Johani 6
6
Jesu Wasanina Bantu bali Shuulu Shosanwe
(Matayo 14:13-21; Maako 6:30-44; Luka 9:10-17)
1Inzho Jeso wakaya umutala umwi wezhiba lya Galilaya, lelyo litewa ati lwaatele lwa Tibeliyasi. 2Bantu banji banji bakamucilila nkaambo bakabona shitondezho sha nsana nshaakaponya balwazhi. 3Jeso wakaya alupili awo ngaakaya kukala u ba shiciiya bakwe. 4Inzho ipobwe lya kwiitilila lyaba Juda kalili afwaafwi. 5Inzho Jeso naakasansula menso wakabona inkamu inkando ya bantu ileza kwakwe, amane wakoombuzha Filipo ati, “Anu tulakashuula kwi shakulya kwaamba baba boonse bantu balye?” 6Naabuzha bobo kamusunka bulyo Filipo kwaamba ateelele mbwaakaaingula nkaambo mwini walo kacizhi kale cakucita.
7Filipo wakaingula ati, “Nitukaula shinkwa sha mali a siliva ali myaanda yobile tabazulili bantu boonse nikuba kusola kapanzha kashoonto bulyo.”
8Ngoonaawo umwi shiciiya uutewa ati Andulu munina Saimoni Pita wakaamba ati, 9“Kuli mweembezhi uukwete tunkwa tosanwe twaapangwa kubufwu bwa bale iiswi shobile. Pele tashibazulili baba bantu boonse.”
10Jeso wakaamba ati, “Noombakalike bantu.” Abusena bobo kakuli bwizu bunji bunji. Inzho bakakala anshi, mweelwe wabalombwana kooli shuulu shosanwe, kutabala bakaintu u bana. 11Jeso wakashibweza shesho shinkwa, amane kulumba wakapa babo bakaakushite. Umbona bobo wakabapa iinswi. Inzho boonse bakekuta. 12Bamane kulya, Jeso wakabalailila ba shiciiya bakwe kwaamba babwezelele bufwefwelenga bwashinkwa boonse bwakashaala nibakaakulya bantu kwaamba kubule cilyo cizonauka. 13Ubobo bakabubwezelele bufwefwelenga bwashinkwa shosanwe bwakashaala ukuzuzha intundu shili ikumi iintundu shobile.
14Bantu nibakacibona ncaakacita Jeso bakaamba ati, “Ncobeni wezu inguwe mushinshimi ulangilwa kwiza anshi.” 15Jeso wakazhiba ati bantu balazanda kumubika a bwami ubobo ulimwi wakaya kukala ku lupili ice.
Jeso Weenda Ameenzhi
(Matayo 14:22-33; Maako 6:45-52)
16Kumangolezha ba shiciiya baka Jeso bakaselemuka baya kwizhiba, 17koko bakanjila mu bwato kwaamba balanduke kuya umutala umwi wezhiba, kuya u Kapenaumi, kwakashiya Jeso katana kwiza nkubakaakubele. 18Kwakaba mankutisha mwizhiba nkaambo kwakaba ikunku. 19Ba shiciiya nibakashika bwato makilomita ali osanwe na cisambomwi, bakabona Jeso uleza nkubakaakubele ezeulu ameenzhi, ceco cakabatizha cini cini. 20Jeso wakabaambila ati, “Ndime mutatiyi.” 21Ubobo bakamuhuminya kunjila mu bwato, ndilyona bwakashoka kumuuma nkubakaakuya.
Bantu Bamukapula Jeso
22Nibwakaca inkamu yakakusheele umutala umwi wezhiba, yakazhiba ati kakuli bulyo bwato bomwi bwakasebezha ba shiciiya kulanduka kuya umutala umwi. Ulimwi bakabona ati Jeso wiina naakanjila mu bwato u ba shiciiya bakwe bakamushiya bakaya beni. 23Inzho amwi mato akahwa ku Tibeliyasi, akashika ku mulando wakaakuli afwaafwi u busena ngubakalila shinkwa bantu, Mwami Jeso naakamaninzha kulumba Leza. 24Inzho bantu nibakabona ati Jeso u ba shiciiya bakwe tabewo abusena bobo, bakanjila mu twato baya ku Kapenaumi kukapula Jeso.
Jeso Ncinkwa Ca Bumi
25Nibakamuyana Jeso umutala umwi bakamubuzha ati, “Mwiiyi no washika liliye kono?”
26Jeso wakabaingula ati, “cini cini mwiina kunkapula ati nkaambo mwakalamwa shitondezho shangu, pele nkaambo kakuti mwakalya ukukuta. 27Inzho mutaakusebezela shilyo shimana bulyo, pele amusebezele shilyo shikalilila kushicila ku bumi butamana. Sheshi nshishilyo Mwanaa Muntu nshaakaamupa. Nkaambo Leza Taata wakamubika cikanto.”
28Inzho abo bakamubuzha ati, “No tucite buti kwaamba tusebeze milimo yaka Leza?” 29Jeso wakabaingula ati, “Leza ncaazanda kwaamba ati mumushome wezo ngwaakatuma.”
30Ulimwi bakamubuzha ati, “No ulacita citondezho nzhi ncitukabona kwaamba tukushome? No mulimo nzhi nguukacita? 31#Kul 16:4, 15; Inte 78:24Ba shaakale bakalya mana mulukula, umbona mbukulembelwe ati, Wakabapa cilyo cihwa kwizeulu kwaamba balye!”
32Jeso wakabaingula ati, “Ncobeni ndamwaambila meni meni tali Mozesi wakabapa cilyo cihwa kwizeulu, pele Taata nguupa cilyo cini cini cihwa kwizeulu. 33Cilyo cihwa kwizeulu nguwezo uuhwa kwizeulu, nkaambo nguupa bumi ku bantu banshi yoonse mbwiibelele.”
34Bakamwiingula ati, “Mwami kuhwa bwasunu kutupa cinkwa ceci lyoonse.”
35Jeso wakaamba ati, “Ndime cinkwa cipa bumi. Kufwumbwa muntu uzhiza kwangu takafwi linji inzala, aze wezo uushoma mwangu takafwi linji inyota pe. 36Pele umbona mundamwaambila kale ati, nikuba ati mulimbwene, tamunshomi pe. 37Pele boonse babo mbaakampa Taata baleza kwangu, ulimwi kufwumbwa uuzhiza kwangu nshimutandi pe, 38nkaambo ume ndiina kwiza ano anshi kuhwa kwizeulu kwiza kucita luzando lwangu ndimwini pe. Ndakezhila kucita shizanda wezo wakantuma. 39Inzho wezo wakantuma ulazanda ati intazhimininwa naaba womwi wa babo mbaakampa, pele nkababushe mu buzuba bwamamanino. 40Nkaambo lolu nduluzando lwa Taata, kwaamba oonse wabona Mwana u kumushoma ayane bumi butamana. Ulimwi ume ndakababusha mu buzuba bwamamanino.”
41Bateelele bobo bakando baba Juda bakakanka kutongauka nkaambo wakaamba ati, “Ndime cinkwa cakahwa kwizeulu.” 42Bakaamba ati, “Sa wezu tali Jeso mwanakwe Jozefu? Ushi u baina tulibezhi. No ncinzhi cimwaambya ati wakahwa kwizeulu?”
43Jeso wakabaingula ati, “Mutatongauci pe. 44Kwiina ukonzha kwiza kwangu atamuswenya afwaafwi Taata wakantuma. Kwaamba ume nkamubushe mu buzuba bwamamanino. 45#Aiz 54:13Bashinshimi bakalemba ati, ‘Boonse ulakabayiisha Leza.’ Ubobo kufwumbwa wakayiya u kucilila mazwi aka Taata uleza kwangu. 46Ceci tacaamba ati kuli muntu wakamubona Taata pe, cita bulyo ume indakahwa kwa Leza, ndime indakamubona. 47Cini cini ndamwaambila ati kufwumbwa uunshoma ulikwete bumi butamana. 48Ndime cinkwa cipa bumi. 49Bamaushenu bakalya mana mulukula pele nikuba bobo bakafwa. 50Inzho nciceci cinkwa cakahwa kwizeulu, kufwumbwa muntu uucilya takafwi. 51Ndime cinkwa ca bumi cakahwa kwizeulu. Kuti muntu wacilya ceci ulaakupona shikwense uushikwense. Cinkwa ceco ncinkaamupa mubili wangu ngunkaapa, kwaamba bantu banshi yoonse bakayane bumi.”
52Ngoonaawo bakando baba Juda bakakanka kukazhanya mulwabo beni ati, “Anu wezu muntu ulatupa buti mubili wakwe kwaamba tulye?”
53Jeso wakabaambila ati, “Cini cini ndamushimwina ati, kuti tamuuli mubili wa Mwanaa Muntu u kunwa bulowa bwakwe, mwiina bumi. 54Woonse uulya mubili wangu u kunwa bulowa bwangu ulikwete bumi butamana, ulimwi ndakamubusha mu buzuba bwakumamanino. 55Nkaambo mubili wangu nkukulya kwini kwini abo bulowa bwangu nkukunwa kwini kwini. 56Wezo uulya mubili wangu u kunwa bulowa bwangu ulishite mwangu, ame ndishite mwakwe. 57Taata wakantuma mbwaali mumi ame ndimumi ukaambo kakwe. Ubobo wezo uulya mubili wanngu ulakakwata bumi ukaambo kangu. 58Ceci ncicinkwa cakahwa kwizeulu, tacili ukoya ceco ncibakalya bamaushenu pele nikuba bobo bakafwa. Kufwumbwa muntu uucilya ceci cinkwa ulaakuli mumi lyoonse.”
59Aza makani Jeso wakaamba naakaakuyiisha mucikombelo caba Juda ku Kapenaumi.
Mazwi a Bumi Butamana
60Ba shiciiya banji banji nibakaateelela aza makani bakaamba ati, “Aza makani makando. Anu nguni uukonzha kwaateelela?”
61Cakutashimwinwa Jeso naakazhiba ati bakaakutongauka ukaambo ka makani aza, wakabaambila ati, “Sa aza makani amupezha? 62No cilaba buti, kuti mwamubona Mwanaa Muntu waliza wabweela nkwaakaakubele? 63Moza Usalala nguupa bumi butamana. Mubili tokonzha kukwata bumi kwaakwiina moza. Mazwi ngumwaambila Moza ulimwi mbumi. 64Pele ngubali bamwi bantu batashomi.” Jeso kabezhi kuhwa ku makancilo babo batakaakumushoma ulimwi u wezo uuti akamwaabe. 65Ulimwi wakaamba ati, “Nciceci ncindamushimwinina ati kwiina ukonzha kwiza kwangu cita wahumizhiwa kwa Taata.”
66Kuhwaawo, ba shiciiya bakwe banji banji bakapiluka bacileka kumucilila. 67Inzho Jeso wakababuzha babo bali ikumi ubatwesha bobile ati, “Sa amwe mulazanda kunshiya?”
68 #
Mat 16:16; Mk 8:29; Lk 9:20 Saimoni Pita wakaingula ati, “Mwami anu uswe tuye kwi? Uwe ndiwe uukwete mazwi a bumi butamana. 69Uninzho twashoma u kuzhiba ati ndiwe Usalala wakahwa kwa Leza.”
70Jeso wakabaambila ati, “Ndime indakamusala umwe numuli ikumi ubatwesha bobile pele umwi wenu ngu Shaatani.” 71Wakaakwaamba Judasi mwanakwe Saimoni Shikaliyoti, nikuba ati kali wankamu yabo bali ikumi ubatwesha bobile, inguwe wakaakuya kumwaaba.
Currently Selected:
Johani 6: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.
