LUUKA 14
14
Yesus Wac̱ki Wathi/ jin ’Kosha ’Batha Wasa/ I/is mo
1Dhali ka cim ma pesun ’deŋ kamu/ mo tani ki a’di yaki’d mo mmoshwa to mo e gu’b gi tap̱aŋ kamu/ mo ’peni ’Kwani P̱arisiyiin mo tani uni timki a’di mo be. 2Dhali hili mo mo ma, wathiŋ kamu/ doshki’da bor a’di mo a’di jin ta’d gi ’batha wasa/ e is piti mo. 3Dhala Yesus ki o imanmisha jo’d gwoŋḵan gwo mo dhali ’Kwani P̱arisiyiin gwo mo ki: A’di ta mii gi gwoŋḵan mo ’taa? mmowac̱a wac̱ ka cim ma pesu/ mo? walla minu dhalku/ mo? 4Hili uni ’kon ki shwam mo. Yan’ko’d a’di ki sus a’di mo dhali wac̱ a’di mo dhali mmodhal a’di mmoya mo be. 5Dhali a’di ki o uni gwo mo ki: Wathi/ jana ’peni bwam um ta’d gi thuluny mo walla morbip̱ kun ṯa’kkin mo e bwany jis mo, mina a’di diki ya ki jahanne/ mo mmodir uni ka pije/ mo ka cim ma pesu/ mo ’taa? 6Dhali uni mol thoḵ gwo yansan mo be.
Gwo gom Yilkina/ dhali Com Gu’b mo
7Dhali a’di ki ṯor uni gwo mo ki gwom ’bi’th/e mo gom uni gwansan kun yuḵkunu mo ki a’di nyiṯẖki uni mo mmokwanykina uni moŋ’kom ’borga/ mo mmo/o gwo mo ki: 8Ki /e yuḵkunu mo, ma e momiimash ka tul ’kup̱ mo tani dhalku/ ki c̱a’ba ’cesh e mom’borga/ mo, hili isi ciki/ wathi/ jin eḵki’d ki /e mo yuḵkina a’di mo be, 9dhali a’di jin yuḵki /e mo gara/ midi p̱u’du/ mo dhali o /e gwo mo ki: C̱iyi mo yansan ki wathi/ yansan mo ma dhali yan’ko’d /e mini ṯel mii ’pen mo mmo’the is mo mmobu’th mo jin gwa’dagwa’d mo be. 10Hili ki /e yuḵkunu mo tani yaku/ mo dhali c̱a’b e mo jin gwa’dagwa’d wakan mo, ki a’dim bum jin c̱iki’da yuḵ mo midi p̱u’du/ mo tani dhali a’di midi o /e gwo mo ki: Amugum pema, shoru/ mo ma, mmoc̱a’bi mompoḵo’d yaase mo. Yan’ko’d /e minu taḵ mo e buŋ’kus uni ’baar mo kun ’kona tharabeesa nyaḵki /e mo be. 11Haali/ aris ’kwani ’baar mo ka ’deṯe/ ’deṯe/ kun dhu is buni ki ca mo tani minu dhu ki gwa’d mo, dhali a’di jin kar is piti ki gwa’d mo tani a’di minu kar ki ca mo be.
12Dhali a’di si’da/ o gwo mo e wathi/ jin yuḵki a’di mo ki: Ki /e ki c̱iya yuḵ jin yuḵu mo gom tonṯe/ mo walla dhan tonṯe/ jin shwanu mo tani dhalku/ ki yuḵ imugum pini mo walla ikam pini mo walla ibas pini mo walla imannyaḵ ’kom pini kun ta pa ki pa mo hili isi ciki/ uni si’da/ mini yuḵ /e mo mmodoḵ mii mo dhali /e minu raḵ mii yani bway mo be. 13Hili waḵki/ /e mini c̱iya yuḵ jin yuḵu mo tani yuḵi ’kwani kun hatha’ko’d mo ma, dhali uni gun ḵutha is guŋkuru/ mo dhali uni kun ta ŋwol mo dhali uni gun tana ja’da/ mo be 14dhali /e minu ’bor mii mo haali/ uni mini mol /e to raḵi bway mo be. Hili /e minu raḵ to ibway mo ki mompinu ki uni kun ta kuŋ ḵar/e mo be.
Gwom ’Bi’th/e gom Dhan Tonṯe/ jin Shwanu mo
15Ki jan ṯal ’deŋ kamu/ ’peni uni gwansan kun ’kokina tharabeesa nyaḵki a’di mo ciḵki gwo yansan mo tani a’di o a’di gwo mo ki: Mom’bor mii gom a’di jin midi shwa tonṯe/ e Bampa/ ma Arumgimis mo be. 16Hili a’di ki o a’di gwo mo ki: Wathi/ ki eŋ kamu/ c̱iki’da yuḵ mo gom dhan tonṯe/ jin shwanu mo tani a’di yuḵki ’kwani ka ris mo be. 17Dhali ka tee p̱u’dki’d mo gom tonṯe/ mo tani a’di hashki c̱iŋkinam piti mo mmo/o uni gwansan gwo mo uni kun yuḵkunu mo ki: Iiyu/ mo ma, haali/ aris to ’baar mo thosonkunu mo be. 18Hili uni ’baar mo ṯelki mii ’pen mo mmoc̱i gwo ’ko’d mo be. Wathi/ jin ṯwa/a/ a’di oki a’di gwo mo ki: Aha/ daḵa yola bunto mo dhali aha/ mina mii ya mo mmop̱ar a’di e mo. Aha/ doṯkina /e mo ki aha/ minu dhalku/ mo be. 19Dhali jaŋ kamu/ o gwo mo ki: Aha/ yolkina morbip̱i ’kume’d mo kun rep̱u/ ’ba/ ki dhaŋḵa’b to ka susu/ susu/ mo dhali aha/ mina mii ya mo mmopal uni mo. Aha/ doṯkina /e mo ki aha/ minu dhalku/ mo be. 20Dhali jaŋ kamu/ o a’di gwo mo ki: Aha/ daḵa mashkina a’bom mo dhali gom gwo gi wakan mo tani aha/ mina molku/ yaku/ mo be. 21Wakan c̱iŋkina/ a’di p̱u’dki’d mo dhali ṯor gwo yansan ki tap̱am piti mo dhali com gu’b a’di shwa’da nyor kagahara mo dhali o c̱iŋkinam piti gwo mo ki: Yaku/ ka pije/ ki jahanne/ mo ma, e bwaya beega/ mo dhali bway tura nyu’thga/ mo gi ’peŋkuman bampa/ mo dhali susi uni gun hatha’ko’d mo dhali uni gun ḵutha is guŋkuru/ mo dhali uni gun tana ja’da/ mo dhali uni kun ta ŋwol mo. 22Dhali yan’ko’d c̱iŋkina/ ki o gwo mo ki: Tap̱a, gwo gi ḵankina /e aḵan mo tani miikunu mo be dhali embul di’d naskina/ mo. 23Dhali tap̱a ki o c̱iŋkina/ gwo mo ki: Yayi e bway tur ka pije/ mo kun ’kon is’ko’d mo dhali e bwaagoŋ mo dhali malasi ’kwani ki gwo mo mmo/iiyu/ mo, ki gu’b pem minu ’tu’d mo be. 24Haali/ aha/ ṯora um gwo mo ki jan ṯal ’deŋ kamu/ ’peni ’kwani gwansan kun yuḵkunu mo tani uni mini ’koki nyoḵ tonṯem pem mo be.
Mii jin Minu Mii Deŋ E Mmota Amanciḵa Yesus Gwo mo
25Dhali adhana waambuhany ’kwani nyaḵki ii ki a’di mo dhali a’di ki ṯuka bor mo dhali o uni gwo mo ki: 26Waḵki/ wathiŋ kamu/ midi yayu/ i aha/ mo dhali diki shi/ ababam pitiŋ gana/ i e mo dhali kum mo dhali ash mo dhali uc̱i mo dhali ikam mo dhali i’bwaham mo, nye, dhali mondiki/em pitiŋ gana/ si’da/ mo tani a’di mol ta amanciḵ gwom pem mo be. 27A’diyin jin diki ḵal cwany’ciṯẖan dhul pitiŋ gana/ mo dhali baṯẖ aha/ isho’k mo tani a’di mol ta amanciḵ gwom pem mo be.
28Haali/ wathi/ jana ’peni bwam um jin ona bwa ki nyaŋ gu’ba turga/ mo mina a’di diki di nṯwa/a/ mo mmodeŋ to e jin midi mii ’baar a’di mo ’taa? waḵki/ a’di ta’d gi to jin ’kosh jwa mo mmothim a’di mo. 29Hili isi ciki/ waḵki/ a’di midi kar mo jin ḵa’bu mo tani dhali a’di mol a’di thim mo tani aris uni ’baar mo kun mishi a’di mo tani mini ṯel mii ’pen mo mmomii a’di ka maḵ mo be 30mmo/o gwo mo ki: Wathi/ yan ti ṯelki mii ’pen mo mmonyaŋ gu’b mo tani dhali mol a’di ’ka ’kup mo be. 31Walla maliḵ si’da/ jin yaki’d mo mmogam ’kup ka maliḵa kamu/ mo mmo/as mo tani mina a’di diki di iṯwa/a/ mo mmo’cunycur mii mo waḵki/ a’di mish ta ga askar ka alaap̱i ’kume’d mo mmogam a’di ’kup mo a’di jin yayi’d mo ap̱o/ a’di nyaḵka askar alip̱i iss ’kwanimpa ’de/ mo ’taa? 32Dhali waḵki/ a’di diki wakan mo tani ka maliḵa kamu/ dina sho’k mmosi’du/ mbway mo tani a’di ki hash amanya mo dhali doṯ gwo mo gom moŋḵu’th is mo be. 33Gom gwo gi wakan mo tani a’diyin ’peni um mo jin diki dhal tom piti ’peni ’baar mo jin tana a’di mo tani a’di mol ta amanciḵ gwom pem mo be.
A’doŋkoro/ jin Thap̱athap̱ mo
34A’doŋgoro/ a’di ’bora’bor mo hili waḵki/ a’di ki this mom’bala’th piti e mo tani a’di midi mish mom’bala’th piti ta kata ka nyaŋ’ko’d mo? 35A’di diki ha me’d mo goma ’cesh mo walla goma duhal guren to/e mo. ’Kwani mini biṯ a’di ka pije/ mo. A’di jin ta gi bwany’ce mo mmociḵ gwo mo tani dhalki a’di ciḵ gwo mo ma.
Currently Selected:
LUUKA 14: Udk
Highlight
Share
Copy
Want to have your highlights saved across all your devices? Sign up or sign in
©Society for International Ministries, 2013
