PEMUYAN 4
4
Peterus ngan Yaya nyeripa Mpun diaʹ Lataʹ
1Dalau Peterus ngan Yaya pisiu ngan dulu kina, idi kenai palai detaʹu ngan pengebioʹ diaʹ ban jagaʹ Umaʹ Palan Allah ina, pemung ngan kelunan Seduki, nai palaʹ ida dua. 2Sakit kaʹ saheʹ de moʹ peterus de dua penco katuk me lepoʹ ina neng puyan Yesus ban numpak mudip cen patai, ngan badaʹ kelunan matai ke numpak mudip laʹa. 3Sulo re mapo ida dua kina, penco nyepin ida dua pabeʹ neng kenempam me, moʹ dalau ketai tahup. 4Un sepuʹo kadoʹ ne dulu iaʹ lepa kenahan tiraʹ ina ngan ngelan ne. Toʹ kadoʹ laki dina kihoʹ kihoʹ lema ibu usa diaʹ ngelan.
5Neng kenempam me, mung tuʹa lepoʹ Yahudi, ngan diaʹ lataʹ de, ngan diaʹ guru Katuk Adet, sulo re pempun ne kaʹ Yerusalim. 6Un pe Hanas, Pengebioʹ Detaʹu kina, ngan Kayapas, ngan Yaya, ngan Alik-sandar, pemung ngan mung diaʹ pemanak Pengebioʹ Detaʹu ina. 7Kun nte cuk ida dua lawa Injil dina nekejeng neng beluaʹ ida. Kun nte lemutu ida dua. Un dau re: “Kumpin ncem uyan pemuyan ini tupe? Penyukat inu, ngan ngadan aheʹ iaʹ ikem dini kanan tupe?”
8Peterus iaʹ sangan kuʹun Berua Buheʹ ina mipa ida, un dau ue: “Ahaʹ pui, amai, ngan mung ngkem diaʹ tuʹa tuʹa le, 9buk ke tau ini ikem kenesek ameʹ dini neng iaʹ ameʹ ban uyan tiga neng laki iaʹ apet ini, ngan lemutu ameʹ cen mpi laki ini ban tai maget, 10tiga hem mung tisen kidi. Tekep ketoʹ lepoʹ Israil tai tisen, ban laki iaʹ nai nekejeng kata ikem ini, lepa maget lan ne ia kuʹun penyukat dalem Yesus Keristus, lepoʹ Nasarit, iaʹ ikem ban lematai neng kayu tecek idai, ngan Allah iaʹ ban pudip ia cen patai ie. 11Ban neng Yesus ne lete Kitap Tuhan le badaʹ pekini dau:
‘Sukaʹ iaʹ tukang amin ban sau are,
ia iaʹ ban tai nuyan sukaʹ tekedeng penyalet amin.’
12Abeʹ un ca kelunan kentaʹ langit ne iaʹ senteng pudip ilu, bang Yesus le, iaʹ Allah ban mencai me kelunan, moʹ dalem Yesus un iaʹ ke pudip ilu.”
13Tai salam diseʹ diaʹ lataʹ diaʹ pempun kina, uban tempa ne dau Peterus ngan Yaya, moʹ de tisen ida dua pengalai kelunan tuaʹ le, abeʹ de sekula. Ina le tai re tisen ida dua iaʹ malai ban kejahi ngan Yesus cen kena. 14Abeʹ ne ida diaʹ lataʹ mencam kenyakat ne laʹa, moʹ ida taʹan laki iaʹ lepa maget idai pemung nekejeng ngan Peterus de dua Yaya kina. 15Ina ukoʹ de cuk ida telu tai kawang cen Mpun diaʹ Lataʹ kina. Sulo diaʹ lataʹ dina pisiu neng ata re tengen le, 16kun nte: “Kumpin ne pemuyan le keneng ida dua taʹin? Mung lepoʹ Yerusalim tisen sebelang nge ca tedanaʹ nyingan iaʹ luhaʹ ini, uban lepa ne ida uyan ne. Abeʹ le senteng ngebawaʹ a laʹa. 17Un ʹo apan puyan ina are tai pigai kaʹ coʹneng ahang dulu, tiga le mulen ida pisiu neng ngadan Yesus palaʹ dulu laʹa.”
18Kun nte mengin ida dua nai kedalem laʹa, sulo dau re neng ida ayen peletoʹ ke pisiu buk are pekatuk neng ngadan Yesus ina laʹa.
19Un sepuʹo dau Peterus ngan Yaya mipa ida kuma: “Ikem tengen ten pekimet ading. Iaʹ mpi iaʹ teneng neng Allah baʹan ncem: tekep meʹ bayaʹ dau hem tupe, buk are bayaʹ dau Allah pe? 20Moʹ un meʹ dini, abeʹ meʹ senteng are ke badaʹ a inu iaʹ ameʹ lepa taʹan, ngan iaʹ ameʹ lepa kenahan ina.” 21Pali kuʹo ke Mpun diaʹ Lataʹ dina mulen ida dua laʹa, penco re pawang ida dua tai uleʹ. Abeʹ un penading ukoʹ de senteng ke nyakit ida dua, moʹ mung dulu pempau Allah kuʹun puyan iaʹ lepa ban nuyan ina. 22Moʹ un kelunan iaʹ maget kuʹun nyingan ina are, lepa pat puloʹ uman udip pe.
Cenganak le diaʹ ngelan lemameʹ nyat tempa
23Lepa ne Peterus ngan Yaya nai mecin cen ina, tai re uleʹ palaʹ diaʹ cenganak de dalem Tuhan. Sulo re badaʹ a mida mung ban puyan dau isiu diaʹ detaʹu lataʹ dina, ngan dau diaʹ lataʹ lepoʹ. 24Tegoʹ cenganak de dalem Tuhan dina kenahan dau ina, penco re pemung lemameʹ palaʹ Allah ngan ca le penawai re: “Ahaʹ Tuhan, ikoʹ lete iaʹ uyan langit, ngan tanaʹ, ngan banget, ngan mung iaʹ un dalem mo. 25Ikoʹ iaʹ lepa badaʹ cen Berua Buheʹ man dau isiu tepun meʹ Daut iaʹ ulaʹ koʹ, tegoʹ o pekini dau:
‘Moʹ inu adeʹ lepoʹ tahaʹ awang ke miʹa?
Inu adeʹ dulu peseket pekimet neng puyan iaʹ are un tuman tuman tupe?
26Diaʹ laja kusun tanaʹ kuaʹ nai beteʹ,
pemung ngan diaʹ paren lepoʹ.
Moʹ de ubaʹ ke nyudup Tuhan Allah, ngan Keristus iaʹ ia naʹ milu.’
27Moʹ iaʹ lan ne Tuhan, kedalem lepoʹ ini, Herudis, ngan Puntius Pilatus, pemung ngan lepoʹ Israil, ngan lepoʹ diaʹ ca, lepa kelimpun nai nyudup Yesus, ulaʹ koʹ iaʹ buheʹ, iaʹ ikoʹ atek uyan Laki iaʹ ngkang pungu udip. 28Ina ukoʹ de kelimpun pekina Tuhan, moʹ de bayaʹ iaʹ ikoʹ nekena nyalet dalem penawai hoʹ, iaʹ ban nuyan kuʹun penyukat ngan pengubaʹ koʹ are. 29Naʹkini Tuhan, diseʹ de ngeretaʹ ameʹ. Tiga hoʹ naʹ tempa mameʹ diaʹ ulaʹ koʹ ne, idi meʹ senteng penco tiraʹ koʹ ʹo. 30Ngayang ujoʹ koʹ iaʹ senteng ke paget kelunan, ngan ke uyan tedanaʹ bulen ngan puyan nyingan man ngadan Yesus, ulaʹ koʹ iaʹ buheʹ.”
31Lepa re lemameʹ, un amin iaʹ ukoʹ de pempun tai tekicuk. Mung nte sangan kuʹun Berua Buheʹ pa re senteng penco tiraʹ Allah ngan iaʹ tempa dau.
Ida pebulung mung inu re
32Un nte diaʹ lepa ngelan Tuhan dina, mudip ngan ca le penawai ngan ca le kimet de. Abeʹ un ca mida iaʹ kuma un inu ue iaʹ atek anun ne tengen. Mung inu re anun nte mung. 33Man pemuyan penyukat iaʹ bioʹ, lawa Injil dina badaʹ ban Tuhan Yesus numpak mudip cen patai ie. Allah pe mubeʹ sio neng ida mung. 34Abeʹ un aheʹ iaʹ tepa neng inu inu laʹa, moʹ ida diaʹ un tanaʹ ngan un amin, ida pebeli mung ne dina. Un ban beli ie ida naʹ me diaʹ lawa Injil dina. 35Kun nte petulat ligit neng ahang ida singket singket usa re dina, bayaʹ neng seʹ penepa singket usa re.
36Un Yusup ne, diaʹ lawa Injil naʹ ipa ngadan ne Barnabas, iaʹ sen ngadan ina “Laki Nyelaho,” ca diaʹ mela Liwi ie, ban cen tanaʹ Siperus te. 37Un ca tanaʹ kelimeng nge. Kun ne pebeli ie, penco ngkin ligit ina ngan naʹ a me diaʹ lawa Injil dina.
Currently Selected:
PEMUYAN 4: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
