Lúkàs 10

Yésù tómndéé nɨ̀fuùb vii taarɨ́b ɨ́ cóóŋ ɨ́ bɨrɨ́b jɨ̀r ə́ré

1Cùr kɨ́ no, Kéké ɨ́ càkwà nɨ̀fuùb vii taarɨ́b ɨ́ cóóŋ ɨ́ bɨrɨ́b, ŋgə́ ɨ́ tómkɨ́yàyè nùb kɨ́ bɨrɨ́b bɨrɨ́b, kwɨ́ì lâs no, ɓe yɨ́ lâs ŋgə́ nɨ̀mɨr yi ɓa ndóŋtèèniì. 2Ŋgə́ ɨ́ tànà ŋgáb ɨnè: «Nàám á mwa̧á̧ cei, ɨ́dù nùb ə́ré cè bɨ́ ví̧i̧ ɗàà. Yóŋnáam tá mwarí, ŋgə́ tómwòkwà nùb ə́ré. 3Gɨnáam, mɨ tómtɨ́ nyí hȩ kùb tómndéce munɨ́b ndèɗúbí kpáín màŋgùbì noò. 4Nyí nɨ pósà ŋgáré ágè, dùgɨ̀ càká, dùgɨ̀ tə́b, nyí cè nɨ́ nyìndí jȩ̀ȩ̀ cɨ́ɨr. 5Ɓwâ nyí ɓa lénɨ dúú kù no rɨ, tarə́sonáam ɨnè: ‹Ju ɗóóŋ dù dúú rè no.› 6Nò ɗú ju ɗóóŋ ɨ́ dù yó ku, ŋgə́ ɓa gàmnɨ nyìndí nyínè kɨ́ á, duceé u̧ ɗàà, nyìndí nyínè kɨ́ dùcùcé nɨ ɓe nyí. 7Dunáam dúú kɨ́ no, taŋnáam, nyí a mèì nɨ́m kùb ɓa nyí nànɨ yó kwe, ɓetí á ɗúnɨ kùb nàhá nò ə́ré lɔ̀ɔ́ nóò. Nyí nɨ dúhé éin éítèè. 8Ɓwâ nyí ɓa lénɨ kwɨ́í kù noò, kùb ɨ́ gàmcè nyí, nɨ́m kùb na nyínè lâs, taŋnáam. 9Wáaŋnáam nɨ̀yáàb kwɨ́í kɨ́ noò, nyí a tànà ŋgáb: ‹Ŋgɔ̧́ɔ̧̀ Mèèín ŋgóobtɨ́.› 10Ɨ́dù, ɓwâ nyí ɓa lénɨ kwɨ́í kù no kùb ɨ́ dùcè nyí gàmwáá, fó̧náam laŋtaaŋ jííb ya, nyí a tà: 11‹Mvútúúb kwɨ́í nyínè rè noò, tɨ wúí nɨ́mè gureè á nɨ́m lámcukɨ́sona nyí ɗàrɨ́, ɨ́dù ɗəəŋnáɓam mîn ŋgɔ̧́ɔ̧̀ Mèèín ŋgóobtɨ́.› 12Mɨ tanaɓa nyí wááŋ á: ye Mèín ɓa ŋgùnnɨ nɨ̀vɨ́tɨ̀bì, jábɨ́r nùb kwɨ́í kɨ́ noò ɓa ndóŋnɨ kɨ́ nùb Sòdóòm á.»

Kwɨ́ì nùb no kwe ya mvú ɓàndɨ̀nɨ sumí

(Góòmɓwê Mt 11.20-24)

13«Jábɨ́r á ɓe wu Kòràsə̧̂, jábɨ́r á ɓe wu Bètsáyídà, ɓetí nɨ́ɨ́b sɨ̀sɨ̀rí ya ndɨŋ yá nyínè rè ya dùyè Tíìr ɓe Sìdôŋ á naa, nùb kwíì kɨ́ noò yè duréé ɗàá, ŋgáb a lə́rê kùtúùb só, ŋgáb a sàtèè tu̧ só bɨ̂ŋ, túùmnɨ ɨnayâna vúm ɓandɨtɨ́ sum vúmè. 14Àm kɨ́ á, ye Mèín ɓa ŋgùnnɨ nɨ̀vɨ́tɨ̀bì, jábɨ́r kùb ɓa túùmnɨ nùb Tíìr ɓe nùb Sìdóòŋ ɓa dùnɨ cə̀k á, kɨ́ nyínè ɨ́ ɓa ndóòŋnɨ. 15Wu ɗàrɨ́ cè, Kàpèrnàwûm, wu lə́mne wu ɓa wútɨ̀wúnɨ síí há̧á̧ ɓɨllin á à? Kùb ɓa wu nyísénɨ ɗàá há̧á̧ ko̧ó̧ á.» 16Á ŋgə́ tanakwa nɨ̀fuùb noò ɨnè: «Nò ók àm nyínè ɓɔ̧ne, ókɓwée kɨ́ mo ɓɔ̧ne á; Nò mvú nyínè, mvúɓwéece mɨ á. Nò mvúce mé, mvúɓwéece nò ya tómwo mé á.»

Nɨ̀fuùb vii taarɨ́b ɨ́ cóóŋ ɨ́ bɨrɨ́b lè féíncuwotɨ́

17 Nɨ̀fuùb vii taarɨ́b ɨ́ cóóŋ ɨ́ bɨrɨ́b lè ɨ́ féíncùwò ɓe mɨ̀tù sumí. Ŋgáb ɨ́ tà: «Kéké, dugɨ nɨ̀wàtɨ̀b á nɨ́m jə̀ŋnɨ ɓwâ nɨ́m du ŋgáb pámnɨ ɓe nyòm ɨ́r woò rɨ!» 18Yésù ɨ́ tàcùnà ŋgáb: «Mɨ tɨ á kòm pénɨ Sátàìn gùlòmsónɨ ɓɨllin hȩ nyə́ŋhȩ̀ȩ́ nàhí. 19Óknáye: mɨ tɨ naá nyí nyòm nyí ɗeiŋgírɨkɨ́ nyó̧nɨ́b ɓe mɨ̀nyààb, nyí a ndóŋkwà Sátàìn nyòme, nɨ́m kù á dùɓà nɨ́ nyí ndɨ̀ŋ. 20Ɨ́dù nyí nɨ mɨ̀tù ô àm nyéhè ɓáŋhɨ́b du nyí jə̀ŋniì, óknábɨ̂ŋ mɨ̀tù àm Mèín áré nyí kpáín nùb ŋgə́ caré no kwe.»

Yésù á mɨ̀tùú

(Góòmɓwê Mt 11.25-27; 13.16-17)

21Mvókín kɨ́ no ɓè mu̧u̧, Nyéhè Sarîn ɨ́ ndɨ̀ŋ Yésù ókɓà mɨ̀tù cei, á Yésù ta: «Tá, wu nò du Kéké ɓɨɨr ɓe ɗɔ̀bí, mɨ sáktií wu, àm wu ya yokna nùb kɨ̀cáblì ɓe nùb ɗɨŋhí̧ nɨ́ɨ́b wu ya túumna mucutɨ́bí. I̧i̧, Tá, á mè u̧nè, àm wu ya ɗú dù u̧nèé á.

22«Tá moò yi ɨ́ naɓa mɨ nɨ́ɨ́b lâs lu, nò ɗəŋhȩ muní nɨ ɗàà sé Tá, nò kù ɗəəŋce Táà nɨ ɗàà sé Mwin, ɓe nùb Mwin ɗú ɗə̀ŋhɨ̀ Táà.»

23Á Yésù ɓandɨcuré nɨ̀fuùb noò no, ŋgə́ ɨ́ tànà nɨ́ ŋgáb ɨnè: «Mɨ̀tù á ɓe íí duɓwée pénɨ nɨ́m nyí du pénɨ rè. 24Ɓetí mɨ tanaɓa nyí wááŋ á: tɨ́kɨ̀nɨ́b Mèèín ɓe mvènnɨ́b jííb ya tíí ya ɗúú vúm yè péé nɨ́m nyí du pénɨ kɨ́, ŋgáb ɨ́ dù bɨ́ pə́wa. Ŋgáb yá ɗúú vúm yè óó nɨ́m nyí du óknɨ kɨ́, ŋgáb ɨ́ dù bɨ́ ókwa.»

Sà̧à̧ gɨ̀gàìnbì Yésù ya átɨré

25Á nɨ̀gáŋ káàtàbì kù éíwúso còóm fɔ́nòòmhó̧nɨ Yésù àm ɓɔ̧ɔ̧. Ŋgə́ ɨ́ fɔ̂ ŋgə́ ɨnè: «Tá tɔ̀hí, ní á du ɗúnɨ mɨ ndɨ̀ŋtɨ ɗà mɨ a kwà mè mɨ̀cɨ̧̀ɨ̧́?» 26Á Yésù fɔ́cu ŋgə́ ɨnè: «Ní ɨ́ du tɨín káàtààb ɓíhɨ̀b Mòyîs ya nakɨ́so nɨ́mè no? Ɓwâ wu duce fàìnniì, njàb ŋge á wu duce nó ónɨ?» 27Á nɨ̀ŋgwá rè piina ŋgə́ ɨnè: « ‹Á ɗúnɨ wu ɗú Kéké nò du Mèín wóò, ɓe sum wóò lâs, ɓe mè woò lâs, ɓe nyòm woò lâs, ɓe kɨ̀cáàb woò lâs. Wu a ɗúgwàhè kùŋ ɓwà woò hȩ wu ɗú síí wu nɨ̀mɨrí.› » 28Á Yésù tana ŋgə́: «Pìí wóò á hàrák; ndɨŋ u̧, wu ɓa kwànɨ mè mɨ̀cɨ̧̀ɨ̧́ á.» 29Ɨ́dù nɨ̀gáŋ káàtàbì rè ɨ́ ɗû túùmnɨ ní nɨ ɗəəŋɓɔ̧́ré á; á ŋgə́ fɔ́cukwa Yésù ɨnè: «Na ɨ́ duce kùŋ ɓwà moò?» 30Yésù ɨ́ pììnà ŋgə́ ɨnè: «Nɨ̀ŋgwá kù ya éísówoó Yèrúsàlèm gìnɨ Yèríkò. Féín jȩ̀ȩ̀, ŋgàyíìb ɨ́ bì ŋgə́, ŋgáb ɨ́ gà júúb noò ɓe nɨ́ɨ́b noò lâs, ŋgáb ɨ́ jɨ̀mkɨ́sò ŋgə́ fín kɨ́ fín. 31Nò na satɨgàà kù yaácè nɨ́ sóndóŋnɨ gùr noò jɨ̀r kɨ́ no. Ŋgə́ ɨ́ gò sə́mnɨ nɨ̀ŋgwá rè, ŋgə́ ɨ́ ɓàŋndôŋ nɨ́ nɨ́m nóò gə́nȩ̀ȩ́, ŋgə́ ɨ́ gì nɨ́. 32Lèvît kù yaá sóɓwênɨ jɨ̀r kɨ́ no, ŋgə́ ɨ́ gò sə́mɓwênɨ nɨ̀ŋgwá rè, ŋgə́ ɨ́ ɓàŋdóŋɓwêhâ nɨ́. 33Ɨ́dù nɨ̀ŋgwá Sàmàríì kù yaá nɨ sóndóŋnɨ gùr noò jɨ̀r kɨ́ no ɓwê. Ŋgə́ ɨ́ féíndê nɨ̀ŋgwá rè ya. Ɓwâ ŋgə́ pə́ nɨ̀ŋgwá kíì, mwàm ɨ́ bɨ̀ɓà ŋgə́ cei. 34Ŋgə́ ɨ́ tɨ̀ɨ̀msê ŋgə́ ya. Ŋgə́ ɨ́ kɨ́klénà ŋgə́ kúrúm ɓe súm ɓààì ŋgéé sóò no, ŋgə́ ɨ́ ɓòmkî. Ɗà ŋgə́ ɨ́ hàìnwî ŋgə́ tɨ́ha̧á̧ nóò ya, ŋgə́ ɨ́ gè ŋgə́ dúú nɨ̀gwíbí no gə́tɨ̀nɨ. 35Kpíí, ŋgə́ ɨ́ nà nò gə́tɨ dúú kíì mòné, á ŋgə́ tana nò kɨ́ ɨnè: ‹Garɨm nɨ̀ŋgwá rè, mwèìn ndè duú èrɨ̀wá, wu a kpɔ̀ɔ̀rê. Ɓwâ mɨ ɓa ndóŋcùniì, mɨ nɨ̀mɨr a tì nàcù wu.› »

36Yésù ɨ́ fɔ́gì nɨ̀gáŋ káàtàbì rè ɨnè: «Mvókín nùb taarɨ́b kɨ́, kɨ́ woò, wu pə́ce, na ɨ́ du kùŋ ɓwà nɨ̀ŋgwá kùb tɨ jɨm ndè?» 37Á ŋgə́ piina Yésù, ŋgə́ ɨ́ tà: «Nò tɨ ndɨŋ ŋgə́ mîn ndɨ á.» Kí á Yésù tanagi ŋgə́: «Gɨm, wu a ndɨ̀ŋɓwê u̧.»

Yésù á Máártà ɓe Màríyà yó

38Yésù ɓe nɨ̀fuùb noò yaá gùrí. Féín kwɨ́í kù no, nɨ̀gwi kù ɨ́r yi du Máártà ɨ́ gàm ŋgə́ no yó. 39Máártà kɨ́ yaá ɓe mwin yàá noò ɨ́r yi du Màríyà, Màríyà kɨ́ ɨ́ gò dùrénɨ Kékéé ɓusiín ónɨ tɔ̀ɔ́ ŋgéé. 40Máártà yaáɓà bɨrîn ɓe ə́rɨ́b yóò. Á ŋgə́ gɨsoye yɨ́ Yésùù, tànànɨ ŋgə́ ɨnè: «Kéké, hȩ mwin yàá mo rè mbɨ́kléháce nɨ́ mɨ ə́rɨ́b lè ya mwi̧ ndè, nɨ wu nɨ́m kù tànànɨ ɗàwá à? Tanam ŋgə́, ŋgə́ gòcé mɨ kpɔ́knɨ ye.» 41Á Kéké tacuna ŋgə́: «Máártà moò, á wu só yínɨ, wu a jáabce síí ɓe ɨ́r nɨ́ɨ́b ví̧ne. 42Ɨ́dù nɨ́m mwi̧ ɨ́ du nɨ́ tíí. Màríyà caá nɨ́ ə́r du nɨ́ nyɔ̧ɔ̧́ ndóŋ kɨ́ woò, kùb kwá tɨ̀ bɨ ŋgə́ ə́r kɨ́ ŋgáré ákɨ̂r.»

Currently Selected:

Lúkàs 10: NTV

Highlight

Copy