Màtíyò Yààr
Yààr
Kìn Nyɔ̧ɔ̧́ Màtíyò yi tɨin ndè, ŋgə́ yi tɨnna Jwîf bɨ á. Ŋgáb ɗəəŋɓatɨ́ nɨ́ɨ́b du káàtààb fɨ̀nní noò mîn. Káàtà Màtíyò kɨ́ no, ŋgə́ taá ɨnayâna Yésù du nò yi go ndɨ̀ŋnɨ nɨ́ɨ́b yi du káàtààb fɨ̀nní no tɨnné fó̧ hàráá á. Ŋgə́ á fà̧à̧ɓàcéyènɨ nɨ́ɨ́b kɨ́. Ɓwâ Màtíyò yi tɨin káàtà rèè, Jwîf bɨ yi du nùb ə́mní yi bɨ́ lénɨ dúú mɨ̀yú̧ú̧ ɗàà, kùb ya ŋgɨ́íhó̧ó̧ ŋgáb. Ŋgáb ɨ́ gì nyààŋnɨ mɨ̀kwìn ə́mní ŋgábè, ɨ́dù ŋgáb yaá bɨ gàmndénɨ nùb du bɨ́ Jwîf séé mɨ̀kwìn ŋgábè kɨ́ no.
Kɨ́ Màtíyòò, Yésù du Tá tɔ̀hí du tànɨ ɓe sɨr cúk nɨ́m Mèín ta nùb ə́mní ndɨ̀ŋte á. Tá tɔ̀hí kɨ́ á tànànɨ kùb i̧ á kùb fɨ́tɨ óknɨ njàb nɨ́ɨ́b du ti̧nɨ́b káàtààb fɨ̀nní noò. Màtíyò ta Yésù du Mèsî Jwîf bɨ yi móŋkom ndè á. Ɓwâ Màtíyò du nyìnnɨ àm Ŋgɔ̧́ɔ̧̀ Mèèín, ŋgə́ á ɓéènɨ ɨnè: «Mèín du mvèìn jíri á, ŋgə́ á cɨ̀ nɨ túùmsówònɨ ŋgɔ̧́ɔ̧̀ nóò ɗɔ̀bín.»
Kìn Nyɔ̧ɔ̧́ Màtíyò yi tɨnndé á ɓáàkɨ́nɨ njàb kìn nyɔ̧ɔ̧́ Máàrk ɓe Lúkàs yi tɨnndé.
Káàtà kɨ́ no, nyindɨ́b Yésù nyinteeré, ŋgə́ gɔɔtɨ́ nyindɨ́b kɨ́ ŋgiì:
Yàrénɨ gɔ̀ 5 há̧á̧ 7: Nyindí Yésù yi nyin ɓeè còmné duna nɨ̀fuùb noò túúm á. Nyindí kɨ́ gómɨ ju nɨ̀vɨ́tɨ̀b du dùnɨ mvókín ŋgábè noò ɓe kɨ́ ŋgáb du dùnɨ ɓe Mèèín á.
Gɔ̀ 10: Nyindí Yésù yi nyin gɔ̀ cóóŋ kɨ́ noò á nànɨ nùb du gìnɨ ɓéèsénɨ Kìn Nyɔ̧né nyòm ŋgáb ndɨŋ nɨ́m kíì, á ŋgáb nàɓwênɨ sóóŋ.
Gɔ̀ 13: Nyindí Màtíyò nyin gɔ̀ kɨ́ noò á ɓáàkɨ́nɨ sà̧à̧ bɨ Yésù yi áte àm túumna nɨ̀vɨ́tɨ̀b nɨ́m du ndóŋnɨ ɓwâ Mèín du ŋgáŋnɨ nɨ̀vɨ́tɨ̀bì yaà.
Gɔ̀ 18: Nyindí gɔ̀ kɨ́ noò á túùmnɨ i̧ á mwin yàá ɓe kùb fɨ́tɨ dùnɨ ɓwâ ŋgáb du mɨ̀kwìn nùb ə́mní noò.
Yàrénɨ gɔ̀ 24 há̧á̧ 25: Nyindí kɨ́ á tànɨ i̧ á du sàmàìn nɨ̀fuùb móŋ pénɨ hȩ Mèín ɓa ɓə̀nnɨ su ye cáŋhɨ̀rí. Sà̧à̧ bɨ Màtíyò átɨ káàtà no rè no yàrénɨ ya̧á̧ ɓe cáŋhɨ̀rí á tànɨ àm Yésùù sóò: hȩ kɨ́ Yésù yi wáŋhȩ nɨ̀yábì, kɨ́ ŋgə́ yi líhe mɨ̀kwìn nɨ̀vɨ́tɨ̀bì rɨ, kɨ́ ŋgə́ du lènànɨ nɨ̀vɨ́tɨ̀b gɨ̀gàìnbì ɓe kɨ́ ŋgə́ ɓe kɨ̀jííb Jwîf bɨ du ndáŋniì rɨ u̧.
Yàrê káàtà kíì, Màtíyò á nyìnnɨ àm fin Yésùù ɓe mutɨɨr ŋgéé (Gɔ̀ 1 há̧á̧ 2). Cáŋhɨ̀r káàtà kíì, ŋgə́ á tànɨ àm Yésù du mvèìn Jwîf ɓoò, kɨ́ ŋgù̧ú̧ yi téín ɨ́ tà kùb kwíìkɨ́ Yésù, kùb ɨ́ kpáàŋwû ŋgə́ bɨ̧̀ɨ̧́ (Gɔ̀ 27). Ɨ́dù Mèín ɨ́ sə̀ə̀mcùhô̧ ŋgə́ cwéé. Kɨ́ Yésù yi túumna nɨ̀fuùb noò síí. Kɨ́ ŋgə́ yi ta nɨ̀fuùb noò ɓéènà gbààŋ ɗɔ̀bɨ́nné lâs Kìn Nyɔ̧né (Gɔ̀ 28).
Kùb Yésù fèìnɓàyèwá, ɨ́r nóò yaá Èmànúwèl, kí ta: «Mèín á ɓe nɨ́m» na á. (Gɔ̀ 1.23). Màtíyò cáaŋtɨ́ káàtà noò ɓe ɓwáár Yésù yi ɓwállé ɨnè: «Kɨ́ moò, mɨ ɓa dùnɨ ɓe nyí á há̧á̧ cáŋhȩ̀ ɗɔ̀bí» (Gɔ̀ 28.20). Yésù du hȩ Mèín á mvókín nɨ̀vɨ́tɨ̀bì.
Currently Selected:
Màtíyò Yààr: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon