MATIUS 19
19
Katuk Yesus neng puyan petat
(Un te neng Markus 10.1-12)
1Dalau Yesus lepa pedaʹam dau isiu ue, sulo ho mecin tanaʹ Galilia, ngan penco tai ie kaʹ dale Yudia tahaʹ dipa sungai Yardin. 2Ngan kadoʹ dulu nai bayaʹ ia, sulo ho paget diaʹ sakit kina.
3Nai kun palai kelunan Perisi ubaʹ ten ke pungkeʹ isiu ngan Yesus. Kun nte lemutu ia: “Kumpin, buk bayaʹ adet le, senteng ca kelunan ke petat ngan iaʹ leto ho, mele inu inu dau ukan ne tupe?”
4Un dau Yesus mipa ida: “Kumpin, abeʹ kem ban baca dau isiu ini dalem Kitap lepe? ‘Ban ne cen tading Allah uyan kelunan, ia uyan laki ngan leto.’ 5Laʹa dau Allah: ‘Tuman ina, tiga laki mecin amai ie ngan ueʹe, tai pemung ngan leto ho, apan nte dua nuyan ca le.’ 6Tuman ina, abeʹ de dua usa laʹa, di lareʹ ca le ida dua. Tuman ina, abeʹ un tekep kelunan ke ngasing diaʹ ban Allah lepa pemung ca le.”
7Un dau kelunan Perisi dina lemutu Yesus laʹa: “Buk ke pekina, moʹ inu Musa dayo cuk dulu uyan surat petat ngan puleʹ leto re?”
8Un dau Yesus mipa ida: “Musa pedayo ikem petat ngan leto hem, moʹ mahing kimet cem. Un sepuʹo abeʹ e pekina puyan ne cen tading Allah uyan kelunan. 9Moʹ ina ukoʹ keʹ badaʹ a mikem, laki iaʹ mpi iaʹ petat ngan leto ho, petem pe iaʹ leto abeʹ un petaro ia, ngan ia alaʹ ca leto laʹa, atek ke petaro lete ina.”
10Un dau diaʹ bayaʹ katuk Yesus neng ia: “Buk ke pekina ban puyan ca laki ngan iaʹ leto, tiga pulang nte ayen pepeto tuaʹ ne.”
11Un dau Yesus mipa ida: “Katuk ini abeʹ e un pedapit neng singket singket kelunan, di lareʹ bang palaʹ kelunan diaʹ lepa un tulat cen Allah le. 12Un kadoʹ naʹan iaʹ tuman palai laki abeʹ un tai pepeto. Un diaʹ abeʹ un senteng un leto cen tading kenai re pempet. Un pe diaʹ are senteng un leto ban tuman tenuyan kuʹun kelunan, ngan un pe diaʹ abeʹ un senteng un leto apan nte penco puyan pengaren Allah ke ngaren ilu kelunan. Talan ne kelunan diaʹ dapit kimet neng katuk ini ke alaʹ a.”
Yesus naʹ peniga ha me anak dumit
(Un te neng Markus 10.13-16; Lukas 18.15-17)
13Un palai kelunan nai ngkin anak de palaʹ Yesus apan ne napoʹ ujoʹ o neng ida, ngan lemameʹ mida. Un sepuʹo diaʹ bayaʹ katuk ke ngenca kelunan dini are. 14Un dau Yesus: “Talan ne anak dina nai palaʹ akeʹ. Ayen mulen ida nai. Ban ne kelunan diaʹ koʹ baʹan anak dumit dini are, ida ne diaʹ atek marung neng puyan pengaren Allah.”
15Sulo Yesus napoʹ ujoʹ o neng anak dina, ngan lepa ina sulo tai ie mecin cen ina.
Ca demanai iaʹ kayaʹ
(Un te neng Markus 10.17-31; Lukas 18.18-30)
16Neng ca tau ue, nai ca kelunan palaʹ Yesus. Un dau ue: “Ahaʹ guru, inu puyan iaʹ tiga iaʹ tekep akeʹ ke uyan apan nceʹ ke alaʹ udip saheʹ kelineʹ iaʹ ngeriman?”
17Un dau Yesus mipa ia: “Moʹ inu hoʹ lemutu akeʹ neng puyan iaʹ tiga? Bang ca tuaʹ le iaʹ tiga. Buk koʹ ubaʹ ke alaʹ udip saheʹ kelineʹ iaʹ ngeriman, tiga ne ikoʹ bayaʹ katuk ukum Allah.”
18Un dau ue lemutu Yesus pelaʹa: “Katuk ukum iaʹ mpi ina?” Un dau Yesus mipa ia: “Ayen ncoʹ lematai kelunan; ayen ncoʹ petaro; ayen ncoʹ ngelau; ngan ayen ncoʹ lemalo; 19ngan nyelama ne ueʹ ngan amai hoʹ, ngan tiga hoʹ malaʹ kelunan diaʹ ca koʹ baʹan ncoʹ malaʹ usa hoʹ tengen are.”
20Un dau demanai ina mipa ia: “Ahaʹ, ketoʹ katuk dina lepa ne akeʹ kanan ne, ngan inu iaʹ tepa laʹa tupe?”
21Un dau Yesus neng ia: “Buk koʹ ubaʹ pengudip koʹ ke dengkep, tai ne ikoʹ matu ketoʹ inu iaʹ un neng ikoʹ, ngan ligit te ikoʹ naʹ me kelunan kasip. Ina le ikoʹ ke un galen kaʹ surga. Uʹo ina nai hoʹ bayaʹ akeʹ.”
22Tegoʹ demanai ina kenahan dau isiu ina, sulo tai ie puke ngan bahat tekaʹ tawi ie, moʹ o ngimet kayaʹ a.
23Sulo Yesus pisiu ngan diaʹ bayaʹ katuk ke: “Lan dau heʹ badaʹ mikem, mahan laleʹ le ca kelunan kayaʹ ketai kaʹ dalem puyan pengaren Allah. 24Un pelaʹa dau heʹ mikem, masaʹ melai ca pun untaʹ ketai kaʹ dalem lubang lo, neng ʹo ca kelunan kayaʹ ketai ngkin usa ha kaʹ dalem puyan pengaren Allah.”
25Salam laleʹ ne kaʹ de diaʹ bayaʹ katuk Yesus kenahan dau isiu ina. Un dau re: “Buk ke pekina, aheʹ le iaʹ ke alaʹ udip dalem Tuhan tupe?”
26Kun Yesus naʹat ida, mentung nge kuma ha neng ida: “Lan te puyan ini kelunan abeʹ un senteng ke uyan, di lareʹ abeʹ un ca inu iaʹ Allah are senteng ke uyan.”
27Penco dau Peterus: “Ameʹ dini lepa mecin ketoʹ o mung, ngan nai bayaʹ ikoʹ. Inu iaʹ ameʹ ke alaʹ laʹa tupe?”
28Sulo dau Yesus neng ida: “Dau heʹ mikem, tegoʹ udip iaʹ kenai mading, dalau ina ne Anak Sio ini ke madung neng usun adan pengaren ne ngan serema peniga ha. Ngan ikem puloʹ dua usa diaʹ bayaʹ katuk keʹ dini ke madung singket adan pengaren ncem tengen, ngan ke pebetep tiraʹ neng diaʹ puloʹ dua puhoʹ Israil. 29Ngan singket usa kelunan diaʹ lepa mecin amin nte, ngan pekina pe cenganak laki re, cenganak leto re, ueʹ de ngan amai re, ngan pekina pe anak de, pekina uma re tuman akeʹ, kelunan dina lete diaʹ ke alaʹ ca ato liwai uleʹ liwet inu dina are, pit udip saheʹ kelineʹ iaʹ ngeriman. 30Un sepuʹo kadoʹ kelunan naʹkini diaʹ tahaʹ tena ke tai tahaʹ bayaʹ, ngan pekina pe kadoʹ kelunan naʹkini diaʹ tahaʹ bayaʹ ke tai tahaʹ tena.”
Currently Selected:
MATIUS 19: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
