MFA' MGHƐ NTHƏM 20

Polo cyə Grikia pu Makedonya gɔ Troas

1Paknyə lə cwə tə̀ mǐ Polo ke mghɛ zhi'nwə, hɑ kaktʉɔ bi pu. Biŋ da'nyə wap, tə ntham məjyə Makedonya. 2E lə kəka nə yə bɔ ghəŋ awɛ, hɑ kaktʉɔ bi mfɑ̌mfɑ́; gɔ tə ŋkhəm Grikia, 3shwə̀ wə̀ nə mŋwə́ tá. Cwə yə e lə pɑ̀ gɔ ko shyə lɑpʉə ghɔ Siria a, pɑ Yudea ko cu'tə cwəpuŋ nə e. E yap cwəlɔ gɑ̀ e gɔ piŋ cyə́ m Makedonya. 4Mso ghiŋ pyə pyə pu a pu lə bɑ a, lə bɑ Sopater mu Piro, yə Berea, Aristarko pu Sekundo pɑ̀ Tesalonika, Gayo yə Dɛrbe pu Timotio; 5pɔ pɔ gɑ̀ lə tamdzə, ŋkho Troas byap wɔk. 6Sɔ' m nə pyə, bɑ tyɛ' Paska lə cyə̌ tə pyə lù guŋ Filipo, ŋkho kənu' gwyə; a cyə mtyɛ'dzʉ mənthɔ̀ tə pyə kwyatə wap Troas, biŋ nthiŋnyə wə nə ta' gap dzʉ́.

Polo yam Etiko Troas

7A lə pɑ̌ nə dəŋdzə tyɛ'dzʉ́ nə gapdzʉ́, pyə cu'tə bɑ bo'nyə msɛ. Pa' dzʉ lə bɑ gɔ lɔ Polo ghɔ a, e lə ghɔmnwə bi mfɑ̌mfɑ́ a sak tə ŋkhəm teŋ mtsʉ̌'. 8Mlámbù lə bɑ nə yə zhəŋ dyə thə́ yə pyə lə bɑ pyə cu'tə nə a. 9Mú mu' səm tsò tsyə̀ pɑ Etiko yə a lə bɑ̀ e cwə nə kə̌ŋ shwə fǎdyə́ a, lə ti tə ŋʉ̌', Polo yɑwə gɔmghɔ́m. Lwɔk lə ghə mù bɔ fɑ nə zhəŋ dyə́ yɑtá bvʉ́ si, pu nə ghɔ m nə pʉ' e bɑ e pfʉ́. 10Polo lə wuŋ fi' cwəlɔ gɔ bəŋ é, ŋkwa e nə bu myə́ gɔm gɑ: Ka po tsɔp nɑ tsɔ, e ka pfʉ̀. 11Polo lə piŋ ŋkwɔ' thə̀ cwəlɔ, bo' msɛ, pfɑ, biŋ gɔm nwə tə ŋkhəm fɔkdzʉ, gɔ̌. 12Sɔ m nə́ mù mbɛ, pu lɑ é nthʉɔnthʉɔ nə bɑnyə, a pɑ kwa' nə hɑ kaktʉɔ.

Polo Mileto

13Pyə lə tamdzə cwəlɔ, ŋkho kənu' gwyə nə gɔ Asos tsʉ' yə pyə lə gɔ lɑ Polo nə a, nə pa' a lə bɑ ě cyə m məjyə̀ dəmcǎ' pa' e lə yǎp nə́ nə gɔ wə́ a. 14Polo lə kwyatə wɔk Asos, pyə kwa e nthʉm kənu' gwyə pyə a pu ghɔ m Mitilene. 15Pyə lə kǒ wə́, dzʉ̌ lɔ̀ pyə lɑ kənu' gwyə gɔ tə ŋkhəm Kios; a lə pɑ̀ yə mu' jʉ̀m dzʉ̌, pyə cyə Samos, a piŋ nə cyə ta' tyɛ'dzʉ pyə tiŋnyə Trogilion tə ŋwak Mileto. 16Polo lə yap gɑ e tə gɔ tiŋnyə pɑ̀, nə pa' e lə bɑwə do'nyə, shəŋ nə kəm Yerusalɛm nə tyɛ' Pantekɔtə

Polo la'nyə̀ Mileto

17Polo lə ko Mileto ŋkhe mghətso cu'tə pɔ Kristo Efeso. 18Wap lə kwyatə e, e ghɔm bi pu gɑ: Po zhyə́ pa' ghiŋ tsɑ̌ lɑ pɑ̌ cəcɑ̌ pó tə fɑ tyɛ'dzʉ́ yə ŋ də ŋwak Azia a. 19Dɑ lɑ nə fi'nɑ hɑ si pu a shyə̀tsə fa' bi Cyəpɔ nthʉm mləŋtə pu a cu'tə cwəpùŋ yə pɑ Yudea lə ŋkho nə m̀ a. 20Ŋ da tə wak sɔmywə yə a lə bi a pɑ̀ a kwitə wɔ a; ŋ də siŋ Cúŋ, ji'tə wɔ dəm sim bɑ m tsʉ' cam. 21Mkwinthɛ mə̌ lə bɑ nə ghɔm bi pɑ Yudea ba bi pɑ Grikia gɑ wap kwyəpnyə, shʉ' pɔ Si, biŋ Cyəpɔ yɔk pɑ̀ Yeso.

22Cwəlɔ, gɑ̌ wə bɑ̀ gɛ cɛ̌ Zhwenyə, bɑ̀ məjyə̀ nə ghɔ m Yerusalɛm. Ŋ khɑ zhyə ywə yə́ a wə̀ bɑ̀wə byap a. 23Da' gɑ nə guŋ mtisuŋ awɛ Zhwenyə Dɔlɔ̌ bɑwə siŋ a gɑ gwɑ̀ mtʉ̌ɔ pu a ghəghʉɔ wə byap a. 24Ŋ tə yɑwə nyəŋ bɑ sɔm dəŋ nə vɔk a pɑ. Ywə yə gɑ shəŋ a wə bɑ da' gɑ dɑ fa' tsyə Cyəpɔ Yeso lə hɑ bəm a nə ŋkwinthɛ̌ nə mcuŋ pɑpuŋ nə gho' si a, gɔ tə ŋkhəm nə pɑpuŋ.

25Gɑ̌ wə jyə kwa' pɑpuŋ gɑ̀ wɔ pyə ŋ də siŋ wɔ nwə Nəfo a, tə gɔ la'tə kwi' yɔ sə̀ a pɑ̀. 26Bi a pɑ̀ gɔm cwəlɔ dzə po sɔsɔ̌ gɑ gɑ̌ pɑ dɔlɔ̌ nə mcyə mɔ. 27Ŋ khɑ lɑ msənyə gə sɔmywə pɑ̀. Gɑ̌ siŋ wɔ guŋ ywə yə Si lə yap a awɛ. 28Po wim nɑ̀ tso pɑpuŋ biŋ gwim ka dzə̀ yə Zhwenyə Dɔlɔ̌ dɑ wɔ gə pɑ pyap a. Po khim Cu'tə po Si yə e lə lɑ̀ mcyə myə́ jó a.

29Gɑ zhyə́ pɑpuŋ gɑ cwə yə gɑ gɔ ghɔ a, mbvʉ̌ go shɔ́kcɔ̌k gɔ ko cəcɑ̌ po, ka dzə lə vɔk wap. 30Mghɛ ghɔm cwəpuŋ gɔ təm pɑ cəcɑ̌ po fəŋ mghɛ zhi' nwə yap jʉ̌m pú. 31Po ti tə tì bɑ ŋkhamtə gɑ̀ nə dzʉ̀ gu' tá mtsʉ' ba m mɔkcʉ, da tə pwa nə lɑ̀ shyətsə́ nthɔk bǎ ya mo lə nə po. 32Cwəlɔ gɑ̌ tak wɔ bi Si ba m nə ghɔm gho' tsyə́ tsyə a bɑ ǎ ghə gʉ' nə ŋkwɑ̀ biŋ gə guŋ pɔ dɔlɔ̌ awɛ sɔ' dzʉ m cʉ' Si a.

33Ŋ dě tə ghi'nyə ŋkhap, kɑ gɔl, kɑ dzə sɔmmo lɑ. 34Bǔ mɔ gɑ, pa' po nə̀ jyə́ a, lé hɑ ywə yə a lə jak ǎ bəm ba m bi mso pɑ̌. 35Ŋ də bɑ guŋ mcwə awɛ bɑ da'tə wɔ gɑ́ pu jɔgo' po'o tə ŋkwitə pɔ bwapwǎ, biŋ bɑ̀ ŋkhamtə ghɔm tsyə́ Cyəpɔ Yeso lə ghɔm a, gɑ́ nə hɑ bɑ ǎ ŋwɛnyə shyə nə kwi.

36Mghɔm mɔ gɑ lə mǐ, pu a pù kam mkwi'tə si, shwyɛ'nyə Si. 37A nə mi guŋ yap awɛ lɔ̀, bvʉtə nə Polo nthɛtə e. 38Lɔ́ tsap lə dù pa' e lə ghɔm gɑ wap tə gɔ la' tə piŋ yɔ sə é a pɑ́. Wap lə lɑ́ e nə gɔ tə nə kənu' gwyə shya.

Currently Selected:

MFA' MGHƐ NTHƏM 20: NTGomala

Highlight

Copy