Maliki 1

Yohane Mbatitsa kowapetela iwanu

(Matei 3:1-12; Luka 3:1-18; Yohane 1:19-28)

1Haino Imbuli Inoghile ya Yesu Kiristu, Imwana we Imulungu.

2Yakwandusa ka pfayandikighwe mne chitabu cha nabii Isaya.

“Imulungu kalonga, ‘Nitsomtuma imtumighwa wangu yakulongole,

ayo katsoyandaa inzila yako.’

3Litsi lye imunu lyokema kunyika,

‘Muyandae inzila ye Imtwatsa,

muigholose inzila yake.’ ”

4Yohane tsakalawila kunyika, kowapetela iwanu na kowabatitsa. Kawalongela iwanu, “Mtsileke nzambi tsenu namwe mbatitsighwe, na Imulungu katsowaleghusila nzambi tsenu.” 5Iwanu wengi walawa mne isi ya Yudeya na mne ghumji ghwa Yerusalemu waghenda kumuhulikitsa Yohane. Watsitoghola nzambi tsawo, naye kawabatitsa mne ghumto Yoridani.

6Yohane tsakapfala lighwanda ilitendighwe kwa ngotsi ya ingamiya, na ghumsipi ghwe ngotsi mchuno, na chijo chake chayang'ali yakuja tsachikala iwanzighe na uki. 7Kawalongela iwanu, “Kuchughu kwangu kakutsa yane ingupfu kubita nene. Nene sibamighwa bae hata kwinama na kudohola mitsabi ye imikwabatsa yake. 8Nene nowabatitsa mwemwe kwa ghamatsi, lekeni ayo katsowabatitseni kwa Ghumuhe ghwe Imulungu.”

Kubatitsighwa na kughetsighwa kwa Yesu

(Matei 3:13-4:11; Luka 3:21-22; 4:1-13)

9Ghamatsuwa agho, Yesu tsakatsa kulawa ghumji ghwa Natsareti, mne isi ya Galilaya, kabatitsighwa na Yohane mne ghumto Yoridani. 10Yesu hayang'ali yolawa mne ghamatsi, tsakona ililanga lopfughuka na Ghumuhe Mwenzeluka komhulumkila ka injiwa. 11Kuya Iitsi lilawa kulanga, “Ghweghwe kwa imwanangu yanikunoghele, ninoghelighwa naghwe.”

12Bahala Ghumuhe Mwenzeluka kamlongotsa yaghende kunyika, 13kuya kakala ako ghamatsuwa arubaini koghetsighwa na Setani. Iwanyama wa kwibagho nawo tsawabahala, na iwamalaika wamtumikila.

Yesu kowakema iwanang'ina wa mwanduso

(Matei 4:12-22; Luka 4:14-15; 5:1-11)

14Yohane hekighwe mchifungo, Yesu kaghenda Galilaya kuwapetela iwanu Imbuli Inoghile ye Imulungu. 15Kalonga, “Ichipindi chitsa, Undewa we Imulungu wa habehi. Mtsileke nzambi tsenu muitoghole Imbuli Inoghile.”

16Yesu hayang'ali yoghenda mmbalimbali mwe tsimbu Galilaya, kawona iwalowa wasomba weli, Simoni na Andereya, ndughu yake. Tsawang'ali wolowa iwasomba. 17Yesu kawalongela, “Mniwinze, nani nitsowatenda mwemwe muwe iwalowa iwanu.” 18Bahala watsileka nyapfu tsawo, wamuwinza.

19Kaghenda hatali chidogho, kawona Jakobu na Yohane, iwana wa Sebedayo, wamne mnumbwi ghwawo, wotenda ghoya nyapfu tsawo. 20Bahala Yesu hayawonile, kawakema. Nawo wamleka Sebedayo, aba wawo mne mnumbwi hamwe ne iwatenda isang'ano, wamuwinza.

Yesu komlapfa imunu chinyamkela

(Luka 4:31-37)

21Yesu ne iwanang'ina wake wapfika mne ghumji ghwa Kaperinaumu. Litsuwa lya Sabato, #1.21 Litsuwa lya Sabato Mana yake litsuwa lyalaghitse Imulungu iwanu wabwihile. Yesu kengila mne ing'anda ye ukulombela, kandusa kulangulitsa. 22Iwanu iwamhulikitse wakangawala kwa ghamalangulitso ghake, kwaapfila yeye ng'alangulitse bae ka iwolangulitsa Ghamalaghitso gha Musa, ila kalangulitsa ka imunu yane ukulu.

23Bahala imunu yane ichinyamkela kengila mne ing'anda ye ukulombela kakemelela kwa litsi likulu, 24“Ubama kutenda choni, Yesu wa Natsareti? Kutsa kutukoma? Nokumanya ghweghwe kwa Mwenzeluka we Imulungu!”

25Yesu kamkembela ichinyamkela, “Nyamale! Umlawe imunu yuno!”

26Ichinyamkela ayo tsakamhighitsa kwe ingupfu imunu ayo, kuya kakemelela, kamlawa. 27Apfo iwanu wose wakangawala ghendo, weghutsa, “Apfino pfinu pfachi? Agha malangulitso gha sambi? Imunu yuno kana uwetso wa kulapfa ipfinyamkela, nawo womtegheletsa.”

28Apfo mbuli tsa Yesu tsenela himahima mne isi yose ya Galilaya.

Yesu kowahonetsa iwanu wengi

(Matei 8:14-17; Luka 4:38-41)

29Yesu ne iwanang'ina wake, hamwe na Jakobu na Yohane walawa mne ing'anda ye ukulombela waghenda ukaye kwa Simoni na Andereya. 30Mai mkwe wa Simoni tsakakala kawasa mlusatsi koghula lihoma. Yesu hayapfikile, wamlongela mbuli tse ipinga ayo. 31Kamghendela, kamkinda ghumoko kamwinula. Utamu umlawa, kandusa kuwatumikila.

32Mihe haipfikile na litsua kuswa, iwanu wamghalila Yesu iwatamu wose ne iwanu wane ipfinyamkela. 33Iwanu wose wa ghumji wetingana hachibwalu he ing'anda. 34Yesu kawahonetsa iwanu wane matamu ghoghose na kalapfa ipfinyamkela wengi. Ng'aweng'ile bae ipfinyamkela nyafwasi ye ukulonga chochose kwaapfila tsawammanya yeye nani.

Yesu kowapetela iwanu mne isi ya Galilaya

(Luka 4:42-44)

35Lupfilipfili, litsua ng'ana lilawe, Yesu kenuka, kalawa aho hakaye, kaghenda kunze kwe ghumji, hanu halihela imunu, kamlomba Imulungu. 36Simoni na weyaghe waghenda kumbama. 37Hawamwonile, wamlongela, “Iwanu wose wokubama ghweghwe.”

38Yesu kawedika, “Twobamighwa tughende kune ipfijiji pfingi ipfili habehi. Amo nobamighwa niwapetele iwanu Imbuli Inoghile, kwaapfila acho chicho chanitsilile.”

39Apfo Yesu kanga isi yose ya Galilaya, aku kowapetela iwanu mne tsing'anda tsawo tse ukulombela na kulapfa ipfinyamkela.

Yesu komuhonetsa imunu iyoghula ukoma

(Matei 8:1-4; Luka 5:12-16)

40Imunu yumwe iyoghula ukoma tsakamghendela Yesu. Kamtowela ghamaghoti kamlomba, kalonga, “Ung'abama, kwodaha kunideghetesa.” #1.40 Kunideghesa Ukoma tsaukala utamu iumghoma imunu kumlomba Imulungu, kwaapfila imunu yane utamu awo tsakakala keha.

41Yesu kamwonela libatsi imunu ayo, kagholosa ghumoko ghwake, kamkinda. Kuya kalonga, “Nobama, degheta!” 42Bahala utamu umlawa, kahona.

43Bahala Yesu kamleka yoke aku komkomangitsa ghendo, kamlongela, 44“Uleke kumlongela imunu wowose imbuli ino, ila ughende wikelanguse kwe mtambika, ulapfe nambiko ka pfayalaghitse Musa. Kuya yakulanguse kwe iwanu ka kuhona.”

45Lekeni imunu ayo koka, kandusa kwenetsa mbuli atso chila hanu, mbaka Yesu ng'adahile bae kughenda mwatsimwatsi mne ghumji. Ila kakala kunze hanu halihela imunu. Lekeni iwanu tsawang'ali womghendela kulawa chila hanu.

Currently Selected:

Maliki 1: LBV

Highlight

Copy