LUKASI 9

Yeso tə́m pɑkhʉ pyə shwɔppʉə mgham

(Mt 10.5-15; Mk 6.7-13)

1Yeso lə cu'tə pɑkhʉ pyə́ shwɔppʉə mgham hɑ gʉ' ba tʉɔ bi pu nə́ nə jə́ŋ guŋ mzhwenyə cwəpuŋ awɛ ba nə nə jɛ mgho. 2E lə́ təm wap gɑ́ wap ghɔ shyanyə nwə Nəfo Si, bɑ jɛ mgho. 3Bǐŋ gɔ́m bi pu gɑ: Ka po nə ghɔ dɑ sɔmywə, kɑ pə̀ŋ, kɑ pʉ̀ə, kɑ ywətsʉ, kɑ ŋkhǎp lə, ka sɔmmo ghə dzə́ yɑpʉə. 4Po ko bǎ nə ya dyə lə, po cwə pɑ wə́ tə da' gɔ̌. 5Tisuŋ yə po ko nə la' pu lɑ wɔ a, po nə ghɔ dzɔp ca' nə mkwə mɔ, a pɑ yɔ nə kwinthɛ nə pú. 6Wap lə ghɔ, bɑ giŋ nthʉm mla', bɑ siŋ Cuŋ Pɑpuŋ, biŋ bɑ jɛ mgho.

Nwə̌ cyə́ Herode

(Mt 14.1-12; Mk 6.14-29)

7A lə pɑ̌ po'o, fo Herode yu' yə́ nwə yə á bɑwə shyə́ a nwə zhʉm é; nə pa' shɑ pɔ lə bɑwə gɔm gɑ́ Yohane yám nə vʉ̌. 8Shɑ pɔ pɑwə gɔm gɑ á bɑ Elia piŋ sɔ̌'. Shɑ pɔ ghɔm gɑ a bɑ mu' gɔm ghɔm Si piŋ jám nə vʉ̌. 9Herode ghɔm gɑ, a bɑ dě gə pu ya' thə Yohane pɑ kwa' myə̀. Mo yə gɑ̌ ju' pu pɑ gɔm yəŋ tiŋ nwə nə é a bɑ wɑ? E lə ghɔm po'o bɑ shə́ŋ jyə nə́ nə yɔ é.

Yeso kím vəŋ pɔ

(Mt 14.13-21; Mk 6.30-44; Yhn 6.1-14)

10Pɑkhʉ Yeso lə pɑnyə siŋ e guŋ ywə yə wap gə á awɛ. E lɑ wáp, pu a pú ghɔ m Betsaida tsʉ' tsiŋ. 11Pɔmnəŋ lə́ zhyə, jap jʉ̌m pu. Yeso lɑ wap, siŋ wap nwə nə Nəfo Si biŋ jɛ wap.

12Dzʉ lə to' nə pwa, Pɑkhʉ Yeso shwɔppʉə mgham sɔ' bəŋ e gɔm bi e gɑ. Tak pɔmnəŋ nə́ŋ wap ghɔ nthʉm gúŋ shəŋ ywətsʉ ba tsʉ' yə wap gɔ ti nə a, nə pa' tsɔ̌' si bɑ ghak tsʉ' a. 13Yeso ghɔm bi pu gɑ: Kwa' wɔ hɑ ywətsʉ bi pú. Wap ghɔm bi e gɑ: Pyə ghə da' msɛ mta' tɔ, ba bapgu duŋ pʉ̌ə, tə́ ně da' pa' bi a pɑ pyə ghɔ jo ywətsʉ nə dəŋ pɔ pɔŋ gɑ a. Pɔmnəŋ lə bɑ gwɛ a pɔ sha'tɔ. 14Yeso ghɔm bi pɑkhʉ pyə gɑ: Po ghə́ wap cwətə si pɔ mghǎmthɔ mghǎmthɔ. 15Wap lə ghə po'o, pɔmnəŋ cwətə si awɛ. 16Yeso lə kwi msɛ̌ mta' tɔ ba bapgu duŋ pʉə, bʉ' mnyə kɛbəŋ, nyəŋ byanyə nə́, bo'tə, hɑ bi pɑkhʉ pyə gɑ wap ghaptə bi pɔmnəŋ. 17Pɔmnəŋ lə pfɑ ywə tə jwyə; pu lak bo' tsə nə msap shwɔppʉə mgham.

Yeso bɑ́ Kristo

(Mt 16.13-19; Mk 8.27-29)

18Yeso pu a pɑkhʉ pyə lə pɑ̌ tsʉ' tsiŋ bɑ shwyɛ'nyə si, e həŋtə wáp gɑ: Pɔmnəŋ gɔm gɑ gɑ̌ bɑ wɑ́? 19Wap pa' gɑ: Shɑ pɔ gɔm gɑ o bɑ Yohane nu' pɔ shyə, shɑ pɑ́ gɔm gɑ́ o bɑ́ Elia. Pyə shɑ pɑ gɑ o bɑ mu' gɔm ghɔm Si bɑ e yám nə vʉ̌. 20Yeso həŋtə wap gɑ: Sɔ' m nə po, po gɔm gɑ gɑ̌ bɑ wɑ? Pɛtrɔ ghɔm gɑ: O bɑ Kristo Si.

Yeso siŋ vʉ tsyə́ ba nə yam nə vʉ̌

(Mt 16.20-28; Mk 8.30—9.1)

21Yeso co' bi pu gɑ wap kɑ siŋ sɔmmo. 22Biŋ gɔm gɑ: Mú mo gɔ yɔgo' tə', mghətso ba mtadyə mkamsi pu a pɑ zhyə mcò' wa' e, pu zhwə e, a pɑ batə tyɛ'dzʉ yɑtá e yám nə vʉ̌. 23E lə piŋ gɔm bi guŋ yap awɛ gɑ: Mo pɑ gɔ yap jʉ̌m m̀, e kəŋnyə thə nɑ e, biŋ ŋkwa yə bɛnyəpɛnyə nə jap jʉ̌m m̀ guŋ mtyɛ'dzʉ awɛ. 24Mo yə ě cəŋ nə vɔk vɔ́k é a gɔ pi, mo yə e pi vɔk e nə thə́ ǎ gɔ sɔ' vɔk. 25A po'o bi a pɑ mo nyəŋ guŋ dzʉ awɛ pʉə e tə bi vɔk, kɑ sa'tə vɔk e lə bɑ a gɔ kwitə e m kɑ? 26Mo yə ě kuso nə m̀ ba nə ghɔm tsɑ̌ a, bɑ Mu mo gɔ sɔ' kuso nə e nə cwə yə e gɔ sɔ' sɔ' nthʉm ghu'tə e, ba yə Tap e pu a pɑ aŋgəle dɔlɔ̌ a. 27Gɑ̌ siŋ wɔ kwa' nyənyɔ gɑ shɑ pɔ cəcɑ̌ pɔ pyə wap tsɔ' á, tə gɔ sɔ' pfʉ́ tə yɔ Nəfo Si pɑ.

Yeso sɑnyə

(Mt 17.1-8; Mk 9.2-8)

28A lə nə cyə tyɛ'dzʉ hɔ̌m pá' Yeso

gɔm mɔ mnwə a, e lɑ Pɛtrɔ, ba Yohane pu Yakop pu a pu

ghɔ dəm kuŋgo nə cwyɛ'nyə Si.

29Yeso lə pɑ shwyɛ'nyə Si, sə e sɑnyə̀, dzə e fɔk dəŋnyələŋnyə. 30Pu yɔ shɑ pɔ pɑpʉə pu a pu pɑ wə gɔmtə. A lə bɑ Mosɛ pu Elia. 31Bɑ wap ŋwak nthʉm ghu'tə̀. Wap lə bɑwə gɔm pa' cwə yə Yeso gɔ pɑnyə a si gɔ ku' Yerusalɛm a. 32Pɛtrɔ pu a mso pyə lə bɑwə gʉɔnyə lwɔk. Wap lə cwə tə jǎm, jɔ ghu'tə̀ Yeso ba pɔ pɑpʉə pyə pu a pu lə́ bɑ́wə gɔm a. 33Pɔ bɔ pu a Yeso lə nə hapnyə, Pɛtrɔ ghɔm bi e gɑ: Ta, a puŋ nə pɑ tsɔ'ɔ; pɑ zhɔk mpfɑ tsɔ'ɔ mɑntha: Yǔ, yə Mosɛ ba yə Elia. E lə gɔm po'o tə pɑwə jyə́ ywə yə e gɔm a. 34E lə pɑ gɔm po'o mlwa təm sam pɔ bɔ. Pɑkhʉ Yeso nə yɔ pa' mlwa sam wap a bwɔk te' ó. 35Wap yu' gi mo nthʉm mlwa ghɔm gɑ: Mo yəŋ gɑ bɑ Mú a, bɑ gɑ cwɔ' e. Po yu'nyə é. 36Wap lə nə yu' gi mo po'o, biŋ jɔ pɑ́ da' Yeso do é. Pɑkhʉ pyə lɛtə gɑ kǎm. Wap lə siŋ sɔmmo ywə yə wap jɔ́ a cwə o bɔ.

Yeso yɛ mu' mú nə zhwenyə cwəpuŋ

(Mt 17.14-18; Mk 9.14-27)

37Dzʉ lə́ lɔ, wap fi' dəm ŋkhuŋ gɔ̌. Pɔmnəŋ tə jɔm sɔ' dzə Yeso. 38Mu' mo cəcɑ̌ vəŋ pɔ ghɔm tə thə́ gɑ: Ta, səso ma' mnyə mǔ nə mú a yə̌ŋ. E bɑ pɑ duŋ e do é bəm. 39Mu' zhwenyə cwəpuŋ ŋkho nə é. E cwe, sɛtə́ mnyə, sə́ mkəkak, nə təm nə e a tʉɔ, nə təm bɑ e pwa. 40Gɑ̌ cwyɛ'nyə pɑkhʉ pǔ, gɑ wap zhəŋ zhwenyə bɔ, la' wap ghə jyə́. 41Yeso ghɔm gɑ: Gwya msɔk tʉ́m, pɑ tə́ ghə piŋnthʉm, pɔ cwəpuŋ. Pɑ gɔ piŋ cwə dəŋ pa' po pɑ dzá nə m̀? Lɑ mu o nə́ sɔ'. 42Mu lə pɑ sɔ', zhwenyə bɔ ma' e si. Shʉ'nyə e m bò. Yeso cɔk zhwenyə cwəpuŋ bɔ, jɛ mu bɔ, hɑ e bi tap e. 43Guŋ pɔ awɛ yɔ pa' gʉ' Si bɑ a tʉɔ a, a sya wap.

Yeso siŋ nə batə m cʉm bʉə gɑ e gɔ yɔgo'

(Mt 17.22-23; Mk 9.30-32)

Wap lə pɑ ŋwɛnyə nə guŋ tsə tsyə, Yeso lə gə a, e ghɔm bi pɑkhʉ pyə gɑ: 44Po cəŋtə ju' ywə yə gɑ gɔ ghɔm bi po a: Pu gɔ hɑ mu mo nə bu pɔmnəŋ.

45Da' gɑ la' pɑkhʉ pyə yu' ywə yə e bɑwə gɔm bi pu a, bɑ ǎ tʉmnyə nə zhyənwə yap. Wap piŋ bwɔk nə həŋtə e nwə nə́.

Wɑ̌ bɑ mo gwyə?

(Mt 18.1-5; Mk 9.33-37)

46Pɑkhʉ pyə lə pɑ̌ fəŋnyə cəcɑ̌ pu nə zhyə mo gwyə nə pú. 47Yeso zhyə́ ywə yə wap lə bɑwə ŋkwɛ a, ŋkhe mu' múywə mú jap e bəŋ e. 48Gɔm bi pú gɑ: Mo yə é lɑ tso tsɑ̌ nyəŋ múywə mú yəŋ dyə a, bɑ e nyəŋ pa' pɑ myə̀ dyə́. Mo yə e nyəŋ a dyə a, bɑ e nyəŋ mo yə e nthəm a dyə́; nə pa' mo yə e cəcɑ̌ po bɑ mo ŋkho' a nə bɑ mo gwyə́.

Mo tak tə pɑ gɛ bo o bɑ e bɑ só o

(Mk 9.38-40)

49Yohane ghɔm gɑ: Ta, pyə yɔ mu' mo e pɑwə dɑ́ tso tsú jəŋ mzhwenyə cwəpuŋ pyə cə́ŋ nə́ kɔ bi é, nə pa' tə pyə a pu nə bəmtə bɑ jʉm o pɑ. 50Tə́ Yeso ghɔm gɑ: Ka po kɔ bi e nə pa' mo yə e tə bɑ gɛ bo yɔ a pɑ bɑ so yɔ.

51Cwə yə Yeso lə bɑ gɔ təm nthʉ́m dzʉ́ lə ku' a, e yap gɑ e gɔ ghɔ Yerusalɛm. 52Nthəm mghɛ nthəm dzə e. Wap lə ghɔ tə ŋkho nthʉm mu' pfə la' nthʉm guŋ Samaria nə nyaptə tsʉ' bi Yeso. 53Pɑ tsʉ'u bɔ kəŋnyə nə lɑ wap, nə pa' wap lə bɑwə gɔ m Yerusalɛm a. 54Yakop pu Yohane lə yɔ po'o, gɔm gɑ: Cyəpɔ, o piŋ gɑ pyə ke mɔk, a fi' fɑ thə́ kɛbəŋ sɔ' si'nyə wap a? 55Yeso fɛ nɑ e de wap, shɔktə wap 56pu a pu ghɔ nə mu' guŋ dyɛ'.

Wa' guŋ ywə awɛ, yap jʉ̌m Yeso

(Mt 8.19-22)

57Wap lə pɑ mə́jyə, mu' mbɛ ghɔm bi Yeso gɑ: Gɑ gɔ yap jʉ̌m o, tə ko bǎ hɑ́ lə́ yə o ghɔ a. 58Yeso ghɔm bi e gɑ: Msə́sʉm bɑ wap ghə mghʉ̌m map, pǒmsəŋ to kɛbəŋ ghə mkɔ máp, tə́ Mú mo bɑ e ka ghə tsʉ' nə yap thə́ é nə́.

59Biŋ gɔm bí mu' mo gɑ: Yap jʉ̌m m̀. Mo bɔ ghɔm gɑ: Ta piŋ gɑ də́ŋdzə gɔ nthəŋ ta á, 60Yeso ghɔm bi e gɑ: Tak mpfə pɔ wap təŋ mpfə pɔ pap, sɔ' m nə o, ghɔ siŋ Nəfo Si.

61Mu' mo kwi' gɔm bi e gɑ: Ta gɑ gɔ yap jʉm o, da' gɑ piŋ bəm gɑ́ gɔ pyə a mfɑ pɑ̌ la'nyə. 62Yeso ghɔm bi e gɑ: Mo yə ě kyəp sú nə dzʉ'ne, dé jʉm a, ka ku'nyə nə́ Nəfo Si.

Currently Selected:

LUKASI 9: NTGomala

Highlight

Copy