Lúkàs 17
17
Sóóŋ ɓe ɨ́r cum ɓe tɨ́llí
(Góòmɓwê Mt 18.6-7, 21-22; Mk 9.42)
1Yésù ɨ́ tànà nɨ̀fuùb noò ɨnè: «Nɨ́ɨ́b geré nɨ̀vɨ́tɨ̀b cumí kwá dulɨ́ŋhá nɨ́. Ɨ́dù jábɨ́r kwá du ɓe nò njóoré kùŋ noò cumí! 2Kɨ́ nò kíì, nyɔ̧ɔ̧́ á kùb kóllé ŋgə́ jùm kù ya lèrénɨ mɨ̀kwehɨ̀rí, ɨ́ ndôŋ kɨ́ ŋgə́ njóoré kùŋ noò cumí. 3Gə́tɨná nɨ!
«Mwin yàá woò ɨ́ ndɨ̀ŋ ɓáŋhîn, yetɨɓam ŋgə́. Ŋgə́ ɨ́ ô, wu a tɨ́ì ŋgə́. 4Mvii mwi̧í̧ no, ŋgə́ ndɨ̀ŋgɨ̀ ɓáŋhîn gwì meeb ŋgə́ a goce wu ɓwèìnɨ tɨ́ɨ́r, tɨ́í ŋgə́.»
Dunáam ɓe ə́ə́m tamnì
5 Nùb tómé ɨ́ tànà Kéké ɨnè: «Taamnam nɨ́m ə́ə́m nɨ́mè!» 6Á Kéké tana ŋgáb ɨnè: «Ə́ə́m nyínè tɨ dùháyè tamnì ti, yè tɨ á sàmàìn nyí tana yɔ̀ rè: ‹Éíkɨ́ɨm ɓè, wu a gì dùnɨ mɨ̀kwehɨ̀rí›, yɔ̀ kɨ́ a éíkɨ́mè.»
Jə̧̀ə̧́ ə́r kùb ɗob wé
7«Nɨ́m tàpéyè mvókín nyínè no, nɨ̀mwi̧ á ɓe nò ə́ré du ŋgə́ mwar ɗȩ̀nɨ̀nàniì, kɨ́ kù du ŋgə́ nyèém noò gə́tɨ̀nàniì. Ɓwâ ŋgə́ ɓa pénɨ nò ə́ré kɨ́ cùwònɨ mwa̧né, ŋgə́ tɨ̀ nɨ ŋgə́ ɓè mu̧u̧, ‹Gom cɔŋ tàŋnɨ› na tànàwá. 8Nɨ́m ŋgə́ ɓa ŋgə́ tànàniì á: ‹Sina mɨ cɔŋ, wu a cə́ndè júk. Wu a gèwònà mɨ cɔŋ kɨ́ mɨ tàŋtɨ. Mɨ taŋcáaŋtɨ́, wu a gòcùcè kɨ́ woò tàŋnɨ.› 9Wu tɨ̀ wu nò wo ə́ré kɨ́ sáktɨ̀wá àm ŋgə́ tɨ ndɨŋ nɨ́m wu tɨ ta ŋgə́ ndɨ̀ŋte. 10Kɨ́ nyínè duɓwée u̧ á. Ɓwâ nyí ndɨŋ nɨ́m Mèín ta nyí ndɨ̀ŋte, tanáam: ‹Nɨ́m du nɨ nùb ə́ré saai á, nɨ́m ndɨŋháce nɨ́ nɨ́m kùb ta nɨ́m ndɨ̀ŋte á.› »
Yésù cáaŋkɨ́naá njɨ̀njə́ə̀b cóóŋ njɨ̀ɨ̀b ŋgábè, nɨ̀mwi̧ ɨ́ cùwò ŋgə́ sáktɨ̀nɨ
11Yésù yaá gìnɨ Yèrúsàlèm. Ŋgə́ ɨ́ téínsê ɗɔ̀ɔ́b Gàlìléè gìnɨ ɓàŋsénɨ ɗɔ̀ɔ́b Sàmàríì. 12Féín gín kwɨ́í kù, á njɨ̀ŋjə́ə̀b cóóŋ gainso Yésù. Ŋgáb ɨ́ ə́ə̀ŋsò bɨ́ cóo. 13Ŋgáb ɨ́ ya kɨ́ŋsònɨ ɨnè: «Yésù! Yée tá, ók nɨ́m mwàm!» 14Yésù pə́so ŋgáb, ŋgə́ ɨ́ tàsò: «Gɨnáam túùmnànɨ nùb na satɨgàà síí.»#17.14 Yésù yi ɗú ŋgáb tànànɨ ɨnayâna njɨ̀ɨ̀b ŋgábè sutií na á. Ɓetí nò njɨ̀ɨ̀b noò sutɨré yaákòm gìnɨ túùmnànɨ nùb na satɨgàà síí ɗà nùb kɨ́ a gècùrówò ŋgə́ mɨ̀kùnɨ́nné. Ŋgáb gɨ̀sénɨ á ŋgáb sɨ̀rɨ̀cì na njɨ̀ɨ̀b ŋgábè sutií nɨ́. 15Ɨ́dù nɨ̀mwi̧ mvókín ŋgábè noò, hȩ ŋgə́ pénɨ njɨ̀ɨ̀b níì sutií nɨ́ rèé, ŋgə́ ɨ́ ɓàndɨ̀cùwò nɨ́ cùrì, ŋgə́ a mgbíice Mèín kúu còóm. 16Ŋgə́ ɨ́ gò gùcáàmsénɨ Yésùù ɓusiín ŋgə́ sáktɨ̀nɨ. Nò yi cuwo nɨ́ kɨ́ yɨɨ́mcè nɨ́ nò Sàmàríì á. 17Yésù ɨ́ tà: «Ína njɨ̀njə́ə̀b cóóŋ lâs, njɨ̀ɨ̀b ŋgábè sutɨhaá ye! Nùb ɓwécɔ̧́ kù rè á cè bɨ́ ŋga? 18Kí du nò kù nɨ lə́ə̀mwá ní cùwòyè sáktɨ̀nɨ Mèèín, sé nò du nɨ́ nɨ̀gúr lè hàye?» 19Á Yésù tana nɨ̀ŋgwá Sàmàríì rè ɨnè: «Eíwúum còóm, gɨ wu nɨ́m wóò! Ə́ə́m wóò ɓátií wu.»
Yésù á nyìnnɨ àm Ŋgɔ̧́ɔ̧̀ Mèèín féínndé
(Góòmɓwê Mt 24.23-28, 37-41)
20 Fàrísààb ɨ́ fɔ̂ Yésù ɓwâ ŋge á Ŋgɔ̧́ɔ̧̀ Mèèín kɨ́ ɓa féínnɨ. Á Yésù piina ŋgáb ɨnè: «Ŋgɔ̧́ɔ̧̀ Mèèín nɨ nɨ́m kùb fɨ́tɨ pénɨ gòɓànɨ laŋtɨ̧né nɨ sé. 21Kùb tɨ̀ bɨ nyí tànàwá: ‹Pə́náye ŋgə́ á hò̧!› kɨ́ kù ‹Ŋgə́ á péín ndɨ!› na. Nɨ́m mwi̧, ɗəəŋnáɓam ɨnayâna Mèín á cɨ̀ nɨ nyí ya ŋgáŋnɨ.»
22Á Yésù tana nɨ̀fuùb ɨnè: «Kwá du u̧u̧, nyí a tà: ‹Ɓwâ Mwin Nɨ̀rì ɓa cùwònɨ kɨ́, ɓè nɨ́me ŋgáb tɨ duhó̧háye mvii mwi̧í̧ naa›, ɨ́dù nyí a dù nɨ́ ŋgə́ pə̂r. 23Kùb kwá tana nyí ɨnè: ‹Pə́sonáye péín ndɨ!› ‹Pə́náye hò̧!› nyí nɨ ku gɨ̀r, nyí cè nɨ́ ku lùgè. 24Hȩ nyə́ŋhȩ̀ȩ́ nàhí du kùb sɨ̀rɨ̀nɨ mwa kɨ́ a gàkî ɗɔ̀ɔ́b bɨ̂ŋ ndɨ, u̧ á ɓwê cùwòó Mwin Nɨ̀rì ɓa dùnɨ fɨ́sɨɨm ɗà àm kɨ́ a gàkî ɗɔ̀ɔ́b lè bɨ̂ŋ. 25Nɨ́m mwi̧, ɗú ŋgə́ pə́ɓàyè jábɨ́r cei á, nùb jíìb mwánnè a mvúlèhè ŋgə́. 26Nɨ́m ɓa ndɨ̀ŋnɨ ɓwâ Mwin Nɨ̀rì ɓa cùwòniì tɨ̀ duɓwéece hȩ kɨ́ ya ndɨŋ ɓwâ ya Nòwéè rɨ. 27Nɨ̀vɨ́tɨ̀b yaá tàŋnɨ ŋgáb a meice, ŋgáb yaá ɓùtèènɨ gùúm, há̧á̧ hȩ ye Nòwê lə́ kwánnè ya go ɗóòniì. Mbɨ̀ɨ̀ŋ kàm ndè ɨ́ gògì nɨ̀vɨ́tɨ̀b ndùùkɨ́nɨ. 28Ɓa dùɓwênɨ hȩ ɓwâ ya Lóòt á: Nɨ̀vɨ́tɨ̀b yaá tàŋnɨ ŋgáb a meice, ŋgáb yaá gùrɨ̀nɨ nɨ́ɨ́b ŋgáb a sə́rɨce, ŋgáb yaá ɗòŋnɨ nɨ́ɨ́b ŋgáb a óoŋteece dúhɨ́b; 29Ɨ́dù ye Lôt ya éíhó̧kɨ́ Sòdóòm, wa ɨ́ ndììsówò ɓɨllin, ɨ́ gò ndùùkɨ́nɨ nùb lâs. 30Ye Mwin Nɨ̀rì ɓa mgbíí noò túùmniì, nɨ́m kɨ́ kwá ndɨŋɓwée u̧.
31«Ye Mwin Nɨ̀rì kwá cuwo kɨ́, nò kwá du ŋgwé dúhéé sótɨ́ ə́llénɨ, ŋgə́ nɨ yó lə́cuyè árɨ̀nɨ nɨ́ɨ́b noò; wu dùgɨ̀ mwa̧á̧ yoo, wu wu yó cùwòyè. 32Lə́əmcunáam nɨ́m ya ndóŋ ɓe gwi Lóòt. 33Ɓetí nò kwá má ɓátɨ̀nɨ mè noò, kwá məm mè no kɨ́. Ɨ́dù no məm mè noò ɓe ɨ́r moò kwá céín mè no kɨ́. 34Mɨ tanaɓa nyí àmɨɨr wááŋ á, ɓwâ kɨ́ nɨ̀vɨ́tɨ̀b bɨrɨ́b ɨ́ dù kòó gwîn, kùb a hàìnhô̧ nɨ̀mwi̧, nɨ̀mwi̧ a mècê. 35Nɨ̀gub bɨrɨ́b ɨ́ dù gwìí, kùb a hàìnhô̧ nɨ̀mwi̧, nɨ̀mwi̧ a mècê. [ 36Nɨ̀ŋgwáàb bɨrɨ́b ɨ́ dù mwa̧á̧, kùb a hàìnhô̧ nɨ̀mwi̧, nɨ̀mwi̧ a mècê.]» 37Á nɨ̀fuùb Yésùù fɔ́ ŋgə́ ɨnè: «Kéké, nɨ́ɨ́b kɨ́ kwá ndɨŋce bɨ́ ŋga?» Á ŋgə́ piina ŋgáb ɓe gɨ̀gàìn ɨnè: «Yɨ́ fín nyèmì səmndé, yɨ́ gbə́ ɓáaceré á ye.»
Currently Selected:
Lúkàs 17: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
Lúkàs 17
17
Sóóŋ ɓe ɨ́r cum ɓe tɨ́llí
(Góòmɓwê Mt 18.6-7, 21-22; Mk 9.42)
1Yésù ɨ́ tànà nɨ̀fuùb noò ɨnè: «Nɨ́ɨ́b geré nɨ̀vɨ́tɨ̀b cumí kwá dulɨ́ŋhá nɨ́. Ɨ́dù jábɨ́r kwá du ɓe nò njóoré kùŋ noò cumí! 2Kɨ́ nò kíì, nyɔ̧ɔ̧́ á kùb kóllé ŋgə́ jùm kù ya lèrénɨ mɨ̀kwehɨ̀rí, ɨ́ ndôŋ kɨ́ ŋgə́ njóoré kùŋ noò cumí. 3Gə́tɨná nɨ!
«Mwin yàá woò ɨ́ ndɨ̀ŋ ɓáŋhîn, yetɨɓam ŋgə́. Ŋgə́ ɨ́ ô, wu a tɨ́ì ŋgə́. 4Mvii mwi̧í̧ no, ŋgə́ ndɨ̀ŋgɨ̀ ɓáŋhîn gwì meeb ŋgə́ a goce wu ɓwèìnɨ tɨ́ɨ́r, tɨ́í ŋgə́.»
Dunáam ɓe ə́ə́m tamnì
5 Nùb tómé ɨ́ tànà Kéké ɨnè: «Taamnam nɨ́m ə́ə́m nɨ́mè!» 6Á Kéké tana ŋgáb ɨnè: «Ə́ə́m nyínè tɨ dùháyè tamnì ti, yè tɨ á sàmàìn nyí tana yɔ̀ rè: ‹Éíkɨ́ɨm ɓè, wu a gì dùnɨ mɨ̀kwehɨ̀rí›, yɔ̀ kɨ́ a éíkɨ́mè.»
Jə̧̀ə̧́ ə́r kùb ɗob wé
7«Nɨ́m tàpéyè mvókín nyínè no, nɨ̀mwi̧ á ɓe nò ə́ré du ŋgə́ mwar ɗȩ̀nɨ̀nàniì, kɨ́ kù du ŋgə́ nyèém noò gə́tɨ̀nàniì. Ɓwâ ŋgə́ ɓa pénɨ nò ə́ré kɨ́ cùwònɨ mwa̧né, ŋgə́ tɨ̀ nɨ ŋgə́ ɓè mu̧u̧, ‹Gom cɔŋ tàŋnɨ› na tànàwá. 8Nɨ́m ŋgə́ ɓa ŋgə́ tànàniì á: ‹Sina mɨ cɔŋ, wu a cə́ndè júk. Wu a gèwònà mɨ cɔŋ kɨ́ mɨ tàŋtɨ. Mɨ taŋcáaŋtɨ́, wu a gòcùcè kɨ́ woò tàŋnɨ.› 9Wu tɨ̀ wu nò wo ə́ré kɨ́ sáktɨ̀wá àm ŋgə́ tɨ ndɨŋ nɨ́m wu tɨ ta ŋgə́ ndɨ̀ŋte. 10Kɨ́ nyínè duɓwée u̧ á. Ɓwâ nyí ndɨŋ nɨ́m Mèín ta nyí ndɨ̀ŋte, tanáam: ‹Nɨ́m du nɨ nùb ə́ré saai á, nɨ́m ndɨŋháce nɨ́ nɨ́m kùb ta nɨ́m ndɨ̀ŋte á.› »
Yésù cáaŋkɨ́naá njɨ̀njə́ə̀b cóóŋ njɨ̀ɨ̀b ŋgábè, nɨ̀mwi̧ ɨ́ cùwò ŋgə́ sáktɨ̀nɨ
11Yésù yaá gìnɨ Yèrúsàlèm. Ŋgə́ ɨ́ téínsê ɗɔ̀ɔ́b Gàlìléè gìnɨ ɓàŋsénɨ ɗɔ̀ɔ́b Sàmàríì. 12Féín gín kwɨ́í kù, á njɨ̀ŋjə́ə̀b cóóŋ gainso Yésù. Ŋgáb ɨ́ ə́ə̀ŋsò bɨ́ cóo. 13Ŋgáb ɨ́ ya kɨ́ŋsònɨ ɨnè: «Yésù! Yée tá, ók nɨ́m mwàm!» 14Yésù pə́so ŋgáb, ŋgə́ ɨ́ tàsò: «Gɨnáam túùmnànɨ nùb na satɨgàà síí.»#17.14 Yésù yi ɗú ŋgáb tànànɨ ɨnayâna njɨ̀ɨ̀b ŋgábè sutií na á. Ɓetí nò njɨ̀ɨ̀b noò sutɨré yaákòm gìnɨ túùmnànɨ nùb na satɨgàà síí ɗà nùb kɨ́ a gècùrówò ŋgə́ mɨ̀kùnɨ́nné. Ŋgáb gɨ̀sénɨ á ŋgáb sɨ̀rɨ̀cì na njɨ̀ɨ̀b ŋgábè sutií nɨ́. 15Ɨ́dù nɨ̀mwi̧ mvókín ŋgábè noò, hȩ ŋgə́ pénɨ njɨ̀ɨ̀b níì sutií nɨ́ rèé, ŋgə́ ɨ́ ɓàndɨ̀cùwò nɨ́ cùrì, ŋgə́ a mgbíice Mèín kúu còóm. 16Ŋgə́ ɨ́ gò gùcáàmsénɨ Yésùù ɓusiín ŋgə́ sáktɨ̀nɨ. Nò yi cuwo nɨ́ kɨ́ yɨɨ́mcè nɨ́ nò Sàmàríì á. 17Yésù ɨ́ tà: «Ína njɨ̀njə́ə̀b cóóŋ lâs, njɨ̀ɨ̀b ŋgábè sutɨhaá ye! Nùb ɓwécɔ̧́ kù rè á cè bɨ́ ŋga? 18Kí du nò kù nɨ lə́ə̀mwá ní cùwòyè sáktɨ̀nɨ Mèèín, sé nò du nɨ́ nɨ̀gúr lè hàye?» 19Á Yésù tana nɨ̀ŋgwá Sàmàríì rè ɨnè: «Eíwúum còóm, gɨ wu nɨ́m wóò! Ə́ə́m wóò ɓátií wu.»
Yésù á nyìnnɨ àm Ŋgɔ̧́ɔ̧̀ Mèèín féínndé
(Góòmɓwê Mt 24.23-28, 37-41)
20 Fàrísààb ɨ́ fɔ̂ Yésù ɓwâ ŋge á Ŋgɔ̧́ɔ̧̀ Mèèín kɨ́ ɓa féínnɨ. Á Yésù piina ŋgáb ɨnè: «Ŋgɔ̧́ɔ̧̀ Mèèín nɨ nɨ́m kùb fɨ́tɨ pénɨ gòɓànɨ laŋtɨ̧né nɨ sé. 21Kùb tɨ̀ bɨ nyí tànàwá: ‹Pə́náye ŋgə́ á hò̧!› kɨ́ kù ‹Ŋgə́ á péín ndɨ!› na. Nɨ́m mwi̧, ɗəəŋnáɓam ɨnayâna Mèín á cɨ̀ nɨ nyí ya ŋgáŋnɨ.»
22Á Yésù tana nɨ̀fuùb ɨnè: «Kwá du u̧u̧, nyí a tà: ‹Ɓwâ Mwin Nɨ̀rì ɓa cùwònɨ kɨ́, ɓè nɨ́me ŋgáb tɨ duhó̧háye mvii mwi̧í̧ naa›, ɨ́dù nyí a dù nɨ́ ŋgə́ pə̂r. 23Kùb kwá tana nyí ɨnè: ‹Pə́sonáye péín ndɨ!› ‹Pə́náye hò̧!› nyí nɨ ku gɨ̀r, nyí cè nɨ́ ku lùgè. 24Hȩ nyə́ŋhȩ̀ȩ́ nàhí du kùb sɨ̀rɨ̀nɨ mwa kɨ́ a gàkî ɗɔ̀ɔ́b bɨ̂ŋ ndɨ, u̧ á ɓwê cùwòó Mwin Nɨ̀rì ɓa dùnɨ fɨ́sɨɨm ɗà àm kɨ́ a gàkî ɗɔ̀ɔ́b lè bɨ̂ŋ. 25Nɨ́m mwi̧, ɗú ŋgə́ pə́ɓàyè jábɨ́r cei á, nùb jíìb mwánnè a mvúlèhè ŋgə́. 26Nɨ́m ɓa ndɨ̀ŋnɨ ɓwâ Mwin Nɨ̀rì ɓa cùwòniì tɨ̀ duɓwéece hȩ kɨ́ ya ndɨŋ ɓwâ ya Nòwéè rɨ. 27Nɨ̀vɨ́tɨ̀b yaá tàŋnɨ ŋgáb a meice, ŋgáb yaá ɓùtèènɨ gùúm, há̧á̧ hȩ ye Nòwê lə́ kwánnè ya go ɗóòniì. Mbɨ̀ɨ̀ŋ kàm ndè ɨ́ gògì nɨ̀vɨ́tɨ̀b ndùùkɨ́nɨ. 28Ɓa dùɓwênɨ hȩ ɓwâ ya Lóòt á: Nɨ̀vɨ́tɨ̀b yaá tàŋnɨ ŋgáb a meice, ŋgáb yaá gùrɨ̀nɨ nɨ́ɨ́b ŋgáb a sə́rɨce, ŋgáb yaá ɗòŋnɨ nɨ́ɨ́b ŋgáb a óoŋteece dúhɨ́b; 29Ɨ́dù ye Lôt ya éíhó̧kɨ́ Sòdóòm, wa ɨ́ ndììsówò ɓɨllin, ɨ́ gò ndùùkɨ́nɨ nùb lâs. 30Ye Mwin Nɨ̀rì ɓa mgbíí noò túùmniì, nɨ́m kɨ́ kwá ndɨŋɓwée u̧.
31«Ye Mwin Nɨ̀rì kwá cuwo kɨ́, nò kwá du ŋgwé dúhéé sótɨ́ ə́llénɨ, ŋgə́ nɨ yó lə́cuyè árɨ̀nɨ nɨ́ɨ́b noò; wu dùgɨ̀ mwa̧á̧ yoo, wu wu yó cùwòyè. 32Lə́əmcunáam nɨ́m ya ndóŋ ɓe gwi Lóòt. 33Ɓetí nò kwá má ɓátɨ̀nɨ mè noò, kwá məm mè no kɨ́. Ɨ́dù no məm mè noò ɓe ɨ́r moò kwá céín mè no kɨ́. 34Mɨ tanaɓa nyí àmɨɨr wááŋ á, ɓwâ kɨ́ nɨ̀vɨ́tɨ̀b bɨrɨ́b ɨ́ dù kòó gwîn, kùb a hàìnhô̧ nɨ̀mwi̧, nɨ̀mwi̧ a mècê. 35Nɨ̀gub bɨrɨ́b ɨ́ dù gwìí, kùb a hàìnhô̧ nɨ̀mwi̧, nɨ̀mwi̧ a mècê. [ 36Nɨ̀ŋgwáàb bɨrɨ́b ɨ́ dù mwa̧á̧, kùb a hàìnhô̧ nɨ̀mwi̧, nɨ̀mwi̧ a mècê.]» 37Á nɨ̀fuùb Yésùù fɔ́ ŋgə́ ɨnè: «Kéké, nɨ́ɨ́b kɨ́ kwá ndɨŋce bɨ́ ŋga?» Á ŋgə́ piina ŋgáb ɓe gɨ̀gàìn ɨnè: «Yɨ́ fín nyèmì səmndé, yɨ́ gbə́ ɓáaceré á ye.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon