MFA' MGHƐ NTHƏM 21

Polo pʉɔ m Yerusalɛm

1Pyə a pù lə hapnyə, pyə kó shyə, dé jyə Kos; dzʉ̌ lə nə lɔ́ bɑ pyə ko Rodos, biŋ gɔ tə ŋkho Patara. 2Pyə lə ko wə jɔ kənu' gwyə a pɑ̀wə gɔ m Fenikia ŋkho nə́. 3Pyə lə ghɔ tə bɑ jɔ Kipro, biŋ fɛ̀ dɑ m Siria, ŋkho Tiro nthəm, a pɑ̀ tsʉ' yə kənu' gwyə lə bɑwə nthé pɔ nə a. 4Pyə lə cwə̌ wə tyɛ'dzʉ sɔmbʉə, nə pa' pyə lə ko wə jɔ shɑ mghɛ zhi'tə nwə. Zhwenyə lə thənyə wap, wap ghɔm bi Polo gɑ e kɑ́ pʉɔ Yerusalɛm. 5Dəŋ pa' pyə lə bɑ gɔ cwə́ wə́ a lə kǔ', pyə lú nə ghɔ̀, ntham məjyə̀, guŋ pɔ awɛ, pɑ jwǐ, ba pɑkhʉ̌ yap ghɔ shya wɔk nə dhə tisuŋ. Pyə a pu ko tsʉ'u ŋkham mkwi'tə si kəŋ shyə́ lɑpʉə shwyɛ'nyə Si. 6Pyə a pu piŋ da'nyə cwəlɔ, pyə nə ko kənu' gwyə wap pɑnyə wə pú. 7Pyə lə sa'shyə fɑ Tiro ŋkho Ptolemaida, sha'tə mfɑmfɑ, pyə a pu piŋ shwə̀ ta' tyɛ'dzʉ.

8Dzʉ̌ lə lɔ̌ pyə ghɔ ŋkho Kaesarea, gɔ dyə́ Filipo, yə e lə bɑ mu' mo nə pɔ sɔmbʉə, bɑ siŋ Cuŋ pɑpuŋ biŋ shwə́ ywə́ é. 9A lə bɑ ě ghə po pɑ jwǐ tə zhyə mbɛ papfʉə wap pɑ gɔm ghɔm Si. 10Pyə lə na' nə cwə ywə́ nə pǒ mtyɛ'dzʉ́ mu' gɔm ghɔm Si nə tso Si fɑ Yudea sɔ̌', tso tsyə pɑ Agabo. 11E lə sɔ' jɔ wɔk, bé tap Polo nə ŋkwɑ bu myə́ pu a mkwə myə́ gɔm gɑ: Zhwenyə Dɔlɔ̌ ghɔm gɑ: Mbɛ yə yəŋ gɑ tap é a yɔ pa' pɑ Yudea gɔ ko Yerusalɛm kwɑ é piŋ hɑ é bi pɑ tə pɑ pɑ Yudea a yəŋ. 12Pyə lə yu' po'o, pyə a mfɑmfɑ nthʉm tisuŋ cwyɛ'nyə Polo gɑ̀ e kɑ pʉɔ Yerusalɛm. 13A pá po'o e pa' bi pyə gɑ: nwə kɑ́ po lɔ̀ biŋ bɑ́ bwa tʉm tsɑ̌? Gɑ̌ e dá' bɑwə byap tə da' gɑ̀ pu kwɑ a pɑ̀, ba m nə pfʉ Yerusalɛm nə tso Cyəpɔ Yeso. 14Pa' é lə kəŋnyə nə yù' bi pyə a, pyə la tə nə gɔ dzə pɑ̀. Pyə lə ghɔm da' gɑ̀ ywə yə Si wə shəŋ a pəmtə́.

15Mtyɛ'dzʉ bɔ lə nə cyə̀, pyə miŋ nə nyaptə tsə tsɔk, bʉɔ gɔ Yerusalɛm. 16Mghɛ zhi'nwə pyə wap lə fɑ Kaesarea bɑ gɔ yap m Yerusalɛm pyə a pu a, lə lɑ̀ wɔk gɔ dyə Mnason yə Kipro mu' mo nə dzə mghɛ zhi'nwə.

Polo yɔ Yakop Yerusalɛm

17Pyə ko Yerusalɛm mfɑ̌mfɑ́ lɑ kwa' tʉm pɑpuŋ tə́ nə́ dɑ wɔk. 18Dzʉ lə lɔ̌ pyə a Polo ghɔ ywə Yakop. Tsʉ́' yə gúŋ mghətso awɛ lə bɑ nə a. 19Polo lə ca'tə wap biŋ siŋ guŋ mfa' awɛ myə Si shyə́ m nə e gə nə gǔŋ pɑ tə pɑ pɑ Yudea a, pɑ m zhəŋ. 20Pɔ pyə wap lə bɑ̀wə ju' nwə yə e gɔm a lə hɑ ghu'tə bi Si, biŋ gɔm bi Polo gɑ: Fɑ yɔk, o yɔ dəŋ vəŋ pɑ piŋ pyə wap cəcɑ̌ pɑ Yudea a, guŋ yap awɛ nəŋ bɑ pɑ́ pɔ pyə wap ŋkhaktʉɔ nə mco' a. 21A nə́ pɑ̀ po'o bɑ wap tsə yu' ywə yə pú bɑ́wə gɔm nə o a: Gɑ ywə yə o bɑwə ji'tə pɔ a bɑwə gə́ gɑ́ pɑ Yudea pyə wap shwə cəcɑ̌ pɑ tə pɑ pɑ Yudea a wap wa' mco' Mosɛ, wap lə piŋ bɑ bvo po pap pɑ́, wap lə piŋ giŋ nə ŋkhɛ mco'. 22Pù gɔ ghə m gɑ̀ kɑ̀? Wap gɔ yu' gɑ o tsɔ'ɔ. 23Ghə ywə yə pyə gɔ ghɔm bu a. Pyə̌ ghə pɔ̀ pápfʉ̀ə tsɔ'ɔ bɑ wap lě ŋkhà' mka'nyə bi Si. 24Lɑ wap pu a pú pə́mtə́ dɔ́nyə́ nɑ tsɔ, a wə nə ghə ywə nə dɔ́nyə̀ bi guŋ yap awɛ, wap gɔ cwə tə kəm mthə màp, pu zhyə̀ gɑ guŋ ywə awɛ yə pu gɔm nə o a tə bɑ̀ nwə pɑ; gɑ ba wə yǔ bɑwə giŋ nə mcò'. 25Sɔ' m nə pɑ tə pɑ pɑ Yudea pyə́ wap shʉ' pɑ piŋ a, pyə kě bvə bi pu gɔm gɑ: Po kɑ pfɑ bap tsə pwɔ' pɑ tə pɑ pɑ Yudea, kɑ mcyə bap yə e fám a lə, kɑ ghiŋ cwəpuŋ lɑ. 26A lə pɑ̀ nə yə mù' jʉ̀mdzʉ̌, Polo lə pɑ bɛ bɔ pú a pú to' nə lɔnyə nɑ tsap. E lɑ ghɔ Dyə Si nə ghɔm tyɛ'dzʉ yə mlɔ́nyə̀ gɔ nə mi wap hɑ bǎ yə ywə nə gamtə Si ya mo a nə pu a.

Nə ghəm Polo Dyə́ Si

27Tyɛ'dzʉ batə sɔmbʉə lə nə́ mi, pɑ Yudea nə ghəŋ Azia, pyə wáp lə tyəŋ Polo Dyə Si a, cyə́ guŋ pɔ awɛ biŋ jap bú nə e. 28Wáp lə bɑwə shwé gɑ: Pɑ Israɛl, po kwitə́ wɔk. Yɔ mo yə é bɑ̀wə nthé shù nə pɔ pɔk pɑ, ba m nə mco' mɔk pɑ, ba nə tsɔ'ɔ yəŋ gɑ yə pɑ nɑ a, shyə́ m nə ywə yə é bɑwə ji'tə nə guŋ mtsʉ' awɛ bi guŋ pɔ̀ awɛ a yə̌ŋ. E bɑ̀ e lɑ ba pɑ Grikia ŋkho Dyə Si, po'o nə jəmtə yəŋ tsʉ' dɔlɔ̌. 29A lə̀ bɑ̀ wap yɔ̌ wap pù Trofimo yə Efeso tisuŋ, bɑ̀wə ŋkwɛ gɑ e lɑ e ŋkho Dyə Si. 30Guŋ tisuŋ awɛ lə tə̌m, pɔmnəŋ piŋ sɔ' kwa' vəŋ e. Pù ghəm Polo biŋ fəŋ e nə nthəm Dyə Si, biŋ gùŋ jo' mjyədyə̌. 31Cwə yə pu lə pɑ shəŋ nə zhwə Polo, mcuŋ ŋwak ywə tá sa' msəŋwi gɑ guŋ Yerusalɛm awɛ si bɑ a va'. 32E lə wuŋ shu'tə msəŋwi pu a pɑ tadyə́ sa' pɔ ŋkhə pu a pù ghɔ nə pwa pɔ. Wap lə nə yɔ tá sa' msəŋwi pu a msəŋwi, wap lə piŋ shwɔ Polo. 33Tà sa' msəŋwi lə ghɔ bəŋ Polo cwəlɔ, gəm e, gɔm gɑ̀ pu lɑ gwɑ mtʉɔ mɑbʉ́ə nə shəŋ e. E lə pɑ̌ shəŋ nə zhyə mo yə e bɑ e, ba ywə yə e gə a. 34Da' gɑ a ghɔ cəcɑ̌ pɔmnəŋ sɔmmo lə ghɔm yə́ a hwənyə yə́ yəmu' mo yə e bəŋ e a. A cyə m nə zhwyanyə bi a pɑ tadyə̌ sa' msəŋwi lə yu' sɔm nwə nyənyɔ. E ghɔm gɑ pu lɑ Polo nə gɔ nthʉ̀ɔdyə̌. 35Cwə yə Polo lə ghɔ tə ŋkho nə zhəŋ mkwə̀ ŋkwɔ' nə ŋkho dyə a, pɔmnəŋ nyɔnyə̀ nyɔ̌nyə́ tə msəŋwi cʉ' ŋkwa Polo kwa. 36Nə pa' guŋ pɔ awɛ lə bɑ̀ jʉm e bɑwə shwe gɑ: Pu zhwə e! Pu zhwə e!

37Pu lə pɑ̀ tə bɑ̀ gɔ nyəŋ Polo nthʉɔdyə e ghɔm bi tadyə msəŋwi gɑ: Bi a pɑ gɔm shwə nwə bu a?

E pa' bi e gɑ, a bɑ o zhyə ghɔm pɑ Grikia a? 38E piŋ həŋtə e gɑ: Wə né tə bɑ yə Egipto yə e kɑ thə́nyə gwɛ a pɔ sha' pfʉə, pɑ tʉɔthə́ bi Roma, fəŋ wap nə gɔ ghakgo a pɑ a?

39Polo ghɔm gɑ: Myə̀ lə? Gɑ̌ bɑ yə Yudea, yə Tarso m Kilikia, mù e tisuŋ yə ɑ bɑ̀ a ghə tso a. Sə́so, piŋ gɑ gɔm nwə bi pɔmnəŋ.

40Pu lə̀ pìŋ bi Polo gɑ̀ e ghɔmnwə. E tiŋnyə nə mzhəŋ ŋkwɔ' nə ŋkho nthʉɔdyə, dɑ pú é gə mtiŋ bi pɔmnəŋ gɑ wap lɛtə́, wap lɛtə gɑ kǎm. Polo lɑ ghɔm Ebraika gɔm bi pu gɑ.

Currently Selected:

MFA' MGHƐ NTHƏM 21: NTGomala

Highlight

Copy