Kuuɗe Nelaaɓe 7

Jaawaabu Etiyen yeeso dawrooɓe

1Hooreejo liman'en ƴami Etiyen: “Gooŋga ɓe mbi'i na?” 2Etiyen jaabi: “Deerɗiraaɓe e baabiraaɓe, nananeeɗam. Allah tedduɗo waŋgani kaakiraawo meeɗen Ibrahiima diga o ɗonno haa Mesopotamiya, o siwaa jooɗaago haa Haran tawon. 3Allah wi'i mo: Wurta lesdi ma, accu lenyol ma, yah haa lesdi ndi mi hollete#Laat 12:1.. 4Nden o acci lesdi Kaldiya, o eggi, o jooɗoyi haa Haran. Ɓaawo maayde baaba maako, Allah waddi mo haa lesdi ndi on njooɗi nder maari jonta#Laat 11:31; 12:4.. 5Yaake man Allah marnaay Ibrahiima koo yaaɓannde kosŋgal nder lesdi ndi'i. Ammaa o iini marnugo mo ndi, kaŋko e danygol maako. Saa'i man boo Ibrahiima walaano ɓiŋngel tawon#Laat 12:7; 13:15; 15:18; 17:8.. 6Allah wi'i mo: Danygol ma njooɗoto haa lesdi njananndi, ɓe laatoto maraaɓe, ɓe torroto baakin duuɓi teemeɗɗe nayi. 7Ammaa mi hiitoto ummaatoore nastinnde ɓe nder maccuŋgaaku. Ɓaawoɗon, ɓe ngurtoto lesdi man, ɓe njagganto yam haa nokkuure nde'e#Laat 15:13-14.. 8Nden Allah waɗani Ibrahiima alkawal, juulnol#7:8 Juulnol malla ndemnol. laati alaama maagal. Nde Ibrahiima danyi Isiyaaku, o juulni mo nyannde joweetataɓre, Isiyaaku boo juulni Yaakubu, Yaakubu boo juulni kaakiraaɓe men sappo e ɗiɗo#Laat 17:10-14; 21:2-4; 25:26; 29:31—35:18..

9Kaakiraaɓe ɓe'e kaaji Yusufu, ɓe coorri mo haa Misra. Ammaa Allah wondi bee maako#Laat 37:11; 37:28; 39:2,21., 10wurtini mo diga nder torraaji maako, hokki mo hikma e mo'ere yeeso Firawna, laamiiɗo Misra. Firawna waɗi mo ardiiɗo dow lesdi Misra e dow saare mum fuu#Laat 41:39-41.. 11Yaake man weelo#7:11 Weelo malla rafo. waɗi haa Misra bee Kanaana fuu. Ngo torri yimɓe masin, haa kaakiraaɓe meeɗen keɓaay ko nyaame#Laat 42:1-2.. 12Ngam maajum, nde Yaakubu nani nyaamdu ɗon haa Misra, o neli kaakiraaɓe meeɗen ton jahaaŋgal aranal. 13Haa jahaaŋgal ɗiɗaɓal Yusufu annditini hoore muuɗum haa deerɗiraaɓe mum. Bana non Firawna anndiri yimɓe saare baaba Yusufu#Laat 45:1,16.. 14Nden Yusufu neli, hoosi baaba mum Yaakubu bee saare maako fuu: Ɓe cappanɗe njoweeɗiɗo e njowo (75)#Laat 45:9-10,17-18; 46:27.. 15Nden Yaakubu yehi, jooɗi haa Misra. Ton o maayi, kaŋko e kaakiraaɓe meeɗen fuu#Laat 46:1-7; 49:33.. 16Ɓe njahri ɓe haa Sikem. Ton ɓe uwi ɓe nder yenaande nde Ibrahiima sooduno haa ɓiɓɓe Hamor#Laat 23:3-16; 33:19; 50:7-13; Yos 24:32..

17Nde saa'i iinawol ngol Allah hunani Ibrahiima ɓadake yottaago, Isra'iila'en ɓesdi ɗuuɗugo nder Misra, 18haa wakkati laamiiɗo goɗɗo mo anndaa Yusufu laamani Misra#Gurt 1:7-8.. 19O ƴoyri yimɓe meeɗen, o torri kaakiraaɓe meeɗen go, o dooli ɓe, ɓe ngudina ɓikkoy maɓɓe musinankoy, ngam taa koy ngeeɗa#Gurt 1:10-11,22.. 20Yaake man nden ɓe ndanyi Muusa, o ɓiɗɗo ŋarniiɗo yeeso Allah. Ɓe njogi mo haa saare baaba maako lebbi tati#Gurt 2:2., 21nden ɓe ngurtini mo. Ammaa ɓiɗɗo Firawna debbo hoosi mo, mawnini mo bana ɓiŋngel muuɗum halal#Gurt 2:3-10.. 22Muusa ekkiti anndal Misra'en fuu, haa o laati baawɗo bolle e kuuɗe fuu.

23Nde Muusa yotti duuɓi cappanɗe nayi, o waɗi anniya yillaago banndiraaɓe maako, Isra'iila'en. 24Nde o yi'i Misraajo ɗon torra Isra'iilaajo, o yehi haa o walla mo. O jiŋngi mo, o waati mo, o mbari Misraajo go. 25O tammino yimɓe maako paaman Allah neli mo haa o hisna ɓe, ammaa ɓe paamaay. 26Jaŋngo man boo o tawi Isra'iila'en ɗiɗo ɗon kaɓa. O tefi senndugo ɓe, o wi'i: Hey worɓe, onon on deerɗiraaɓe, koni on ngiɗi sarrindirgo? 27Ammaa torranɗo deerɗum jaabi Muusa, wi'i mo: Moy darni ma hooreejo e kiitoowo amin? 28A yiɗi mbarugo yam bana mbarɗa Misraajo keenya na? 29Nde Muusa nani ɗum, o doggi, o jooɗoyi haa Mediyan, lesdi njannandi. O danyi ɓiɓɓe worɓe ɗiɗo ton#Gurt 2:11-15; 18:3-4..

30Ɓaawo duuɓi cappanɗe nayi, malaa'ikaajo waŋgani Muusa nder jamre yiite nder wumre haa ladde haa hooseere Sina. 31Ko o yi'i hayɗini mo, o ɓaditi wumre haa o laara booɗɗum. Nden o nani sawtu Jawmiraawo ɗon wi'a: 32Min woni Allah kaakiraaɓe ma, Allah Ibrahiima, Allah Isiyaaku e Allah Yaakubu. Muusa hultori, diwni, huli laarugo. 33Jawmiraawo wi'i mo: Faɗɗita ngam nokkuure haa a ɗon dari, nde seniinde. 34Mi yi'i bone yimɓe am nder Misra. Mi nani uumaali maɓɓe, mi jippake haa mi hisna ɓe. Jonta war, haa mi nele haa Misra#Gurt 3:1-10..

35Kaŋko woni Muusa mo Isra'iila'en njaɓaayno, ɓe mbi'i mo: Moy waɗi ma hooreejo e kiitoowo? Ammaa Allah neli mo o laato hooreejo e kisnoowo. Allah waɗi ɗum bee juŋngo malaa'ikaajo mo waŋgani mo nder wumre go. 36Muusa wurtini ɓe bee waɗugo kaayeefiiji e alaamaaji nder lesdi Misra, haa maayo Maaliya e haa ladde duuɓi cappanɗe nayi#Gurt 7:3; 14:21; Lim 14:33.. 37Muusa wi'i Isra'iila'en: Allah umminanan on annabiijo bana am caka deerɗiraaɓe mooɗon#TT 8:15-18.. 38Yaake jama'aare ɗonno nder ladde, kaŋko laati dariiɗo hakkunde kaakiraaɓe meeɗen e malaa'ikaajo bolwanɗo mo haa hooseere Sina. Ton o jaɓi bolle ngeendam haa o hokka en ɗe#Gurt 19:1—20:17; TT 5:1-33..

39Ammaa kaakiraaɓe meeɗen cali ɗowtanaago Muusa. Ɓe ɗoyli mo, ɓe ngiɗi loraago haa Misra. 40Ngam man ɓe mbi'i Haruna#7:40 Haruna woni deerɗiraawo Muusa mo Allah suɓi haa o laato hooreejo liman'en haa Isra'iila (laar Gurt 28—30:10).: Waɗan min ɗowanteeɓe ardotooɓe min, ngam Muusa, goɗɗo gurtinɗo min lesdi Misra oo, min anndaa ko waɗi mo#Gurt 32:1.. 41Ɓe mbaɗi lawru nanndundu bee gaggel, ɓe lii'ani ndu kirseteeɗi, ɓe mbaɗi juulde, ɓe ceyori kuugal maɓɓe nga'al#Gurt 32:2-6.. 42Ammaa Allah ɗoyli ɓe, acci ɓe ɓe cujidana koode asama, bana ko winnda nder deftere annabi'en:

Onon Isra'iila'en! Nde on lii'i kirseteeɗi e dokke

duuɓi cappanɗe nayi nder ladde, min on lii'ani na?

43On ndoondi laymaaru lawru mon Molok,

on ndoondi horre lawru mon Refan,

labbi ɗi on mbaɗi ngam on cujidana ɗi.

Ngam maajum mi dahan on#7:43 Dahan onyiɗi wi'go egginan on bee doole. haa gaɗa Baabila#Am 5:25-27..

44Laymaaru Allah ɗonno caka kaakiraaɓe meeɗen nder ladde. Ɓe nyooti ndu bana no Allah waŋginani Muusa, bana misaalu ɗum o holli mo#Gurt 25:9,40.. 45Ɓaawoɗon kaakiraaɓe meeɗen ndoni ndu haa baabiraaɓe muuɗum'en. Ɓe ndoondi ndu haa jahaaŋgal maɓɓe dow ardaaŋgal Yosuwa. Allah riiwi ummaatooje goɗɗe yeeso maɓɓe. Laymaaru ndu jooɗi ton haa yotti zamanu Daawuda#Yos 3:14-17.. 46Daawuda heɓi mo'ere Allah, tori haa o nyiɓana danygol Yaakubu jooɗorde#2 Sam 7:1-16; 1 HN 17:1-14.. 47Ammaa ɗum Suleymaanu nyiɓani mo nde#1 Laam 6:1-38; 2 HN 3:1-17..

48Ammaa Allah Ɓaŋiiɗo jooɗataako nder cuuɗi ɗi yimɓe mahata, bana no annabiijo wi'i:

49Jawmiraawo wi'i: Asama woni leeso laamu am,

lesdi woni jaaɓruɗum kosɗe am.

Suudu nduye on nyiɓantammi?

Nokkuure ndeye laatoto siwtorde am?

50Naa min waɗi kuuje ɗe'e fuu na#Esa 66:1-2.?

51Onon saata-ko'e'en, on nanataa haala Allah sam! On cali nanango Ruuhu Ceniiɗo bana kaakiraaɓe mon#Esa 63:10.! 52Woodi annabiijo koo gooto mo kaakiraaɓe mooɗon toonyaaki na? Ɓe mbari nelaaɓe Allah, anndinɓe garki Adiliijo. Ndaa, on zammbi mo, on mbari mo. 53On njaɓi tawreeta Allah ka malaa'ika'en anndini on, ammaa on tokkaaki ka.”

Ɓe piɗi Etiyen bee kaa'e

54Nde dawrooɓe Yahuudu'en nani bolle ɗe'e, ɓe ɓernani Etiyen masin, haa ɓe kirƴindiri nyii'e. 55Ammaa Etiyen, kebbinaaɗo Ruuhu Ceniiɗo, tijji asama, yi'i tedduŋgal Allah, yi'i Yeesu boo ɗon dari haa nyaamo Allah! 56O wi'i: “Ndaa, mi ɗon yi'a asama ɗon maɓɓiti, mi ɗon yi'a Ɓii-neɗɗo ɗon dari haa nyaamo Allah.” 57Ɓe ngooki bee sawtu, ɓe cukki noppi maɓɓe, ɓe fuu ɓe kawti, ɓe kippi mo. 58Ɓe ngurtini mo haa yaasi berniwol, ɓe piɗi mo bee kaa'e. Seedooɓe acci limce muuɗum'en haa derkeejo bi'eteeɗo Sol. 59Saa'i ɓe ɗon piɗa Etiyen, kaŋko o ɗon toro bana ni'i: “Jawmiraawo Yeesu, jaɓ yoŋki am!” 60O tuggi koppi maako, o hooli, o wi'i: “Jawmiraawo! Yaafana ɓe hakkewol ngo'ol!” Nde o wi'i ɗum o maayi.

Currently Selected:

Kuuɗe Nelaaɓe 7: FBDC

Highlight

Copy