Ə́rɨ́b nùb tómé yi ə́llé 2

Sówòó Nyéhè Sarɨ́nne

1Jíì vii bɨrɨ́b ɨ́ cóóŋ cùr cwá Yésù yi wúi ɓɨllɨnne, ɓwâ ye jùrúb Pàŋtèkóòt yi ɗóoré, nùb ə́mní yaá lâs ɓáhîn yɨ́ mwi̧. 2Ŋgáb ɨ́ ókcì na, wùúm kù sówotɨ́ ɓɨllin hȩ kəŋmbə́r ɓùfûúb, ɗà ɨ́ yûk dúú ŋgáb yi du nó rè no ɗéé. 3Ŋgáb ɨ́ pə́gì nɨ́m kù hȩ yúum waá rɨ u̧; nɨ́m kɨ́ ɨ́ gɔ̀ɔ̀tèèsê ŋgáb ya mwi̧í̧ mwi̧. 4Kí á Nyéhè Sarîn ya lə́ɓa ŋgáb lâs só, ɗà ŋgáb ɨ́ yàrê nyìnnɨ nyindí gbàŋ bɨ kù hȩ Nyéhè kɨ́ yi du ŋgáb nànɨ nyòm nyinndé.

5Jwîf bɨ ɓe nùb mɨ̀yú̧ú̧ yi go tɨb ɗɔ̀bɨ́nné lâs noò yaá Yèrúsàlèm. 6Ɓwâ ŋgáb yi ók gbɨ̀mgbɨ̀m kíì á ŋgáb ɓáhe lâs mɨ̀kù̧ú̧. Ŋgáb yi gbɨɨŋɓatɨ́, ɓetí nɨ̀mwi̧ yaá óknɨ nyindí nó fɨnni nùb ə́mní yi du nyìnniì. 7Ŋgáb yi gbɨɨŋɓatɨ́ ŋgáb ɨ́ yà ŋgáb sèìkɨ́nɨ, ŋgáb a tace: «Nɨ̀ŋgwáàb du nyìnnɨ rè nɨ nùb Gàlìléè sé yá? 8Ndɨŋce nɨ́ i̧, vùùm nɨ́mè lâs, nɨ̀mwi̧ a yà nɨ́ óknɨ ŋgáb nyìnnɨ nyindí fɨnni noò? 9Tɨŋtɨ̀ŋ nɨ́mè no nùb go Páàrtə̀ á hò̧, nùb go Mèdíì ɓe Èláàm á hò̧, nùb go Mèsòpòtàmíì, Jùdê ɓe Kàpàdóòs á hò̧, nùb go Pôŋ ɓe Àsíì á hò̧, 10nùb Fɨ̀rìjî ɓe Pàmfìlíì, nùb Èjíìbtə̀, nùb go Sìrên ɗɔ̀ɔ́b Lìbíì noò, nùb kù á nùb go Róòm, 11Jwîf nɨ̀miib ɓe nùb ɓandɨ síí ɓóò Jwîf àm ə́mní lâs á hò̧, nùb Kɨ́réèt ɓe nùb Àràbíì á hò̧, nɨ́m a ókcɨ̀ nɨ́ ŋgáb lâs nyìnnɨ ɓe ɨ́r ə́rɨ́b jííb Mèín ə́llé nyindɨ́b fɨnni nɨ́mè no à!»

12Ŋgáb yi gbɨɨŋɓatɨ́, kɨ̀cáàb ɨ́ yɔ̂ ŋgáb, ŋgáb ɨ́ yà nyìntèènɨ mvókín ŋgábè no ɨnè: «Kí tace i̧ á?»

13Kɨ́ nùb kù, ŋgáb ɨ́ yàcè bɨ́ sɔ̀knɨ nùb ə́mní ŋgáb a tace: «Ŋgáb duɓa bɨ seín á!»

Píyéèr á nyìnnànɨ nɨ̀vɨ́tɨ̀b

14Kí á tɨŋtɨ̀ŋ nùb tómé cóóŋ ɨ́ mwi̧ rè no, Píyéèr éíwú còóm, ŋgə́ ɨ́ yà nyìnnànɨ nɨ̀vɨ́tɨ̀b ɓe kúu còóm ɨnè: «Nyí, Jwîf bɨ, ɓe nyí nùb du dùnɨ Yèrúsàlèèm lâs, óknáɓam mîn nɨ́m mɨ ɓa nyí tànànɨ rè. 15Nùb lè bɨ seín hȩ nyí du lə́ə̀mnɨ ɗàrɨ́ ɗàà, ɓetí nɨ́m á yènɨ mvii ɓwécɔ̧́ yekɨ́rɨ̀bì.#2.15 Kɨ́ Jwîf ɓoò yaá nɨ mɨ̀yú̧ mvii ɓwécɔ̧́ yekɨ́rɨ̀bì du nɨ́ ndóŋyèwá, kùb bɨ cɔŋ tàŋ, súm mèìcée. 16Ɨ́dù nɨ́m Jòwêl tɨ́kìn Mèèín yi taré ɗóorégií.

17Ɓetí Jòwêl kɨ́ ya taá ɨnè: Mèín ta, ‹péye nɨ́m kwá féín jíìb cáŋhɨ̀rí noò á rè:

mɨ ɓa nànɨ nùb lâs Nyéhè moò á;

munɨ́b nyínè nɨ̀ŋgwáàb ɓe nɨ̀gub kwá tatee nɨ́m Mèín nyinworé,

wàánjííb ɓe tukwííb nyínè kwá jəəm wum.

18I̧i̧, ye kɨ́, mɨ kwá na nùb ə́ré moò nɨ̀ŋgwáàb ɓe nɨ̀gub cúk Nyéhè moò,

ŋgáb a kwá tàtèè nɨ́m mɨ yi nyinsoré.

19Mɨ kwá túumna nyí nɨ́ɨ́b sɨ̀sɨ̀rí ɓɨllin

ɓe lìím bɨ kù ɗɔ̀bín:

nyí kwá pə́ tɨ́ɨ́m ɓe wa, nyí a pə́ɓwê jùm fɨ̀tɨ̀b,

20Mvii kwá ducu ndùúŋ,

njumi cè mgbuu hȩ tɨ́ɨ́m,

ɗà ye kàm jíri Kékéé a sàìgì.

21Ɓwâ kɨ́ á nò kwá kɨ́ŋɓé Kékéé, Mèín kwá ɓátɨ nò kɨ́.›

22«Nùb Ísràyéèl, óknáam nɨ́m mɨ ɓa nyí tànànɨ rè: Yésù nò Nàsàréèt yɨɨ́m nò Mèín yi came nyínè tíí á. Nɨ́ɨ́b kàtɨ́b sɨ̀sɨ̀rí ɓe lìím bɨ ŋgə́ ya ndɨŋkom nyínè íhín hȩ nyí nɨ̀miib nyí ɗəəŋɓa rɨ́ ɨ́ du túùmnɨ ɨnayâna Mèín ya nametɨ́ ŋgə́ nyòm noò ru. 23Ɓe ɓwáár Mèín ya nyaaŋkɨ́cɨré á kùb sə́rɨkɨ́na nyí nɨ̀ŋgwá kɨ́ ru. Nyí ɨ́ nàrê ŋgə́ cɨcómbì ŋgáré, ŋgáb ɨ́ kpáàŋkwíìwúkî ŋgə́ bɨ̧̀ɨ̧́. 24Ɨ́dù Mèín nacutɨ́ ŋgə́ mè, ŋgə́ céínhó̧tɨ́ ŋgə́ yíìnɨ́m cwéé no, ɓetí Mèín yi nɨ́ ə́ə̀mwá ŋgə́ mèré nàmé cwéé no. 25Ɓe àm kɨ́ á Dàvît yi ta ɓe ɨ́r ŋgéé ɨnè:

Mɨ yaá ɓwâ lâs pénɨ Kéké mo tíí,

ŋgə́ á ɓe mɨ àm vùù tɨ̀ bɨ mé.

26Àm kɨ́ á mɨ du dùnɨ njɔ̧̀ ɗàá fàb, mɨ a ókce mɨ̀tù ɓe nyindí mo ɓɔ̧ne;

dugɨ ɓe góòsɨ́m síhé moò, mɨ kwá du njɔ̧̀ ɗàá mɨ a sə̀ŋ gíí.

27Ɓetí wu tɨ̀ wu mɨ mbɨ́kwa mvókín nɨ̀kwíbí,

wu tɨ̀ wu ə́ə̀mwá mɨ nò jɨ̧ɨ̧́ woò, mɨ ɓwèìn sèrìn.

28Wu túumnatɨ́ mɨ jɨ̀r du nànɨ mèè,

ju wu du ɓe mé ɓa mɨ nànɨ mɨ̀tù á.

29«Mwin yàá bɨ, mɨ kwatɨ́ nyòm mɨ nyinnanyaaŋ nyí ɓe ɨ́r Dàvît tákìí ndùtì ndútíí: ŋgə́ kútɨ́, kùb ɨ́ vɨ́rè ŋgə́, sèè noò á yè ku. 30Ɨ́dù ŋgə́ yɨɨ́m tɨ́kìn Mèèín á, ŋgə́ yi ɗəəŋceé ɨnayâna Mèín yi gunaá ŋgə́ ɓɔ̧ nànɨ nɨ̀mwi̧ mvókín nyȩrɨ́b noò no kò mvènnì ya ók ɓe ŋgéé. 31Dàvît ya pə́kɨ́yayeé nɨ́m yi ɓa féínniì, á ŋgə́ ya nyin ɓe ɨ́r sə̀ə̀mcùhô̧ sèrɨ̀nnè Mèsíì ɓwâ ŋgə́ ya ta:

‹Mèín ya nɨ́ ŋgə́ jì̧ì̧mbɨ́klə́sòwá mvókín nɨ̀kwíbí,

fín nóò ya nɨ́ sèrìn ɓwèìncéwa› ru.

32Nɨ́m lâs nɨ́m á ná mɨ̀námé ɨnayâna Mèín ya nacutɨ́ Yésù mɨ du nyí tànànɨ kɨ́ mè. 33Mèín yi áwútɨ́ ŋgə́ no ŋgáár lame á ŋgə́ gam Nyéhè Sarîn Mèín nò du Táà ya ɓwáína ŋgéé: ŋgə́ ɨ́ nàtèècè nɨ́m Nyéhè kɨ́, ɗàrò nɨ́m kɨ́ á nyí du pénɨ nyí a ókce rè. 34Ɓetí Dàvît ya nɨ́ wɨ́íwa ɓɨllin, ɨ́dù ŋgə́ ya taá ɨnè:

‹Mèín nò du Kékéé ya tanatɨ́ Kéké móò:

gom dùnɨ mo ŋgáár lame,

35mɨ a ndɨ̀ŋ wu ɗèìsé nùb du wú jìniì ŋgwéé.›

36Á ɗúnɨ nyí, gbàŋ Ísràyéèl lâs, nyí ɗə̀ə̀ŋnyààŋnáɓà mîn ɨnayâna Yésù nyí kpáaŋwú bɨ̧̀ɨ̧́ ɗàrɨ́, ŋgə́ á Mèín settɨkɨ́ Kéké ɓe Mèsî ru!»

37Ɓe nyindí Píyéèr yi nyin kɨ́ á kɨ̀cáàb yi tuklɨ ŋgáb ŋgwȩ́ȩ́, ŋgáb ɨ́ fɔ̂ ŋgə́ ɓe nùb no rè ɨnè: «Mwin yàá bɨ, nɨ́m ma ndɨ̀ŋcé i̧?» 38Píyéèr ɨ́ pììnà ŋgáb: «Ɓandɨnáam sum, nyí a ndɨ̀ŋ kùb kɔ̀ɔ̀ nyí kɔ ə́mní ɓe ɨ́r Yésù Krístùù, àm Mèín a tɨ́ínà nyí cum nyínè, ɗà nyí a kwàgì Nyéhè Sarîn du nyər Mèèín ndè. 39Ɓetí ɓwáár Mèèín yi duna nyíne munɨ́b nyínè á, dùɓwêgɨ̀ nùb du cóo, nùb Mèín nò du Kéké nɨ́mè kwá ɓéré lâs.»

40Píyéèr yaá ŋgáb nyìnnànɨ nyindɨ́b kù ví̧i̧ àm túumna ŋgáb àmɨɨr, tààmɓwênɨ ŋgáb njɔ̧̀, ŋgə́ yaá tànɨ ɨnè: «Ə́əmná nɨ ɓə́r, nyí a gɔ̀klè nɨ́ ɓe nùb du bɨ́ nùb lɔ̧́ɔ̧ ɗàrɨ́!» 41Ví̧i̧ mvókín ŋgábè no ɨ́ ə́mnè nyindí Píyéèr kɨ́, kí á kùb kɔhe ŋgáb kɔ ə́mní. Ye kɨ́ mu̧u̧, nɨ̀vɨ́tɨ̀b sàmàìn tɔ́sìn taarɨ́b yi kpɔɔréé kpáín nùb ə́mní no.

42Nɨ́ɨ́b ŋgáb yi du ndɨ̀ŋnyàŋniì lâs hȩ ôó tɔ̀ɔ́ nùb tómé yi du ŋgáb nàniì, ju ɓaín ɓe kùb mwin yàá, cɔŋ ɓáhîn yá mwi̧í̧ ɓe mɨ̀yú̧ yaá ɓe jɨ̧.

Ju nùb ə́mní yi dukomndé

43Nɨ́ɨ́b sɨ̀sɨ̀rí ví̧i̧ ɓe lìím bɨ nùb tómé ya ndɨŋkom ɓe nyòm Mèèín yaákòm nànɨ nɨ̀vɨ́tɨ̀b vùù. 44Nùb ə́mní lâs yaá ɓɔ̧ mwi̧, kpɨ́kpɔ́ yaá mvókín ŋgábè no. 45Ŋgáb yaá sə́rɨ̀nɨ njɔdì ŋgábè, ŋgáb a gɔ̀k mwèìn kɨ́ mvókín ŋgábè no kpɔ́knɨ nɨ̀mwi̧ ɗóhîn ɓe nɨ́m ŋgə́ ɗúré. 46Ye lâs, ŋgáb yaá ɓáàlɨ́ŋnɨ Dúú Jíri Mèèín no, ɓo yúkbìn ŋgáb yaá tàŋtèèlɨ́ŋnɨ cɔŋ ɓoò yá mwi̧ ɓe mɨ̀tù ɓe njɔ̧̀ sarîn cúk. 47Ŋgáb yaá mgbíìnɨ Mèín, nùb lâs yaácè ŋgáb pə́dɨ̀ɨ̀mnɨ. U̧ á cè ye lâs Mèín yi du kpɔ̀ɔ̀rénɨ nùb ɓállé ŋgábè kpánȩ́ȩ́.

Currently Selected:

Ə́rɨ́b nùb tómé yi ə́llé 2: NTV

Highlight

Copy