Mwanduso 4
4
Kaini na Abeli
1Kuya Adamu kawasa na Eva, mwehe wake, naye kakinda inda na kumweleka Kaini, kalonga, “IMNDEWA kanyapfila nyeleka mwana mmale.” 2Hambele keleka imwana yungi, kamkema Abeli. Abeli tsayang'ali mdimi, na Kaini tsayang'ali yolima. 3Hambele, Kaini kamlapfila nambiko ya matsawo ghake gha kumghunda, 4naye Abeli kamlapfila Imulungu nyama inoghile ye iwana wa mwanduso wa iwang'olo. IMNDEWA kanoghelesighwa na nambiko ya Abeli, 5lekeni ng'anoghelesighwe baye na Kaini wala nambiko yake. Apfo Kaini kona maya ghendo na chihanga chake ching'onang'ona. 6Kuya IMNDEWA kamlongela Kaini, “Ule kuna maya? Ule chihanga chako ching'onang'ona? 7Angu ungatenda ghanoghile, ng'utsotogholighwa baye? Lekeni kwaapfila kutenda ghehile, nzambi yamlibani mwako, yobama ikulongotse, lekeni kobamighwa uihume.”
8Kuya Kaini kamlongela Abeli ndughu yake, “Tuke kumghunda.” Hawang'ali mna mghunda, Kaini kamuhundukila, kamtowa Abeli ndughu yake, kamkoma.
9Kuya IMNDEWA kamghutsa Kaini, “Alikwani ndughu yako Abeli?”
Kaini kedika, “Simanyile baye. Apfi nene na mwimilitsi wake?” 10Kuya IMNDEWA kamghutsa, “Utendile choni? Tegheletsa! Idamu ya ndughu yako yondilila kulawa mna lidongo. 11Lelo ghweghwe kulanighwa na ng'utsolima mna lidongo linoghile ilighubule mlomo wake kubokela idamu ya ndughu yako yumkomile. 12Haulima lidongo ng'alitsokwelekela baye ghamatsawo. Kutsakwangakwanga na ng'utsakuwa na hanu ha kukala baye muisi.”
13Kaini kamlongela Imtwatsa, “Anzabu ino ndito ng'ani sidaha baye kuidudumila. 14Leloli kuniwinga kulawa mna lidongo linoghile na nitsokala kutali naghwe, nitsakwangakwanga na nitsakuwa nahela hanu ho kukala muisi, na imunu wowose iyatsombona katsonikoma.”
15Lekeni IMNDEWA kamwidika, “Bae, imunu iyatsokukoma ghweghwe, katsodununzighwa mala saba kubita ghweghwe.” Kuya IMNDEWA kamwika chitango Kaini, imunu ang'amwona aleke kumkoma. 16Apfo Kaini koka hambele he Imulungu, kaghenda kukala mna isi ya Nodi ubali wa kumoso wa Edeni.
Lukolo lwa Kaini
17Kaini kawasa ne mwehe wake, naye mwehe wake kakinda inda kamweleka Enoki. Kuya Kaini kandusa kutsenga ghumji, na kaghukema ghumji agho Enoki, taghwa lya imwanaghe. 18Enoki kamweleka Iradi, naye Iradi kamweleka Mehuyaeli, Mehuyaeli kamweleka Metushaeli, naye Metushaeli kamweleka Lameki. 19Lameki tsakakwela iwapinga weli, yumwe tsakakemighwa Ada, na yungi tsakakemighwa Sila. 20Ada kamweleka Yabali, Yabali iyakalile mtsehe we iwanu wala iwofugha iwanyama na kukala mna pfibumbulika. 21Ndughu yake tsakakala Yabali, iyakalile aba wa wose iwotowa pfilimba na pfimbeta. 22Sila kamweleka Tubalikaini, iyakalile mhunzi wa shaba na chuma. Lumbu wake Tubalikaini tsakakala Naama.
23Lameki kawalongela wehe tsake,
“Ada na Sila, mnitegheletse,
mwemwe wehe wa Lameki ulikeni mbuli tsangu.
Nene tsanimkoma imunu kwaapfila kandagha,
tsanimkoma msongolo kwa kundagha.
24Kaini ang'alihighwa mala saba,
kuya Lameki katsolihighwa mala sabini na saba.”
Seti na Enoshi
25Adamu kawasa keli na mwehe wake Eva, naye keleka imwana mmale, kamkema Seti, kalonga, “Imulungu kangaya mwana yungi hanu ha Abeli, kwaapfila Kaini tsakamkoma.” 26Seti keleka imwana, tsakamkema Enoshi. Kulawa baho iwanu wanza kulilomba taghwa lya Imtwatsa.
Currently Selected:
Mwanduso 4: LBV
Highlight
Share
Copy
Want to have your highlights saved across all your devices? Sign up or sign in
