YAYA 13

Yesus muheʹ taket diaʹ bayaʹ katuk ke

1Abeʹ ne tau iaʹ kena Adet Bunut Paska, lepa tisen ne Yesus uban ini ne jakaʹ iaʹ neng penekep pe ke mecin usun tanaʹ ini ngan tai palaʹ Amai Bioʹ. Lepa ne Yesus usun tanaʹ ini ngan tai palaʹ Amai Bioʹ. Lepa ne Yesus lemuto malaʹ neng ida diaʹ anun ne kusun tanaʹ ini, ngan sengarem tekaʹ kimet te malaʹ neng ida.

2Yesus pemung uman ngan diaʹ bayaʹ katuk ke. Lepa ne Bali Sitan metep kimet te neng Yudas, anak Simun Iskariut, ke cuk ia mencai Yesus me diaʹ bunoʹ o. 3Lepa tisen ne Yesus ban Amai Bioʹ lepa naʹ mung penyukat mia, ngan tisen pe Yesus ia nai cen Allah ngan ketai palaʹ Allah lete laʹa. 4Ina ukoʹ Yesus beteʹ cen bijaʹ, ngan mesau sapai ie tahaʹ awang, penco mahat ca sedung kaʹ aking nge. 5Kun Yesus mubeʹ sungai neng ca bisin, penco tai ie muheʹ taket diaʹ bayaʹ katuk ke, ngan pemuhang nge man sedung iaʹ un kaʹ aking nge. 6Abeʹ kun ne palaʹ Simun Peterus iaʹ pisiu ia ne: “Tuhan, adeʹ koʹ ke muheʹ taket ceʹ?”

7Dau Yesus mipa ia: “Naʹkini abeʹ koʹ tisen puyan nceʹ. Bayaʹ koʹ ke tisen ʹo.”

8Penco dau Peterus: “Midan midan pe ayen ncoʹ peletoʹ ke muheʹ taket ceʹ.”

Un dau Yesus mipa: “Buk keʹ abeʹ un ke muheʹ taket coʹ, abeʹ koʹ diaʹ bayaʹ katuk keʹ laʹa.”

9Dau Simun Peterus mipa: “Ahaʹ Tuhan, buk pekina, ayen muheʹ taket ceʹ tuaʹ le udi, muheʹ pe ujoʹ keʹ, ngan muheʹ pe ulu heʹ lete.”

10Un dau Yesus: “Aheʹ iaʹ lepa ntoʹ, buheʹ ne tipo usa ha, ngan abeʹ titin ne muheʹ usa ha laʹa pit taket te. Mung ngkem ne lepa buheʹ, bang ca le iaʹ abeʹ un buheʹ.” 11Lepa tisen ne Yesus aheʹ iaʹ ke mencai ia me bunoʹ o, ina iaʹ ukoʹ o pisiu pekina dau: “Mung ngkem ne lepa buheʹ, bang ca le iaʹ abeʹ un buheʹ.”

12Lepa Yesus muheʹ taket de, kun ne un tempan sapai ie laʹa, ngan tai ngeliwet palaʹ bijaʹ iaʹ kukoʹ o re. Kun ne lemutu ida: “Un ncem tisen sen puyan iaʹ akeʹ lepa ti neng ikem ne?” 13Ikem pisiu akeʹ Guru ngan Tuhan. Teneng lete dau hem ti pekina, uban lan akeʹ lete, 14akeʹ ne iaʹ Tuhan ncem ngan Guru hem. Ngan naʹkini lepa heʹ muheʹ taket cem. Ina ukoʹ tekep lete ikem muheʹ taket cem semaheʹ apan. 15Lepa ne akeʹ uyan ca kata mikem, apan ncem senteng ti kuaʹ baʹan iaʹ akeʹ lepa ti mikem. 16Lan dau heʹ mikem, abeʹ un ca ulaʹ iaʹ lapa bioʹ neng diaʹ tuʹa ha, ngan abeʹ un ca lawa iaʹ lapa bioʹ neng ia iaʹ cuk ia. 17Naʹkini ikem tisen ne katuk telit ini. Bangen lan ne ikem buk kem naʹ pemuyan ncem kuaʹ ngan iaʹ penisen ncem.

18“Abeʹ dau isiu heʹ sihoʹ neng ikem mung. Akeʹ tisen mung diaʹ akeʹ lepa lemileʹ. Un sepuʹo atek palup lan ne dau Kitap iaʹ kuma ha: ‘Laki iaʹ pemung uman ngan nceʹ, ia ne iaʹ ke ngeliwet nyakat akeʹ.’ 19Akeʹ badaʹ puyan ini mikem naʹkini, kena ha ke palup, apan tegoʹ o ke palup ne ʹo reʹ, atek kem ke tisen ‘Akeʹ Iaʹ Lemuto Un’. 20Lan dau heʹ mikem, aheʹ diaʹ alaʹ lawa heʹ, atek de alaʹ akeʹ lete. Aheʹ diaʹ alaʹ akeʹ, atek de alaʹ ia iaʹ cuk akeʹ nai lete.”

Yesus nekena badaʹ laki iaʹ ke mencai ia me bunoʹ o

(Un te neng Matius 26.20-25; Markus 14.17-21; Lukas 22.21-23)

21Lepa Yesus pisiu ini, bahat ne tekaʹ tawai ie. Ina ukoʹ besut dau ue badaʹ a: “Lan dau heʹ mikem, un ca usa kahang ikem ne iaʹ ke mencai akeʹ me bunoʹ keʹ ʹo.”

22Ina ukoʹ diaʹ bayaʹ katuk ke ne naʹat ida semaheʹ, mentung nte miat tekaʹ pekimet aheʹ iaʹ baʹan ne ne. 23Un ca usa me ida diaʹ bayaʹ katuk Yesus madung temping ia, ia iaʹ Yesus malaʹ. 24Kun Simun Peterus nungkit ia ngan kuma ha: “Lemutu ue ading, aheʹ iaʹ baʹan ne ne?”

25Ina ukoʹ laki ina tai pesen temping Yesus ngan lemutu ia: “Tuhan, aheʹ iaʹ baʹan ncoʹ ne?”

26Dau Yesus mipa: “Akeʹ ke metin ruti neng telang ʹo, ngan naʹ a me ia. Laki ina ne ia.” Ina ukoʹ Yesus alaʹ ca peʹ ruti, sulo metin ne neng telang, penco naʹ a me Yudas anak Simun Iskariut. 27Selaho uʹo Yudas lepa alaʹ ruti ina, tai kun Sitan nesun neng ia. Dau Yesus neng ia: “Nyelarai ne ti iaʹ ikoʹ ke uyan.” 28Neng ahang ida diaʹ madung kaʹ bijaʹ ina, ca usa pe abeʹ un tisen sen iaʹ Yesus pisiu neng ia. 29Uban Yudas mampin buhan ligit idai, un palai diaʹ bayaʹ katuk ke dina kuma Yesus cuk ia tai lemeli penguman iaʹ tekep me bunut ina. Ngan laʹa ida kuma Yesus cuk ia tai naʹ ligit me kelunan diaʹ kasip.

30Yudas alaʹ ruti ina ngan penco tai kawang. Ngahu ne ina.

Dau ukum mading

31Lepa Yudas tai mecin ida, un dau Yesus: “Naʹkini ne kenai luhaʹ serema peniga Anak Sio ini. Ngan naʹkini lete serema peniga Allah ke luhaʹ cen ia. 32Buk lan serema peniga Allah iaʹ luhaʹ cen ia, atek Allah loʹ iaʹ ke peluhaʹ serema peniga ha neng Anak Sio ini, ngan atek ke penco ke ti ie. 33Ahaʹ anak keʹ, abeʹ keʹ majan ngan ncem laʹa. Ikem ke mita heʹ ʹo, un sepuʹo dau heʹ neng ikem naʹkini, kuaʹ dau heʹ neng kelunan Yahudi ading nte: ‘Abeʹ kem senteng tai kaʹ ukoʹ keʹ ne.’ 34Dau ca katuk ukum mading iaʹ akeʹ naʹ mikem, ina ne malaʹ neng ikem semaheʹ. Kuaʹ baʹan puyan nceʹ lepa malaʹ neng ikem, pekina lete atek tekep kem ke malaʹ neng ikem semaheʹ. 35Buk luhaʹ diseʹ kem malaʹ neng ikem semaheʹ, ina le dulu mung ke tisen ikem uban bayaʹ katuk keʹ.”

Yesus nekena badaʹ puyan Peterus ke nyepati ia

(Un te neng Matius 26.31-35; Markus 14.27-31; Lukas 22.31-34)

36Kun Simun Peterus lemutu ia: “Tuhan, kempi ketai hoʹ?”

Kun Yesus mipa ia: “Kempi kukoʹ ketai heʹ, abeʹ kem senteng nai bayaʹ akeʹ naʹkini. Uʹo hem ke nai bayaʹ akeʹ.”

37Dau Peterus lemutu ia: “Tuhan, uban inu heʹ abeʹ un senteng nai bayaʹ ikoʹ naʹkini? Tenup ne tekaʹ kimet ceʹ ke matai tuman ikoʹ.”

38Dau Yesus mipa ia: “Lan ncoʹ un tenup tekaʹ kimet ke matai tuman akeʹ mo? Lan dau heʹ mikoʹ, kena tekuʹuk iap, telu liwai hoʹ ke badaʹ kuma ikoʹ abeʹ un tisen akeʹ.”

Currently Selected:

YAYA 13: KNT

Highlight

Copy