GENESIS 13
13
Nagsuhay si Abram asin si Lot
1Pakahale sa Egipto, naglakaw si Abram pasiring sa habagat na parte kan Canaan kaiba an saiyang agom asin an gabos niyang rogaring; nag-iba man saiya si Lot. 2Mayaman nang marahay si Abram huli ta kadakul na kan saiyang mga hayop, plata asin bulawan. 3Hale sa duman, nagpadagos siyang maglakaw sagkod na makaabot sa pagultanan kan Betel asin Ai, sa lugar na tinugdokan niya kaidto kan saiyang tolda, 4asin pinatindogan niya nin altar. Duman nagsamba si Abram sa Kagurangnan.
5Si Lot, na nag-iba ki Abram, igwa man nin mga karnero, kanding asin baka. Igwa man siya nin pamilya asin mga oripon. 6Huli ta kadakul na kan mga hayop na pagsadiri ni Abram asin ni Lot, an daga dai na magkanigo para sa saindang duwa. 7Kaya nagkaigwa nin pag-iriwal an mga pastor ni Abram asin ni Lot. (Kaidto, an mga Cananeo asin Perezeo iyo an nag-eerok sa lugar na idto.)
8Dangan sinabihan ni Abram si Lot, “Magkadugo kitang duwa, kaya dai dapat na mag-iriwal an satong mga pastor. 9Mas marahay pang magsuhay kita; pilion mo an arin man na parte kan daga na magustohan mo; kun pumawala ka, mapatoo ako; kun pumatoo ka, mapawala ako.”
10Nangalagkalag si Lot asin nahiling niya na mayaman sa tubig an bilog na Kapantayan nin Jordan sagkod sa Zoar, arog kan tatamnan kan Kagurangnan o arog kan daga nin Egipto. (Ini an kamugtakan kan daga bago tunawon nin Kagurangnan an Sodoma asin an Gomorra.) 11Kaya pinili ni Lot an bilog na Kapantayan nin Jordan, asin naglakaw siya pasiring sa sirangan; sa siring na paagi nagsuhay sindang duwa. 12Nagpawalat si Abram sa Canaan mantang si Lot nag-erok sa mga syudad duman sa kapantayan na harani sa Sodoma. 13An nag-eerok sa Sodoma mga maraot na tawo asin mga parakasala sa Kagurangnan.
Nagpasiring sa Hebron si Abram
14Pakahale ni Lot, nagtaram an Kagurangnan ki Abram, “Mangalagkalag ka sa palibot mo, 15huli ta an gabos na daga na nahihiling mo itatao ko sa saimo asin sa mga kapagarakian mo sagkod lamang. 16Papadakulon ko siring sa alpog kan daga an saimong mga kapagarakian. Dai nin makakabilang sainda huli ta mayo nin makakabilang kan alpog kan daga. 17Lakaw asin hilinga an bilog na daga ta itatao ko gabos iyan saimo.” 18Kaya naghale duman si Abram asin nag-erok harani sa sagradong mga kahoy ni Mamre sa Hebron. Nagpatindog siya nin altar duman para sa Kagurangnan.
Currently Selected:
GENESIS 13: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
