LUUKA 13
13
Mo gi Rijuwa Du Is mo walla Mony’ce’d Sho’k mo
1’Kwanin tiya ’kon ki mo c̱aan mo uni kun ṯorki a’di gwo mo gom ’Kwani gi Pany Jaliil kun ’kosh ma Bilaaṯus abas buni e mo nyaḵki tom buni kun ’ciṯẖa/ uni ’kus mo mmomiiya basa ’cesh mo. 2Dhali a’di ki thoḵ uni gwo mo ki: A/um kulumki gwo ibwa ki ’Kwani gi Pany Jaliil gwansan ta imanmii miinthus kun shi/ashi/ mo mmobola ris ’Kwani gi Pany Jaliila tiya e mo ’taa? haali/ uni ’koshkunu ki isa nyor kan mo? 3Aha/ ṯora um gwo mo ki: Yisa. Hili isi ciki/ um mini rica du is mo ki umi ’baar mo minu ’koki ’ce’d sho’k wakan mo be. 4Walla uni gwansan kun ’koni ’kume’d i’ce’dka pekwara mo uni gun biṯkina gu’ba turga/ ap̱o/ mo e Pan Siluwaam mo dhali ’kosh uni jwa mo tani a/um kulumki gwo ibwa mo ki uni ta imandhiŋ gwo kun shi/ashi/ mo mmobola ris unin tiya kun ’kon e Pa Urushaliim e mo ’taa? 5Aha/ ṯora um gwo mo ki: Yisa, hili isi ciki/ um mini rica du is mo ki umi ’baar mo minu ’koki ’ce’d sho’k wakan mo be.
Gwom ’Bi’th/e gom Cwampu/ mo
6Dhali a’di ki ṯor gwo gi gwom ’bi’th/e yan gom uni mo ki: Wathi/ jin ta’d gi cwamp̱u/ jin sikina a’di e bwaagoŋ piti mo dhali a’di p̱u’dki’d mo mmoŋap̱ maman ’peni a’di mo tani dhali a’di diki gam jan ’deŋ kamu/ mo be. 7Dhali a’di ki owa manhil cwalman gwo mo ki: Hili mo mo ma. Yil ’koni kwara shwane/ jin yayika/ mo mmoŋap̱ maman ’pena pu/ yan mo tani dhali aha/ dinaki gam jan ’de/ mo. Jep̱i a’di ka ’cesh mo ma. Atinta mina a’di bu’th mony’cesh yan kan mo? 8Dhali a’di ki thoḵ a’di gwo mo ki: Dhalki a’di di’d mo ma, tap̱a, yil yansan si’da/ ntagi aha/ mina c̱wany a’di ka ’kawur is mo dhali wol guren to/eya po/ mo. 9Dhali waḵki/ a’di midi dho’th maman ki yil jiŋ ’ko’d mo, ’boro’d be. Hili waḵki/ a’di diki dho’th maman mo tani /e mini mish a’di jep̱ ka ’cesh mo be.
A’bom jin Ta Ŋwol jin Wac̱kunu ka Cim ma Pesu/ mo
10Dhali a’di diki’d mo mmoṯor gwo mo e gu’b gi montul isa kamu/ ka cim ma pesu/ mo. 11Dhala ’boma kamu/ diki’d jin ta’d ga rum thus jin ’batha a’di mo mmo/aṯẖ mom’bi’th mo ki yili ’kume’d i’ce’dka pekwara mo. Ayim di’d ki goŋgo/ mo dhali a’di mol is piti ’de’k ki ’bore/ mo. 12Dhali ka Yesus p̱arki’da yim e mo tani a’di yuḵki’da yim mo dhali owa yim gwo mo ki: A’boma, /e din ki ’kus mo ’peni ’ba’th pini mo be. 13Dhali a’di ki dhu me’d piti ap̱owa yim mo dhali ki jahanne/ ayim ’ka’dkina is mo dhala yim ’borki’da Arumgimis bwa i is mo be. 14Hili tap̱a gi gu’b gi montul is mo a’di shwaki’da nyor ka nyor mo haala Yesus wac̱ki’da wac̱ ka cim ma pesu/ mo be. A’di ki o ’kwani gwo mo ki: Acim ’koni pe’de/ jin minu ḵa mii thima ṯu’c mo be. Iiyu/ ka cim gwansan mo ma ki um minu wac̱ mo, yisa ka cim ma pesu/ mo. 15Yan’ko’d Tap̱a ki thoḵ a’di gwo mo ki: Um ’kwani kun tana he’k e ka he’k e mo. ’Kona um ka ’deṯe/ ’deṯe/ ka cim ma pesu/ ki ’cuḵ morbip̱ bum mo walla thuluny bum ’peni gu’b buni mmosus uni mmop̱i yi’de/ mo ’taa? 16Dhala ’bom yansan mo jin ta ’bwa/ ma Ibrahiim mo a’di jin deḵkin ma Seṯaan ki yili ’kume’d i’ce’dka pekwara mo tani a’di ḵa ba/ mminu mii diki ’cuḵ mo ’peni mondeḵ yan ka cim ma pesu/ mo? 17Me’d jin okina a’di gwo gwansan mo tani aris uni kun ta ’kup̱ ki a’di mo tani dhukunu ki mon’the is mo dhala ris ’kwani ’baar mo ’kunykina bwa mo goma ris mii gi monyca kun miikina a’di mo be.
Gwom ’Bi’th/e gom Emen To jin Miinuwa ’Tash mo
18Dhali wakan a’di ki o gwo mo ki: Bampa/ ma Arumgimis wana e katinta mo sa/? Dhali aha/ mina kar a’di ka p̱ar ’ban katinta mo? 19A’di wana e ki emen to jin miinuwa ’tash jin ḵala wathi/ mo dhali si e monsinum piti mo. Dhali a’di caki’d mo dhali a’di warki’d ki cwa mo dhali ’dii kun p̱en e mis mo tani nyaŋki gu’b buni eya bim piti mo be.
Gwom ’Bi’th/e goma Cumaṯ mo
20Dhali doḵ/e a’di ki o gwo mo ki: Aha/ mina kar Bampa/ ma Arumgimis ka p̱ar ’ban kata mo sa/? 21A’di wana e ka cumaṯ jin ḵal ma ’bom mo mmo’thoḵ mo mmoce e ka dip̱any ka uc̱aŋ bwamani kwara mo ntagi a’di seki’d mo be.
Acampur jin Nyutha ’Twaman ki Nyu’th mo
22A’di yaki’d mo e bway piti mo e bampa/ mo dhali e pa ’baar mo mmoṯor gwo mo dhali a’di ki ya mo ’kup̱ ki Pa Urushaliim mo. 23Dhali wathin ’deŋ kamu/ o a’di gwo mo ki: Tap̱a, mina uni gwansan kun woṯẖkunu mo ’ko i daḵa/ kan mo ’taa? Dhali a’di ki o uni gwo mo ki: 24Uṯẖi/ mo ma mmocic̱ mo eya campur jin nyuthanyu’th mo haali/ ’kwani ṯorkika/ um gwo mo ki: Uni tana ris mo kun mini simm mo e mmocic̱ mo tani dhali uni mini mol se mo be. 25Ki eŋ kamu/ ka mancila gu’b, ki a’di midi cu mis mo dhali mutha campur mo tani um mini ṯel mii ’pen mo mmodosha pije/ mo dhali nagkana campura p̱o/ ki me’d mo mmo/o gwo mo ki: Tap̱a, ḵa’dki am gu’b mo ma. A’di midi thoḵ um gwo mo ki: Aha/ mola mo jin iiyina um ’peni cine/ mo be. 26Dhali yan’ko’d um mini ṯel mii ’pen mo mmo/o gwo mo ki: Aman shwana to mo dhali p̱i to mo e buŋ’kus pini mo dhali /e ṯorki aman gwo mo e bway bam mo. 27Hili a’di midi o gwo mo ki: Aha/ ṯora um gwo mo ki: Aha/ dinaki mish mo mo jin iiyina um ’peni cine/ mo be. Iiku/ um mo ’peni aha/ mo aris umi ’baar mo kun miiki mii kun ’coḵa’coḵ mo. 28Dhali yan’ko’d um mini ko mo dhali ’pe’d shem bum mo ki um mini p̱ara Ibrahiim e mo dhala Is/hak mo dhala Yakuub mo dhali aris imanc̱i gwo ma Arumgimis kadhamo/ mo e Bampa/ ma Arumgimis mo dhali um ki is bum minu ṯa’k ka pije/ mo be. 29Dhali ’kwani mini p̱u’du/ mo ’peni mom’pesho’k mo dhali ’pena bor ma luŋgu’b mo dhali ’peni moŋ’ko’d gwar ma bim poros mo dhali ’peni moŋ’ko’d gwar ma biny cam mo dhali uni mini ’ko mo atharabeesa gi Bampa/ ma Arumgimis mo be. 30Dhali hili mo mo ma, unin tiya kun ’koni ’ko’d mo tani minu dhu iṯwa/a/ mo dhali unin tiya kun ’koni ṯwa/a/ mo tani minu dhu i’ko’d mo be.
Yesus Gwoki’d Ap̱o/ Pa Urushaliim mo
31Dhali e mo c̱aan gana/ mo tani ’Kwanim P̱arisiyiina tiya p̱u’dkin mo dhali o a’di gwo mo ki: Yayi mo ’peni mahan mo haala Hirodus ŋap̱ /e mmo’kosh jwa mo be.
32Dhali a’di ki o uni gwo mo ki: Iiku/ um mo ma dhali ṯora maḵ c̱aan gwo mo ki: Hili mo mo ma. Aha/ urkina ruma ’cesh ka pije/ mo dhali mii mowac̱ shwane/ mo dhali ka’thamo/ si’da/ mo, dhali ka cim kwara mo tani aha/ mina ’baar bway pem mmothim a’di mo be. 33Bahili aha/ mina mii ya e bway pem shwane/ mo dhali ka’thamo/ dhali ka tee jin midi baṯẖi ’ko’d mo haali/ a’di dinuki mish mii mo ka manc̱i gwo ma Arumgimis kadhamo/ mo minu ’koki ’taki ’ce’d sho’k ka pije/ mo ’peni Pa Urushaliim mo be. 34Ayy Urushaliim, Urushaliim, um kun ’koshki imanc̱i gwo ma Arumgimis kadhamo/ jwa mo dhali ’kosh uni gwansan ki wosh mo uni gun hashkunu mo e um mo. Me’d wana risa jin oka/ bwayi mmotul uc̱im bum is mo mmonṯal ’de/ mo me’d kumana ŋwa jin wup̱i ushan piti ka bi mo dhali um ushkin mo be. 35Hili mo mo ma. Gu’b bum dhalkunu um ’pen ki ma’du/ mo be. Dhali aha/ ṯora um gwo mo ki um mini ’koki p̱ar aha/ e mo ntagi um mini o gwo mo ki: Mom’bor mii ki a’di jin p̱u’dki’d ki gway gi Tap̱a mo be.
Currently Selected:
LUUKA 13: Udk
Highlight
Share
Copy
Want to have your highlights saved across all your devices? Sign up or sign in
©Society for International Ministries, 2013
