LUKASI 18

Gɛ fyɛ' yə pu shwyɛ'nyə e dɔmnyə e a

1Yeso lə ghɔm mu' ghɔm tə tutə bi pɑkhʉ pyə nə́ nə siŋ wap gɑ a puŋ gɑ wap pɑ shwyɛ'nyə Si tə pwa. 2E lə ghɔm bi pu gɑ: Mu' gɛ fyɛ' lə bɑ nthʉm mu' tisuŋ e lə pɑ bwɔk Si, e lə nəŋ bɑ shɔm nə sɔmmo. 3Mu' npfɔk mjwǐ lə bɑ nthʉm tisuŋ bɔ bɑ sɔ' guŋ mcwə awɛ gɔm bi é gɑ: Ya'shɛ yɔk pyə gɛ bo a. 4A lə cwə́ te', la' e kuŋ nə ya' shɛ bɔ. Biŋ di gɔm gɑ: Ba pa' ŋ tə́ bwɔk Si a, ŋ də nəŋ bɑwə shɔm nə sɔmmo a pɑ, 5npfɔk mjwǐ yəŋ nəŋ bɑwə sɔ' baknyə a guŋ mcwə awɛ a, a puŋ gɑ ja' shɛ e. A taktə pɑ po'o bɑ e gɔ pɑ sɔ' guŋ mcwə awɛ paknyə a pɑ po'o tə shwə bwa bi e. 6Cyəpɔ ghɔm po'o biŋ ŋkwi' gɔm gɑ: Po yú' ywə yə ba'sa' cwəpuŋ gɔm a! 7Já Si tə gɔ ya'shɛ́ pɔ pyə wap bɑ e lě ŋkhe wap, wap pɑ pɔ pyə, bɑ sɔ' shwé bi e mɔkcʉ́ ba mtsʉ' a lə? Já e gɔ cwə te' tə kwitə wap lə? 8Gɑ siŋ wɔ gɑ: E gɔ lo'nyə ya'shɛ yap. Da' gɑ tə Mú mo gɔ la' nə sɔ' kwyatə mghɛ piŋnthʉm dəmcǎ' lə?

Mo Farisai pu gɛ kwishwɔp

9E lə kwi' gɔm mu' ghɔm tə tutə nə pɔ pyə wap ŋkwɛ gɑ wap bɑ pɔ dəŋdəŋ tə́ bɑ gwak pyə shɑ pɔ a gɔm gɑ: 10Shɑ pɑ bɛ pɑpʉə lə ghɔ Dyə Si nə cwyɛ'nyə Si. Mu' mo nə pu lə bɑ Farisai, yə mu' mo pɑ gɛ kwishwɔp. 11Farisai lə tiŋnyə thə́ shwyɛ'nyə Si gɔm gɑ: Si, gɑ gho'tə nə pa' ŋ tə bɑ pa' pyə shɑ pɑ bɛ a pɑ: Wap bɑ mcúŋ, bɑ pɑ ghə nwə cwəpuŋ, pɑ ghə ghap. Ŋ tə bɑ pa' gɛ kwishwɔp yəŋ gɑ a pɑ. 12Gɑ̌ shwə tə tsʉ̌ ywə mcʉm bʉə nə gapdzʉ biŋ bɑ hɑ bɑtə jyə gham nə tsə́ tsǎ bu.

13Gɛ kwishwɔp tiŋnyə gʉə sʉəsʉə, la' e zhyə bɑ nə́ pʉ' mnyə myə́ de kɛbəŋ, dɑ mtso dzɔp kəkɔp e gɔm gɑ: Si kɑ yɛluŋ nə m̀, myə̀ gɛ mhɔ. 14Gɑ siŋ wɔ gɑ bɛ yəŋ lə nə́ pɑnyə la' e bɑ si lɑ mhɔ myə́ shwyɛ' e; tə sɔ' m nə yə mu' mo la' Si lɑ mhɔ myə́ shwyɛ' e pɑ. Nə pa' mo yə e ŋa' nɑ e á pu gɔ sɔ' fi' e hɑ si, mo yə e fi' nɑ e hɑ si a pu ŋa' e hɑ thə́.

Fo' po bwǎ

(Mt 19.13-15; Mk 10.13-16)

15Shɑ pɔ lə lɑ ba po bwa nə sɔ' bi Yeso gɑ e yap bu nə pu. Pɑkhʉ pyə lə nə yɔ po'o shɔktə po bɔ. 16Da' gɑ Yeso ghə pu lɑ po bwa bɔ sɔ̌', e ghɔm gɑ: Po tak po mkəcɔk po wap sɔ' bəm, ka po kɔ bi pu; nə pa' Nəfo Si bɑ yə pɔ pyə wap hwənyə wap a. 17Kwa' nyənyɔ gɑ̌ siŋ wɔ gɑ mo yə e ka lɑ Nəfo Si m pa' mú kəcɔk mú a bɑ e tə gɔ sɔ' ko nə pɑ.

Nə wa' tsə fʉ' nə Nəfo

(Mt 19.16-30; Mk 10.17-31)

18Mu' ŋkhám biŋ si lə həŋtə Yeso gɑ: Tá pɑpúŋ gɑ̌ gɔ ghə gɑ kɑ tə sɔ' kwi vɔk mama a? 19Yeso ghɔm bi e gɑ: Nwə kɑ o ke a gɑ mo pɑpuŋ? Sɔmmo tə bɑ mo pɑpuŋ pɑ tə ně da' Si do e. 20O bɑ o zhyə́ mco' gɑ: Kɑ ghə ghap; kɑ zhwə mo; kɑ zhʉ; kɑ cwanwə; ghə mku' tɔ ɔ pu mɔ ɔ. 21Ŋkhǎm bɔ pa' gɑ: Ŋ dɑ́ jyə mco' bǎ tə fə mubwǎ. 22Yeso lə yu' po'o gɔm bi e gɑ: A yɑ̌wə jak o ta' ywə yɑmu': Fiŋ tsə tsyə o ghə a, gaptə bi mpə̌ŋ, biŋ sɔ' jap jʉ̌m m̀; o gɔ sɔ' ghə fʉ' kɛbəŋ. 23E lə nə yu' po'o sə e fi', nə pa' a lə bɑ e zhi té' o. 24Yeso yɔ e po'o gɔm gɑ: Nə ko nə Nəfo Si bɑ a tʉɔ té' bi mghɛ ywə. 25Nə pa' a yɛ̀ bi kamelo nə twɔk nə fǎ syap shyə́ pa' bi a pɑ gɛ ywə ko nə Nəfo Si a. 26Pɔ pyə wap lə yu' a həŋtə e gɑ: Tə́ a bɑ po'o wɑ ghɔ sɔ' vɔk? 27Yeso pa' gɑ: Ywə yə a shyə pɔmnəŋ a tə shyə Si pɑ! 28Pɛtrɔ ghɔm gɑ: Yɔ, pyə lě gwa' tsə tsɔk awɛ jap jʉm o. 29Yeso pa' bi pu gɑ: Kwa' nyənyɔ gɑ ghɔm bi po gɑ́ sɔmmo tə̌ wə yə e le gwa' la' tsyə, ba jwi e, bɑ pǒmmʉə pyə, bɑ mtǎ pu a mʉə, bɑ po pyə nə́ Nəfo Si, 30la' e ghə fʉ' cwəlɔ tə a yɔm, piŋ sɔ' cwə jʉm ko nə vɔk mama a pɑ.

Yeso siŋ nwə vʉ́ e ba nə yam nə vʉ̌

(Mt 20.17-19; Mk 10.32-34)

31Yeso lə ke pɔ shwɔppʉə mgham bəŋ e, gɔm bi pu gɑ: Po yu', pɑ si po'o bʉɔ m Yerusalɛm; guŋ mnwə awɛ yə mghɔm ghɔ̀m Si lə və nə Mu mo a, a pəmtə. 32Pu gɔ hɑ e bi pɑ tə pɑ pɑ Yudea, pu yəmtə e, dɑ e jɔgo', nthətə́ mti nə e. 33Piŋ cwɔ e, zhwə e, tə́ a nə pɑ tyɛ'dzʉ yɑtá e yam nə vʉ̌. 34Yeso lə ghɔm po'o la' pɑkhʉ pyə yu' kwa' pɑpuŋ. Mghɔm bɔ̌ pa' bɑ ǎ tʉmnyə, wap lə pɑwə jyə sɔmywə nə́.

Yeso yɛ mu' fʉ Yeriko

(Mt 20.29-34; Mk 10.46-52)

35Yeso lə nə kəm bəŋ Yeriko, mu' fʉ pɑ kəŋ məjyə bɑ e cwə, bɑwə do ywə. 36Fʉ bɔ lə yu' pa' pɔmnəŋ wə shyə a həŋtə ywə yə a bɑ ya a. 37Pu siŋ e gɑ: Yeso bɑwə shyə̌. 38E cwe tə thə́ gɑ: Yeso Mú David cɔmmtso mə̌. 39Pɔ pyə wap lə bɑ dzə́ e ɑ cɔktə e gɑ e lɛ́tə́; da' gɑ e piŋ shwé tə thə́ gɑ: Mu David cɔmmtso mə̌. 40Yeso tiŋnyə, gɔm gɑ pu lɑ e sɔ' bi e. E lə kəm bəŋ e, e həŋtə e gɑ: 41O shəŋ gɑ gə la m wu? E pa' bi e gɑ: Cyəpɔ gɑ jɔ tsʉ'. 42Yeso ghɔm bi é gɑ: Yɔ tsʉ'; piŋnthʉm o vɔk o. 43E lə wuŋ jɔ tsʉ', jap jʉm Yeso, giŋ gu'tə Si. Guŋ pɔ awɛ lə nə yɔ po'o, go'tə Si.

Currently Selected:

LUKASI 18: NTGomala

Highlight

Copy