KAHTAMYENGHAN 40
40
Küpnok Me Ngohpani Shinmang Joseph-e Lüppe Tam
1Hipak ütenja ngohyang phei me, Egypt ahngpa wan jonpa hüyange I hahying lingpa imni-a Egypt ahngpa kaiye ümeng ling. 2Hüyange Pharaohwe wanjonpa hei hahying lingpa üshang nite mongshih ngai. 3Tüokhei ahngpa yompa tangme üshangpa phang me, phopalan nok ümeken me Joseph ngoh, tüoken me imni-o phowe ang. 4Hüyange yompalan üshangpawe tüopa kahta ni Joseph phei ngoh ne tam; hüyange Joseph te leine tamme iman ang; hüyange hipak nangjang iman küpnok me ngoh.
5Yaja küpnok me ngohpu Egypt ahngpa wanjonpa hei hahying lingpa niye moiniye shin mang japong mang; hüyange imni mangme yoi yoi leppu japong ne ngoh. 6Aope napning imni tangte Joseph pei, imni mongshangpu lye nge. 7Tüokhei iye imnite tong, “Hangjing ne, tenyih nangni-a teshinne mong shangpu?”
8Imniye jan, “Tomni moiniye mang japong mang, hüpoi mang te leppu lüppe iye tampa tüome ao-o yenang.”
Tüokhei Joseph-e imnite i, “Mang lüppe oklak jingne juteih phapa-a Kahwang hei ngohnang.” “Nang ni mangyangpu üte itehu.”
9Tüokhei wan jonpa ütahpawe Joseph te yoi mang i, hüyange hüke ngao, “Ü-mang me wuwüngwu ja ü-sheshao me taowe nge; 10hüyange üwu me üqui lüm ngoh yangki; hüyange tüome üyak ngaipu phei jamshe üpeng ngai; hüyange wuwünglick üjep üjep lickke yim. 11Taowa ahngpa wan jonyange ngoh; tüokhei taowe wuwünglick yah hüyange tüolan-a wan me phütte yah hüyange Ite tüopa-a pha.” 12Hüwante Joseph-e i, “Tüopate leppuwa hatüo: üqui lümma nyih lüm. 13Nyihlüm mongme Pharaoh-e nanga lanne tamlak, ümeng winlak, hüyange nang ngohyangpu toishao te muh nanga yah yelak. Hüyange nang üshongwante I wan jonpa ne ngohwante lingpu kih-e, nange Ite I wan phalak. 14Hüpoi aope nangjingne shemin lamphe khakshuwe meiye tailakei, hüwante chingmei lamlinge ü-jeng Pharaoh phei ngaowe, tüopa nok mepu tao ngaitam pha. 15Hangjingne taowa Hebrew kahtok mepu bumei me shingjang shinge kuh-e woipei; hüyange tüome-o hüke shangjange hang ümengo taowe yejonpute iman-e tao küpnok longsa me angnang.”
16Aope hahying lingpa üjengpawe wan jonpate lüppe tampu leppuwa meinangki she leiye ok, lye Joseph te i, “Taowe-o mang ja mangki, taowe ü-shangtang me an küm lüm kiyange ngoh. 17Hüyange küm ütokpa me Pharaoh jingne sheminlamphe tümme peiyangpu hahying ümeilan ngoh, hüpoi awhalan ne ü-shangtang me ngohpu küm mepu tüopa hah.”
18Joseph-e janne i, “Tüopate leppuwa hatüo: Küm lüm-a nyih lüm; 19nyihlüm mongme Pharaohwe nang lanne tamlak—hüyange nang shang langlak! Tüophei me lye nang püm pee ja me jhotlak, hüyange awhalan ne nang mei hahlak.”
20Nyih lüm shepupa me, ahngpa puhpu nyih me, lye yoi shaoshanpalan khongkümpu jingne mongmei mo ja tümme tam. Hüwante lye wanjonpa hei hahying lingpa üshangpa ni, küpnok mepu lanne ngai hüyange yoi shaoshanpalan sheshao me yah yüo. 21Ahngpawe wan jonpa üshangpa nishe yoi wan jonlak jingne yah ye; tüokhei Iye ahngpa yak me wan pha. 22Hüpoi hahying lingpa üshangpa lye toine tam. Hüke Joseph-e imante lüppe tampu kih khongkümpu ngai. 23Tüoyangpoi wan jonpa üshangpawe Joseph yeteih tüope peye mah.
Currently Selected:
KAHTAMYENGHAN 40: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
