MATIO 22

La'nwə lɔmdyə́

(Lk 14.15-24)

1Yeso lə piŋ ntho' nə́ lɑ ghɔm tə́ tútə̀ gɔmnwə bi pú gɑ: 2Nəfo kɛbəŋ bɑ pa' mu' fo lə da'nwə mu e yə mbɛ a. 3E lə̀ təm mghɛ fa' pyə gɑ wap ghɔ ŋkhe pɔ pyə e lə́ gho wap la'nwə bɔ a. Da' gɑ́ wap ko wap lə kuŋ nə sɔ'. 4E lə̀ piŋ nthəm shɑ mghɛ fa' gɑ wap ghɔm bi po pyə e lə́ gho wap a gɑ: Gɑ nyap tsə́ la'nwə, gɑ̌ wà mpɔp m na' ba mcɑ̌ nɔm, guŋ tsə awɛ pəmtə̀, po sɔ' nə la'nwə. 5Da' gɑ wap lə̀ nə sɛ sɔmywə; mu' mo lɑ m pě é, yə mu' mo lɑ m sim 6pyə shɑ pɔ ghəm mghɛ fa', dɑ wap jɔgo', jwətə wap. 7Fo lə̀ yɛluŋ, nthəm msəŋwì pyə wap zhwə̀ pɑ zhwə pɔ bɔ̌, biŋ ntho tisuŋ yap. 8Biŋ gɔm bi mghɛ fa' pyə́ gɑ: Tsə ghap ghʉɔ pəmtə, da' gɑ pɔ pyə dɑ ghó wap a lə́ bɑ wap ka ku'nyə. 9Po ghɔ mthə́ jyə̀, ŋkhe guŋ pɔ awɛ pyə po yɔ wap a nə̀ nə ghap ghʉɔ. 10Mghɛ fa' bɔ lə ghɔ mməjyə̀, shu'tə guŋ pɔ awɛ pyə wap yɔ wap a, pɔ cwəpuŋ ba pɔ pɑpuŋ tə̀ dyə ghap ghʉɔ lo pɔmnəŋ. 11Fo lə ko dyə cwəlɔ nə yɔ pɔ pyə wap sɔ' nə la'nwə; jɔ mu' mbɛ bɑ e ka kwadzə la'nwə nə é. 12Fo bɔ ghɔm bi e gɑ: So a, o shyə m gɑ kɑ tə́ ŋkho dyə ɔ tə́ dzə la'nwə nə o? Bɛ bɔ lə́ ŋa' shwə é. 13Fo ghɔm bi mghɛ fa' pyə gɑ: Po kwɑ bú myə́ pu a mkwə myə́, ma' e pé nthʉm jʉ́m, tsʉ' nə lɔ̀, biŋ mpfɑ msuŋ. 14Nə pa' a nyənyɔ gɑ́ á bɑ pú ke pɔ jɔmyɔm da' gɑ pɔ pyə pu ci wap a lə yɔm.

Nə ma' shwɔp bi Kasa

(Mk 12.13-17; Lk 20.20-26)

15A lə́ pɑ po'o, pɑ Farisai cu'tə sɛ pa' wap gɔ ghə tə Yeso ghɔmnwə wap nə gəm e nə yo' a. 16Wap lə́ təm pɑkhʉ pap pu a pɑ Herode gɑ́ wap ghɔ gɔm bi e gɑ: Ta, pyə zhyə́ gɑ o bɑ nyənyɔ, bɑ da'tə məjyə Si dəŋdəŋ tə́ pwɔk sɔmywə, nə pa' dəŋ mo tə́ hɛ́ o pɑ́. 17O yɔ yǔ gɑ́ kɑ̀? A bɑ pù piŋ kɑ ŋkhəŋnyə nə ma' shwɔp bi Kasa? 18Yeso lə̀ yɔ fʉ́ yap gɔm gɑ: Pɑ tsɛbǔ, nwə kɑ́ po ləŋtə a? 19Po la'tə a ŋkhap yə pu nə ma' shwɔp a. Wap lə́ la'tə bɛ ŋkhap. 20E ghɔm bi pu gɑ: Thə mò ba ywə bvəvə yə a nə́ a bɑ́ tsyə wɑ? 21Wap pa' gɑ: Tsyə Kasa: Yeso ghɔm bi pu gɑ: A pɑ́ pa' a po pa' ywə yə a yə́ Kasa a bi Kasa, ba' yə a yə Si a bi Si. 22Wap lə yu' tsɔ ghɔm, a cyə́ wap té', wap piŋ nthak Yeso cwəlɔ, gɔ̌.

Nwə nə̀ yam nə vʉ̌

(Mk 12.18-27; Lk 20.27-40)

23A lə́ pɑ́ tyɛ'dzʉ bɔ̌, pɑ Sadukai sɔ' bəŋ Yeso; pɑ Sadukai gɔm gɑ́ nə yam nə vʉ̌ tə̀ bɑwə pɑ́. Wap lə sɔ' bəŋ Yeso həŋtə e gɑ: 24Ta, Mosɛ gɔm gɑ: Mo pfʉ tə́ tsə mu, fɑ e sɔk pfɔk e, po' o gɑ e ghə yə gwya fɑ e bɔ. 25A po'o bɑ shɑ mfɑ lə́ pɑ̌ wə pyə pɔ sɔmbʉə. Shyədzə yap lə́ lɔmdyə̌, pfʉ tə́ tsə̀, nthak jwi e bi fɑ e; 26A pɑ́ pɑ́ po'o nə mo batə yɑpʉə ba batə yɑtá, tə́ gɔ ŋkhəm nə batə sɔmbʉə. 27Wap lə pfʉ awɛ, ba mjwǐ piŋ pfʉ yə́. 28A bɑ̀ po'o, a ghɔ sɔ' pɑ cwə yə pu yam nə vʉ̌ a, e pɑ jwi ya mo nə pù? Pa' wap nəŋ dɔm e guŋ yap awɛ a? 29E pa' bi pu gɑ: Po fʉmnyə, nə pa' po ka zhyə́ ŋwa'nyə Si ba gʉ' Si. 30Nə pa' cwə nə yam nə vʉ̌ pu lə ghə mjwǐ kɑ dhə lə. Pu bɑ́ pɑ́ pa' pɑ aŋgəle thə kɛbəŋ a. 31Biŋ sɔ' m nə́ nə́ yam nə vʉ̌, bɑ po ka ké ghɔm tsyə Si gɔm bi po a gɑ: 32Gɑ bɑ Si Abraham, Si Isak, ba Si Yakop a? E tə bɑ Si mpfə́ pɔ́ pɑ̀, e bɑ Si pɔmtʉɔ. 33Pɔmnəŋ lə́ nə̀ yu' po' o ywə yə Yeso lə bɑwə ji'tə wap a cəŋtə ŋkhonyə wap.

Mco' gwyə́

(Mk 12.28-34; Lk 10.25-28)

34Pɑ Farisai lə́ nə́ yu' gɑ́ Yeso cɑ shwə pɑ Sadukai, shu'tə. 35Mu' mo nə́ pú, bɑ́ jyə́ mco' ləŋtə Yeso həŋtə e gɑ: 36Ta, dəŋdzə mco' nə mco' bɑ ma mco'?

37Yeso ghɔm bi e gɑ: O gɔ pɑ́ kuŋ Cyəpɔ Si o nə guŋ tʉm tsǔ awɛ, nə guŋ lam tsǔ a awɛ, ba nə guŋ zhwenyə o awɛ. 38Mɔ̌ bɑ mco' gwyə, bɑ dəŋdzə. 39Shɑ́ batə mɑ́bʉ́ə bɑ a kwi' gə dəŋ pɑ́ gɑ: O gɔ pɑ́ kuŋ mo yə e bəŋ o a pá' thə nɑ o. 40Guŋ mco' awɛ pu guŋ ywə awɛ yə mghɔm ghɔm Si lə́ ghɔm a miŋ pɑ nə mco' mɔ mɑ́bʉ́ə.

Mu David pu Cyəpɔ e

(Mk 12.35-37; Lk 20.41-44)

41Pa' pɑ Farisai lə bɑ wap cu'tə a, Yeso lə həŋtə wap gɑ: 42Pó gɔm gɑ kɑ nə Mesia? E bɑ mu wɑ? Wap pa' bi e gɑ mu David. 43Yeso piŋ gɔm bi pu gɑ: Tə́ nwə kɑ a cyə m nə Zhwenyə, David ké e gɑ́ Cyəpɔ nə cwə yə e gɔm gɑ:

44Cyəpɔ ghɔm bi Cyəpɔ a gɑ:

cwə́ nə ghəŋ tʉɔ a

tə́ nyəŋ mghɛ bo pǔ

to mkwə o?

45A pɑ gɑ David ŋkhe Yeso gɑ Cyəpɔ e bɑ e biŋ bɑ́ mú é m gɑ́ kɑ̀? 46Sɔmmo la tə ku' nə pa' shwə ghɔm bi e, tə́ fɑ tyɛ' o bɔ sɔmmo lə kwi' həŋtə e nwə.

Currently Selected:

MATIO 22: NTGomala

Highlight

Copy