WOITEI 7
7
1Hüwante Youngwanpawe Mosa te i, “Leitüoh, Taowe nanga ahngpa sheshao me Kahwang ja kih-e linge tamlak, hüyange nangjei Aaron-e nang jing hipa ja leye I phei ngaolak. 2Taowe nangte hangheyin ngaone tam khongkümpu nange Aaronte itüoh, hüyange ahngpawe iman kahmük mepu Israel hayimlan taine tamlak jingne nangjei Aaron-e I phei ngaolak. 3#Lam 7.36.Hüpoi Taowe ahngpa mongjang wan ne tamlak, hüyange ü-yepinlakpa hei yashanyali Egypt kahtok me hangshin linglakei lingyapoi lye nang ngao üjai külak. 4Hüwante Taowe Egypt te ü-yak hünglak, hüyange ngaophün üyongpuwe Egypt kahtok mepu ü-nokphong, ü-kahta Israel hayim woiteilak. 5Hüyange Taowe aope Egypt tangme ü-yak hongyange Israel hayimlan iman yo mepu woitei lakei, hüwante nakshih Egyptlanne Taowa Youngwanpa she shinglak.” 6Youngwanpa hanghe ngaokeng pha, Mosa hei Aaron niye hüke ling. 7Aope iman-e ahngpa phei ngaoyapeih tüo hipak me Mosa-a wangpeng detet hüyange Aaron wangpeng detet me lüm lwngmei ne ngoh yangki.
Aaron Wongjoi Pu Ne Meng
8Youngwanpawe Mosa hei Aaron nite i, 9“Aope ahngpawe nang nite ‘kahnyingwüngha ja hüowe tamtüoh,’ she ngaolakei, hüwante nange Aaron te itüoh, ‘Nang wongjoi yahtüoh, hüyange hatüowa ahngpa sheshao me shüptamtüoh, hüyange tüopa-a pu ne menglak.’ ” 10Tüokhei Mosa hei Aaron ni ahngpa tangte pei, hüyange Youngwanpawe ngaowe tampu kih ling; hüyange Aaron-e ahngpa hüyange I shaoshan palan sheshao me I wongjoi shüppe tam hüyange hatüo pu ja ne meng. 11Hüwante ahngpawe shinge manpalan hei yepahipalan te nyik: hüyange Egypt kahtok mepu yepahipalan-e hüke muh imane-o ling. 12Kahta liliye yoi wongjoi shüptam, hüyange wongjoi lan-a pu ne meng: hüpoi Aaron wongjoiwe iman wongjoi lan-a lünge taiküm. 13Tüoyangpoi, ahngpa-a yelakpe muh üngei ne menge mah, hüyange Youngwanpawe ipu meimei kih-e, Mosa hei Aaron ni ngaote ahngpawe hangko yeteih.
Shaonahpudak Üwangpa: Yeng Iy Ne Meng
14Hüwante Youngwanpawe Mosate i, “Ahngpa mongjang wan-e ngohnang hüyange lye kahtalan taine tamlak yemong. 15Tüokhei napning aope I yeng te laikülakei hüwante wentüoh, yengyin nah me yong ngohtüoh hüyange I phei hüotüoh. Hüyange pune menge tampu wongjoi nang yak me jonyah, hüyange yengnah me I peipu tan-e ngoh tüoh. 16Tüophei me nange ahngpa te itüoh, ‘Hebrewlan Kahwang, Youngwanpawe I jing kahtalan taine tamtüoh she, hümme nakshih iman-e wanwüng jeng me I te yoppe khümlak she nangte tüopa ilak jingne tao shon. Hüpoi sha-a te ngoiye nange tüopa ngao yeyah.’ 17Youngwanpawe hüke inang, ‘lye hanghe linglakei tüopa kaiye nange I-a Youngwanpa shinglak üja she inang. Leihuyah, ü-yak me ngohpu wongjoi tüowe Nile me yünne ngohpu yengte taowe shütlak, hüyange hatüo iy ne menglak. 18Nyah lilak, hüyange Nile yengyin-a jamloi nam-e pelak, tüokaiye Egyptlan-e tüopa mepu shaowe yingne ye-oklak.’ ”
19Youngwanpawe Mosate i, “Aaronte itüoh, ‘Nang wongjoi yahyah hüyange Egypt kahtok nopu tangme ngohpu yengyinlan, yengsholan, hüyange yengnunglan tangme notüoh she itüoh. Yeng iy ne menge mahlak, hüyange kahmük nopu me iy shaha ne pekook hei long kooksalan me nehoi iy ngohlak.’ ”
20Mosa hei Aaron niye Youngwanpawe ngaowe tampu kih-e ling. Ahngpa hei I shaoshan palan sheshao me Aaron-e wongjoi hongyange Nile me ngohpu yengte shüt; hüyange Nile me ngohpu yeng khongkümpu iy ne meng. 21Hüyange Nile me ngohpu nyah li; hüyange nile me ünam pe, hüyange Egyptlan-e tüopa mepu yeng yeying ok; hüyange Egypt kahtok üshei yeme iy ngohyangki. 22Hüpoi Egypt yepahipa lane-o iman wanglam jon-e hüke muh ling, tüokhei ahngpa-a üwangpe hangke ngoh hüke muh üngei#Mongjang wanpu ne menge mah. Youngwanpawe ipu mei mei kih-e, Mosa hei Aaron ni ngaote ahngpawe mong pha-e yeteih. 23Ahngpa-a hüke hüowe tampu te hangko yeteihpe lüpyange ahngnok te leihye mah. 24Hüyange Egyptlan khongkümpuwe Nile neikonne yinglak yeng yamme kahtok shao; hangjingne iman-e Nile yeng-a yeying ok.
25Youngwanpawe Nile te shüt yang phei me nyih nyit linne tam.
Currently Selected:
WOITEI 7: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
