MARKUS 10
10
Yesus Ṯorki Gwo gom Mo jin Dhaluwa Dhal ’Pen mo
1Dhali a’di dhalki mo yan ’pen mo dhali yaki’d mo e Bampa/ gi Pa Yahuudiyya mo dhali e bwamp̱o/ Yi’deŋ Ḵumma/ Uurdun mo, dhala dhana buhany wathimpa thulki is i a’di mo doḵ/e. Dhali doḵ/e me’d miim piti jin miina a’di isa yempa/ mo tani a’di ki ṯor uni gwo mo be.
2Dhali ’Kwani P̱arisiyiin p̱u’dkin mo mmoŋap̱ bway mo mmopal a’di ki gwondoṯ mo mmo/o gwo mo ki: A’di ta gwoŋḵan jin dhala’da dhal bway mo ’taa? gom wathi/ mmothoson gwo jin dhaluwa dhal ’pen mo mmodhal ash ’pen mo? 3A’di ki thoḵ uni gwo mo ki: Gwo gi wakatinta iḵankin ma Musa um mo? 4Uni thoḵki a’di gwo mo ki: AMusa a’di dhalki wathi/ bway mo mmo’kwara warka/ jin dhaluwa dhal ’pen mo dhali kara yim ’pen ka pije/ mo be. 5Hila Yesus ki o uni gwo mo ki: Haali/ goma dum bum kun ’bitha’bi’th kan mo tani a’di ’kwarki um gwoŋḵan gi wakansan mo be. 6Hili ’peni ka muŋ’kup̱ jin uḵu to mo tani Arumgimis ki uḵ wathiŋ gwaṯẖ mo dhali wathim ’bomi mo be. 7Gom ’kup̱ gwo gi wakan mo tani a’di imina wathi/ idhal com ’pen mo dhali kum mo dhali gam is ki ashim piti mo be. 8Dhali uni su/ mina buŋgwar isi ṯal ’de/ mo be. Wakan uni doḵ/e yisa i’koni su/ doḵ/e yisa, hili uni ṯala buŋgwar isa ’de/ mo be. 9Gom mii gi wakan mo tani uni gun gam ma Arumgimis isi monṯal ’de/ mo tani dhalku/ ki dhal wathiŋ kamu/ bway mo mmoḵwa/ uni bwa mo.
10Dhali e bwaŋ gu’b mo tani imanciḵ a’di gwo doṯki a’di gwo mo gom gwo yansan doḵ/e mo. 11Dhali a’di ki o uni gwo mo ki: A’diyin jin midi dhal ashim piti ’pen mo dhali mash jaŋ kamu/ mo tani a’di miiki miinyc̱al ap̱owa yim mo be. 12Dhali waḵka yim si’da/ dhala’da kaṯẖim piti ’pen mo dhali mashi jaŋ kamu/ mo tani ayim si’da/ miiki miinyc̱al mo be.
Yesus ’Borki Ushi Uc̱iŋ Gwa’dga/ Mii mo
13Dhali uni ’kokin mo mmosusi uc̱i i a’di mo ki a’di midi ’taki ta uni is ki me’d mo. Dhali imanciḵ a’di gwo ḵucurki uni ki gwo mo be. 14Hili ka Yesus mishki mii yan mo tani a’di deḵkin ma nyor mo dhali o uni gwo mo ki: Dhalki uc̱i iiyini aha/ mo ma. Dhalki uni ki non mo. Haali/ ku gi wakansan mo tani uni ’kokin mo e Bampa/ ma Arumgimis mo be. 15Ka jiŋ gana/ aha/ ṯora um gwo mo ki a’diyin jin midi diki bu’th Bampa/ ma Arumgimis mo mmowa e ka ’ci yan mo tani a’di midi diki se a’di mo be. 16Dhali a’di ki sus uni mo mmodhu ’ko’da bim piti mo dhali a’di ki ’bor uni mii mo mmokarkina a’di me’d piti ap̱o/ uni mo be.
Wathin Dhuru’c jin Ta Pa ki Pa mo
17Dhali mmomurkina a’di mmoya mo e bway piti mo tani wathin ṯal ’deŋ kamu/ guski’d mo dhali c̱a’bki jiŋ ’kup̱a’dup̱uni bwambori a’di mo dhali o a’di gwo mo ki: Amanṯor Gwo jin ’boro’d mo, ki aha/ mina mii miiya taye mmogam mal gi mondiki/e ki sule/ ya ye ’ba/ mo? 18Dhala Yesus ki thoḵ a’di gwo mo ki: Atinta yuḵa /e aha/ ki jin ’boro’d mo? Jan ṯal ’deŋ kamu/ yisa di’da jin ’boro’d mo, hili jasa Arumgimis a’di ’de/ mo be. 19/E mishki gwoŋḵan kun ’kwarkunu mo ’taa? kun o gwo mo ki: Dhalka ’kosh ki mii ’kosh mo, dhali, Dhalki c̱al ki mii mii mo, dhali, Dhalku/ to ki mii ḵwal mo. dhali, Dhalki gwon thus ki mii aḵ wathiŋ kamu/ i is mo, dhali, Dhalki to ki mii dil mo, dhali, Taḵi cim dhali kwan mo? 20A’di ki thoḵ a’di gwo mo ki: Amanṯor Gwowa, aris to gwansani ’baar mo miikika/ mo ki aha/ tana dhuru’c mo be. 21Dhala Yesus ki hil a’di ki e mo dhali en a’di mo dhali o a’di gwo mo ki: Ton ṯal ’de/ aṯẖa /e mo be. Yaku/ mo dhali yol aris tom pini ’baar mo kun tana /e mo dhali c̱iki uni ki ’kwani kun hatha’ko’d mo, dhali /e mini ta gi to kun mini ish ḵumma/ mo e momis mo, dhali yayu/ mo ma, mmobaṯẖ aha/ nsho’k mo. 22Gom gwo jin onu a’di kan mo tani a’di ki biṯ a’di bwa ka luŋgu’b mo dhali a’di ki ya bway pa mo ki bwa jin diṯadiṯ mo, haali/ a’di ta’d gi dhan to kun eḵa ’pen ki eḵ mo be.
23Dhala Yesus ki hil mo mo dhali ’kar mo ki e mo dhali o imanciḵ a’di gwo gwo mo ki: Mii wa’di diṯa/ gom uni gwansan kun ta pa ki pa mo mmocic̱ Bampa/ ma Arumgimis mo be. 24Dhali imanciḵ a’di gwo merkin gom gwom piti yansan mo be. Hila Yesus ki o uni gwo mo doḵ/e ki: Uc̱iya, a’di wana mii diṯa/ gom uni gun gamki gwo is gom pam buni kun tana uni mo mmocic̱ Bampa/ ma Arumgimis mo. 25A’di ’disha mii ki ’dish gom kalman mo mmoya ki solol e jis ma ’dip̱ira/ mo mmodhal wathimpa e i is mo, a’di jin ta pa ki pa mo mmocic̱ Bampa/ ma Arumgimis mo be. 26Dhali uni ’kokin mo mmomer mo ka daran duŋ gana/ mo dhali o gwo ka rem ’kup̱ mo ki: Ba waḵki/ wakan mo tani ija a’di iminu iwoṯẖ moyi? 27Yesus ki hil uni mo dhali o uni gwo mo ki: Ki ’kwani mo tani a’di molu mii mo, hili ka Arumgimis mo tani aris to ’baar mo mishu mii ka Arumgimis mo be. 28Hila Buṯerus ṯelki mii ’pen mo mmo/o a’di gwo mo ki: Hili, aman dhalkina aris to ’peni ’baar mo dhali baṯẖ /e nsho’k mo be. 29Yesus ki o uni gwo mo ki: Ka jiŋ gana/ aha/ ona um gwo mo ki: wathiŋ kamu/ yisa di’da jin dhalki gu’b piti ’pen mo walla ikam piti mo walla i’bwah piti mo walla kum mo walla com mo walla uc̱i mo walla mo mo gom gway pem mo dhali gom gway gi gwom ’borga/ mo tani 30a’di jin midi diki bu’th to ki me’d iss ’kwanimpa ka mudhe’d mo shwane/ mo ki mo yansan mo, gu’b mina a’di gam mo dhali ikam piti mo dhali i’bwaham piti mo dhali ikum mo dhali uc̱i mo dhali mo mo nyaḵki to kun mini ṯo’c a’di ’kus mo, dhali ki she yil yan jin midi p̱u’du/ mo tani a’di midi gam mondiki/e ki sule/ sule/ ya ye ’ba/ mo be. 31Hili aris uni gun ’koni ṯwa/a/ mo tani uni minu dhu ŋ’ko’d mo dhali uni gun ’koni ’ko’d mo tani uni minu dhu iṯwa/a/ mo be.
AYesus Ṯorki Wum Piti Me’di Kwara Iṯwa/a/ mo
32Dhali uni ’kokin mo mmo/ii i bway mo mmo/ii ka gagamis mo e Pa Urushaliim mo dhala Yesus yaki’di shu uni bway mo. Dhali uni ’kokin mo mmomer mo dhali uni gwansan kun baṯẖki a’di nsho’k mo tani ḵo/ki is mo. Dhali a’di ki sus uni gun ’koni ’kume’d i’ce’dka su/ mo doḵ/e dhali a’di ki ṯel mii ’pen mo dhali ṯor uni gwo mo gom to gun minu mii a’di mo be, 33mmo/o gwo mo ki: Hili mo mo ma, ana iina ka gagamis mo e Pa Urushaliim mo, dhali Ya/ gi ’Kwani minu c̱i mo e igasiis kun can mo dhali iman’kwar to mo, dhali uni mini waḵ a’di mo mmo’kosh a’di jwa mo, dhali a’di minu c̱iki ’kwani kun ’koki ta ’Kwani Yahuuda/ ime’d mo be. 34Dhali uni mini mii a’di ka maḵ mo dhali ’taḵ a’di manya/ i is mo dhali dor a’di mo dhali ’kosh a’di jwa mo. Dhali ’ko’da cim kwara mo tani a’di midi piyu/ ka pije/ mo be.
Gwondoṯ ma Yakuub mo dhala Yohaan mo
35Dhala Yakuub dhala Yohaan uni gun ta iya/ ma Sabadi mo tani p̱u’dkin kadhoŋ ’kup̱ ki a’di mo dhali o a’di gwo mo ki: Amanṯor Gwo, aman ona bwa ki /e mini dhal aman bway mo gom to jin mina amani doṯ ’peni /e mo be. 36Dhala Yesus ki o uni gwo mo ki: Atinta o um bwa mo jin miga/ mii gom um mo? 37Dhali uni ki thoḵ a’di gwo mo ki: Dhas am bway mo ma mmo’ko mo. Jan ’de/ midi c̱a’b /e ki me’da bim poros pini mo dhali jan ’de/ midi c̱a’b /e ki me’da biny cam pini mo e monycam pini mo be. 38Hila Yesus ki o uni gwo mo ki: Um ’koki mish to jin doṯa um mo. A/um mini p̱iya ḵubbaaya jin p̱ikika/ mo walla a/um minu cuc̱ mo ki mii jin miinuwa mii ki yi’de/ mo jin miikunu aha/ mo? 39Dhali uni ki thoḵ a’di gwo mo ki: Aman mina mish mii mo be. Dhala Yesus ki o uni gwo mo ki: Aḵubbaaya jin p̱ika/ mo tani mina umi p̱i mo dhali mo jin miinu aha/ amii ki yi’de/ mo tani a’di imiinu mii um si’da/ mo be. 40Hili mmo’ko aha/ ki me’da bim poros pem mo walla ki me’da biny cam pem mo tani a’di diki ta miim pem mo mmodhas um bway mo, hili a’di gom uni gwansan kun thosonkunu uni mo be. 41Dhali ki uni gun ’koni ’kume’d ciḵki gwo yansan mo tani uni ṯelki mii ’pen mo mmodeḵa nyor mo goma Yakuub mo dhala Yohaan mo be. 42Dhala Yesus ki yuḵ uni mo i a’di mo dhali o uni gwo mo ki: Um mishki gwo mo gom uni gwansan kun o ki ta tap̱a ap̱o/ ’kwani kun ’koki ta ’Kwani Yahuuda/ mo tani uni mii miin tap̱a ap̱o/ uni mo dhali ’kwanim buni gun eḵa/ eḵ kun ta gi moshirr mo ap̱o/ uni mo be. 43Hili mii yansan minu ’koki mii wakan ap̱o/ um mo. Hili a’diyin jin midi eḵa/ eḵ mo e bwam um mo tani a’di midi mii ta a’di jin midi mii um to mo be. 44Haali/ a’diyin jin midi mii ta jin ṯwa/a/ mbwaman um mo tani a’di midi mii ta c̱iŋkina/ gom umi ’baar mo be. 45Haali/ Ya/ gi ’Kwani si’da/ p̱u’dki’d mo yisa ki a’di minu mii to mo, hili ki a’di midi mii ’kwani to mo dhali c̱i mondiki/em piti mo mmota Amanwan ’Kwani ’Ba/ ka ris mo be.
Barṯimawuus jin Ta Wathiny Ja’da/ Bu’thki Momish Mo mo
46Dhali uni p̱u’dkin mo e Pa Ariiha mo. Dhali ki a’di di’d mmodhal Pa Ariiha ’pen mo nyaḵki imanciḵ a’di gwo mo tani adhana waambuhany wathimpa caaca kagahara mo. Dhali wathiny ja’daŋ kamu/ diki’d jin yuḵkunu gway ka Barṯimawuus mo jin ta’da man’tho to mo, a’di jin ta ya/ ma Ṯimawuus mo, a’di c̱a’bki’d mo e shemen bway isa yempa/ mo. 47Dhali ki a’di ciḵki gwo goma Yesus ki Pa Naasira mo tani a’di ṯelki mii ’pen mo mmocuu gwo ki dhan ’twa/ jin caaca mo dhali o gwo mo ki: Yesus, jin ta Ya/ ma Dawuu’d. Miiyi mii ap̱o/ aha/ mo ma. 48Dhali ’kwani ka ris ḵucurki a’di ki gwo mo mmoṯor a’di gwo mo mmoc̱a’b ki shwam mo. Hili a’di cuuki’d kagahara ki nyanye/ ki nyanye/ mo ki: Ya/ ma Dawuu’d. Miiyi mii ap̱o/ aha/ mo ma. 49Dhala Yesus doshki’d mo dhali o gwo mo ki: Yuḵi a’di mo ma. Dhali uni ki yuḵi wathiny ja’da/ mo dhali o a’di gwo mo ki: Budhi adu mo ma. Cuyi mis mo. A’di yuḵki /e mo be. 50Dhali a’di biṯki burrinye/ ma p̱om piti a’cesh mo dhali a’di ki p̱e imis mo dhali ya aYesus mo. 51Dhala Yesus ki o a’di gwo mo ki: Ata o /e bwa jin miga/ mii gom /e mo. Dhali wathiny ja’da/ ki o a’di gwo mo ki: Tap̱a, dhalki aha/ butha momish mom pem mo ma. 52Dhala Yesus ki o a’di gwo mo ki: Yaku/ i bway pini mo. Moŋgam gwo is pini a’di woṯẖki /e mo. Dhali ki jahanne/ a’di ki bu’th momish mo mo dhali baṯẖ a’di nsho’k ibway mo be.
Currently Selected:
MARKUS 10: Udk
Highlight
Share
Copy
Want to have your highlights saved across all your devices? Sign up or sign in
©Society for International Ministries, 2013
