Awˬ hkuiˉ puiˍ ve li‸ 21
21
Iˉcaˆ paw la ve
1Gʼuiˬsha lehˬ Yawˇ ka ti‸ te taˍ peuˬ ve hkʼe, Saˍraˇ hta‸ awˬ bon na‸ piˇ ve yoˬ. 2Aˍbraˍhanˍ a sha‸ mawˇ la ve teˇ yanˇ, Saˍraˇ yaˇ hu leh yaˇ paˍ teˇ gʼaˇ paw la ve yoˬ. 3Aˍbraˍhanˍ yawˇ hta‸ Iˉcaˆ teh‸ meh piˇ ve yoˬ. 4Iˉcaˆ paw la peuˬ hkʼaw‸ nawˉ hiˉ nyi gaˬ ve teˇ yanˇ, Gʼuiˬsha kʼoˆ piˇ taˍ ve hkʼe Aˍbraˍhanˍ lehˬ yawˇ yaˇ paˍ hta‸ awˬ guiˬ meuˇ shoˍ piˇ ve yoˬ. 5Iˉcaˆ paw la htaˇ, Aˍbraˍhanˍ ve a sha‸ teˇ ha hkʼaw‸ gaˬ peuˬ ve yoˬ. 6Saˍraˇ kʼoˆ ve, Gʼuiˬsha lehˬ ngaˬ hta‸ ha lehˬ tuˬ leh gʼuiˬ yawˬ tuˬ pe‸ laˇ ve yoˬ. Awˬ lawn chi hta‸ hkʼa gʼa kaˇ ve chaw teˇ gʼaˇ le le ngaˬ geh teˇ geh gʼuiˬ tuˬ yoˬ. 7Teˇ nyi kʼo, ngaˬ yaˇ teˇ gʼaˇ paw la tuˬ yoˬ, teh‸ a shu teˇ gʼaˇ Aˍbraˍhanˍ hta‸ ca hto piˇ taˍ ve le. Ya‸ hkʼaˇ, yawˇ mawˇ la htaˇ ngaˬ lehˬ yawˇ awˬ pon yaˇ paˍ teˇ gʼaˇ paw la piˇ taˍ peuˬ, teh‸ kʼoˆ ve yoˬ.
8Yaˇ paˍ chi uiˍ la leh cuˉ hpaˆ ve awˬ yanˇ gaˬ la htaˇ, Aˍbraˍhanˍ lehˬ hti caˇ hti dawˬ ve pawehˇ lonˉ teˇ maˬ te ve yoˬ.
Haˍgaˍraˆ leh Iˉshaˍmeˍlaˆ hta‸ gʼa‸ kʼoˬ piˇ ve
9Teˇ nyi htaˇ, Eˇjiˇtu‸ chaw Haˍgaˍraˆ ve yaˇ paˍ Iˉshaˍmeˍlaˆ lehˬ, Saˍraˇ ve yaˇ paˍ Iˉcaˆ geh leˍ guiˇ chehˇ ve yoˬ. 10Oˇ hkʼe te chehˇ ve hta‸ Saˍraˇ gʼa mawˬ leh Aˍbraˍhanˍ hta‸ kʼoˆ piˇ ve, Awˬ ceˬ ma chi ve leh yaˇ paˍ oˇ ve hta‸ gʼa‸ kʼoˬ loˬ. Awˬ ceˬ ma chi ve yaˇ leh ngaˬ yaˇ paˍ Iˉcaˆ teˇ geh awˬ shinˉ pehˬ yuˬ ve hta‸ ngaˬ maˇ heuˆ gaˇ, teh‸ kʼoˆ piˇ ve yoˬ. 11Aˍbraˍhanˍ tawˇ chi hta‸ gʼa kaˇ ve teˇ yanˇ hpeh‸ bawˬ jaˇ ve yoˬ. Awˬ lawn kʼo, Iˉshaˍmeˍ laˆ htawˇ yawˇ ve yaˇ hpeh‸ ve pa taw yoˬ. 12Ya‸ hkʼaˇ, Gʼuiˬsha yawˇ hta‸ kʼoˆ piˇ ve, Nawˬ ve yaˇ paˍ leh nawˬ ve awˬ ceˬ ma oˇ ve hta‸ pa taw, nawˬ ve nyi ma hpeh‸ bawˬ ve taˇ cawˬ piˇ. Saˍraˇ kʼoˆ ve hkʼe te-o. Awˬ lawn kʼo, ngaˬ ka ti‸ te taˍ peuˬ ve hkʼe, nawˬ ve awˬ ceuˬ awˬ hkʼaˇ teˇ hpaˍ lehˬ Iˉcaˆ awˬ hkʼaw lo cawˬ la tuˬ yoˬ. 13Nawˬ ve awˬ ceˬ ma ve yaˇ paˍ hta‸ htawˇ ngaˬ chaw ceuˬ lonˉ teˇ ceuˬ hpeh‸ la piˇ tuˬ yoˬ. Awˬ lawn kʼo, yawˇ htawˇ nawˬ ve yaˇ hpeh‸ ve pa taw yoˬ, teh‸ kʼoˆ piˇ ve yoˬ.
14Oˇ htaˇ, Aˍbraˍhanˍ lehˬ mvuhˇ shawˉ teˇ na‸ tu leh caˇ tuˬ, iˉ kaˆ yuˬ leh Haˍgaˍraˆ hta‸ piˇ ve yoˬ. Peuˬ leh yawˇ ve yaˇ paˍ hta‸ htawˇ yawˇ hta‸ chiˇ a‸ piˇ leh tawˆ kʼai tcuh ve yoˬ. Hkʼe te leh, yaˇ miˇ chi lehˬ Beˍraˍsheˍbaˆ teh‸ kʼoˆ ve heh puiˉ hkʼaw lo ca te toˇ chehˇ taˍ ve yoˬ. 15Aˉ mo‸ kʼoˍ hkʼaw ve iˉ kaˆ peuˬ kʼai ve teˇ yanˇ, yawˇ lehˬ yaˇ paˍ hta‸ suhˆ buiˇ teˇ maˬ awˬ hawˉ lo teh taˉ leh, ngaˇ chi loˬ hkʼe vuiˇ ve chehˇ kuiˬ lo ca jo mui taˍ ve yoˬ. 16Oˇ htaˇ yawˇ lehˬ, Ngaˬ yaˇ suh-e ve hta‸ ngaˬ hkʼaˬ hkʼe te nyi hpeh‸ tuˬ le, teh‸ kʼoˆ leh gʼaˇ hte‸ kuˬ hawˬ ve yoˬ.
17Gʼuiˬsha lehˬ, yaˇ paˍ hawˬ chehˇ ve awˬ hkawˇ hta‸ gʼa kaˇ ve yoˬ. Mvuhˇ naw tcuh yaˇ teˇ gʼaˇ Haˍgaˍraˆ geh laˬ leh, Haˍgaˍraˆ-oˬ, nawˬ aˬ hto‸ ma te dawˇ haˍ ve le. Taˇ kawˆ. Awˬ lawn kʼo, nawˬ yaˇ paˍ hawˬ ve awˬ hkawˇ hta‸ Gʼuiˬsha gʼa kaˇ peuˬ. 18Tu leh yawˇ hta‸ nawˬ ve la‸ sheh hkʼaw chiˇ taˍ-o‸. Ngaˬ yawˇ hta‸ chaw ceuˬ lonˉ teˇ ceuˬ hpeh‸ la piˇ tuˬ yoˬ, teh‸ kʼoˆ piˇ ve yoˬ. 19Oˇ htaˇ, Gʼuiˬsha yawˇ ve mehˆ shiˍ hta‸ hpaw piˇ leh, nanˬ bawˍ teˇ maˬ hta‸ yawˇ gʼa mawˬ ve yoˬ. Yawˇ kʼai leh aˉ mo‸ kʼoˍ hkʼaw iˉ kaˆ nyiˉ keu peuˬ hkʼaw‸ nawˉ, yawˇ ve yaˇ paˍ hta‸ taw piˇ ve yoˬ. 20Gʼuiˬsha lehˬ yaˇ paˍ chi ve geh chehˇ taˍ ve yoˬ. Yawˇ uiˍ la leh, Paˍranˍ heh puiˉ hkʼaw lo chehˇ leh, cheuˬ jaˇ ve shaˍ bawˆ paˍ lonˉ hpeh‸ la ve yoˬ. 21Yawˇ ve awˬ e lehˬ, Eˇjiˇtu‸ mvuhˇmiˬ hkʼaw ve yaˇ miˇ teˇ gʼaˇ hta‸ ca shiˍ veu laˇ leh yawˇ hta‸ ka piˇ ve yoˬ.
Aˍbraˍhanˍ leh Aˍbiˆmaˍlehˆ shaˉ caˆ caˇ ve
22Awˬ yanˇ oˇ ve awˬ hkʼaw lo, Aˍbiˆmaˍlehˆ leh yawˇ ve ma‸ poˍ lonˉ Hpiˇkawˇ laˆ hui Aˍbraˍhanˍ geh kʼai leh, Nawˬ te ve kanˉ teˇ ceuˬ le le hkʼaw Gʼuiˬsha nawˬ geh chehˇ ve yoˬ. 23Chi hta‸ pa taw, nawˬ lehˬ ngaˬ hta‸ maˇ kʼoˆ, ngaˬ ve awˬ yaˇ awˬ duˬ leh ngaˬ ve awˬ ceuˬ awˬ hkʼaˇ teˇ hpaˍ hta‸ maˇ kʼoˆ, shaˉ caˆ maˇ luˬ tuˬ hkanˍ leh ka ti‸ te laˇ-oˆ. Chi hkʼoˆ ka‸, ngaˬ lehˬ nawˬ hta‸ shaˉ caˆ yeˬ chehˇ ve hkʼe, nawˬ htawˇ ngaˬ hta‸ leh, chi beu‸ nawˬ ca chehˇ la ve mvuhˇmiˬ chi hta‸ shaˉ caˆ yeˬ tuˬ yoˬ, teh‸ Gʼuiˬsha mehˆ gʼuˇ suhˍ ka ti‸ te laˇ-oˆ, teh‸ kʼoˆ piˇ ve yoˬ.
24Aˍbraˍhanˍ htawˇ, Ngaˬ ka ti‸ te ve yoˬ, teh‸ kʼoˆ piˇ ve yoˬ.
25Oˇ htaˇ, Aˍbraˍhanˍ lehˬ yawˇ hui ve nanˬ bawˍ teˇ maˬ Aˍbiˆmaˍlehˆ ve awˬ ceˬ teˇ hpaˍ hiˉ yuˬ kʼai ve awˬ lawn Aˍbiˆmaˍlehˆ hta‸ hto piˇ ve yoˬ. 26Aˍbiˆmaˍlehˆ lehˬ, A shu teˇ gʼaˇ chi hkʼe ca te taˍ ve hta‸ ngaˬ maˇ shiˍ. Nawˬ ka‸ ngaˬ hta‸ maˇ hto laˇ. Chi beu‸ nawˬ kʼoˆ laˇ htaˇ heh‸ ngaˬ gʼa shiˍ ve yoˬ, teh‸ yawˇ hta‸ kʼaw‸ kʼoˆ piˇ ve yoˬ. 27Aˍbraˍhanˍ lehˬ, yawˬ leh nuˇ teˇ hpaˍ Aˍbiˆmaˍlehˆ hta‸ piˇ leh, yawˇ huiˉ maˬ shaˉ caˆ caˇ ve yoˬ. 28Aˍbraˍhanˍ lehˬ, yawˬ ehˉ suhˍ hkeh hta‸ teˇ kaˬ lo leuˆ teh taˍ ve yoˬ. 29Oˇ htaˇ Aˍbiˆmaˍlehˆ lehˬ, Nawˬ aˬ hto‸ ma pa taw chi hkʼe te taˍ ve le, teh‸ yawˇ hta‸ na nyi htaˇ,
30Aˍbraˍhanˍ lehˬ, Nanˬbawˍ chi ve hta‸ ngaˬ duˇ taˍ ve shaˉ hkiˆ hpeh‸ tuˬ, yawˬ ehˉ chi ve suhˍ hkeh hta‸ nawˬ ha‸ yuˬ-o‸, teh‸ kʼoˆ piˇ ve yoˬ. 31Oˇ kaˬ lo yawˇ huiˉ maˬ chi hkʼe shaˉ caˆ caˇ ve pa taw, chehˇ kuiˬ oˇ ve hta‸ Beˍraˍsheˍbaˆ #21:31 Chi ve lehˬ, suhˍ hkeh ve Nanˬbawˍ, leh shaˉ caˆ Nanˬbawˍ teh‸ kʼoˆ gaˇ ve yoˬ. teh‸ meh piˇ ve yoˬ.
32Yawˇ huiˉ maˬ Beˍraˍsheˍbaˆ hkʼaw ka ti‸ te da‸ peuˬ hkʼaw‸ nawˉ, Aˍbiˆmaˍ lehˆ leh Hpiˇkawˇlaˆ hui Hpiˇliˇtiˆ mvuhˇmiˬ lo kʼaw‸ kʼo‸-e ve yoˬ. 33Aˍbraˍhanˍ htawˇ, oˇ kaˬ lo ma‸ kehˇ cehˬ teˇ cehˬ ti leh co co taiˍ taiˍ Gʼuiˬsha hta‸ oˉ kʼoˍ pui ve yoˬ. 34Oˇ ve hkʼaw‸ nawˉ, yawˇ lehˬ Hpiˇliˇtiˆ mvuhˇmiˬ hkʼaw maw chaweh chehˇ taˍ ve yoˬ.
Currently Selected:
Awˬ hkuiˉ puiˍ ve li‸ 21: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
