Jâŋ 20

Yésù səəmcuhó̧tɨ́ sèrìn

(Góòmɓwê Mt 28.1-8; Mk 16.1-8; Lk 24.1-12)

1Ye sóndèè yesə̀rì, sɨ́mnɨ̀r ti yaáyè no, á Màríyà nò Màkdàláà yi gi nyàbȩ́ȩ́. Ŋgə́ ɨ́ kwàcì na sɨɨ kàm kùb ya ɗeinkɨ́ ɓɔ̧ sèrì ɓe kí rè á nɨ́ gə́nȩ̀ȩ́ pɨ́ɨŋkí̧i̧. 2Ŋgə́ ɨ́ lùcùwò kwànɨ Sìmóŋ Píyéèr ɓe nɨ̀fuùb Yésù yi ɗúkomndé, á ŋgə́ tana ŋgáb: «Kùb yíhó̧ó̧ bɨ́ fín Kékéé sèrìn ku, nɨ́m cè nɨ́ ɗə̀ə̀ŋwá yɨ́ kùb gendóŋndé.» 3Píyéèr ɓe nɨ̀fuùb kù mwi̧í̧ rè ɨ́ ə́llê gìnɨ nyàbȩ́ȩ́ ku. 4Ŋgáb bɨrɨ́b lâs yaá lùhí, ɨ́dù nɨ̀fuùb kù mwi̧í̧ rè ɨ́ ndôŋ nɨ́ Píyéèr lùú, á ŋgə́ féínyaye nɨ́ nyàbȩ́ȩ́. 5Ŋgə́ ɨ́ tɨ̀ɨ̀mndésò sèrìn, ŋgə́ ɨ́ pê ndómbó kɨ̧́ɨ̧, ŋgə́ ɨ́ dù nɨ́ lə́sòwá. 6Sìmóŋ Píyéèr ɨ́ féíntèèwò, ŋgə́ ɨ́ lə́sò sèrìn, ŋgə́ ɨ́ pê ndómbó kɨ̧́ɨ̧, 7ŋgə́ ɨ́ pə́ɓwê júk kùb yi ɓomna Yésù ŋgwé nóò, ɨ́dù júk kɨ́ yi nɨ́ ɓe ndómbó yɨ́ mwi̧ kɨ̧́ɨ̧ ɗàà, yaá nɨ́ gə́nȩ̀ȩ́. 8Á nɨ̀fuùb kù mwi̧í̧ yi féínyaye sèrìn ndè yi lə́soɓwée, ŋgə́ ɨ́ pê fín Yésùù nɨ sèrìn ɗàà, á ŋgə́ ə́mne Yésù á jáŋ. 9Kí du nɨ́m káàtà Mèèín yi ta ɨnayâna Yésù kwá səəmcuhó̧ mvókín nɨ̀kwíbí na rè, nɨ̀fuùb ya du bɨ njàb kɨ́ ókháyèwá á. 10Á nɨ̀fuùb bɨrɨ́b lè gɨcu ŋgábè yó.

Yésù túumnatɨ́ Màríyà nò Màkdàláà síí

(Góòmɓwê Mt 28.9-10; Mk 16. 9-11)

11Màríyà yaá ə́ŋhîn laŋtɨ̧ɨ̧́ ɓɔ̧ sèrì, kɨ́kɨ́rí. Ŋgə́ á cè kɨ́kɨ́rí, á ŋgə́ tɨɨmsé ɗàá góòmndésònɨ sèrìn. 12Ŋgə́ ɨ́ pê dùgallɨb Mèèín bɨrɨ́b, júúb mɨ̀vûú só, du̧ú̧ yɨ́ kùb yi gúnde fín Yésùù rè, nò kù péín ŋgwéné, nò kù cè péín gureè. 13Dùgallɨb lè ɨ́ fɔ̂ ŋgə́ ɨnè: «Yàáŋ, wu kɨ́í ní á?» ŋgə́ ɨ́ pììnà ŋgáb: «Kùb yíí bɨ́ fín Kéké móò, mɨ cè mɨ́ ɗə̀ə̀ŋwá yɨ́ kùb gendóŋndé.» 14Nyìncáŋhȩ̀ȩ́ u̧nèé á ŋgə́ ɓandɨcu íí cùrì, ŋgə́ ɨ́ pê Yésù ə́ŋhîn, ɨ́dù ŋgə́ ɨ́ dù nɨ́ ŋgə́ ɗə̀ə̀ŋcùwá. 15Yésù ɨ́ fɔ̂ ŋgə́: «Yàáŋ, wu kɨ́í ní á? Wu má wú na?» Màríyà ɨ́ lə́mnè nɨ́ nɨ nò gə́tɨ mwarí á, á ŋgə́ ta ɓe ŋgə́: «Tá, duú ɓè wu hainkɨ́ fín ŋgéé, tana mɨ yɨ́ wu gɨ ŋgə́ kɨ́kniì, mɨ yè gií ŋgə́ hàìncùwònɨ.» 16Á Yésù ɓé ŋgə́: «Màríyà!» Ŋgə́ ɨ́ ɓàndɨ̀cùrê Yésù íí no, ŋgə́ ɨ́ tànà ŋgə́ ɓe nyindí Jwîf «Ràbùnî!» (kí ta, «Tá tɔ̀hí!» na á). 17Yésù ɨ́ tànà ŋgə́: «Wu wu mɨ dì̧nɨ̀r, mɨ mɨ yɨ́ Tá moò wúíyèwá. Ɨ́dù gɨm tànànɨ nɨ̀fuùb moò mɨ á wúícùnɨ yɨ́ Tá moò duɓwéece Tá nyínè; yɨ́ Mèín móò duɓwéece Mèín nyínè.» 18Á Màríyà nò Màkdàláà gɨ tànànɨ nɨ̀fuùb Yésùù ɨnè: «Mɨ péé Kéké!» Ŋgə́ ɨ́ átɨ̀nàcê ŋgáb nɨ́m Kéké tɨ tana ŋgéé.

Yésù túumnatɨ́ nɨ̀fuùb noò síí

(Góòmɓwê Mt 28.16-20; Mk 16.14-18; Lk 24.36-49)

19Ye sóndèè mwi̧ kɨ́, lɨ́tɔ̧ɔ̧́, nɨ̀fuùb Yésùù yaá ɓáhîn dúú kù no, ŋgáb ɨ́ kpàrɨ̀kî ɓavɨ̀ì lâs, ɓetí ŋgáb yaá lùnɨ kɨ̀jííb Jwîf. Ŋgáb sɨ̀rɨ̀cì na Yésù á ə́əŋkɨ́ ŋgábè tə̧ə̧́ rè. Ŋgə́ ɨ́ tànà ŋgáb: «Ju ɗóóŋ dù ɓe nyí!» 20Cùr ŋgə́ nyin u̧nèé, ŋgə́ ɨ́ túùmnà ŋgáb lààm ɓàìbì, kɨ́b ŋgáréè ɓe kɨ́ ɓwàríì. Nɨ̀fuùb Yésùù ɨ́ ókɓà mɨ̀tù ɓwâ ŋgáb pə́ Kékéé. 21Á Yésù tanakwa ŋgáb: «Ju ɗóóŋ dù ɓe nyí. Hȩ Tá moò ya tómwo mé, mɨ tómɓwéetɨ́ nyí ɗɔ̀bín.» 22Nyìncáŋhȩ̀ȩ́ u̧nèé, ŋgə́ ɨ́ fɨ̀tɨ̀wúsò ŋgáb fìí yá, ŋgə́ ɨ́ tà: «Gamnáam Nyéhè Sarîn. 23Nùb nyí kwá tɨ́ína cumí, kwá kwa tɨ́ɨ́r. Nùb nyí kwá mvúce tɨ́ínànɨ cumí kwá bɨ tɨ́ɨ́r kwà.»

Yésù ɓe Tòmâ

24Nɨ́m mwi̧, ɓwâ Yésù yi túumna nɨ̀fuùb noò síhé, nɨ̀fuùb no kù mwi̧ ɨ́r yi du Tòmâ, (kùb yi ɓékom nyɔ̧ɔ̧), yi nɨ́ ɗàá ɗàà. 25Kùb noò ɨ́ tànà ŋgə́ ɨnè: «Nɨ́m péé Kéké.» Á ŋgə́ tacuna ŋgáb: «Mɨ du pə́wa lààm ŋgéé ŋgáréè, mɨ ɨ́ hə̀lê mbə́re lààm kɨ́ no, mɨ ɨ́ hə̀lə́kwà ŋgáár ŋgéé ɓwàrí, mɨ tɨ̀ mɨ Yésù á na ə́mnɨ̀r.»

26Sóndè mwi̧ cùr kɨ́ no, nɨ̀fuùb Yésùù yaácùhá ɓáhîn yó. Kí, Tòmâ yaácɨ̀ kpánȩ́ȩ́. Ɓavɨ̀ì lâs kparɨ́b, ɨ́dù ŋgáb sɨ̀rɨ̀cì na Yésù á ə́əŋkɨ́ nɨ́ ŋgábè tɨŋtɨ̧̀ɨ̧́ rè, ŋgə́ ɨ́ tànà ŋgáb: «Ju ɗóóŋ dù ɓe nyí!» 27Á ŋgə́ tana Tòmâ: «Péye ŋgárɨ̀b moò, gewom mbə́re dì̧nɨ, naamwom ŋgáár, wu a hə̀lê mɨ ɓwàrí. Mbɨ́k mɨ̀sə́ndɨ̀r, wu a dù ɓe ə́ə́m!» 28Á Tòmâ tana ŋgə́: «Kéké móò, Mèín móò!» 29Yésù ɨ́ tànà ŋgə́: «Àm wu pə́gɨ mé á wu ə́əmgɨ ru. Mɨ̀tù á ɓe nùb du ɓe íí pə́wa, ŋgáb ɨ́ ə́mnèé.»

Nɨ́m ndɨŋ kùb tɨ̀ìn káàtà rèè

30 Nɨ̀fuùb noò tíí, Yésù yi ndɨŋkwatɨ́ lìím bɨ víi̧ du bɨ́ káàtà rè no tɨnndȩ́ȩ ɗàwáá. 31Ɨ́dù kɨ́ no tɨín ndè, yi du àm nyí a ə́mnè ɨnayâna Yésù du Mèsî, Mwin Mèèín á na á. Nyí ɨ́ ə́ə̀mcè ŋgə́, nyí ɓa kwànɨ mè ɓe ɨ́r ŋgéé á.

Currently Selected:

Jâŋ 20: NTV

Highlight

Copy