GENESIS 29
29
Si Jacob sa Harong ni Laban
1Nagpadagos sa paglakaw si Jacob asin nakaabot sa daga kan mga taga sirangan. 2Mantang nangangalagkalag siya, nahiling niya an sarong bubon sa oma asin an tolong grupo nin mga karnero na nagloloko sa palibot kan bubon. Digdi sa bubon na ini, na nalulukdoan nin dakulang gapo, pinapainom an mga karnero. 3Kun nagkakatiripon na an gabos na karnero, tarabang na hinahale kan mga pastor an dakulang gapo dangan pinapainom an mga karnero; pakatapos, ibinabalik ninda an lukdo sa bubon.
4Hinapot ni Jacob an mga pastor, “Mga tugang, mga taga saen kamo?”
Nagsimbag sinda, “Taga Haran.”
5Naghapot giraray si Jacob, “Midbid nindo si Laban na aking lalaki ni Nahor?”
Nagsimbag sinda, “Midbid mi.”
6“Komusta siya?” an hapot ni Jacob.
Nagsimbag sinda, “Marahay man, asin uya, nagdadangadang si Rachel na aki niyang daraga kaiba an mga karnero kan saiyang ama.”
7Nagsabi siya, “Nin huli ta halangkaw pa an aldaw, asin dai pa dapat ipuli an mga hayop, tadaw ta dai ngona nindo pinapainom saka pinapasabsab an mga karnero?”
8Nagsimbag sinda, “Dai mi magigibo iyan sagkod na dai nagkakatiripon an gabos na karnero asin sagkod na dai pa nahahale an dakulang gapo; dangan mi mapapainom an mga karnero.”
9Mantang kaolay ni Jacob an mga pastor, nag-abot si Rachel kaiba an inaataman niyang mga karnero na sadiri kan saiyang ama. 10Kan mahiling ni Jacob si Rachel kaiba an mga karnero ni Laban na tugang ni Rebecca, nagduman siya sa bubon, hinale an lukdo na gapo asin pinainom an mga karnero ni Laban. 11Dangan hinadokan niya si Rachel asin naghibi sa kaogmahan. 12Sinabihan niya si Rachel, “Sobrino ako kan saimong ama, aki ako kan tiya mong si Rebecca.”
Nagpuli tolos si Rachel asin inosipan an saiyang ama. 13Kan madangog ni Laban an bareta, naghidali siya sa pagsabat ki Jacob. Kinugos niya ini asin hinadokan dangan ipinag-iba sa saiyang harong. Inistorya ni Jacob ki Laban an gabos na nangyari, 14asin nagsabi ini, “Tunay nanggad na laman ka nin sakong laman asin dugo nin sakong dugo.” Duman na nag-erok si Jacob sa laog nin sarong bulan.
Nagmanugang si Jacob ki Laban para ki Rachel asin ki Lea
15Nagsabi si Laban ki Jacob, “Maski sobrino taka, sala na magtrabaho ka sako na mayong bayad. Kaya magsabi ka kun gurano an isusweldo ko saimo.” 16Si Laban igwang duwang aking daraga: si Lea an matua, asin si Rachel an ngohod. 17Magayon an mga mata ni Lea, alagad mas magayon si Rachel.
18Namoot si Jacob ki Rachel, kaya nagsabi siya ki Laban, “Malingkod ako saimo sa laog nin pitong taon kun ipaagom mo sako an ngohod mong aking si Rachel.”
19Nagsimbag si Laban, “Mas marahay pang itao ko siya saimo ki sa ibang lalaki; digdi ka sako.” 20Kaya nagmanugang ki Laban si Jacob para ki Rachel sa laog nin pitong taon na garo sana nagkapirang aldaw huli kan pagkamoot niya ki Rachel.
21Dangan sinabihan ni Jacob si Laban, “Tapos na an panahon nin sakong paglingkod; ipakasal mo na sako an saimong aki.”
22Kaya tiniripon ni Laban an gabos na kalalakihan sa lugar na idto asin nagbangkete siya. 23Alagad kan bangging idto, dinara ni Laban ki Jacob si Lea, asin dinorogan ini ni Jacob. 24(Itinao ni Laban ki Lea an oripon niyang babaeng si Zilpa tanganing magin saiyang katabang.) 25Pagkaaga, nahiling ni Jacob na an kadorog niya iyo si Lea, kaya sinabihan niya si Laban, “Ano ining ginibo mo sako? Bakong nagmanugang ako saimo para ki Rachel? Tano ta dinaya mo ako?”
26Nagsimbag si Laban, “Bakong ugale digdi na enot na ipaagom an ngohod. 27Taposon mo ngona an sarong semanang selebrasyon nin pagkasal, dangan itatao mi saimo si Rachel, kun paglilingkodan mo giraray ako nin pitong taon.”
28Nag-oyon si Jacob, kaya kan tapos na an sarong semana nin selebrasyon, itinao ni Laban an saiyang aking si Rachel ki Jacob bilang agom. 29(Itinao ni Laban ki Rachel an oripon niyang babaeng si Bilha tanganing magin saiyang katabang.) 30Dinorogan man ni Jacob si Rachel asin namotan niya ini nin labi pa ki Lea. Dangan naglingkod siya ki Laban nin pito pang taon.
An mga Aking Namundag ki Jacob
31Kan mahiling nin Kagurangnan na pinaorog ni Jacob si Rachel, pinagmarahay niyang magkaaki si Lea alagad ginibo niyang baog si Rachel. 32Kaya nagbados si Lea asin nag-aki nin sarong lalaki na nginaranan niyang Ruben,#32 RUBEN: Sa pandangog, an ngaran na ini nakakaarog sa Hebreyong tataramon na hilinga, aking lalaki asin nahiling an sakong kasakitan. huli ta nagsabi siya, “Nahiling nin Kagurangnan an sakong kasakitan asin ngunyan mamomotan na ako kan sakong agom.” 33Nagbados siya giraray asin nag-aki nin lalaki. Nagsabi siya, “Itinao pa sako an aking ini huli ta nadangog nin Kagurangnan na ikinakaongis ako;” kaya an aki nginaranan niyang Simeon.#33 SIMEON: Sa pandangog, an ngaran na ini nakakaarog sa Hebreyong tataramon na nadadangog. 34Nagbados siya giraray asin nag-aki nin lalaki. Olay niya, “Ngunyan, orog na kuminosog an bugkos kan samong pag-inagoman, huli ta natawan ko na siya nin tolong aking lalaki;” kaya an aki nginaranan niyang Levi.#34 LEVI: Sa pandangog, an ngaran na ini nakakaarog sa Hebreyong tataramon na binugkos. 35Nagbados naman siya asin nag-aki nin lalaki. Olay niya, “Ngunyan, oomawon ko an Kagurangnan;” kaya an aki nginaranan niyang Juda;#35 JUDA: Sa pandangog, an ngaran na ini nakakaarog sa Hebreyong tataramon na pag-omaw. dangan dai na siya nag-aki.
Currently Selected:
GENESIS 29: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
