KAHTAMYENGHAN 38
38
Judah Hüyange Tamar
1Tüopa nyih hipak me Judah I jeihei naolan mepu taiye Adullam ching mepu Hirah she minpu kahta ja shongme nyoi. 2Tüome Judahwe Kananlan ja min Shua üha naoyha ja nge; hüyange lye yha yah, hüyange yha phei shi. 3Hüyange yha püm yekengpe ngai, netan ja puh; hüyange Iye Ite Er she min. 4Üne-o yha nishe püm yekengpe ngaiye netan ja puh; hüyange yhawe Ite Onan she min. 5Tüophei me üne-o yhawe netan ja puh, hüyange Ite Shelah she min. Aope naha puhyapeih, Judah-a#Judah Hebrew min, Greekme yha she ngelak. Chezib me ngoh yangki.
6Hüyange Judahwe yoi üwangpa ha Er jingne sheko ja yah, hüyange yha min Tamar ngoh yangki. 7Hüpoi Er Judah üwangpa ha, nyoingoh wanglam yemeipe nuwe ngoh, hüyange tüokaiye Youngwanpa mong yemeipe ngai, tüokhei Youngwanpawe I li ne tam. 8Tüokhei Judahwe Er ünao Onan te i, “Nangjei sheko phei peiye shitüoh. Hüyange yha phei netanpa ja leye toi lingtüoh; tüokaiye nangjei jingne huhayimlan ngohne ok.” 9Hüyangpoi Onan-e hayimlanna I jingne yejekülak she shing; tüokhei hangkih tingme lye yoijeiye tüohpu shekonyu phei shi yapeih, lye yoijei jingne hayim mintah ngoh she üli-a kahtokte kepwin. 10lye hanghe lingetam tüopawe Youngwanpa mong yemei, hüyange Youngwanpawe I-a toiye tam. 11Hüwante Judahwe yoi nyemnya nyu Tamar te i, “Üha, Shelah manjong manjong nangpa nok me ye-e wamnyu ne menge ngohkei.” Ijei ni kih-e Shelah-o toi pha ma she I nyampu jingne tüopa ngao i. Tüokhei Tamar nokte leih ye.
12Hipak ütenja ngoh phei me Shua üha Judah shekonyu li. Aope I shappe yoongpu hipak linyapeih, I hüyange I shümpa Adullamlan Hirah phei nyee-min khüppalan tangte Timnah te ong. 13Ütamme Tamar te ngaowe i, “Leitüoh, nenok netanpa üpa (Nangküo) yoi nyee-min khüp ne Timnah te ongnangki.” 14Hüwante yhawe yoi wamnyu o khokke tüoh, hüyange inkhek üpiye yha sheta lümyange ülao inkhek inyange, Timnah te taipu lamnyu ü-o me ngohpu Enaim ching pejong me shot; hangjingne yhawe Shelah jongteki she shing, hüyangpoi, Ite shekonyu ne menglak jingne yha yeshontam.
15Aope Judah-e yha nge, yha-a üsho yüonyu she lye teih; hangjingne yhawe shanglüm yange ngoh. 16Hüyange lye lamnah yete yha tangte wenne i, “Kei, tao nang tangme ongküning.”#Yejema-a- ‘Nange hangshin yunangki Hangjingne Iye yha-a yoi nyemnyanyu she yeshing.
Hüwante yhawe i, “Nang ü-tangme ongyangpu jingne üte hanghe phalak?”
17Iye janne i, “Taowe youn ükhong mepu youn pongha ja nangte shonpha ning.”
Hüyange yhawe i, “Nange tüopa manshonpu mongme teijanpu hüowe ülam ja phalak jeya pu?”
18Iye tong, “Taowe teijanpu hüowe nangte hanghe phalak?”
Hüyange yhawe janne i, “Nang min yepinlakpa tüppu hüyange nangjing wu, hüyange nangyak me ngohpu shengshaoh.” Hüyange lye tüolan yhate phayange yha tangme onge shi; hüyange yha I kaiye püm yekengpe ngai. 19Tamar nokte leihye, yha shanglümkhek khokke ang, hüyange yhawe yoi wamnyu o nishe yah.
20Aope Judahwe I shümpa Hirah yak me younpongha phei, shekonyu mepu teijanpu ne tüohpu toinan yahlak jingne shonyapeih Hirahwe yha yetüo. 21Hüwante lye tüopa nyoi me ngohpu lante tonge i, “Enaim ching lamnah me ngohpu üsho yüonyuwa ümeken me ngoh nangki?”
Hüwante iman-e jan, “Tüoken me üsho yüonyu aope-o yengoh ja.”
22Tüokhei I Judah tangte leih ye, hüyange i, “Taowe yha yetüo; hüyange üne-o tüopa nyoi me ngohpu kahtalan-e iyangki, ‘Tüoken me üsho yüonyu aope-o yengoh ja.’ ”
23Judah-e i, “Yhawe tüolan toi-a min angyah; kahtalanne temante nyitam phalakte yeleng. Leihuyah, taowe youn pongha hatüo phawe tei, hüpoi nange yha yetüo.”
24Lekeng lüm nanjing lin phei me ütamjawe Judah te i, “Nenok nyemnyanyu Tamar-e üsho yüopu jonteki; hüyange üne-o leitüoh, hüke linge yha püm yekengpe ngohnang.”
Judah-e ngaokeng phawe i, “Yha yah ngaiye vün me jakke toitüoh.”
25Hüyange aope yha woipei, yhawe yoi küote shonne i, “Tüolan-a ao jingne menglakei I kaiye taowa püm yekengpe ngoh nang;” hüyange yhawe i, “Tüopa yepinlakpa min tüppu, hüyange wu, hüyange shengshaoh, ao jingne mengyapei iye ok kei she taowe nangte tongnang.” 26Hümme nakshih Judahwe tüolan me shinge pei, hüyange i, “Yha shuwe ngohnangki. Yha yekao me taowe ye-okpu ngenangki. Taowe yha-a ü-ha Shelahte nokne menge tamhah shepu!” Hüyange shaaji Judahwe nishe yha phei yeshi. 27Aope yhame nao ngohlak hipak ngoipei, yha naonyoi me nipet ngohpu shinge pei. 28Aope yha dak onge nao wangngai nge ne poyapei, shejawe yak ü-at me ngai; hüyange naopainyuwe I yak me vetak hinyange i, “Tüopa üwangne puhnang.” 29Hüpoi lye yoi yak nishe shuwe yemah, I naopa üwangne yu. Hüwante naopainyuwe i, “Hüke nange nang nyingnyingke lam lüowe ngai!” Tüokhei Ite Perez#Leppu-Lüowe ngaipu she min. 30Tüophei me Ijei ngai, ao yak me vetak hinyange ngoh; hüyange Ite Zerah#Leppu-Phihlang she min.
Currently Selected:
KAHTAMYENGHAN 38: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
