɔ nɛ hegɔ nɛ oon muul nɛ gi dɔŋgo. 23Kol daar leesɛ, muul be daar gbandili. 24Seen ga̧a̧ni-ga̧a̧ni wɔ hi taa hinluko, hi taa ɓɛrko, hi taan hin-gbaak lɛlɛ, hi taan bilɛ, wɛɛ Bɛt gihi kaŋkig be. Nɛɛ nɛ taa hinɗɔbt nɛ daar nɔɔs wɔ gbɔɔltɔnɔ gɛ ya?

25Bɔ za̧a̧nɔ a nɛ teesdu ɗɛ̄ɛ̄ an gi zibs za̧a̧tigɔ yɛms kaasi a koltuun dɔŋg nɔ? 26Yɛrɛ yɔ nɛ́ ɗɛ̄ɛ̄ hinza wook kaasiwaanɔ gɛ, kol gin tuuk nɔ a hin zaadɛ wɔ hi dɔŋgo?

27Seenɛ an tɛ̧ɛ̧kɔ̧ɔ̧r gbɔlɛ bɛtɛ wɔ hɛt du gɔ hi kɔ̧ɔ̧ko hi woowoos gɛ, wɛɛ hi ɓoo kunsig an hi gɔ gbandil gɛ. Yɛrɛ be raasinɛ: a Sulemaanu hɛw hi gbɔlumsɔ sɛw, hēg gbandil bɛt an zaaya̧ gɛ. 28An nɛɛko, Bɛt heks hɛt wɔ gɔ hi yaahi laa du yoosig gbandil bɛti, Bɛt gii gi ɔs nɛɛ gbandil hek ya? Nɛɛ ɗɔbsil fɛŋya wɛ!

29Yɛrɛ nɛya, bɔnɛ ɓɛɛ hinyɔ gɔ nɛ le hi hinyɔ gɔ nɛ yɔ̧, wɛɛ bɔ kol gi tuunɛ. 30Yɔ anbɔ hin wɛrɛ sɛw, dood waal du sɛw hii wɛɛ hi gihi ɓɛɛko. Baa nɛ mɛɛ a ha̧a̧n hinɔ hɛw.

31Yɛɛlin nɛ woos Bɛt wáátɔ hin kete, kuudu Bɛt gi wɛɛ gi goktsin hin wɛrɛ ha.

32Bɔ hoob gi ha̧a̧nɛ, tam wɔ nɛ kit gɛ, Baa nɛ yɔ bɛtha harig an gi gaanɛ wáátɔ. 33Zebrin hinyɔ nɛ ginɔ, nɛ gaa ya̧a̧rya wɔ tus bɔ nɛ dagɔ an gaasɛ. Tɛɛsin zul nɛ tus duk yɔ gɔ haŋks gɛ. Dagin rɔɔs yɔ bɛtha gɔ yɔ̧ɔ̧s gɛ. Luur gɔ sɛ̧ɛ̧b lɛlɔge gɛ, wɛɛ ga̧a̧r ɗɛɛ an gi ha̧tir hin a lɛlɔge gɛ. 34Ya̧a̧nɛ, lɛlyɔ rɔɔs nɛ gi ge, kpoos nɛ gi lɛlɔge be.

35Wɔn see nɛ hi hi̧i̧lwɛɛlɛ an nɛ woo Bɛt woosɔ hi pitila nɛ kpooki. 36Wɛɛn an dood wɔ hi ook an ɗɛntya̧ yɔ gɔ gi wɛɛz a lottins naab lɛlɛ gi bɛɛ gbɔnɔ ɓaako hi gborsige. 37Hat gi a gbaarɛ wɔ ɗɛntya̧ gɔ gi tuurɔ gi zɛ̧hi lɔl hi. Be raasin rɔbo: gɔ gi anbɔ gi wɔb seeɔ hi hi̧i̧lwɛɛlɛ an gi woosihi woosɛ, gi wɛɛ gi elihi an hi zaa hi ɗɔɔtɔ gi gaahi lees hi le. 38Gi tuur a yɛms teesdu, zaabe a kɔɔkekil eesim bɔ gedu, zaabe a kɔɔkekil taasum bɔ gedu gi zɛm gbaarɛ ɔ̧ɔ̧ wɔ hi gig ooko, hi dag hato.

39Mɛɛn bɛttɔnɔ a à ɗɛnt raatya bɔ mɛɛ nɛ ɔ̧tyɔ luur gɔ gi zaa du, yɔ kɔm nɛ lɔlɛ, yɔ ɔ̄ɔ̄nɛ luur an gi gul hi tɛŋk a gi raa du gɛ. 40Nɛɛ hɛw, oondi bed, gɔ gi anbɔ Za̧a̧n Waa bɔ gi zaa a ɔ̧tyɔ nɛ mɔk gɛ gedu.

41Piyɛr war Yeesu :

a Waar i, ya̧a̧daanik bɔrɔ mɔ dɔksig wii ya, nɛ rɛ mɔ dɔksig dood sɛw ya ri?

42Waar Yeesu wɛɛ raa:

a gbaar za lɛl-ookya gi giro, gi gis ɗɛntɔ hin wook rɔbtɔnɔ hi hinmɛɛki, ɗɛntɔ bɔ gi gbaage a doodɔ hi zulha an gi gaahi lees ya̧nɛ a ɔ̧tyɔ rii an hi dag duge sɛw. 43Hat gi a gbaar yɔ ɗɛntɔ bɔ gɔ gi zaa gi zɛŋge gi wook anbɔ ge! 44Be raasin rɔbo: gi gbaa gbaar bɔ a rɔɔsɔ bɔ zulɔ hage sɛw.

45Wɛɛ gbaarɔ bɔ gi raa a gi kpoos du a ɗɛnt be zaakɔ bɔ gi aŋk-amɔ, gi yɛɛl gbaarɛ walɛ wɔ hi nɛɛd wɔ lɛki, gi wɛɛ gi gbosig hinleki hi yɔ̧ki, wɛɛ gi bum wɔnik be. 46Gɔ gi anbɔ gbaar bɔrɔ ɗɛntɔ bɔ gi zaak a ɔ̧tyɔ taa ook gɛ gedu hi ɔ̧tyɔ mɛɛ gɛ gedu. Gɔ gi zɛŋg anbɔ gi wa̧a̧ge gi dɛ̧ɛ̧lig du eerɛ, gi gaag lɛl ɔnɛ hi mɛlya wɔ.

47Gbaarwal bɔ mɛɛ hinyɔ ɗɛntɔ gɔ ha̧a̧ge, gi gɛms hinza gɛ, gi wɛɛ gi woo hinyɔ ɗɛntɔ ha̧a̧ge gɛ, ɗɛntɔ gi raa dood hi wa̧a̧g hi lɛge dɔɔ kittɔnɔ. 48Yɛrɛ gbaarwal yɔ mɛɛ hinyɔ ɗɛntɔ ha̧a̧g gɛ, gi woo hinyɔ rii an gi dag ya̧a̧rhant lɛlɔge, hi lɛg kaasi. Za̧a̧nyɔ hi gaag hin gbɔɔltɔnɔ, hí ɛrig gbɔɔltɔnɔ be; za̧a̧nyɔ hi gaag hin gbɔɔltɔnɔ an gi woo, hi ɛrig hinyɔ tɔɔ gi daarɔ.

49Be zaa an be gbaa laa a hɛbtdi. À laa bɔ kab nɛ gaati, yɔ bɛsibe! 50Bɛtmɛm yɔ gɔ be loo, giro. Be gin hoobo gi tuur an hinɔ gi da̧a̧. 51Nɛ mɔk a be zaa an be kamz boolum hɛbtdi ya? Ɛ̧-ɛ̧, be dɔksinɛ: be zaa an be kamz gɛksilyɔ.

52Ya̧a̧nɛ, yɛɛl ɓɔryɔ, dood nɔɔn a raa gbun du hí gɛ̧ɛ̧ya; dood taarɛ hi gbaatin hi dood eerɛ; wɛɛ dood eerɛ wɔ be hi gbaatin hi dood taarɛ wɔ be. Hi gɛ̧ɛ̧ytinu. 53Baa gi gbaatin hi waawalɔ, waawal bɔ be gi gbaatin hi baatɔ; nàa gi gbaatin hi waasiŋ, waasiŋ be gi gbaatin hi nɔɔtɔ; wal nàaɔ gi gbaatin hi yaatɔ, yaatɔ be gi gbaatin hi wal nàaɔ.

54Yeesu wɛɛ raa dood saal wɔ:

a gɔ nɛ bɛɛ kuus za gbɛnik gi ɗunzig a ɔ̧tleki, nɛ raa a bɛl gi naaŋgɔ; hinɔ gɔ tuur anbɔ be. 55Wɛɛ gɔ nɛ gbɛn zɛk bɔ a ɔ̧tkazig-naanyɛ̧l gi fɛko, nɛ raa a lɛl gi sa̧a̧sa̧. Yɔ anbɔ hinɔ gii gi tuuruko. 56Nɛɛ dood mɛlya ha̧a̧l wɛ, nɛ mɛɛ hɛbtdi hi bɛtha woosɔ gɛ̧ɛ̧ki, yɛrɛ ɔnɛ nɔ nɛ mɛɛ ɔ̧tyɔ gi ɓɔryɔ gɛ̧ɛ̧kɔ gɛ nɔ?

57Wɛɛ a bɔ dɔŋg ɔnɛ nɛ gɛ̧ks hinyɔ rii hi zul nɛ gɛ? 58Ɔ̧tyɔ gɔ mɔ gi rek gbɔnɔ du hi za̧a̧nyɔ nɛ gbaatin elo a za̧a̧nyɔ gɔ nɛ yɛ̧ɛ̧ dɔgl ge, tɛm boolum hi gii a gbɔnɔ bɔ gedu an bɔgi ka̧mɔ a dɔglyɛ̧ɛ̧kya bɔ ge, gii gi ka̧mɔ gi gaa laaya ɔ̧ɔ̧ naan du gi ka̧m gi yaam luknɔ du. 59Be gisum raako: mɔ́ tòò tus fɛŋwaa bɔ gɔ hi dɛ̧ɛ̧sumɔ sɛw, ɓɔr mɔ ɔɔ tuuk a duhɔ.

Currently Selected:

LUKA 12: NTD

Highlight

Copy