LUKAS 15
15
Pun dumba iaʹ lingu
(Un te neng Matius 18.12-14)
1Dalau ina pelaʹa, un kadoʹ diaʹ nemo pupu ngan diaʹ dulu kuma jaʹat, nai ubaʹ ke ngeringa dau Yesus. 2Tai kuheng ne tekaʹ Perisi ngan guru Adet Yahudi dina, mentung dau re: “Laki ini ubaʹ ke pejahi ngan kelunan jaʹat. Uman pia ngan nte.” 3Ina ukoʹ Yesus penco ti ca kata katuk iaʹ pekini dau mida:
4“Aheʹ neng ahang ikem iaʹ un dumba ca ato usa, penco lingu ca mida, kumpin puyan ne ʹo? Atek ia ke mahung lete piʹen puloʹ piʹen usa dina kaʹ lasan iaʹ tiga, moʹ o nekena ketai mita iaʹ lingu ina, pa ha alaʹ ia. 5Midan ne taʹan ia, bangen kaʹ tawai ie, penco ho alaʹ ngan nyuʹun ia. 6Abeʹ ne ia kaʹ amin ne, penco ho mengin diaʹ cenganak ke, ngan diaʹ penyeng ngan ne. Kun dau ue neng ida: ‘Bangen ne tawai hem ngan nceʹ, moʹ keʹ lepa alaʹ dumba heʹ iaʹ lingu idai.’ ”
7Un dau Yesus laʹa: “Dau heʹ mikem, pekina lete bangen laleʹ kaʹ surga te, moʹ ban kuʹun ca usa kelunan penyalaʹ iaʹ nesen, ngan nyepuleʹ kimet te. Lapa tekaʹ bangen ne neng ʹo piʹen puloʹ piʹen usa kelunan iaʹ teneng, iaʹ are titin nesen ngan nyepuleʹ kimet de.”
Ligit iaʹ durat
8Ca laʹa: “Buk ca usa leto iaʹ un ligit pirak ca puloʹ liʹap, kedurat ca liʹap. Kumpin puyan ne? Atek ia ke jiget titiu, penco ho mepa amin nte, ngan tudep nitiu pa ha alaʹ a. 9Lepa ha alaʹ a, kun ne mengin diaʹ tuyang nge, ngan diaʹ penyeng ngan ne, kun dau ue: ‘Bangen ne tawai hem ngan nceʹ, moʹ keʹ lepa alaʹ ligit pirak keʹ iaʹ durat idai.’ ”
10Un dau Yesus laʹa: “Dau heʹ mikem, pekina lete bangen laleʹ diaʹ melikat Allah, moʹ ban kuʹun ca le usa kelunan penyalaʹ iaʹ nesen ngan nyepuleʹ kimet te.”
Anak iaʹ tutang
11Un dau Yesus laʹa: “Un ca laki, un dua re anak ke laki. 12Un dau iaʹ sadin neng amai ie: ‘Ahaʹ amai, tiga hoʹ naʹ tulat neng pengamin le makeʹ naʹkini.’ Sulo kun amai ie petulat inu ue mida dua anak ke dina. 13Abeʹ lepe majan ʹo ina, kun iaʹ sadin alaʹ ligit saliu ketoʹ inu ue, sulo tai ie kaʹ lepoʹ iaʹ coʹ. Kina te ia ngebura ligit te ngan saheʹ iaʹ untau. 14Muʹo mung ne ligit te, uʹo ina kenai ca lien iaʹ taru laleʹ kedalem lepoʹ ina. Ia ne iaʹ ading tisen tekaʹ taru ue. 15Ina ukoʹ o tai metau neng ca laki kaʹ lepoʹ ina. Sulo laki ina cuk ia tai kaʹ uma ha, manan buʹin ne. 16Miba ne ia keloʹ ke uman moʹ ubi, iaʹ ban penguman buʹin dina, moʹ malaʹ tekaʹ a ke pebeso batek ke. Un sepuʹo abeʹ un aheʹ iaʹ naʹ inu ia ke uman.
17“Dalau ina, kenai ie tisen ngan nugen puyan ne tengen. Un kaʹ a dalem kimet te: ‘Kudaʹ kadoʹ dulu diaʹ metau neng amai heʹ, ngan suheʹ suheʹ penguman nte. Un sepe akeʹ kini ne ketai matai lien. 18Tiga sepe akeʹ beteʹ ne, tai palaʹ amai heʹ, ngan kun nceʹ mia ʹo: Ahaʹ amai, lepa ne akeʹ uyan penyalaʹ neng Allah, pekina pe neng amai. 19Abeʹ ne tekep dulu ke pisiu akeʹ anak koʹ ne laʹa. Tiga hoʹ uyan akeʹ koʹ baʹan ca diaʹ nai metau are.’ 20Pekina tekaʹ a, mentung nai beteʹ, sulo tai ie ngeliwet palaʹ amai ie.
“Petem coʹ lepe ia, kun amai ie taʹan seʹ nai ie, kelesau laleʹ ne tekaʹ a neng ia. Sulo tai amai ie ngasa, ngan nyekapu ia, mentung maʹoʹ ia. 21Un dau anak ke neng ia: ‘Ahaʹ amai, lepa ne akeʹ uyan penyalaʹ neng Allah, pekina pe neng amai. Abeʹ ne tekep dulu ke pisiu akeʹ anak koʹ ne laʹa.’ 22Un dau amai ie neng diaʹ ulaʹ a: ‘Nyelarai ne nai ngkin sapai mia iaʹ atek tiga, ngan cuk ke un ne. Ngan naʹ ca angkoʹ neng buaʹ ujoʹ o, ngan naʹ sepatu neng taket te. 23Ngan ngkin anak sapi iaʹ atek tiga seʹ idai, ngan lematai ne ia. Tiga ne ilu pemung mana ngan bangen tawai le, 24moʹ anak keʹ ini seleket ban matai ne are, ngan nai ie ngeliwet mudip pe ini laʹa. Lepa tutang ne ia are, nai ie luhaʹ pelaʹa.’ Ina ne penading bangen diseʹ de.
25“Un anak iaʹ seken idai, kaʹ uma te ia. Dalau kenai ie uleʹ nyeng kata amin nte, kun ne kenahan dau tuyau sampeʹ, ngan dau dulu kancet. 26Sulo ho mengin ca diaʹ ulaʹ de ngan lemutu: ‘Dau dulu inu ne?’ 27Un dau ulaʹ ina mia: ‘Lepa ne nai sadin ncoʹ uleʹ, ngan amai hoʹ lepa lematai anak sapi iaʹ atek tiga idai mia, moʹ o lepa petegoʹ ngan ne dalem udip iaʹ saheʹ.’ 28Miʹa seʹ seken ne. Abeʹ e ubaʹ ketai kaʹ umaʹ. Penco nai amai ie kawang nyeluk ia nai kedalem. 29Un dau ue mipa amai ie: ‘Ngki hoʹ taʹan seʹ keʹ, kudaʹ uman ne majan nceʹ kuaʹ baʹan ca ulaʹ de pegayeng mikoʹ, ngan nyahut ceʹ muau dau neng pengecuk koʹ. Mpi lepe amai naʹ makeʹ ca usa anak kading man nceʹ bangen ngan diaʹ malai ngan nceʹ? 30Un sepuʹo dalau kenai anak koʹ ini uleʹ, iaʹ lepa ngebura inu amai, ti ngan leto diaʹ lunteʹ, belekaʹ amai lematai anak sapi iaʹ atek tiga idai mia.’ 31Un dau amai ie neng ia: ‘Ahaʹ anak keʹ, ikoʹ ini lemuto ho pemung ngan nceʹ, ngan ketoʹ inu heʹ ina lete anun ncoʹ. 32Tekep te ilu tiga saheʹ ngan bangen tawai, moʹ sadin ncoʹ ini seleket ban matai, ngan nai ie ngeliwet mudip pe ini laʹa. Lepa tutang ne ia are, belekaʹ nai ie luhaʹ pe ini laʹa.’ ”
Currently Selected:
LUKAS 15: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
