Yuhanna 7

Deerɗiraaɓe Yeesu nuɗɗinaay mo

1Ɓaawo man, Yeesu waanci lesdi Galiili, ngam o yiɗaano yahugo lesdi Yahudiya, ngam Yahuudu'en ɗonno ɗaɓɓa mbarugo mo. 2Wakkati man, juulde Yahuudu'en wi'eteende juulde bukkaaji ɓadake#FL 23:34; TT 16:13., 3deerɗiraaɓe maako mbi'i mo: “Dillu diga nokkuure nde'e, yah haa lesdi Yahudiya, ngam haa pukara'en maaɗa boo ngi'a kuuɗe ɗe a huuwata. 4Walaa mo suuɗataa hoore muuɗum to o yiɗi yimɓe ngi'a mo. Nde nii a ɗon huuwa kuuɗe ɗe'e, waŋgin hoore ma haa yimɓe.” 5Koo deerɗiraaɓe maako maa, nuɗɗinaay mo. 6Yeesu wi'i ɓe: “Wakkati am waɗaay tawon. Ammaa ngam mooɗon, wakkatiire koo ndeyeere fuu, nde fottunde. 7Duniyaaru waawataa wanyugo on, ammaa ndu wanyatam min, ngam mi ɗon seedano ndu no kuuɗe maaru ɗe kalluɗe. 8Njehe haa juulde onon kam, min mi siwaa yahugo, ngam wakkati am waɗaay tawon.” 9Ɓaawo o wi'i ɓe ɗum, kaŋko o lutti haa lesdi Galiili.

Yeesu haa juulde bukkaaji

10Nde deerɗiraaɓe Yeesu njehi haa juulde, kaŋko boo o yehi ton. O waŋganaay yimɓe, ammaa o yehi bee sirri. 11Yahuudu'en ɗonno tefa mo nder mooɓre juulde, ɓe ɗonno ƴama: “Toy mo?” 12Yimɓe nder mooɓre mbolwi dow maako ɗuuɗɗum bee sofndaago. Woɗɓe ɗonno mbi'a: “O goɗɗo giɗɗo mbooɗeeŋga.” Ammaa woɗɓe boo ɗonno mbi'a: “Naa non sam, o ɗon majjina yimɓe.” 13Ammaa walaa mo wolwi dow maako bee baŋguɗum, ngam ɓe ɗon kula mawɓe Yahuudu'en.

14Nde reeta nyalɗe juulde caali, Yeesu nasti haykaliiru, fuɗɗi ekkitingo yimɓe. 15Yahuudu'en kayɗini, mbi'i: “Noy o heɓri anndal binndi, kaŋko mo jaŋngaay?” 16Yeesu jaabi ɓe: “Ko mi ekkitinta iwaay haa am, ammaa ɗum iwi haa Allah nelɗo yam. 17To goɗɗo yiɗi waɗugo muuyo Allah, o anndan to ekkitinol am iwi haa Allah malla to mi ɗon wolwa ngiɗa am. 18Koo moy wolwi ngiɗa mum, ɗon ɗaɓɓana hoore mum tedduŋgal. Ammaa koo moy ɗaɓɓi teddingo nelɗo ɗum, o gooŋgaajo, walaa sooynde adilaaku nder maako. 19Naa Muusa hokki on tawreeta na? Ammaa walaa koo gooto mooɗon ɗowtanto ka. Koni on ɗaɓɓata mbarugo yam?” 20Mooɓre jaabi mo: “A ginnaaɗo! Moy ɗaɓɓi mbarugo ma?” 21Yeesu jaabi ɓe: “Mi huuwi kuugal gootal tan, on fuu on kayɗini. 22Muusa umri on juulnol#7:22 Juulnol malla ndemnol. – ammaa umroore nde iwaay diga Muusa, nde iwi diga kaakiraaɓe – ngam maajum on ɗon njuulna ɓiŋngel gorgel nyalaade siwtorde#Laat 17:10; FL 12:3.. 23To on ɗon njuulna goɗɗo nyalaade siwtorde, ngam taa on luuta umroore Muusa, kadi ngam ɗume on tikkani yam ngam mi yamɗitini ɓanndu goɗɗo fuu nder nyalaade siwtorde#Yuh 5:9.? 24Taa kiite fodde ko gite ngi'ata, ammaa kiite kiita adiliiha.”

Yeesu woni Almasiihu na?

25Woɗɓe nder yimɓe Urusaliima mbi'i: “Naa kaŋko woni mo ɓe ɗaɓɓata ngam mbarugo? 26Ndaa o ɗon wolwa bee baŋguɗum, ammaa ɓe mbi'aay mo koo ɗume. Kadi ardiiɓe meeɗen annditi fakat kaŋko woni Almasiihu na? 27To Almasiihu wari, walaa anndanɗo haa o iwi, ammaa gorko oo kam, en anndi haa o iwi.”

28Nden Yeesu ɗon ekkitina yimɓe nder haykaliiru bee sawtu, o ɗonno wi'a: “On anndi yam, on anndi haa mi iwi. Mi waraay bee ngiɗa am, ammaa nelɗo yam o gooŋgaajo. Kaŋko, on anndaa mo. 29Min, mi anndi mo, ngam mi iwi haa maako, kaŋko neli yam.” 30Nden ɓe ɗaɓɓi naŋngugo mo, ammaa walaa mo meemi mo, ngam wakkati maako yottaaki tawon. 31Ɗuuɗɓe nder mooɓre nuɗɗini mo, ɓe ɗonno mbi'a: “To Almasiihu wari, o waɗan kaayeefiiji ko ɓuri gorko oo na?”

Aynooɓe haykaliiru tefi naŋngugo Yeesu

32Farisa'en nani ngurŋgurtol mooɓre dow Yeesu, nden ɓe narri bee mawɓe liman'en, ɓe neli aynooɓe haykaliiru ngam naŋngugo Yeesu. 33Yeesu wi'i: “Mi ɗon wondi bee mooɗon wakkati seɗɗa tawon, nden mi loro haa nelɗo yam. 34On tefatam, ammaa on tawataa yam, ngam on mbaawataa yahugo haa ngonanmi.” 35Yahuudu'en ƴamƴamtiri: Toy o tammi yahugo haa en mbaawataa tawugo mo? O tammi dillugo haa lesɗe ɗe Yahuudu'en saŋkitiiɓe caka Yunaniŋke'en#7:35 Yunaniŋke'en malla Girek'en. ngoni ngam o ekkitina Yunaniŋke'en na? 36O wi'i: “On tefatam, ammaa on tawataa yam, ngam on mbaawataa yahugo haa ngonanmi.” Ɗume wolde nde'e yiɗi wi'go?

Maaje ndiyam ngeetam

37Nyalaade timminirde juulde, kayre ɓuri nyalɗe goɗɗe samɗineego. Nyannde man Yeesu ummi, dari. O wolwi bee sawtu, o wi'i: “Koo moy ɗomɗi, wara haa am, yara#FL 23:36., 38koo moy nuɗɗini yam, bana ko Deftere wi'i, maaje ndiyam ngeetam ilan diga nder maako#Ez 47:1; Zek 14:8..” 39Yeesu waɗi balndol ngol dow Ruuhu mo nuɗɗinɓe mo tammi heɓugo. Saa'i man ɓe keɓaayno Ruuhu tawon, ngam Yeesu siwaa nastugo tedduŋgal.

Yimɓe luuri dow haala Yeesu

40Nde yimɓe nder mooɓre nani bolle ɗe'e, ɓe mbi'i: “Fakat, kaŋko o annabiijo mo en ndeenata.” 41Woɗɓe mbi'i: “Kaŋko woni Almasiihu.” Woɗɓe feere fahin mbi'i: “Kadi, diga Galiili Almasiihu iwata na? 42Naa Deftere wi'i Almasiihu iwan diga danygol Daawuda, nder berniwol Baytilaama, haa Daawuda wonno#Mik 5:1.?” 43Nden luural waɗi hakkunde yimɓe daliila Yeesu. 44Woɗɓe caka maɓɓe ngiɗi naŋngugo mo, ammaa walaa mo meemi mo.

Mawɓe Yahuudu'en nuɗɗinaay Yeesu

45Aynooɓe haykaliiru go lori haa mawɓe liman'en e Farisa'en, kamɓe ɓe ɗonno mbi'a ɓe: “Koni on ngaddaay mo?” 46Aynooɓe njaabi: “Walaa mo meeɗi wolwugo bana gorko oo sam.” 47Farisa'en ƴami ɓe: “Onon boo on tokki esto maako na? 48Woodi koo gooto nder mawɓe meeɗen malla nder Farisa'en nuɗɗini mo na? 49Sey mooɓre nde anndaa tawreeta, nde naalaande!” 50Nikodemus, gooto nder Farisa'en wonɓe ton, mo meeɗino yahugo haa Yeesu, kaŋko o wi'i ɓe#Yuh 3:1-2.: 51“Tawreeta meeɗen duŋani en hiitaago goɗɗo diga en nanaay mo, en anndaa ko o waɗi na?” 52Ɓe njaabi mo: “An boo a goɗɗo Galiili na? Linyu booɗɗum nder Deftere, a tawan walaa annabiijo koo gooto iwata diga Galiili.”

Debbo jeenoowo

53Nden koo moy hooti saare muuɗum.

Currently Selected:

Yuhanna 7: FBDC

Highlight

Copy