LAMPULAN 27
27
Paul Rome Te Shon
1Aope toman-e Italy te yenglin me taine she mong, iman-e Augustan kengphet ükhong mepu Julius ghoja woipate Paul hüyange ülao phowe angpalan ütam phünne pha. 2Asia yengching nah me kenphe yete taine ngohpu Adramyttium chingnyu mepu yenglin me onge; Thessalonica mepu Macedonialan Aristarkhas toman phei omme ngohwante, toman-e yengching te taine yayong. 3Üne nyih toman-e Sidon ngoi, hüyange Julius Paulte yayeng hüowe I nying nyingke toloi meilak jingne I shümpalan tangte taine tam. 4Tüomepu yengching te yayonge toman-e Saipras jayekao wangyang yeleipu yete tai, hangjingne wangyang ünyong yete lei. 5Hüyange Cilicia hüyange Pamphylia ü-o me ngohpu yengching kaiye taiphei me, toman-e Lisia me Myra chingnyu te pei. 6Tüome ghoja woipawe Italy te tailak Alexandria chingnyu mepu yenglin ja tüo, hüyange Iye tüome toman innetam.
7Hüyange nyih nangjange monglüowe kemme taiye, toman-e ngange Nedas (Cnidus) ching ngoi; hüyange üne-o wangyange tienpu jingne, toman-e Salmone ü-o me Krit jayekaote tai. 8Tüopa dikhot neiye ngange taiye, Lin Lakjing Ümei she nyikpu nyoijing ja ümekenme Lasea chingnyu ngoh, tüome toman pei.
9Hüyange aope hipak yeonge win hüyange yengching lamme ütuh ne meng, hangjingne shaaji nyaowelelaka linne tai; Paul-e imante kentinglak ngao iye, 10imante i, “Üyih üyonglan; yenglin me ngohpu hangki hüyange yenglin shaha yeje, hüpoi teman üyin-o yengching lamme mengpu hüyange mahpu üyong ngailak wengtuh ngohnang she taowe nge oknangki.” 11Hüyangpoi ghoja woipawe Paul-e ipu pheiya yenglin nokpu hüyange lin woipa ngaopupa shejai she jai. 12Hüyange eanyu me nyoilak yenglin lakjing yemeipu jingne, ngang tange nehoi Phoenix ngoi okma-a, tüome eanyu nyoi oklakne, iman sheyongpu jinge tüomepu tailak jingne ngaowe nyüo. Phoenix-a nyipjing apye me hüyange ongjing heyekao te miye ngohpu Krit dikhot me yenglin lakjing ja.
Yengching Me Waishihwangkhah
13Aope heye mepu wangyang nyaishümme lei, iman-e iman teihpu ngainangki she teih-e, yenglin tüklak teakke yah-e, Krit dikhot nah ü-o me tai. 14Hüyangpoi hipak meiyange yengohpe tüomepu waishihwangkhah üyong ja, “Apye wangyang” she nyikpu wangyang yeonge mengpu ja pei. 15Hüyange aope yenglin-a tük hüyange wangyang yete yenglin yeme ok, toman-e yengangpe angne tam hüyange wangyange hei toman woine tam. 16Kauda she nyikpu dikhot üjinghapu ünahyeme wangyange yeleipu yeme taiye, toman-e ngange yenglin üjoiha peipu ok. 17Yenglin-a iman-e nyeangte shuwe ngaiyange wu ütam-e yenglin neikonne monge sha. Libya yengnah pheih ükhaite iman ngoipha ma she nyampuwe iman-e yenglin tokme kangpu nye shuwe taiyange yenglin-a wangyange shunge kemne tam. 18Hüyange waishihwangkhah leipu yelak, tüokhei üne nyih iman-e yenglin me ngohpu hangki winne wang; 19hüyange lüm shepupa nyih phei me iman-e yoi yakke yenglin me ngohpu toinan win. 20Aope wanghe jeyah hüyange shanha jeyah tomante nyih nangjange yetee, hüyange waikei wangmengpu yelakpe pei, hüwante toman yinlak monghümpu üshei taimah.
21Hüpoi hipak nangjange iman-e hahying yehahpe wenyang phei me, Paul-e iman ye me yonge i, “Kahtalan, numan-e üte jaine ngohshihpu üja, hüyange Krit mepu yetailakne ngohshihpu üja, hüyange hatüo mengpu hüyange mahpu ye-ngehah shepu. 22Hüyangpoi sha-a mong yongyah she taowe numante hengnang. Hangjingne yenglin tokte kaiye numan yo me ao üyin-o yemahlak. 23Hangjingne ao jingne tao ngohnang hüyange ao te taowe shaoshan nang, tüopa Kahwang wangdang shongmokpa ja minya ü-shong me yong, 24hüyange i, ‘Paul tahnyam: Kaisar shaome nang yonglak. Hüyange leitüoh, nang phei yinkempalan üyin üshei Kahwange nangte phateki.’ 25Tüokhei, kahtalan, wongnang yah! Hangjingne üte ngaopu kih ütingme hükemuh ngailak she taowe Kahwangte ütinglak nang. 26Tüoyangpoi dikhot ja jingne teman phetlak.”
Yenglin Hempu
27Aope pha penme peli shepupa ya ngoi, Mediterranean yengching me toman jaye jaye me shuiye pongwante phawo ngoi, yenglin woipalanne kahmük ja phei owe tainang she teih. 28Tüokhei iman-e yeng lupute sheam, hüyange lusheam da ngoiye ngoh. Üne-o kenja ngohyange iman-e nishe sheamme nyao hüyange lusheam penme nga ngoh she shing.#Lushem yejema-a feet 29Yengnah longnyu ümeng yo me toman pitpha ma she nyamme, iman-e yenglin ükong yemepu lentüklak peli lanne, hüyange wang ngailak jingne yoppe tan. 30Hüyange lin yeihpalan lin mepu taine ngangwante, iman-e lenshang yeme lentüklak lanne yeitampukih hüowe, iman-e yenglin üjoipa yengching me lanne yeine tam. 31Hüwante Paul-e ghoja woipa hei kengphetlante i, “Tüolan lin yeihpalan lenme tanne yengohma-a, numan yeyinlak.” 32Hüwante kengphetlan-e yenglin üjoi shinpu wu khongkümpu tehlang hüyange yengme yeine tam.
33Wangngai ne oteiye Paul-e iman üsheite jaja hahlak jingne tonge i: “Tenyih iye nyih penme peli shepupa numan-e tanne ngohnangki hüyange hango yehahpe nyaonangki. 34Tüokhei numan-e jaja hahlak jingne taowe tongnang, hangjingne hatüowe numante wong peine tamlak, shaaji numan ao mepu-o shangmin ja nehoi minmah ja.” 35Aope Paul-e tüo ngaowe sho, Iye an yah, hüyange iman üshei sheshaome Iye Kahwang min yong, hüyange Iye hatüo khoih hahne wang. 36Hüwante iman üshei wongnange teih hüyange iman-e hahying hah. 37Hüyange yenglin me toman khongkümpu kahta ghoni phei me denyit me wok ngohyangki. 38Hüyange iman-e wangmanne hahyangphei me, yengching me iman-e wong win hüyange yenglin tanne tam.
39Sha-a aope wangngai, iman-e kahtok yeshing ok; hüyangpoi yengnah pheipu yengnüp ja iman-e nge ok, hüyange tüopa me yenglin-a wenpu ok yalak she iman-e konkon. 40Hüyange lin tüklak üshei lanne yengching me tüoh, hüyange tüohipak memuh yenglin woipawe pekhüw shapu-o lan. Hüyange wangyang yete ütokpa nye no inne, iman yengnah yete wen. 41Hüyangpoi yengching ni hüojing me nyippe, yenglin kahtok me tüp. Hüyange lenju ye kahtok me tüppe yepo ok, hüwante lenkong ye-a waishihwangkhah loipu jingne khoihpaine wang.
42Hüwante phowe teipalan-a yeng yatte taiye ja nehoi mahpha ma she teih-e, kengphetlanne iman üshei toilak jingne ngaowe nyüo. 43Hüyangpoi ghoja woipawe, Paul yinhuwe, iman-e teihpu te tien. Hüleima, Iye ngao phawe i, Yengyat manpalan-e iman nying nyingke yenglin mepu yengte phette, üwangne pah-e kahtok ngoilak; 44hüyange topulan-a, ütam pekhüw tangme, hüyange ütam lin ümeng me tailak, hüke toman üshei kahtokte meimeiye ngai ok.
Currently Selected:
LAMPULAN 27: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
