WOITEI 5
5
Egypt Ahngpa Sheshao Me Mosa Hei Aaron
1Tüophei me Mosa hei Aaron ni Egypt ahngpa tangte tai hüyange i, “Hüke Youngwanpa, Israel Kahwange inang, ‘Wanwüng jengme iman-e üjingne mo ngohlak jingne Ü-kahtalan tai ne tamtüoh.’”
2Hüpoi ahngpawe i, “Youngwanpa-a ao shi?” “Taowe hangne I ngao jailak hüyange Israel tai ne tamlak shi? Taowe Youngwanpa yeshing; hüyange taowe Israel tai ne yetamlak.”
3Tüophei me Mosa hei Aaron ni-e jan-e i, “Hebrewlan Kahwange yoi nying nyingke tomni tangte ngai yangki. Youngwanpa toman Kahwang te toidopu phalak jingne wanwüng jengte nyih lüm lam me toman kem-e taine tampha she yop-e tong nang. Toman-e hüke yelingma-a daktin phei yejema-a wehok kaiye lye toman toi phalak.”
4Hüyangpoi Egypt ahngpawe Mosa hei Aaron nite i, “Iman-e linghümpu toishao te mong yephalak ne kahtalan te numan-e linge tampu tüowa hanghe shi? Numan toishaote leih yetüoh!” 5Ahngpawe yelakpe i, “Egyptlan phei-a numan kahtalan ünyei phongtepu. Hüyange sha-a numan-e toi yelingpe lak hunang!”
6Tüonyih muh ahngpawe shom-aipalan hei Israel yakjongpalante ngaokeng phawe i: 7“Üshongpu kih shaaji numan-e kahtalan te jaklong yaolak jingne tahjant tah pha; iman-e yoi nying nyingke taiye tahjant peine tamtüoh. 8Hüpoi üshongpe iman-e jaklong hangshinne yaowe ling yangki, numan-e imante teshinne muh lingne tamtüoh. Numan-e tüopa mepu ja nehoi yekomlak, hangjingne iman jook nang, tüojing ne iman-e ‘Toman Kahwang te dopu phalak jingne toman taine tampha she üngwün hüm nang. 9Kahtalante toiwan pha tüoh, tüome nakshih iman-e yak yengaipe linge ngohlak, hüyange iman tahleih ngao te mong phalak ne hipak yetüolak.’”
10Tüokhei shom-aipalan hüyange Israel yakjongpalan tai hüyange kahtalante ngaowe i, “Hüke ahngpawe inang, ‘Taowe numante shaaji tahjant yephalak. 11Numan nying nyingke taiye, ümeken me numan-e tahjant tüolakei shai jemyah, hüpoi tüokhei she numan toishao tüomepu shoine yetamlak.’” 12Tüokhei kahtalan Egypt kahtok üshei yete tahjant yam-e shaijemlak jingne yan-e tai. 13Shom-aipalan-e imante hüke kange toi lingne tam-e i, “Tahjant ngohwantepu kih, numan nyihjeih meitam toishao shotüoh!” 14Hüyange Egypt mepu shom-aipalan-e toishaote leine angpu Israel yakjongpalante shüt, hüyange tonge i, “Üshongpe jaklong yaopu kih-e hangne numan kahtalan-e nyih jeihpu meitam khak shuwe linge üshopu?”
15Hüwante Israel yakjongpalan ahngpa tangte taiye hüke i, “Nang üyongpa, nang shao shanpalan te nange hangne hüke jonpu? 16Nang shaoshanpalante tahjant phawe yenang, hüyange iman-e tomante, jaklong yaotüoh she inang! Hüyange leihuyah, nang shao shanpalante shütnang, hüyangpoi yeshupuwa nang kahtalan me ngoh nang.”
17Hüyangpoi ahngpawe jan-e i, “Numan jooknang, numan jook nang; tüojing ne numan-e Youngwanpa te dopu phalak jingne toman taine tampha she inang. 18Sha-a yetüoh, hüyange toi lingtüoh; hangjingne numante tahjant hango yephalak, tüoyangpoi numan-e jaklongpa-a meitam khak shuwe yaowe linge ngaitüoh.” 19Aope iman te iman-e nyih jeih linghümpu jaklonga yekompe, üshong wante hangke linge pei hüke linglak wongpong she ngaoyapeih, Israel yakjongpalan-e iman-a ütuh me ngohnang she shinge pei.
20Hüyange aope ahngpa sheshao mepu iman ngai taiyapeih, iman-e Mosa hei Aaron ni iman tan-e ngohpu lamme hüo. 21Hüyange iman-e imnite i, “Nang niye ahngpa sheshao me hüyange I shaoshanpalan sheshao me iman yak me yanglow shümne tam-e toman toitamlak ne toman min mengne tampu jingne, Youngwanpawe nang nite ngaophünpu phalak.”
Youngwanpate Mosawe Yemeipe Ngao
22Hüwante Mosawe Youngwanpa tangte leihyeyange i, “O Youngwanpa, hangjingne nang jing kahtalan te nange yemeipe jonpu? Hangjingne nange tao tüome shontam pu? 23Tao ahngpa tangte nang min me ngaolak jingne pei phei me peiye lye kahtalante yemeipe jonnang; hüyange nange nang kahtalan yinlak jingne hango yeling!”
Currently Selected:
WOITEI 5: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
