YAYA 6

Yesus lemakan lema ibu usa kelunan

(Un te neng Matius 14.13-21; Markus 6.30-44; Lukas 9.10-17)

1Lepa ina Yesus tai uleʹ kaʹ dipa leteng Galilia, (ia lete leteng Tiberias). 2Un ca peng kelunan ia bioʹ le tai bayaʹ ia, uban nte lepa taʹan diseʹ puyan nyingan ne paget kelunan diaʹ sakit. 3Tai kun Yesus madung kusun ca mudung, pemung ngan diaʹ bayaʹ katuk ke. 4Adet Bunut Paska lepoʹ Yahudi kenai nyeng. 5Kun Yesus naʹat pipa ia ngan taʹan kenai ca peng kelunan iaʹ bioʹ le palaʹ ia. Un dau ue neng Pilipus: “Kempi le ke lemeli penguman iaʹ senteng lemakan kelunan dini mung?” 6Yesus pisiu ini uban ubaʹ ten Pilipus. Iaʹ lan ne, lepa tisen ne Yesus inu iaʹ ia ke ti.

7Un dau Pilipus mipa ia: “Naʹ pe ia tahaʹ dumit le singket usa re, ina ha ke suheʹ dua ato ligit suaʹ luteʹ ke senteng penguman nte lete.”

8Un ca laʹa me diaʹ bayaʹ katuk Yesus, Anderias iaʹ cenganak Simun Peterus, iaʹ kuma ha: 9Ini ca demanai iaʹ un lema re luʹung ruti paun, ngan dua re usa atuk. Un sepuʹo uyan inu le ini me kelunan kadoʹ dini tupe?”

10Kun Yesus badaʹ mida: “Cuk ne dulu madung ading.” Kadoʹ udu kina. Kun dulu madung ne. Pengekadoʹ laki kihoʹ kihoʹ lema ibu usa re. 11Kun Yesus alaʹ ruti idai, penco ho nyuaʹ saheʹ kimet neng Allah, ngan patu ue me kelunan kadoʹ diaʹ madung kina ne. Pekina lete ia ti atuk didai, ngan alaʹ mele kumpin pengubaʹ de ne. 12Tegoʹ de beso mung ne, kun Yesus pisiu diaʹ bayaʹ katuk ke ne: “Nemo mung ne diaʹ laʹa re ne, ayen ngeburaʹ a.” 13Sulo re nemo ho mung, ngan nyangan puloʹ dua belatak man laʹa lema luʹung ruti paun didai, iaʹ kelunan dina lepa uman nte.

14Dalau kelunan dina taʹan diseʹ puyan nyingan iaʹ Yesus lepa ti, un dau re: “Masaʹ lan ini pegawa bioʹ iaʹ tekep nai kusun tanaʹ ne.” 15Lepa ne Yesus tisen kimet de ubaʹ nai alaʹ ia, uban nte ubaʹ mejen uyan ia iaʹ paren bioʹ, ina ukoʹ Yesus tai masat tengen kusun mudung.

Yesus masat kempau sungai

(Un te neng Matius 14.22-33; Markus 6.45-52)

16Tegoʹ tai tahup, kenai diaʹ bayaʹ katuk Yesus tai puno palaʹ leteng ina are, 17ngan tai dalem alut, penco tai uleʹ kaʹ dipa leteng nyeripa lepoʹ Kapernaum. Keno ketai mentem ne, jawa pe nai Yesus palaʹ ida. 18Sebiʹen kenai ca layam kasa ne, ngan leteng ina pe luyak aleʹ. 19Dalau diaʹ bayaʹ katuk Yesus lepa lemesai kihoʹ kihoʹ telu batu, buk are pat batu pengecoʹ o, kun nte taʹan Yesus masat kempau sungai, nai nyeng kata alut, ngan daram tekaʹ de. Un dau Yesus mida: 20“Ayen daram. Akeʹ ini.” 21Ubaʹ ne ida alaʹ ia ngan nte kaʹ alut. Ngan tegoʹ ina, beliau dapit ne alut nte neng tanaʹ iaʹ kukoʹ de ketai ne.

Dulu pita Yesus

22Neng kenempam me, un dulu diaʹ kadoʹ diaʹ petem ngelineʹ kaʹ dipa leteng ina taʹan bang ca le alut nahung laʹa. Ida lepa tisen ne Yesus abeʹ un tai dalem alut ngan diaʹ bayaʹ katuk ke, ban ida tengen ne tai mecin Yesus are. 23Nai alut diaʹ ca cen Tiberias nyekakan kata kina, nyeng kukoʹ dulu uman ruti paun tegoʹ Yesus lepa nyuaʹ saheʹ kimet are. 24Kun dulu diaʹ kadoʹ dina taʹan Yesus ngan diaʹ bayaʹ katuk ke abeʹ un kina, penco re ngedung kalut ngan tai kaʹ Kapernaum, tai mita Yesus.

Yesus iaʹ ruti pengudip

25Kun nte taʹan ia kaʹ dipa leteng ina. Un dau re neng ia: “Guru, midan ban nai hoʹ kini tupe?”

26Dau Yesus mipa: “Lan dau heʹ mikem, iaʹ ukoʹ kem nai pita akeʹ, abeʹ uban ncem tisen puyan nyingan nceʹ ina, un sepuʹo uban ncem lepa beso uman ruti, pa ina lene kimet cem. 27Ayen bang pegayeng mita penguman iaʹ luhaʹ jaʹat, un sepuʹo pegayeng ne mita penguman iaʹ majan neng udip saheʹ kelineʹ iaʹ ngeriman. Peguman ini atek Anak Sio ke naʹ mikem, uban Allah, Amai Bioʹ iaʹ lepa nedanaʹ ia iaʹ tekep ke man puyan ini.”

28Kun nte lemutu ia: “Inu puyan iaʹ ameʹ senteng ti apan meʹ ke mejo gayeng Allah?”

29Un dau Yesus mipa: “Ini ne gayeng iaʹ Allah ubaʹ ikem ti: ngelan ne neng ia iaʹ Allah cuk nai ne.”

30Dau re mipa: “Inu puyan nyingan iaʹ ikoʹ ti apan meʹ taʹan ne, ina le ameʹ ke ngelan ikoʹ? Inu iaʹ ikoʹ ke uyan tupe? 31Un tepun meʹ cen naʹaʹ are lepa uman ruti kaʹ tanaʹ lenga, iaʹ kuaʹ baʹan dau dalem Kitap: ‘Cen surga ha naʹ ruti ida uman.’ ”

32Un dau Yesus mida: “Lan dau heʹ mikem, inu iaʹ Musa lepa naʹ mikem cen naʹaʹ, abeʹ ina ruti cen surga. Amai heʹ iaʹ ke naʹ ruti lan mikem cen surga ʹo. 33Uban ruti iaʹ Allah ke naʹ, ia ne iaʹ nai kentaʹ cen surga, ngan naʹ udip milu kelunan kusun tanaʹ.”

34Kun nte lemutu ia: “Amai, pesulo ne naʹ ruti ini mameʹ.”

35Kun Yesus pisiu mida: “Akeʹ ne iaʹ ruti pengudip. Aheʹ kelunan diaʹ nai palaʹ akeʹ, abeʹ lan nte ke laʹu. Ngan aheʹ kelunan diaʹ ngelan neng akeʹ, abeʹ lan nte ke muʹang. 36Naʹkini akeʹ badaʹ mikem, ngan ikem lepa taʹan akeʹ, un sepuʹo abeʹ kem ubaʹ ngelan. 37Singket usa kelunan, aheʹ diaʹ Amai heʹ naʹ makeʹ, atek de nai palaʹ akeʹ. Abeʹ keʹ ke nyekang aheʹ iaʹ ke nai palaʹ akeʹ, 38uban akeʹ nai kentaʹ cen surga ke ti pengubaʹ ia iaʹ cuk akeʹ nai. Abeʹ keʹ ti pengubaʹ keʹ tengen. 39Ia, iaʹ cuk akeʹ nai, ubaʹ akeʹ ti puyan pekini apan nceʹ ke petubo mung diaʹ ia naʹ makeʹ, ngan abeʹ un buhaʹ ca usa durat. Un sepuʹo ia ubaʹ akeʹ beteʹ ida mung neng udip tegoʹ tau iaʹ ke kuʹo ho. 40Pekini ne puyan Amai heʹ ubaʹ apan mung aheʹ kelunan diaʹ taʹan ngan ngelan Anak ini, ida iaʹ senteng alaʹ udip saheʹ kelineʹ iaʹ ngeriman, ngan akeʹ ke pebeteʹ ida neng udip tegoʹ tau iaʹ ke kuʹo ho ʹo.”

41Ina ne tading kelunan Yahudi kuheng dau neng Yesus, uban ne badaʹ: “Akeʹ ini ne ruti iaʹ nai cen surga.” 42Ina ukoʹ de pekini dau: “Laki ini ne iaʹ Yesus anak Yusup sedeʹ? Ilu tisen amai ie ngan ueʹ e. Naʹkini kumpin puyan ne kuma ia nai cen surga?”

43Un dau Yesus mipa ida: “Pekenaʹ ne nguheng kahang ikem selepeʹ. 44Abeʹ un aheʹ senteng nai palaʹ akeʹ buk abeʹ un kimet te pihit kuʹun Amai Bioʹ iaʹ cuk akeʹ nai ne, ngan akeʹ ke pebeteʹ ia neng udip tegoʹ tau iaʹ ke kuʹo ho ʹo. 45Un diaʹ pegawa cen naʹaʹ de nyurat: ‘Allah iaʹ pekatuk mung kelunan.’ Aheʹ aheʹ diaʹ kenahan dau Amai, ngan pekalai cen ia, ida iaʹ ke nai palaʹ akeʹ. 46Abeʹ un nceʹ kuma ha ca usa iaʹ lepa taʹan Amai. Ia iaʹ nai cen Allah, bang ia tengen le iaʹ lepa taʹan Amai.

47“Lan dau heʹ mikem, aheʹ diaʹ ngelan, ida iaʹ un udip saheʹ kelineʹ iaʹ ngeriman. 48Akeʹ ne iaʹ ruti pengudip. 49Cen naʹaʹ diaʹ tepun ncem uman ruti manaʹ kaʹ tanaʹ lenga are, un sepuʹo matai ne ida. 50Ca naʹan pe ruti iaʹ nai cen surga. Aheʹ diaʹ uman ne, abeʹ de ke matai. 51Akeʹ ne ruti pengudip iaʹ lepa nai cen surga. Buk aheʹ aheʹ iaʹ uman ruti ini, ia iaʹ ke mudip pabeʹ bayaʹ. Ruti iaʹ akeʹ ke naʹ, ina ne usa heʹ iaʹ akeʹ mencai ke uyan udip kusun tanaʹ ini.”

52Ini ne penading iaʹ uyan kelunan Yahudi miʹa ngan paseʹ neng ahang ida selepeʹ. Dau re lemutu: “Inu senteng laki ini ke naʹ usa ha ilu uman?”

53Un dau Yesus mida: “Lan au heʹ mikem, buk kem abeʹ un uman usa ngan nisep dahaʹ Anak Sio ini, abeʹ udip ke un neng ikem. 54Aheʹ diaʹ uman usa heʹ ngan nisep dahaʹ keʹ, ida iaʹ un udip saheʹ kelineʹ iaʹ ngeriman, ngan akeʹ iaʹ ke pebeteʹ ia palaʹ udip tegoʹ tau iaʹ ke kuʹo ho ʹo. 55Uban usa heʹ iaʹ atek ca penguman, ngan dahaʹ keʹ iaʹ atek ca tisep lan. 56Aheʹ iaʹ uman usa heʹ ngan nisep dahaʹ keʹ, ia iaʹ mudip neng akeʹ, ngan akeʹ pe mudip neng ia. 57Amai iaʹ mudip, iaʹ cuk akeʹ nai. Uban kuʹun ne lete akeʹ mudip ne. Pekina ne puyan aheʹ kelunan diaʹ uman akeʹ, ida lete iaʹ ke mudip kuʹun nceʹ. 58Ini ne ruti iaʹ nai cen surga, abeʹ un kuaʹ baʹan ruti iaʹ tepun ncem lepa uman cen naʹaʹ de, penco matai. Un sepuʹo aheʹ iaʹ uman ruti iaʹ nai cen surga ini, ina iaʹ ke mudip pabeʹ bayaʹ.”

59Yesus pisiu ini dalau ue pekatuk dulu kaʹ dalem amin sebayang, kaʹ lepoʹ Kapernaum.

Tiraʹ iaʹ ngkin udip saheʹ kelineʹ iaʹ ngeriman

60Kadoʹ diaʹ bayaʹ katuk Yesus kenahan ini ngan pisiu: “Mahan aleʹ dau katuk ini. Aheʹ iaʹ senteng ke ngeringa dau ue tupe?”

61Abeʹ un aheʹ iaʹ badaʹ me Yesus. Naʹ pe pekina, lepa tisen ne ia uban diaʹ bayaʹ katuk ke nguheng dau neng idi. Ini ukoʹ o pisiu mida: “Ini iaʹ uyan kimet cem tai luʹap tekaʹ tupe? 62Buk pekina, kumpin ne puyan ncem buk kem ke taʹan ketai Anak Sio ini tai uleʹ kukoʹ o cen kena are? 63Berua Allah iaʹ naʹ udip me kelunan. Penyukat usa kelunan abeʹ un inu iaʹ bang nge. Un sepuʹo ketoʹ tiraʹ diaʹ akeʹ lepa pisiu mikem, ina iaʹ atek Berua ngan udip. 64Petem palai mikem abe un ngelan ne.” (Cen kena lene Yesus tisen aheʹ iaʹ abeʹ un ubaʹ ngelan, ngan aheʹ iaʹ ke naʹ ia me bunoʹ o.) 65Kun dau ue laʹa: “Ini ne tuman nceʹ iaʹ akeʹ lepa badaʹ mikem are: abeʹ un aheʹ iaʹ senteng nai palaʹ akeʹ buk Amai Bioʹ abeʹ un pawang ukoʹ kenai re.”

66Uban kuʹun ini ne kadoʹ diaʹ bayaʹ Yesus tai ngeliwet laʹa. Abeʹ de ubaʹ tai tugung ia laʹa. 67Ina ukoʹ Yesus pisiu me diaʹ puloʹ dua usa diaʹ bayaʹ katuk ke ne: “Kumpin ncem tupe? Ubaʹ kem tai mecin akeʹ mo?”

68Kun dau Simun Peterus mipa ia: “Ahaʹ Tuhan, palaʹ aheʹ meʹ ketai laʹa? Ikoʹ iaʹ mampin isiu iaʹ naʹ udip saheʹ kelineʹ iaʹ ngeriman. 69Naʹkini ameʹ ngelan ngan tisen ikoʹ iaʹ atek buheʹ iaʹ nai cen Allah.”

70Un dau Yesus mipa ida: “Lan lete akeʹ iaʹ lemileʹ ikem diaʹ ca puloʹ dua usa dini, belekaʹ uban un pe ca usa mikem iaʹ nuyan bali jaʹat.” 71Dau ue pisiu pekina marung neng Yudas anak Simun Iskariut. Naʹ pe kenuen Yudas ne ca usa me diaʹ puloʹ dua bayaʹ katuk Yesus ne, ia iaʹ ke naʹ Yesus palaʹ diaʹ bunoʹ o.

Currently Selected:

YAYA 6: KNT

Highlight

Copy