Luk, echî Achî nchot mma á rî ka nwet i Luk
Achî nchot mma á rî ka nwet i Luk
Ḿfa a ri Otîp Ogyebhá-ḿbə́ŋé mbi Luk a séŋe. Otîp mbí ó tóŋe sê Jisos a ri nne nnyo Obhasi a chimî se yê a kí tum a bhá yim ane Isrel á sém. A yim fə́ne ngun ndə́m á sém. Luk a séŋe se Ntʉgantʉ Ńtâ Obhasi nâ a bhiŋî Jisos se a bhá karé otîp ogyebhá-ḿbə́ŋé mbâ ane mba á rî ka óséré obhí.
Ogyebhá-ḿbə́ŋé ó rî ka eróghá-ndə́p í nwet i Luk, títí ebhú nji á sə́re sê Jisos a kə́ bha ka ngun. Ó rî fə́ne ka ejeghé nwet, ebhú Jisos a gyʉ́ri a jak nnyi ósô. Ebhú Jisos a jiî nnyi ósô, esə́re ekpak ane á rî á kí ḿbə́ŋé na yê é kúi, é jábhe ka ngun. Luk nnyó yót nâ a séŋe ekpak esə́re njí é kúi é jábhe ka ngun ka nwet eye nnyi é bhíŋa sê Ntûm ágbán í Jisos.
Ka otîp mbí Luk a séŋe egan nji nkôn i baénjel Obhasi, na nji abhábhá-obhúi á jî yên Jisos ebhú á jíi yê. A sêŋ fə́ne a kpê na ebhú Jisos a gyée ka ókʉ́rí achot Obhasi ka obhóné, a kpík ane achot. A sêŋ fə́ne a kpê na egan í nnobha-eji nne Samariya na egan abhon-í-nnyen ábháe. Ka otîp í Luk mbí, a chorê fə́ne kpe-eji a kpê na Obhasi egoróm, na Obhasi Ebhare Ntʉgantʉ, na ejûm nji ane-akáé á fóne ka eyimím ka achot etûm í Jisos, na nsôn nnyi Obhasi á rik, a yighá obhí nne.
Nji é rî ka etím i nwet i Luk
1. Eróghá-ndə́p 1.1-4
2. Ojî Jon nnyo mfúgha-ane ayép Obhasi, na ojî Jisos Krayis é kpê na obhóné obhê 1.5—2.52
3. Etûm í Jon nnyo mfúgha-ane ayép 3.1-20
4. Á fuk Jisos ayép, Satan a gáe yê 3.21—4.13
5. Etûm í Jisos ka Gariri 4.14—9.50
6. Jisos a mághe Gariri, a jî nnyi Jerusarem 9.51—19.27
7. Nji é fábhe kpít na Jerusarem na ka etím í Jerusarem, ogəm bhə́t kən á yúí Jisos 19.28—23.56
8. Ntûfâm i Jisos a nyə́me ka ekʉ̂, a tóŋe biji, a gyʉ̂t a jî nnyi ósô 24.1-53
Currently Selected:
Luk, echî Achî nchot mma á rî ka nwet i Luk: ETUNT
Highlight
Share
Copy
Want to have your highlights saved across all your devices? Sign up or sign in
Ejagham New Testament © Bible Society of Nigeria and Bible Society of Cameroon, 1996.