KAHTAMYENGHAN 17
17
Üshokhüppu Jiengjeppu Yepinlakpa
1Aope Abram nyupuh wangpeng detu me tu ngoi, Youngwanpa Abram tangte ngai hüyange Ite i, “Taowa Ütahpa Kahwang, ü-sheshao me kemtüoh, hüyange nang ünu ye-ompe ngohtüoh. 2Taowe ü-jiengjeppu nang phei yahlak hüyange nangte huhayimlan üngang phalak.” 3Hüwante Abram-e yoi sheta khuh-e tayange khüm; hüyange Kahwange I phei ngaowe i, 4“Leitüoh, Taowe nang phei tüopa jiengjeppu yahnang: hüyange nanga jatlan maapu pajeiyong ne menglak, Taowe jannang. 5#Rom 4.17.Shaaji nangmin Abram she yenyiklak, hüpoi nang min Abraham she nyiklak; hangjingne jatlan maapu pajeiyong ne Taowe nang menge tamteki. 6Taowe nangte huhayimlan üngang phalak hüyange nang mepu Taowe jatlan ngaine tamlak hüyange Ahngpalan nang mepu ngailak.
7 #
Lk 1.55; Gal 3.16. “Taowa nang jingne, hüyange nang phei me nanghu nanghalan jingne Kahwang ne ngohlak, Tao hei nang hüyange nang phei me nanghu nanghalan nipa me jin üshei me üküm yenangpu jiengjeppu ngoh lak jingne, Taowe ü-jiengjeppu anglak. 8#Lam 7.5.Hüyange Taowe nangte, hüyange nang tokphei me nanghuhalan te, nang kemyangpu kahtok, Kanan kahtok khongkümpu, jinte numan jingne menglak ne yah pha ning, hüyange Tao iman Kahwang ne menglak.”
9Hüyange Kahwange Abraham te i, “Nang jingne, nang hüyange nang phei me nanghuhalan jin üshei me ü-jiengjeppu anglak yang. 10#Lam 7.8.Hatüowa ü-jiengjeppu, hanghepa Tao hei nang, hüyange nang phei me nanghu nangha nipa me numan-e anglak: Numan yo me netan mei khongkümpu üsho khüplak. 11#Kaht 17.24; 21.4.Sha-a me peiye numan jing jupeng üsho khüplak; hüyange tüopawe temanpa me jiengjeppu yepinlakpa ne ngohlak. 12Numan yo me puh phei me nyih tet ngoipu, üsho khüptüoh. Numan jin üshei me netan lili nenok me puhpune jeyah, hengching mepu nginne shakpu, nang mepu üli ne yejeyapoi, üsho khüptüoh. 13Rhalan nenok me puhpaipu ne jeyah, hengjing mepu shak-e peipu ne jeyah, jupeng üsho khüplak wongpong. Hüyange Ü-jiengjeppu nang mei me üküm yenangpu jiengjeppu ne ngohlak. 14Shoyekhüppu netan ütam, aowe yoi sho üju meime yekhüppe ngohlakei, tüopa kahta yoi kahta ükhong mepu jange winlak; lye ü-jiengjeppu mengteki.”
15Hüyange Kahwange Abraham te i, “Shaaji nenok nyuyong te nange Sarai she yenyiklak; sha-a me peiye yha min Sarah#Sarah-Ahngyha she nyiklak. 16Taowe yhate moimanlak, tüotokte yha kaiye nangte netanha puh ne tamlak. Taowe yha moiman tamlak hüyange yha kaiye jat lilan nowe inlak, jat Ahngpalan yha kaiye pei ne tamlak.”
17Tüophei me Abraham sheta khuh-e ta hüyange nyi-e ngai hüyange yoi nying nyingke hüke i, “Kahta ja nyupuh wangpeng gho ngoi te phei te yoiha puhtam phalak a? Wangpeng detu ngoite phei piyong Sarah-e moipaipu oklak a?” 18Hüyange Abraham-e Kahwang te tong, Nang moiman me üha ne Ishmael hei angne tampha.
19Hüpoi Kahwange i, “Yeje, nenok shekonyu Sarah-e nangte netan moija paitamlak, hüyange nange I min Isaac she nyiklak; hüyange I phei me I huhalan jingne üküm yenangpu jiengjeppu ngohlak jingne Taowe I phei jiengjeppu linglak. 20Hüyange Ishmael jeng, nange yoppe dopu Taowe jaiteki; leitüoh, Taowe I moiman tamteki, hüyange Taowe I ülick lickke tamteki, hüyange I meiyange jalunne tamlak, I-a ahngpalan pen me ni üpa ne menglak, hüyange Taowe I huhayimlanna jat üyongne menge tamlak. 21Hüyangpoi Isaac aohipa Sarah-e ngaiwang hakih tingme puhlakei, I phei Taowe jiengjeppu yahlak.” 22Aope Kahwange Abraham phei ngaopu shoyapeih, Abraham mepu Kahwang onge mah.
23Hüyange tüonyih muh Abraham-e yoiha Ishmael hüyange Inok me puhpu üshei, hüyange I nginne shakpu üshei, Abraham nok me ngohpu kahta yo mepu netan khongkümpu woiye peiye, Kahwange Ite ipu kih-e, iman mei me jupeng üsho khüppe tam. 24Abraham yoi shokhüp wante nyupuh wangpeng detu me tu lwngmei ne ngohyangki. 25Hüyange I ha Ishmael-a nyupuh wangpeng pen me lüm me ngoh yangki. 26Tüonyih muh Abraham hüyange Iha Ishmael jamme shokhüp yangki. 27Hüyange Inok me ngohpu netan üshei, I nok me puhpu hei kahheng mepu ngin phawe shakpu moilan, I phei shokhüp.
Currently Selected:
KAHTAMYENGHAN 17: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
