MARKUS 2
2
Yesus paget ca laki iaʹ sakit lemaʹ
(Un te neng Matius 9.1-8; Lukas 5.17-26)
1Kudaʹ tau uʹo ina, nai Yesus uleʹ kaʹ lepoʹ Kapernaum. Dalau ina dulu tisen denga Yesus un kaʹ amin ne. 2Uʹo ina pasak kadoʹ kenai dulu pempun, pa abeʹ un ukoʹ kelunan kaʹ amin ina laʹa. Pekeseʹ pabeʹ lung pamen te dulu. Kun Yesus penco katuk mida. 3Dalau ina, nai kelunan pat usa nekalang ngkin ca usa iaʹ sakit lemaʹ. 4Asin tegoʹ mpun kelunan kadoʹ, abeʹ de senteng ketai ngkin ia palaʹ Yesus. Ina ukoʹ de nyekika sapau te neng kempau Yesus. Tegoʹ re uyan awang ina, sulo re muno laki ina are peging ngan tekalang nge. 5Yesus tisen ban bioʹ pengelan nte pat, sulo ho pisiu ngan laki iaʹ sakit lemaʹ ina: “Ahaʹ anak keʹ, penyalaʹ koʹ lepa pesau.”
6Un pe kudaʹ usa guru Adet Yahudi diaʹ madung kina. Penco re pekimet neng kimet de tengen, 7kun nte: “Adeʹ laki ini pekini dau tupe? Inu makang dau ue pejaʹat Allah? Ca kelunan pe abeʹ un senteng sau penyalaʹ kelunan, bang ca le iaʹ senteng, iaʹ ina Tuhan Allah.”
8Dalau ina tisen ne Yesus kimet de selem ina, penco dau ue neng ida: “Moʹ inu hem pekimet pekina dau tupe? 9Iaʹ mpi iaʹ melai, ke badaʹ me laki iaʹ sakit lemaʹ ini kuma ha: ‘Penyalaʹ koʹ lepa pesau,’ buk are melai ke pisiu ia kuma ha: ‘Beteʹ ne, lemelen ne pat coʹ, nga tai ne masat’? 10Iaʹ akeʹ ubaʹ ke nugen badaʹ mikem, apan ncem tisen uban Anak Sio ini iaʹ atek un pengaren kusun tanaʹ ini iaʹ senteng ke sau penyalaʹ kelunan.” 11Sulo Yesus pisiu ngan laki iaʹ sakit lemaʹ ina kuma ha: “Dau heʹ mikoʹ, beteʹ ne, lemelen pat coʹ, tai ne uleʹ kamin ncoʹ te.”
12Dalau ina, seʹ laki ina lemelen pat te, sulo nai ie beteʹ, ngan penco tai ie uleʹ nuʹo. Salam ne diseʹ dulu diaʹ kina mung, mentung nte pempau ngadan Allah, kun dau re: “Ini bioʹ bioʹ meʹ tisen puyan iaʹ pekini.”
Yesus mengin Liwi
(Un te neng Matius 9.9-13; Lukas 5.27-32)
13Tai kun Yesus masat ca liwai ie, tai ngalang sada bahi sungai Galilia. Kadoʹ nai kelunan pempun palaʹ ia, sulo hoʹ pekatuk ida. 14Dalau tai ie masat laʹa, kun Yesus taʹan ca usa iaʹ alaʹ pupu me perinta, ngadan ne Liwi anak Alpius, iaʹ madung kaʹ upis alaʹ pupu. Und au Yesus pisiu Liwi: “Nai ne ikoʹ bayaʹ akeʹ.” Sulo nai Liwi beteʹ, ngan penco tai ie bayaʹ Yesus.
15Uʹo ina nuʹo, tai Yesus pemung uman ngan dulu kamin Liwi re. Neng ahang dulu diaʹ pemung uman ngan ne kina, un pe kudaʹ kadoʹ diaʹ alaʹ pupu, ngan pekina pe kelunan diaʹ dulu kuma jaʹat. Un pe diaʹ bayaʹ katuk Yesus pemung uman ngan nte kina. 16Un pe kudaʹ usa guru Adet Yahudi diaʹ ngkang katuk Perisi, taʹan seʹ puyan Yesus tai pemung ngan kelunan diaʹ dulu kuma jaʹat, ngan diaʹ ala pupu dina. Sulo diaʹ guru Adet Yahudi dina pisiu ida telu diaʹ bayaʹ katuk Yesus dina: “Moʹ inu Yesus pemung ngan diaʹ alaʹ pupu ngan kelunan diaʹ dulu kuma jaʹat dina tupe?”
17Yesus kenahan dau re, sulo ho mipa ida, kun dau ue: “Kelunan maget abeʹ de titin pita duktun, bang kelunan sakit le iaʹ ke pita duktun. Akeʹ nai, abeʹ keʹ kenai mengin diaʹ kuma ida lepa teneng, di lareʹ kenai heʹ ke mengin diaʹ dulu kuma jaʹat.”
Lemalan abeʹ un uman
(Un te neng Matius 9.14-17; Lukas 5.33-39)
18Ca liwai laʹa, dalau diaʹ bayaʹ katuk Yaya Guru Batis, kuaʹ ngan diaʹ bayaʹ katuk Perisi, lemalan abeʹ un uman, nai kun palai dulu diaʹ ca lemutu Yesus, kun dau re: “Inu ukoʹ de diaʹ bayaʹ katuk Yaya Guru Batis peging diaʹ bayaʹ katuk Perisi lemalan abeʹ un uman, un sepe diaʹ bayaʹ katuk koʹ abeʹ de ti pekina?”
19Un dau Yesus mipa: “Kumpin buk le mengin dulu nai ngebangen diaʹ pepeto, un nte leko kuman baʹan ncem? Naʹun. Dalau laki iaʹ un leto ina petem un ngan nte, abeʹ de senteng ke lemalan abeʹ un uman. 20Ke un te tau ue ʹo, dulu ke nai magang laki ina ke ngkin ia kelap. Dalau ina lete ida ke lemalan abeʹ un uman.
21“Abeʹ un aheʹ iaʹ ke lemerit sapai ie iaʹ mading, man ne ke mimum sapai ie iaʹ puʹun, moʹ o malap imum iaʹ mading ina ke lemerit sapai iaʹ puʹun ina, apan berit te are, ketai pincaʹ bioʹ kuʹo ke kuʹun iaʹ mading ina.
22“Ca laʹa, abeʹ un aheʹ iaʹ ke meseʹ telang anggur iaʹ mading kedalem bahan anit iaʹ puʹun, malap telang anggur ina ke mepak bahan anit ina, ngan telang anggur ina musa, ngan tai bura peging ngan bahan ne. Iaʹ lan ne telang anggur iaʹ tumpak, ilu meseʹ neng bahan anit iaʹ mading.”
Tau Kelineʹ Tuhan
(Un te neng Matius 12.1-8; Lukas 6.1-5)
23Neng ca Tau Kelineʹ, tai Yesus peging ngan diaʹ bayaʹ katuk ke tai masat dalau uma. Kun nte nuget ulo padai dina. 24Tuman ina diaʹ Perisi pisiu Yesus: “Naʹat puyan nte diaʹ bayaʹ katuk koʹ. Adeʹ de uyan puyan pekina tegoʹ Tau Kelineʹ? Seʹ de ngesa puyan adet le ne ina.”
25Un dau Yesus mipa ida: “Masaʹ kem abeʹ un baca surat iaʹ badaʹ puyan Daut dalau ue tepet neng ca penguman ne? Laʹu ne tekaʹ a, peging ngan ida telu diaʹ ngan ne. 26Sulo tai ie kedalem Amin Allah ngan uman ruti iaʹ ban pengencai dulu me Allah. Dalau ina Abiatar iaʹ Pengebioʹ Detaʹu. Dalem adet le, bang diaʹ detaʹu le iaʹ senteng uman ruti pengencai ina. Idi pe pekina, ina ban Daut uman ne lete, ngan naʹ ruti ina me diaʹ ngan ne.”
27Dau Yesus laʹa: “Adet Tau Kelineʹ atek nuyan tuman ngkin peniga me ilu kelunan. Abeʹ sepe kelunan iaʹ nuyan tuman me Tau Kelineʹ. 28Ukoʹ baʹan Anak Sio ini iaʹ atek Tuʹa, pekina lete ia Tuʹa neng Tau Kelineʹ.”
Currently Selected:
MARKUS 2: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
