GENESIS 18
18
Ipinanuga ki Abraham an Sarong Aking Lalaki
1Duman sa may sagradong mga kahoy ni Mamre, nagpahiling an Kagurangnan ki Abraham. Sa kainitan kan aldaw, mantang nagtutukaw siya sa may pintoan kan saiyang tolda, 2nagtingkalag siya asin nahiling niya an tolong lalaki na nagtitindog duman. Sinabat niya tolos sinda, nagdapa sa daga 3dangan nagsabi, “Mga kagurangnan ko, kun nawilihan nindo ako, maghapit ngona kamo sa sakong harong; andam ako sa paglingkod saindo. 4Tugote akong magkua nin tubig tanganing makahanaw kamo kan saindong bitis; pwede kamong magpahingalo sa limpoy kan kahoy na ini. 5Dadarahan ko kamo nin dikit na kakanon tanganing magbalik an saindong kosog. Pakatapos kaiyan pwede na kamong magpadagos sa saindong paglakaw. Inonra nindo ako sa paghapit sa sakong harong, kaya tugoteng paglingkodan ko kamo.”
“Ika an bahala,” an simbag ninda.
6Dali-daling naglaog si Abraham sa tolda asin sinabihan si Sara, “Dali, kuaha an pinakamarahay mong arina asin gumibo ka nin dakul na tinapay.” 7Dangan nagdalagan siya pasiring sa mga baka asin nagpili nin sarong matabang ogbon na baka dangan itinao niya ini sa saiyang oripon na naghidali sa pagluto kaini. 8Nagkua man si Abraham nin keso asin gatas dangan an mga ini asin an linutong karne ipinuwesto niya sa mga lalaki na nasa sirong kan kahoy. Nagkakan sinda mantang nakatindog sa harani si Abraham.
9Dangan hinapot siya ninda, “Haen an agom mong si Sara?”
“Nasa laog kan tolda,” an simbag ni Abraham.
10Nagtaram an Kagurangnan, “Pakalihis nin siyam na bulan,#10 Pakalihis…bulan; o sa panahon na ini, sa sunod na taon. mabalik ako asin magkakaigwa na nin aking lalaki an saimong agom na si Sara.”
Nadangog ini ni Sara na naghihimate sa may pintoan kan tolda, sa likodan kan nagtaram. 11Gurang na nin marahay si Abraham asin si Sara mala ta ini dai na inaabotan nin regla. 12Kaya napangisi si Sara asin nagsabi sa iya man sana, “Ngunyan na pareho na kaming gurang nin marahay kan sakong agom makakakua pa daw ako nin kaogmahan sa pakipagdorog saiya?”
13Hinapot nin Kagurangnan si Abraham, “Tano ta nagngisi si Sara asin nagsabing, ‘Pwede pa daw akong magkaaki sa edad kong ini?’ 14May imposible daw sa Kagurangnan? Siring sa itinaram ko, pakalihis nin siyam na bulan ngunyan, mabalik ako asin si Sara mangangaki nin lalaki.”
15Huli ta natakot si Sara, nagnegar siya asin nagsabi, “Dai man ako nagngisi.”
“Iyo baga, nagngisi ka,” an simbag nin Kagurangnan.
Nakimaherak si Abraham para sa Sodoma
16Naghale an mga lalaki asin nagduman sa sarong lugar na pwede nindang madungawan an Sodoma. Dinespedir sinda ni Abraham. 17Nagsaboot an Kagurangnan, “Dai ko dapat pagtagoon ki Abraham an gigibohon ko, 18huli ta aram kong magigin dakula saka makosog siyang nasyon, asin sa paagi niya, bebendisyonan ko an gabos na nasyon sa daga.#18 sa paagi…sa daga; o mahagad sako an gabos na nasyon na bendisyonan ko sinda siring na benendisyonan ko siya. 19Pinili ko siya tanganing pagbotan niya an saiyang mga kapagarakian na magsunod sako asin maggibo kan tama saka matanos. Kun gibohon ninda ini, ootobon ko an gabos na ipinanuga ko saiya.”
20Dangan tinaraman nin Kagurangnan si Abraham, “Dakul nang marahay an sumbong laban sa Sodoma saka Gomorra asin grabe na an kasalan ninda. 21Kaipuhan magduman ako tanganing maaraman ko kun totoo o bako an mga sumbong na nadangog ko.”
22Dangan naghale an mga lalaki asin naglakaw pasiring sa Sodoma, alagad nawalat an Kagurangnan sa kaibahan ni Abraham. 23Nagrani si Abraham sa Kagurangnan asin naghapot, “Ipapadagos mo mananggad an pagtunaw sa mga matanos kaiba kan mga maraot? 24Halimbawa igwa nin sinkwentang matanos sa laog kan syudad, tutunawon mo pa daw iyan? Dai mo daw papatawadon an syudad tanganing ikaligtas an singkwenta? 25Aram kong dai mo gagadanon an matanos kaiba kan maraot. Dai mo gigibohon iyan! Kun gibohon mo iyan, madadamay an mga matanos sa pagpadusa kan mga maraot. Imposibleng gibohon mo iyan! Matanos an Hukom kan bilog na kinaban!”
26“Kun makakua ako nin singkwentang matanos na tawo sa Sodoma, papatawadon ko an syudad huli sa sainda,” an simbag nin Kagurangnan.
27Nagpadagos si Abraham, “Patawada ako, Kagurangnan, ta nangahas akong makiolay saimo, ako na saro sanang tawo asin mayo nin deretso na magsabi nin ano man. 28Halimbawa kwarenta y singko sanang matanos an idtoon, tutunawon mo pa daw an bilog na syudad huli ta kulang nin lima?”
Nagsimbag an Kagurangnan, “Dai ko tutunawon an syudad minsan kwarenta y singko sana an matanos na tawo duman.”
29Nagpadagos pa si Abraham, “Kun igwa sanang kwarenta?”
“Huli sa kwarenta, dai ko tutunawon an syudad,” an simbag nin Kagurangnan.
30“Dai ka man logod maanggot sako, Kagurangnan, huli ta mahapot pa ako. Halimbawa treynta sana an idtoon?” an hapot ni Abraham.
“Dai ko tutunawon iyan kun makakua ako nin treynta,” an simbag nin Kagurangnan.
31Nagsabi si Abraham, “Patawada ako kun ako nangahas na magparapakiolay saimo, Kagurangnan, alagad paano kun beynte sana an makua?”
Nagsimbag an Kagurangnan, “Dai ko raraoton an syudad kun makakua ako nin beynte.”
32Giraray nagpadagos si Abraham, “Dai ka logod maanggot sako, Kagurangnan, huli ta ini na sana an sasabihon ko. Halimbawa sampolo sana nanggad an makua?”
Nagsimbag an Kagurangnan, “Dai ko raraoton an syudad kun may makua akong sampolo.” 33Naghale na an Kagurangnan pakatapos niyang magtaram ki Abraham; nagpuli man si Abraham sa saiyang harong.
Currently Selected:
GENESIS 18: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
