Genesis 19
19
An Pagkamakasalan kan Sodoma
1Kan mag-abot sa Sodoma an duwang anghel kan bangging idto, si Lot nagtutukaw sa may trangkahan kan syudad. Kan mahiling niya sinda, nagtindog siya asin sinabat sinda. Nagduko siya sa atubang ninda 2dangan nagsabi, “Mga kagurangnan ko, nakikimaherak akong mag-ontok ngona kamo sa harong ko; hanawan nindo an saindong bitis asin magpahingalo kamo. Dangan, pwede kamong magmatang amay asin magpadagos sa paglakaw.” Nagsimbag sinda, “Dai na; sa tinampo na sana kami mapaaga.”
3Alagad pinirit sinda ni Lot kaya uminiba na sana sinda saiya asin nagdagos sa saiyang harong. Pinagbotan ni Lot an saiyang oripon na magluto nin tinapay asin mag-andam nin pagkakan para sa mga bisita. Kan andam na, nagkarakan sinda.
4Kan makatorog na sinda, pinalibotan an harong ni Lot kan kalalakihan nin Sodoma. Idtoon duman an gabos na lalaki, aki asin gurang. 5Inapod ninda si Lot asin hinapot, “Haen an mga lalaking nakikitorog diyan saimo? Paluwasa sinda tanganing samong madorogan.”
6Linuwas sinda ni Lot dangan sinerahan an pinto. 7Sinabihan niya sinda, “Mga tugang, nakikimaherak ako, dai nindo paggibohon an siring na karatan. 8Igwa ako nin duwang aking babae na anas pa birhen; iluluwas ko sinda sa saindo asin gibohon nindo sa sainda an gusto nindong mangyari, alagad dai nindo paggibohan nin ano man an mga lalaking ini. Mga bisita ko sinda asin kaipuhan na ingatan ko.”
9Alagad nagsabi sinda, “Hale diyan! Dayuhan ka sana digdi asin mayo kang deretsong magsabi samo kaiyan. Hale diyan ta tibaad mas maraot pa an mangyari saimo ki sa mga bisita mo.” Itinuklang ninda si Lot tanganing gabaon an pinto. 10Alagad binutong si Lot palaog kan saiyang mga bisita dangan sinerahan an pinto. 11Pakatapos, binuta kan duwang anghel an gabos na lalaki duman sa luwas kaya dai ninda nahiling an pinto.
Binayaan ni Lot an Sodoma
12Dangan sinabihan si Lot kan duwa niyang bisita, “Kun igwa ka pang pag-iriba digdi—mga aki, mga manugang o iba pang kadugo na nag-eerok sa syudad—pahaleon mo sinda digdi, 13huli ta tutunawon mi an lugar na ini. Nadangog nin Kagurangnan an gabos na sumbong laban sa mga nag-eerok sa Sodoma asin sinugo niya kami tanganing tunawon ini.”
14Kaya dinuman ni Lot an mga lalaking gustong mag-agom kan duwa niyang daraga asin sinabihan, “Maghale tolos kamo digdi; tutunawon nin Kagurangnan an syudad na ini.” Alagad an mga ini naghona na nagkakalwag sana si Lot.
15Kan nagbabanaag na an aldaw, pinahidali kan mga anghel si Lot. “Dalian mo!” an sabi ninda. “Ipag-iba mo an saimong agom asin an duwa mong aking daraga dangan humale na kamo tanganing dai kamo magkagaradan kun tunawon na an syudad.”
16Nagduwa-duwa si Lot, alagad naherak saiya an Kagurangnan, kaya kinapotan kan duwang anghel an saiyang kamot asin an kamot kan saiyang agom saka kan saiyang mga aki dangan ilinuwas sinda sa syudad. 17Pakatapos, nagsabi an sarong anghel, “Dulag na kamo! Ligtasan an saindong buhay! Dai kamo magsalingoy asin dai kamo mag-ontok sa kapantayan. Magduman kamo sa kabubuldan tanganing dai kamo magadan.”
18Alagad nagsimbag si Lot, “Kagurangnan ko, hare man kami pagpagiboha kaiyan; 19nawilihan mo ako asin naherakan, kaya ilinigtas mo an sakong buhay; alagad harayong marahay an kabubuldan, tibaad dai pa ako nakakaabot duman abotan na ako kan kapahamakan asin magadan ako. 20Nahihiling mo an sadit na banwaan na idto? Mas harani idto; tugote akong magduman. Sadit sana an lugar asin magigin ligtas ako duman.”
21Nagsimbag an anghel, “Sige, tinutugotan taka. Dai ko raraoton an banwa na sinabi mo. 22Alagad maghidali ka, huli ta dai akong magiginibo sagkod na dai ka pa nakakaabot duman.”
Kaya an lugar nginaranan Zoar#19:22 ZOAR: Sa pandangog, an ngaran na ini nakakaarog sa Hebreyong tataramon na sadit. huli ta inapod ini ni Lot na sadit.
An Pagtunaw kan Sodoma asin kan Gomorra
23Nagsisirang na an aldaw kan makaabot si Lot sa Zoar. 24Dangan, an Sodoma asin an Gomorra pinauranan nin Kagurangnan nin nagkakalayong asupre. 25Natunaw an duwang syudad asin an bilog na kapantayan, kaiba an gabos na tawo asin an mga tinanom na nabubuhay duman. 26Alagad nagsalingoy an agom ni Lot kaya nagin sarong hariging asin siya.
27Amay pa kan sunod na aldaw, naghidali si Abraham sa lugar na tinindogan niya sa atubang nin Kagurangnan. 28Nagdungaw siya sa Sodoma saka sa Gomorra patin sa bilog na kapantayan asin nahiling niya an aso na nag-iitaas hale sa daga, siring sa aso na gikan sa sarong dakulang horno. 29Alagad kan tunawon nin Dios an mga syudad sa kapantayan na pinag-erokan ni Lot, nagiromdoman nin Dios si Abraham, asin itinugot niyang makaligtas si Lot.
An Ginikanan kan mga Moabita asin mga Ammonita
30Natakot si Lot na mag-erok sa Zoar, kaya ipinag-iba niya an duwa niyang aking daraga asin nagtukad sinda sa kabubuldan dangan nag-erok sa sarong lungib. 31Nagsabi sa saiyang tugang an matuang aki ni Lot, “Gurang na an satong ama asin mayong lalaki sa dagang ini na pwedeng mag-agom sato tanganing magkaaki kita. 32Marahay pang buraton ta an satong ama tanganing madorogan ta siya asin magkaaki kita huli saiya.” 33Kaya kan bangging idto, pinainom siya ninda nin arak dangan dinorogan kan matua niyang aki. Alagad dai ini naaraman ni Lot huli ta burat siya nin marahay.
34Sunod na aldaw, nagsabi sa saiyang tugang an matuang aki ni Lot, “Dinorogan ko siya kasubanggi; buraton ta siya giraray ngunyan na banggi asin ika man an magdorog saiya tanganing pareho kitang magkaigwa nin aki sa satong ama.” 35Kaya kan bangging idto, binurat giraray ninda an saindang ama asin an ngohod na man an nagdorog saiya. Siring kan enot na banggi, dai nakaaram si Lot kan nangyari. 36Kaya nagbados an duwang daragang aki ni Lot huli sa saindang ama. 37An matua nag-aki nin lalaki na saiyang nginaranan Moab;#19:37 MOAB: Sa pandangog, an ngaran na ini nakakaarog sa Hebreyong tataramon na hale sa sakong ama. ini an ginikanan kan mga tawo na ngunyan inaapod Moabita. 38An ngohod nag-aki man nin lalaki na saiyang nginaranan Ben-ammi;#19:38 BEN-AMMI: Sa pandangog, an ngaran na ini nakakaarog sa Hebreyong tataramon na aki nin sakong kadugo o aki kan sakong banwaan asin arog sa Hebreyong tataramon na Ammonita. ini an ginikanan kan mga tawo na ngunyan inaapod Ammonita.
Currently Selected:
Genesis 19: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
