MATA 12
12
MATA 12
1A ɔ̧tɔ ge Yeesu hi walɛsɛrɛ ɔ̧ɔ̧ wɔ hi daa gbɔnɔ a totbak wɔ du a holum-ɔ̧ti. Yɔ a̧a̧kil gi ha̧a̧k walɛsɛrɛ ɔ̧ɔ̧ wɔ hi halkig tot wɔ hi kɔɔlik hi tɔko. 2Yɔ Farisaya wɔ hi gbɛn anbɔ hi raas Yeesu
a seem walɛsɛrɛ mɔ wɔ hi wook hinyɔ Bɛtmaakdɔgl wɛ ansɛ a holum-ɔ̧ti!
3Yeesu warihi
a nɛ́ zaŋga hinyɔ Dawda woo ɔ̧tza hi zulɔ hi doodɔ yɔ a̧a̧kil gihi ha̧a̧k gɛ ya? 4Dawda gul a Bɛtluk du hi doodɔ hi loo kok kiml wɔ hi gbaas Bɛto hi le; taa nɛ an gii hi doodɔ hi le kok bɔ, maak wɛ gaa Bɛtmaakwookya wɔ hii gbɔnɔ an hi le kpɔd. 5Zaabe nɛ zaŋga Muusa maakɔ bɔ gaa, a Bɛtmaak wookya wɔ hi fɔ̄b holum-ɔ̧t maak a Bɛtluk du a holum-ɔ̧t gɛ sɛw hi taan a̧a̧b gɛ ya? Nɛ lag anbɔ gɛ ya? 6Yɛrɛ be gisin dɔko a hinyɔ be goksinɛ gbɔlumsɔ daar Bɛtluk bɔ hɛw.
7À nɛ mɛɛ nɛ hin bɔ raakɔ a Bɛt ɗɛɛrwol du a ha̧a̧be an hi mɛɛtin ya̧a̧rɛ, hā̧ā̧be maaknamb wɔ hi gbɛɛtirgo gɛ, yɔ nɛ gbāās nɛ dood wɔ hi gɔ hin-a̧a̧b gɛ dɔgl gɛ. 8Yɔ anbɔ, Za̧a̧n Waa bɔ gii gi holum-ɔ̧t waar i.
9Yeesu ɗund hɔdi, rek gul a hi mɔksilluk du. 10Zɛm doo za naanwɔlya gi a mɔksilluk bɔ gedu. Yɔ dood wɔ ha̧a̧hi an hi kɛtinge ya̧a̧ hi warige:
a maak wɛ gaa gbɔnɔ an hi za̧a̧s doo a holum-ɔ̧t ya?
11Yeesu wɛɛ warihi:
a à doo za gbun gi nɛ teesdu gi gin tamɔ gi mat a zɛŋk dubt du a holum-ɔ̧ti, za̧a̧nɔ taa an gi rek gi kadz tamɔ bɔ a zɛŋk bɔ gedu ya? 12Doo gii gi hinɗɔbt gi daar tamɔ. Yɔ anbɔ maakdɔgl wɛ gaa gbɔnɔ an hi gɔs doo hinrɔb a holum-ɔ̧ti.
13Yeesu wɛɛ raa
wal naanwɔlya bɔ a yɔdum naan mɔ.
Wal bɔ yɔd naanɔ wɛɛ bɛr an zaa bɔ.
14Hɔnɛ Farisaya wɔ hi tuu a mɔksilluk bɔ gedu hi rek hi mɔks hi wɔya̧a̧ a Yeesu zulha an hi mɛɛ gbɔŋkɔ. 15Yɔ Yeesu mɛɛ hin bɔrɔ gi kpoos du ɗun ɔɔ lɛl bɔ rekɔ, dood kittɔnɔ hi fɔge. Gii wɛɛ za̧a̧s gumtil wɔ sɛw. 16Raahi hi naati
a bɔhi raas dood a gii gi za̧a̧nɔ.
17Hinɔ wooy an gi da̧a̧s hinyɔ Bɛtya̧a̧kɛŋkya bɔ Esaya boo dɔglɔ gi raa
18a Bɛt raa a wal be sɛr bɔ be herig gɛrɛ. Za̧a̧nyɔ ha̧a̧b ge hi kpoos be sɛw, hat be sɛw gi a ge. Bé gbaa Mɔkil be a gi zulha, gi wɛɛ gi dɔks dood wɔ hi mɛ̄ɛ̄be gɛ ha̧a̧tig be dɔglɛ. 19Taa gbaatingo hi doo, taa ya̧a̧ɓooluko, taa an hi lagig hindɔk a gbɔnɔnɔɔdɛ du. 20Taa bɔ̧ɔ̧k yɔ yees ɓɛdugo, taa nimsig pitila yɔ gi uus-uuko, gi tuur an gi kam woosriit hatya a ɗɛɛt du kete. 21Wɛɛ dood wɔ hi taa Yahuduyaadɛ gɛ hi gbaak mɔkilya̧ a gi nuŋg du.
22Yɔ dood hi kams Yeesu doo za yɔ gin loorɛha̧a̧l gi muul du gi yɔ̧ɔ̧sige, gi wɛɛnig su̧u̧ki, Yeesu za̧a̧sige, wal su̧u̧k bɔ booya̧a̧ wɛɛ gbɛn lɔlɛ. 23Yɔ dood saal wɔ sɛw hi gbɛn anbɔ gi kɔmsihi gɛrsɛ hi warɔ
a wal yɛrɛ nɛ Waar Dawda Waawal gii ma mi?
24Hɔnɛyɔ Farisaya wɔ hi kɛmɔ hi raa
a wal yɛrɛ gi tuusingo loorɛha̧a̧l wɔ hi waar ya̧ bɔ nuŋgɔ a Belzebili tɛŋk ɔ̧ɔ̧nɛ!
25Anyɔ Yeesu mɛɛ mɔkilya̧ raahi
a waar ums yɔ zulɔ gɛ̧ɛ̧y du eerɛ, gi ha̧a̧tiro. Waal gbɔɔl yɔ gɛ̧ɛ̧y du eerɛ, zaabe, raa gi gɛ̧ɛ̧y du eerɛ, ɗɛ̄ɛ̄ an gi er gɛ. 26Saydanu gi nin Saydanu, gɛ̧ɛ̧ zul ɔ̧ɔ̧n eerɛ, waar umsɔ gi er ri?
27Gi gi an be tuusig loorɛha̧a̧l hi Belzebil tɛŋkɔ, fɔkya nɛ wɔ hi tuusingo loorɛha̧a̧l wɔ hi nɔ tɛŋkɔ be? Yɔ anbɔ, walɛsɛrɛ nɛ wɔ hii hi gbaasin dɔgl hi zulya̧. 28Yɛrɛ gid be tuusig loorɛha̧a̧l wɔ hi Bɛt Mɔkilyɔ, Bɛt wáátɔ zaaza ma a nɛɛge.
29Gi an doo za gi gul ri a za̧a̧nza tɛŋkya raa du an gi tuut wɔdɔ luurɛ, gi wɔg nɛ ba̧a̧n du ket gɛ! Yɔ wɔb za̧a̧n raatya bɔ kete, an gi ɔɔ talk a gi raa du an gi tuut wɔdɔ luurɛ. 30Za̧a̧nyɔ taa hi bee gɛ, gi lɔlhɛ̧ɛ̧nikya beenɛ; wɛɛ za̧a̧nyɔ ɔks hi bee an gi mɔks dood gɛ, gihi hɛksighɛksɔ. 31Hinɔ gii be gisin raako a hinha̧a̧lyɔ dood gɔ hi woo sɛw hi ya̧a̧ha̧a̧l yɔ gɔ hi boo sɛw Bɛt gi bitsihi dɔglɔ. Yɛrɛ Bɛt taas dood ya̧a̧ha̧a̧l yɔ gɔ hi boo a Bɛt Mɔkil zulha bisugo.
32Za̧a̧nyɔ gɔ gi boo ya̧a̧ha̧a̧l a Za̧a̧n Waa bɔ gi zulha, Bɛt gi bitsig hinha̧a̧lɔ; yɛrɛ za̧a̧nyɔ gɔ gi boo ya̧a̧ha̧a̧l a Bɛt Mɔkil bɔ gi zulha, Bɛt taasig hinha̧a̧lɔ bisig a ɔ̧ti gi zulɛ, hi ɔ̧t bɔ gi zaak kuudu gedu hɛw. 33Nɛ see tɛ̧ɛ̧ gi gi tɛ̧ɛ̧ rɔbo, humlɔ bɔ gi rɔb be; tɛ̧ɛ̧ gi gi tɛ̧ɛ̧ ha̧a̧lɛ, humlɔ bɔ gi ha̧a̧l be. Yɔ anbɔ, gɔ hi mɛɛ tɛ̧ɛ̧ a gi huml muulɛ. 34Kpolum dɔ̧ɔ̧t wɛrɛ! Nɛ gi dood ha̧a̧l be, gi an nɛ boo ya̧a̧ rɔb ri nɔ? Ya̧a̧ gi tuusig hinyɔ hi̧i̧s a kpoos du giya.
35Doo rɔb gi tuusig hinrɔb a gi rɔɔs rɔb yɔ gin kpoos du gedu. Doo ha̧a̧l be gi tuusig hinyɔ bɛr gɛ gii a gi rɔɔs ha̧a̧l du be. 36Be dɔgsinɛ a dɔgl-gbaak ɔ̧ti, dood hi ɓɛr ya̧a̧boonya̧ tɔs wɔ gɔ hi boo nɛ sɛw. 37Yɔ anbɔ, ya̧a̧boon mɔɔn gi wɛɛnum doo riiti, zaabe, a̧a̧bgɔkya.
38Yɔ anbɔ Bɛtmaakdɔkya zaadɛ hi Farisaya zaadɛ hi zaa hi raa Yeesu
a hingokya , ha̧a̧wi an mɔ woo gɛrs wi gbɛnɔ.
39Yeesu ta̧a̧hi
a dood ha̧a̧l wɔ hi waak ɓɔryɔ hi ɔɔ Bɛt an nis yɔ gi naakmansi gi ɔɔ waltɔ, hi ɓɛɛk gɛrsɛ. Gɛrs za taasihi tuuko, gɛ Bɛtya̧a̧kɛŋkya bɔ Zonas gɛrsɔ bɔ tutsihi kpɔd. 40Za̧a̧n Waa bɔ gi waa ɔ̧t taarɛ hi yɛms taarɛ a loor du be, anyɔ Zonas waa dut gbɔɔl buudu ɔ̧t taarɛ hi yɛms taar be.
41A dɔgl-gbaak ɔ̧ti dood Niniiviya wɔ hí ɗuk a dood wɔ ɔ̧ti gi zul hi muut du an hi matinihi dɔglɛ. Yɔ hi kɛm Zonas gi gisihi Bɛt dɔglɔ dɔko, hi zɛmr kpoosya̧ hi ta̧a̧ Bɛto. Yɛrɛ za̧a̧nyɔ daarin Zonas gbɔlums gi dihɛ. 42A dɔgl-gbaak ɔ̧ti, nis waar bɔ fu̧u̧z a ɔ̧tkazig naanyɛ̧li, gi er a dood wɔ hi gi ɔ̧ti gi zul hi muutdu gi matinihi dɔglɛ, anyɔ fu̧u̧z a waal doorumlɛlɛ an gi kɛm Sulemaanu hin-mɛɛkɔ bɔ gi dɔko. Yɛrɛ za̧a̧nyɔ daarin Sulemaanu gbɔlums hi hinmɛɛki gi hɛdi.
43Yɔ loorɛha̧a̧l za tuu a doo kpoos du, gbɛ̧ɛ̧k a lɛl koot wɔ hi an gi ɓɛɛ lɛl gi holɔ, wɛɛ dag gɛ. 44Yɔ dag holklɛl gɛ raa a be wɛɛ a luk yɔ be ɔz nɛ gedu. Gɔ wɛɛza zaa zɛm luk bɔ ɗɛndilɛ, hi hɛdige hi gɛms lɛl rɔbtɔnɔ. 45Wɛɛ da looz loorɛha̧a̧l zaadɛ wɔ hi ha̧a̧l hi daar gii nɔɔn-erɛ hi zaatin lɛlgbunu hi tal a luk bɔ gedu. Hinɔ anbɔ ro za̧a̧n bɔ gikɔ gi bɔbt gi daar yɔ biitirnaan du. Hinɔ gi turs dood ha̧a̧l wɔ hi gi ɔ̧ti gi zul anbɔ.
46Anyɔ Yeesu gi bookya̧a̧ hi dood saal wɔ luk du tɛ̧, nɔɔtɔ hi yɛ̧ɛ̧dɛ ɔ̧ɔ̧ hi zaa hi er lakdi hi gig ooko an hi booya̧a̧ hi giya. 47Doo za wɛɛ raage
a nàà mɔ hi yɛ̧ɛ̧dɛ mɔ hi zaa hi erk lakdi hi gim ooko, ha̧a̧hi an hi booya̧a̧ hi mɔya.
48Yeesu wɛɛ war za̧a̧n bɔ raage
a bɔ gi nàà be hi yɛ̧ɛ̧dɛ be nɔ?
49Wɛɛ zu un naan a walɛsɛrɛ ɔ̧ɔ̧ wɔ hi zulha raa
a nàà be hi yɛ̧ɛ̧dɛ be hi gi gɛrɛ. 50Yɔ anbɔ za̧a̧nyɔ gi wook hinyɔ Baa be yɔ bɛtha ha̧a̧ge, gi yɛ̧ɛ̧ be, gi siŋg be hi nàà be sɛw.
Currently Selected:
MATA 12: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
