LUKASI 17

Nə hɔnwə

(Mt 18.6-7,21-22; Mk 9.42)

1Yeso ghɔm bi pɑkhʉ̌ pyə gɑ: Sɔmywə yə bi a pɑ a kɔ ywə fa'tə á a tə̌ wə pɑ́, tə gǒ' bɑ bi mo yə a gɔ cyə m nə e a. 2Dzə̌ bi mo bɔ gɑ pu cəŋ ləŋ nthuŋ e, ma' e nthʉm shyə lɑpʉə. Shyə pa' bi a pɑ e ghə mu' nə pɑkhʉ pɔ gɑ vʉ́ si a. 3Po pɔmtə:

fɑ́ o hɔnwə bu, o tɔk e, bi a

e kwyəpnyə a, o lɑ mhɔ myə́ nə shwyɛ' e.

4E hɔnwə bu mcʉm sɔmbʉə nə tyɛ'dzʉ, tə sɔ' dzə o kwyəpnyə mcʉm sɔmbʉə, o lɑ mhɔ myə́ shwyɛ' e.

5Mghɛ nthəm ghɔm bi Cyəpɔ gɑ: Kwi' piŋnthʉm yɔk. 6Cyəpɔ ghɔm bi pu gɑ: Po la' gə piŋnthʉm dəŋ msɔm sɔ́k bɑ po ghɔ̀m bi ta' thə́ yəŋ gɑ gɑ́: Cwɔ' nɑ o gɔ nthʉ́m shyə lɑpʉə. Bɑ a gɔ yu' shwə yɔ.

7Wǎ nə po yə e la gə ŋkwɔ e, e pɑ́ dzʉ'ne kɑ byap dzə́ lə, bɑ cwə yə e fɑ pé a, é gɔ ghɔm bi e gɑ sɔ' shwə dəm tɑpe? 8Gɛ̌. E gɔ ghɔm bi m gɑ: Nyaptə ywətsʉ nə sɔ' hɑ bəm. Cwə yə gɑ̌ tsʉ ywə tə jwyə biŋ nwə́ a, o gɔ ghɔ tsʉ yǔ cwəlɔ. 9E gɔ gho'tə ŋkwɔ e bɔ nə pa' e ghə ywə yə e gɔm bi e a? 10Bɑ wɔ yɔ, cwə yə po ghə guŋ ywə awɛ yə pu lə ghɔm gɑ po ghə a, po ghɔm gɑ: Pyə̌ bɑ pɑ́ sobo mghɛ fa', pyə̌ ghə pɑ ywə yə pyə kɑ bɑ gɔ ghə a.

Yeso yɛ mghɛ ka'pap ghǎm

11Yeso lə pɑ gɔ m Yerusalɛm, shyə m Samaria pu Galilea. 12E lə pɑ ŋkho nthʉm mu' guŋ, shɑ mghɛ ka'pap pɔ gham sɔ' pu a pu yu'tə, wap tiŋnyə gʉə sʉəsʉə. 13Shwé gɑ: Yeso ta, cɔmmtso mɔ́k. 14Yeso lə nə yɔ wap gɔm bi pu gɑ: Po ghɔ da'tə nɑ tsɔ bi mkamsi. Wap lə pɑ̌ gɔ, nɑ tsap lɔ́. 15Mu' mo nə pu lə yɔ bɑ ě yɛ, bɑnyə nə mkwə myə́, giŋ gu'tə Si tə́ thə́, 16sɔ' bvʉ nə mkwə Yeso, pfɔptə sə é si go'tə e; mo bɔ lə bɑ yə Samaria. 17A pɑ́ po'o Yeso ghɔm gɔm gɑ: Guŋ pɔ gham awɛ ka yɛ a? Pyə shɑ pɔ vʉ̌' hɑ? 18Sɔmmo ka təm cəcɑ̌ pu sɔ' gu'tə Si, tə ně da' gʉɔ yəŋ gɑ. 19Biŋ gɔm bi e gɑ: Lusi gɔ; Piŋnthʉm o vɔk o.

Nə́ sɔ' Nəfo

(Mt 24.23-28,37-41)

20Pɑ Farisai lə həŋtə Yeso cwə yə Nəfo Si gɔ sɔ' sɔ' a; e pa' bi pu gɑ: Nəfo Si tə gɔ sɔ' sɔ' tə pu pɑ dɑ mnyə jɔ a. 21Pu tə gɔ sɔ' ghɔm gɑ: A yəŋ gɑ bɑ m tsɔ' gɑ a, kɑ gɑ́, a yə́ gɑ bɑ mtsi'i gɑ a. Nə pa' Nəfo Si dzə́ pɑ cəcɑ̌ po.

22E lə piŋ gɔm bi pɑkhʉ pyə gɑ: Cwə̌ wə́ sɔ́' yə po gɔ sɔ' ti' nə yɔ mu' tyɛ'dzʉ nə mtyɛ'dzʉ Mú mo a, da' gɑ po lə yɔ. 23Pu gɔ sɔ' pɑ ghɔm bi po gɑ: A m tsɔ'ɔ gɑ, kɑ a m tsi' i gɑ: Ka po ghɔ tsʉ'u, 24dəŋdəŋ pa' pəpa' bəŋ ŋwɛ kɛbəŋ kwicʉ̌m nə guŋ mghəŋ dzʉ́ awɛ a, dəŋdəŋ pa' a gɔ sɔ' pɑ nə tyɛ'dzʉ Mu mo a. 25Da' gɑ a bɑwə shəŋ gɑ e ləŋdzə jɔgo' te'te', tə pɔ nə yəŋ wɔ̌ dzʉ wa' e. 26Ywə yə a lə pɑ̌ nə cwə Noe a gɔ sɔ' piŋ pɑ nə cwə Mú mo. 27A lə bɑ cwə o bɔ pɔmnəŋ pɑ dzʉ́, nwə́, bɑ dɔmdyə, biŋ hɑ po pap lɔmdyə tə ŋkhəm tyɛ'dzʉ yə Noe lə ko kənu' dɔmnyə̀ bəŋ mwe lú, mshyə sagʉə jwətə pɔ a. 28Ba dəŋdəŋ pa' a lə pɑ nə cwə Lɔt a, pu lə dzʉ́, nwə́, bɑ jó, bɑ fiŋ, bɑ dzə ywə biŋ bɑ ŋkwɑ mpa' 29tə' tyɛ'dzʉ yə Lɔt lə təm Sodɔm a, Si ghə bəŋ mɔk pu a mwɔ' hwéhwě lú, jwətə wap awɛ. 30A gɔ sɔ' pɑ pɑ́ po'o nə tyɛ'dzʉ yə Mú mo gɔ sɔ' sɔ' a.

31A tyɛ'dzʉ bɔ, mo yə e m̀ zhəŋ dyə thə́ a kɑ fi' gɑ e gɔ ghɔ lɑ tsə tsyə zhəŋ Dyə Si; mo yə e m pe a kɑ pɑnyə la'. 32Po kamtə jwi Lɔt, 33mo yə e gɔ sɔ' pɑ cəŋ nə vɔk a gɔ sɔ' pi. Mo yə e pi vɔk e a, vɔ́k. 34Gɑ siŋ wɔ gɑ a gɔ sɔ' pɑ mtsʉ' bɔ, pɑ bɛ pɑ dəm ta' kodyə pɑpʉə; pu lɑ mu', nthak yə mu'. 35Pɑjwǐ pɑpʉə gɔ sɔ' pɑwə pəmtə wɔ' msɛ. Pu lɑ mu' ta', nthak yə mu'. 36Pɑ bɛ pɑpʉ́ə gɔ sɔ' pɑ́ pé, pu lɑ ta' mo nthak ta' mo. 37Pɑkhʉ pyə həŋtə e gɑ: A gɔ sɔ' pɑ po'o hɑ Cyəpɔ? E ghɔm bi pu gɑ: Tsʉ' yə pfə ywə nə a, a tsʉ' yə mŋwə̌ŋwə shu'tə nə a.

Currently Selected:

LUKASI 17: NTGomala

Highlight

Copy